မိူဝ်ႈဝၼ်းတီႈ 20 လိူၼ်ဢေႃးၵၢတ်ႉသ် ယၢမ်းၵၢင်ၼႂ် သိုၵ်းမၢၼ်ႈယိုတ်းမိူင်း ၶဝ်ႈၵႂႃႇသွၵ်ႈတဝ်ၼႂ်းပိုၼ်ႉတီႈသေ တီႉၺွပ်းဢဝ် ၵူၼ်းၸိူဝ်းႁဵတ်းၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊ (ၵျႃႊၽျႅၼ်ႉ) ယူႇ ၼႂ်းၸႄႈဝဵင်းၵေးသီး မိူင်းတႆးပွတ်းၸၢၼ်း ဝႃႈၼႆ။
ၵူၼ်းႁဵတ်းၵၢၼ်ၵျႃႊၽျႅၼ်ႉၸိူဝ်းၺႃးတီႉၺွပ်းၼၼ်ႉ ပဵၼ်ၸုမ်းဢၼ်ယူႇသဝ်းဝႆႉတၢင်း ၾၢႆႇႁွင်ႇဝၢၼ်ႈၽုၺ်း ႁၢင်ႇၵႆမွၵ်ႈ 9900 မီႊတိူဝ်ႊၼၼ်ႉ တီႈၼိုင်ႈ၊ ၸုမ်းဢၼ်မီးဝႆႉ ၸဵင်ႇႁွင်ႇဝၼ်းဢွၵ်ႇ ဝၢၼ်ႈပုင်ႇလူင် ႁၢင်ႇၵႆမွၵ်ႈ 2900 မီႊတိူဝ်ႊၼၼ်ႉၸုမ်းၼိုင်ႈ ၊ ၸိူဝ်းယူႇသဝ်းဝႆႉ တၢင်းၾၢႆႇႁွင်ႇဝၢၼ်ႈပုင်ႇလူင် ႁၢင်ႇၵႆမွၵ်ႈ 3900 မီႊတိူဝ်ႊၼၼ်ႉ ၸုမ်းၼိုင်ႈ ႁူမ်ႈသဵၼ်ႈ ပဵၼ် 3 ဢွင်ႈတီႈ ၼႆယဝ်ႉ။
ၾၢႆႇႁွင်ႈၵၢၼ်သိုဝ်ႇသိုၵ်းမၢၼ်ႈႁၢႆးငၢၼ်းဢွၵ်ႇမႃးဝႃႈ – ၵူၼ်းၸိူဝ်းတီႉၺွပ်းလႆႈတႃႇ 23 ၵေႃႉ ပဵၼ်ၵူၼ်းၸၢဝ်းၶိူဝ်းၶႄႇတင်းသဵင်ႈ – ဝႃႈၼႆ။
လႆႈႁူႉဝႃႈ သိုၵ်းမၢၼ်ႈယိုတ်းမိူင်း တီႉၺွပ်းယိုတ်းဢဝ်လႆႈ ၵူၼ်းၸၢဝ်းၶိူဝ်းၶႄႇ 10 ၵေႃႉ ၸိူဝ်းယူႇသဝ်းဝႆႉ ၾၢႆႇႁွင်ႇဝၢၼ်ႈၽုၺ်းၼၼ်ႉဢွၼ်တၢင်း ဢိၵ်ႇပႃးၶိူင်ႈၸႂ်ႉတိုဝ်း ၼႂ်းၵၢၼ်ၵျႃႊ ၽျႅၼ်ႉ မိူၼ်ၼင်ႇသတႃးလိင်ႉ Starlink 4 ၵူႈ၊ ၾူၼ်းၵူႈသႅၼ်းသႅၼ်း 26 လုၵ်ႈ၊ Tablet 2 လုၵ်ႈ၊ ၶွမ်ႊပိဝ်ႊတိူဝ်ႊ Laptop 1 လုၵ်ႈ၊ ၶိူင်ႈၼႅင်ႈသၢၼ် Network ဢၼ်ၸႅၵ်ႇလႅင်းဢိၼ်ႊထိူဝ်ႊၼႅတ်ႊၼၼ်ႉ 8 ဢၼ် ၊ Wifi – 12 လုၵ်ႈ၊ ၶိူင်ႈၸၢၵ်ႈၼပ်ႉဢၢၼ်ႇငိုၼ်း 4 လုၵ်ႈ လႄႈ ၶိူင်ႈၸၢၵ်ႈၾႆးလူင်၊ တူႈယဵၼ် (ရေခဲသေတ္တာ) ၸဵမ်ၸိူဝ်းၼႆႉ ဝႃႈၼႆ။
