ၼႂ်းဝၼ်းတီႈ 20 လိူၼ်ၵျူႊ ယၢမ်းႁူဝ်ၶမ်ႈ 6 မူင်းၼၼ်ႉ ရူတ်ႉၵႃးလုၵ်ႈၸုမ်းပျီႇတူႉၸိတ်ႉ PNO ႁေႃႈမႃးၼၼ်ႉ လႄႈရူတ်ႉၶိူင်ႈၵူၼ်းဝၢၼ်ႈ 2 ၵေႃႉၽူဝ်မေး ပဵၼ်ၽေးၵိုင်ႉၵၢင်ႉၽႃႇ ၺႃးၵၼ် ၼိူဝ်သဵၼ်ႈတၢင်း ဝၢၼ်ႈသၢမ်သႅင် လႄႈ ၵုၼ်ၵွင်းမူး ၸႄႈဝဵင်းသီႇသႅင်ႇ ၸိုင်ႈတႆးပွတ်းၸၢၼ်း ၵူၼ်းၶပ်းရူတ်ႉၶိူင်ႈတၢႆထင်ႇတီႈ တူဝ်ၵေႃႉႁေႃႈၽႃႇတႄႉ ပႆႇတီႉၺွပ်းလႆႈ။

ၵေႃႉတၢႆၸိုဝ်ႈႁွင်ႉ ၸၢႆးၵီး ဢႃယု 40 ပီ ၊ မႄးၼၢင်းမၼ်း ၸိုဝ်ႈႁွင်ႉ ၼၢင်းသႅင်သူၺ်း ယူႇဝၢၼ်ႈၽၢႆၵွမ်း ဢိူင်ႇဝၢၼ်ႈယဵၼ်ႇ ။ ၵေႃႉပဵၼ်မေးမၼ်းတႄႉ မၢတ်ႇၸဵပ်းႁၢဝ်ႈႁႅင်း ယူတ်းယႃတူဝ်ဝႆႉတီႈႁူင်းယႃ ၸဝ်ႈၸၢမ်ႇထုၼ်း ဝဵင်းတူၼ်ႈတီး ။

ၵူၼ်းပိုၼ်ႉတီႈ ဢၼ်ႁူႉႁၼ်ၸွမ်းၼၼ်ႉလၢတ်ႈတီႈလၢတ်ႈၽူႈတွႆႇႁွၵ်ႈဝႃႈ -“ ဝၼ်းၼၼ်ႉရူတ်ႉၵႃးၼၼ်ႉ ႁေႃႈမႃးတၢင်းပိူၼ်ႈၵႂႃႇ သေလႄႈ ၽႃႇသႂ်ႇရူတ်ႉၶိူင်ႈ သွင်ၽူဝ်မေး ၶီႇမႃး ၼၼ်ႉ ၊ တူဝ်ၽူဝ်မၼ်းၵႂႃႇမီးယူႇတႂ်ႈၵႃးပုၼ်ႉၼေႈ။ ၵွၵ်းႁူဝ် ၊ ဢူၵ်း ၊ တွင်ႉ ၊ ၸိူဝ်းၼႆႉ ယွၵ်းယွႆ တၢႆထင်ႇတီႈ ၊ မေးမၼ်းတႄႉ မၢတ်ႇၸဵပ်းႁၢဝ်ႈႁႅင်း”- ဝႃႈၼႆ ။

ၵူၼ်းဝၢၼ်ႈလၢတ်ႈဝႃႈ – ၵူၼ်းၶပ်းရူတ်ႉၵႃးသီၶၢဝ် ဢၼ်မႃးၽႃႇသႂ်ႇၼၼ်ႉ ပဵၼ်လုၵ်ႈၸုမ်းပျီႇတူႉၸိတ်ႉပဢူဝ်း PNO ။ ၶႃမႃးၸွမ်းၵၼ် 2 လမ်း။ လမ်း 1 တႄႉပူၼ်ႉရူတ်ႉၶိူင်ႈသွင်ၶႃ ၽူဝ်မေးၵႂႃႇလီငၢမ်း။ ထိုင်လမ်း 2 ၼၼ်ႉ မႃးၽႃႇသႂ်ႇလီလီ ဢမ်ႇတၼ်းဝႄႈ။ ပဵၼ်ရူတ်ႉ သႅၼ်း Toyota Hilux – ရူတ်ႉမၼ်းၵေႃႈ တူၵ်းတၢင်းသေ ၶဝ်ႈၵႂႃႇမီးဝႆႉယူႇၼႂ်းတူင်ႈၼႃးပုၼ်ႉ ဝႃႈၼႆ ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“သဵၼ်ႈတၢင်းၼၼ်ႉၵႂၢင်ႈၵေႃႈၵႂၢင်ႈ ၊ သိုဝ်ႈၵေႃႈသိုဝ်ႈ ၊ ၵူၼ်းႁေႃႈၵႃးႁေႃႈၵေႃႈႁေႃႈဝႆး ။ မဝ်းလဝ်ႈၵေႃႈတေပႃးၵႂႃႈ၊ ဝၢႆးၽႃႇၺႃးရူတ်ႉယဝ်ႉ ႁၼ်ၵူၼ်း 3 ၵေႃႉထူဝ်းၾူင်း ၊ ဝၢႆးၼၼ်ႉ ၵႃးဢၼ်ပူၼ်ႉၵႂႃႇမိူဝ်ႈၵႆႈၼၼ်ႉၶိုၼ်း မႃးႁွင်ႉဢဝ် ၶဝ် 3 ၵေႃႉ ။ ၼိူဝ်ၵႃးၼၼ်ႉ ပဵၼ်သိုၵ်းလၢႆလၢႆ မီးမွၵ်ႈ 9-10 ၵေႃႉၼႆႉ မီးၵူၼ်းၼုင်ႈသိုၵ်းပျီႇတူႉၸိတ်ႉ PNO ဝႆႉ”- ၼႆယဝ်ႉ ။

