ၽူႈမီးပုၼ်ႈၽွၼ်း ၾၢႆႇၽွင်းငမ်းၵူႈလွင်ႈလွင်ႈ ဝဵင်းၵေးသီး တႂ်ႈႁွင်ႈၵၢၼ်ၽွင်းလူင်ၼႂ်းမိူင်း လူင်ပွင်ၸိုင်ႈသိုၵ်းမၢၼ်ႈယိုတ်းမိူင်း ႁွင်ႉဢဝ်ၵူၼ်းမိူင်း ႁဵတ်းပၢင်ၵုမ်သေ ၶပ်းၶိုင် ႁဵတ်း ဢွၵ်ႇပၼ် ဝႂ်ယိမ်တီႈလိၼ်ဝၢၼ်ႈ (ကျေးရွာမြေဌားဂရန်) သေ ႁႂ်ႈၵူၼ်းမိူင်းသႂ်ႇၶွၼ်ႇပၼ် ၼိုင်ႈလွၵ်းၼႆႉ ၼိုင်ႈပီလႂ် 5 သႅၼ်ပျႃး ၼႆယဝ်ႉ။

မိူဝ်ႈပူၼ်ႉမႃး ဝၼ်းတီႈ 27 လိူၼ်ၵျူႊလၢႆႊ ပီ 2026 ၼႆႉ ၸွမ်းၼင်ႇၽႅၼ်ၵၢၼ်ၶၢဝ်းတၢင်း 100 ဝၼ်း ဢၼ်ဢူးမိၼ်းဢွင်ႇလၢႆႇ ၸွမ်ၸိုင်ႈယိုတ်းမိူင်း တမ်းဝၢင်းႁႂ်ႈၶႃႈႁၢပ်ႇၵၢၼ်ၶုၼ် တူင်ႉၼိုင်ႁဵတ်းသၢင်ႈ ၵၢၼ်ငၢၼ်းၵႂႃႇၼၼ်ႉသေ ၶႃႈႁၢပ်ႇၵၢၼ်ၶုၼ် ၾၢႆႇၽွင်းငမ်းၸႄႈတွၼ်ႈၶဝ် လူင်းပိုၼ်ႉတီႈ ႁဵတ်းပၼ်ဝႂ်ႁပ်ႉႁွင်းလိၼ်ဝၢၼ်ႈၵႂႃႇ ပဵၼ်တၢင်းၵၢၼ် တီႈဝဵင်းၵေးသီး ၸႄႈတွၼ်ႈမိူင်းသူႈ မိူင်းတႆးပွတ်းၸၢၼ်း ။

ၵူၼ်းမိူင်းပိုၼ်ႉတီႈၵေႃႉလႆႈၵႂႃႇၶဝ်ႈႁူမ်ႈႁဵတ်းဝႂ်ႁပ်ႉႁွင်းတီႈလိၼ်ဝၢၼ်ႈ ၼႂ်းပၢင်ႁူပ်ႉထူပ်း ၸႄႈဝဵင်းၵေးသီးၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ- “ၶဝ်မႃးၸႂ်ႉႁဝ်းႁဵတ်းဝႂ်ႁပ်ႉႁွင်းတီႈလိၼ်ဝၢၼ်ႈ ၼႆၶႃႈဢေႃႈ။ ၼိုင်ႈပီၼႆႉႁဝ်းတေလႆႈသႂၢင်းပၼ်ၶွၼ်ႇၶဝ် 5 သႅၼ်ပျႃး။ မိူဝ်ႈလဵဝ်ၼႆႉ ငိုၼ်းၵႃႈၶွၼ်ႇ မၼ်းၵေႃႈ ႁဝ်းပေႃးပၼ်ၵႂႃႇယဝ်ႉ။ ဝႂ်တိုတ်းငိုၼ်းဢၼ်ႁဝ်းသႂၢင်းၶွၼ်ႇ ၼၼ်ႉသမ်ႉ ၶဝ်ဢမ်ႇႁဵတ်းပၼ်ႁဝ်းမႃးၶိုၼ်းႁႄ သမ်ႉမႃးယွၼ်းငိုၼ်းႁဝ်းထႅင်ႈ ၶႃႈဢေႃႈ။ တီႈတေႉ တၢင်းဝၢၼ်ႈႁဝ်းၼႆႉ ၸွၵ်ႉႁႅင်းၼႃႇ။ ဝဵင်းၵေႃႈၵႆ။ မိူဝ်ႈလဵဝ် မိူၼ်ၵၼ်တင်း ႁဝ်းလႆႈထၢမ်းၶွၼ်ႇတီႈလိၼ် ၸိူင်ႉၼင်ႇယူႇၼႂ်း ဝဵင်းၼၼ်ႉယဝ်ႉၶႃႈ။ ပေႃးႁဵတ်းၼႆယူႇၵူႈပီတႄႉ ဢမ်ႇၶၢမ်ႇလႆႈၶႃႈ။ ပၢႆသလိူဝ်ႁႃၵိၼ်လဵင်ႉတွင်ႉယၢပ်ႇယူႇၼႆႉ။ ၵမ်ႉဝႃႈ ၶွၼ်ႇၵႃႈၵူၼ်းၵႂႃႇႁၢပ်ႇ ၵၢၼ်သိုၵ်းဝႃႇ၊ ၶွၼ်ႇတီႈလိၼ်ဝႃႇ ဢၼ်ယဝ်ႉဢၼ်ၸိူင်ႉၼႆတႄႉ ၵိၼ်းၸႂ်ႁႅင်းၼႃႇဢေႃႈ” ဝႃႈၼႆ။

ၵူၼ်းမိူင်းၸိူဝ်းယူႇၼႂ်းပိုၼ်ႉတီႈ ဝၢၼ်ႈၼွၵ်ႈၼႃးပၢင်ႇၼႆႉ လႆႈသႂ်ႇၶွၼ်ႇတီႈသိုၵ်းမၢၼ်ႈယိုတ်းမိူင်း ၵူၺ်းဢမ်ႇၵႃး လႆႈပၼ်ပႃးၶွၼ်ႇ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းမီးယူႇၼႂ်းပိုၼ်ႉတီႈပႃး။ ၾၢႆႇၼိုင်ႈၵေႃႈ ၵၢၼ်ပၢႆးမၢၵ်ႈမီးဢမ်ႇၶႅမ်ႉၶိုၼ်းမိူၼ် မိူဝ်ႈပၢၼ်သိုၵ်းမၢၼ်ႈပႆႇယိုတ်းမိူင်းၼၼ်ႉလႄႈ ႁဵတ်းႁႂ်ႈၵူၼ်းမိူင်းယၢပ်ႇၽိုတ်ႇၵိၼ်းၸႂ်ႁႅင်းဝႆႉ ၼႆယဝ်ႉ။