ဝၢႆးလင်တီႉၺွပ်းဢဝ်ၵူၼ်းၸၢဝ်းၶိူဝ်းၶႄႇ 10 ၵေႃႉယဝ်ႉ ၸင်ႇသိုပ်ႇၵႂႃႇတီႉၺွပ်းဢဝ် ၵူၼ်းၸၢဝ်းၶိူဝ်းၶႄႇ ထႅင်ႈ 6 ၵေႃႉ တီႈၸဵင်ႇႁွင်ႇဝၼ်းဢွၵ်ႇ ဝၢၼ်ႈပုင်ႇလူင်ၼၼ်ႉၵူၺ်းဢမ်ႇၵႃး လမ်းတီႉၺွပ်းဢဝ်လႆႈထႅင်ႈ ၵူၼ်းၸၢဝ်းၶိူဝ်းၶႄႇ 7 ၵေႃႉ ပဵၼ်ၵူၼ်းၼုမ်ႇၸၢႆးတင်းသဵင်ႈ ၼႆယဝ်ႉ။
ၸွမ်းၼင်ႇပၵ်းပိူင်မၢႆမီႈမီးဝႆႉၼၼ်ႉ ၾၢႆႇၸဝ်ႈၼႃႈတီႈၶဝ် တေသိုပ်ႇဢဝ်လိူင်ႈပဵၼ်တၢင်းၵၢၼ်ၵႂႃႇသေ တေသိုပ်ႇႁဵတ်းၵၢၼ်ၽဵဝ်ႈမူၺ်ႉ ၵႂၢတ်ႇလၢင်ႉ ၸုမ်းႁဵတ်းၵၢၼ်ၵျႃႊၽျႅၼ်ႉၵႂႃႇ ႁႂ်ႈတိူဝ်းယမ် လိူဝ်ၵဝ်ႇ ၼႆယဝ်ႉ။
မိူဝ်ႈဝၼ်းတီႈ 10/08/2026 ပူၼ်ႉမႃးၼႆႉၵေႃႈ ၸဝ်ႈၼႃႈတီႈပလိၵ်ႈ လႄႈ သိုၵ်းမၢၼ်ႈယိုတ်းမိူင်း ႁူမ်ႈၵၼ် ၵႂႃႇတီႉၸုမ်းၵျႃႊၽျႅၼ်ႉ ဢၼ်မီးတီႈႁိမ်းဝၢၼ်ႈၸီးၸေႃႉ ၸႄႈဝဵင်းလၢႆးၶႃႈ တီႉလႆႈၵူၼ်းမိူင်း ၶႄႇ 34 ၵေႃႉ တႃႇၶိုင်ႈၼိုင်ႈၼႆႉပဵၼ်ၵူၼ်းဢမ်ႇမီးဝတ်းဝႂ်မၢႆၾၢင်သင်သေလၵ်ႉလွမ်ယူႇသဝ်းႁဵတ်းၵၢၼ်ဝႆႉ ဝႃႈၼႆ။
ဝၼ်းတီႈ 4/8/2026 ယၢမ်းဝၢႆးဝၼ်း 2 မူင်းၶိုင်ႈ ၵူတ်ႇထတ်း တီႉၺွပ်းလႆႈ ၵူၼ်းႁဵတ်းၵၢၼ်လွၵ်ႇလႅၼ်ၵိၼ် ငိုၼ်း တၢင်းဢွၼ်ႊလၢႆႊၵျႃႊၽျႅၼ်ႉ 49 ၵေႃႉ တီႈႁိမ်းဝၢၼ်ႈၼႃးယႆး (ယၢၼ် ၵႆၵၼ်မွၵ်ႈ 250 မီႊတႃႊၵူၺ်း) ဝႃႈၼႆ။
ၼႂ်းၶၢဝ်းတၢင်းလိူၼ်လဵဝ်ၵူၺ်း သိုၵ်းမၢၼ်ႈယိုတ်းမိူင်းၶဝ်ႈတီႉၺွပ်းဢဝ် ၵူၼ်းမိူင်းၶႄႇၸိူဝ်းႁဵတ်းၵၢၼ်ၵျႃႊ ၽျႅၼ်ႉ ယူႇၼႂ်းမိူင်းတႆးပွတ်းၸၢၼ်းၼၼ်ႉ ၵုမ်းၵမ်လႆႈၵႂႃႇၶိူင်ႈၸႂ်ႉတိုဝ်း တင်းၼမ်လၢႆလႄႈ ၵူၼ်းၸၢဝ်းၶိူဝ်းၶႄႇ 106 ၵေႃႉယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