ၽွင်း ၽူႈမီးပုၼ်ႈၽွၼ်း ၊ ၵၢင်ႉၵႄႇၼႂ်းဝၢၼ်ႈလႄႈ ပျီႇတူႉၸိတ်ႉဢဝ်ႁူမ်ႇလူမ်ႈၼႂ်းပိုၼ်ႉတီႈ မႃးၵူတ်ႇထတ်းၵႃးၼၼ်ႉ ထူပ်းႁၼ်ဝႂ်လၢႆႊသိၼ်ႊ ၸဝ်ႈၵႃးၼႂ်းၵႃးဝႆႉယူႇသေတႃႉ ထိုင်ဝၼ်းမိူဝ်ႈၼႆႉ ဢမ်ႇပႆႇတီႉၺွပ်းလႆႈ ၵူၼ်းၵေႃႉဢၼ်ႁေႃႈၵႃးၽႃႇၺႃးၵူၼ်းဝၢၼ်ႈၼၼ်ႉ – ၵူၼ်းပိုၼ်ႉတီႈလၢတ်ႈ ။

မိူၼ်ၼင်ႇၼႆ ၼႂ်းဝၼ်းတီႈ 20 လိူၼ်ၵျူႊလၢႆႊၼႆႉၵူၺ်းၼင်ႇၵဝ်ႇ ၵႃးတင်းရူတ်ႉၶိူင်ႈပဵၼ်ၽေးၵိုင်ႉၵၢင်ႉၽႃႇၺႃးၵၼ် တီႈသဵၼ်ႈတၢင်း ဝဵင်းလိူဝ်ႇ- ယႂႃႇငၢၼ်ႇ ႁိမ်းဝၢၼ်ႈၵျွၵ်ႉၵူႇပိၼ်ႇ (ကျောက္ကူပြင်ရွာ) ႁဵတ်းႁႂ်ႈၼုမ်ႇၸၢႆး ဢႃယု 19 ၵေႃႉၼိုင်ႈတၢႆထင်တီႈ ထႅင်ႈၵေႃႈၼိုင်ႈ မၢတ်ႇၸဵပ်းႁၢဝ်ႈႁႅင်းၼႆယဝ်ႉ ။

ၼုမ်ႇၸၢႆးဢႃယု 19 ဢၼ်လူႉတၢႆၵႂႃႇၼၼ်ႉ ပဵၼ်ၵူၼ်းဝၢၼ်ႈယေႇဢူး ၼႂ်းၸႄႈဝဵင်းယႂႃႇငၢၼ်ႇ ၊ ၸဝ်ႈၵႃးဢၼ်ႁေႃႈၽႃႇ ၼုမ်ႇၸၢႆးသွင်ၵေႃႉၼၼ်ႉ ပၢႆႈၵႂႃႇ ထိုင်ဝၼ်းမိူဝ်ႈၼႆႉ ပႆႇတီႉ ၺွပ်းလႆႈ – ၵူၼ်းပိုၼ်ႉတီႈလၢတ်ႈ ။

သဵၼ်ႈတၢင်း ဝဵင်းလိူဝ် – ယႂႃႇငၢၼ်ႇၼႆႉ ပဵၼ် သဵၼ်ႈတၢင်းၶိုၼ်ႈလွႆ မီးတၢင်းၵူင်ႉတၢင်းငွၵ်းၼမ်၊ ၸဝ်ႈၵႃးသမ်ႉ ႁေႃႈၶိုၼ်ႈႁေႃႈလူင်း ဝႆးႁႅင်း၊ ၸဝ်ႈၵႃး ၸိူဝ်းလုၵ်ႉတီႈၵႆမႃးသမ်ႉ ဢမ်ႇႁူႉသၢႆတၢင်းလီလီလႄႈ ၵႆႉပဵၼ်ၽေးၵိုင်ႉၵၢင်ႉၽႃႇၺႃးၵၼ်၊ ဢိင်ၼိူဝ်လွင်ႈၼႆႉ ၵူၼ်းပိုၼ်ႉတီႈတႄႉလၢတ်ႈဝႃႈ – ႁႂ်ႈၾၢင်ႉၵၼ်ႁေႃႈၶပ်းလွႆးလွႆး ၼင်ႇႁိုဝ်တေလွတ်ႈၽေးၵၼ် ဝႃႈၼႆ။