ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ပွၵ်ႈၵမ်းသွင်ယဝ်ႉသေ လူင်ပွင်ၸိုင်ႈမိူင်းၶႄႇ ၶဝ်ႈၵႄႈၵၢင် ႁဵတ်းၶဵဝ် သိူဝ်ႇသဵၼ်ႈတၢင်းပၼ် ၸုမ်းယိပ်းၵွင်ႈၵၢင်ႇၸၢဝ်းၶိူဝ်း လႄႈ သိုၵ်းမၢၼ်ႈယိုတ်းမိူင်းၶဝ် ႁူပ်ႉဢုပ်ႇဢူဝ်း တူၵ်းလူင်းၵၼ်ယဝ်ႉၼၼ်ႉ ၵူၼ်းမိူင်းၼႂ်းမိူင်းတႆးပွတ်းႁွင်ႇၵေႃႈ ဢမ်ႇလႆႈငိၼ်းသဵင်ၵွင်ႈ သဵင်မၢၵ်ႇလူင်ပၼ်းမႃး သုၵ်ႉသၵ်ႉႁူ ယုင်ႈယၢင်ႈၸႂ်ထႅင်ႈ။

ၵူၼ်းမိူင်းပိုၼ်ႉတီႈၸိူဝ်းယူႇသဝ်းၼႂ်းၸႄႈဝဵင်းမိူင်းမိတ်ႈၵေႃႈတေႃႈၼင်ႇၼၼ် ဝၢႆးလင်သိုၵ်းလွႆ (တဢၢင်း) TNLA ထွႆသၢႆသိုၵ်းထွၼ်ၵူၼ်းသိုၵ်းဢွၵ်ႇပိုၼ်ႉတီႈၵႂႃႇယဝ်ႉၼၼ်ႉ ႁိုင်ၶၢဝ်းတၢင်း 10 လိူၼ်ပၢႆ ဢမ်ႇလႆႈငိၼ်းသဵင်ၵွင်ႈသဵင်မၢၵ်ႇထႅင်ႈ။

ထိုင်မႃး ၵၢင်လိူၼ်ဢေႃးၵၢတ်ႉသ် ဝၼ်းတီႈ 11 ယၢမ်းဝၢႆးဝၼ်းမွၵ်ႈ 2 မူင်းမႃး သိုၵ်းမၢၼ်ႈယိုတ်းမိူင်း တင်း ၸုမ်းသိုၵ်းၶၢင် (KIA) ယိုဝ်းတိုၵ်းၵၼ်ႁၢဝ်ႈႁႅင်း ႁိမ်းဝၢၼ်ႈၺွင်ႇၼီႇ ဢၼ် ႁၢင်ႇၵႆၵၼ်တင်း မိူင်းမိတ်ႈ မွၵ်ႈ 3 လၵ်းၼၼ်ႉ။ ၾၢႆႇသိုၵ်းမၢၼ်ႈဢဝ်ၶိူင်ႈၵွင်ႈလူင်သေ ယိုဝ်းသႂ်ႇၼႂ်းၼႃႈတီႈသိုၵ်းၶၢင်ႁၢဝ်ႈႁႅင်း။ ၵွပ်ႈၼၼ် ၸုမ်းသိုၵ်းၵူၼ်းၼုမ်ႇၾၢႆႇၵႅတ်ႇၶႄၵူၼ်း မိူင်း  (PDF) ၶဝ်ၵေႃႈ လႆႈႁူမ်ႈမိုဝ်းၸွမ်း သိုၵ်းၶၢင် (KIA) သေ ယိုဝ်းသိုၵ်းမၢၼ်ႈယိုတ်းမိူင်းၶိုၼ်း ၸိူဝ်းပၵ်းတပ်ႉပၢင်သဝ်းဝႆႉ ႁိမ်းဝဵင်းမိူင်းမိတ်ႈၼၼ်ႉ ဝႃႈၼႆ။

ၵူၼ်းမိူင်းမိတ်ႈၵေႃႉၼိုင်ႈတႄႉ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “သဵင်ၵွင်ႈလူင် ၵွင်ႈဢွၼ်ႇပၼ်းႁႅင်းၼႃႇ။ ႁၼ်သိုၵ်းမၢၼ်ႈ ဢဝ်ႁိူဝ်းမိၼ်မႃးပွႆႇမၢၵ်ႇပႃး။ ၵွပ်ႈၼၼ် မိူဝ်ႈလဵဝ် ၵူၼ်း ၸိူဝ်းယူႇၸမ် ပိုၼ်ႉတီႈပၢင်တိုၵ်းၼၼ်ႉ ဢွၼ်ၵၼ်လႆႈၶၢႆႉဢွၵ်ႇပၢႆႈဝႆႉယူႇ” ၼႆယဝ်ႉ။

သိုၵ်းမၢၼ်ႈယိုတ်းမိူင်း ၸႂ်ႉပႃးႁိူဝ်းမိၼ်သႅၼ်း Y-12 လႄႈ Mi-35  ပွႆႇမၢၵ်ႇပႃးလႄႈ တိူဝ်ႉၺႃးႁူင်းႁဵၼ်း လင်ၼိုင်ႈ လႄႈ ၵျွင်းမုၼ်ၸဝ်ႈလင်ၼိုင်ႈ မီးၸဝ်ႈသင်ႇၶ မၢတ်ႇၸဵပ်းၵႂႃႇၸွမ်းဝႆႉ ၼိုင်ႈပႃး။ ၼႂ်းပၢင်တိုၵ်းၼႆႉ တင်းသွင်ၾၢႆႇ ၸႂ်ႉတိုဝ်းၶိူင်းၻရူၼ်ႊသေ ယိုဝ်းၵၼ်ႁၢဝ်ႈႁႅင်း။ ၽူႈမီးၸၼ်ႉၼႂ်းတပ်ႉသိုၵ်းမၢၼ်ႈၵေႃႉၼိုင်ႈ လူႉသဵင်ႈၵႂႃႇ-  ၼႆၽူႈၶၢၼ်ပၢၵ်ႇ ၸုမ်းသိုၵ်းၶၢင်ပိုၼ်ၽၢဝ်ႇလၢတ်ႈတီႈသိုဝ်ႇဝႆႉၼင်ႇၼႆ။

လႆႈႁူႉဝႃႈ ယၢမ်းလဵဝ် ၾၢႆႇသိုၵ်းမၢၼ်ႈၶဝ်ႈၵုမ်းၵမ်ဝႆႉ ဝၢၼ်ႈၺွင်ႇၼီႇ (ညောင်နီကျေးရွာ) လႄႈ ဝၢၼ်ႈၵွင်းၽြႃး (ဘုရားကုန်းကျေးရွာ) သေ သိုပ်ႇပၵ်းတပ်ႉပၢင်သဝ်းဝႆႉၶိုၼ်း ၼႆယဝ်ႉ။

ပိူဝ်ႈတႃႇၶႂၢၵ်ႈဢဝ်ၶိုၼ်း ပိုၼ်ႉတီႈၼႃႈလိၼ်သိုၵ်းႁႂ်ႈၵႂၢင်ႈၶႂၢင်မိူၼ်ၵဝ်ႇၶိုၼ်းၼၼ်ႉ ၾၢႆႇသိုၵ်းမၢၼ်ႈႁႅၼ်းဢဝ် ႁႅင်းသိုၵ်းၶိုၼ်ႈလေႃႇတိုၵ်းသႂ်ႇ ၸုမ်းသိုၵ်းၶၢင် (KIA) ၵူၺ်းဢမ်ႇၵႃး ၵွၼ်ႇ ၼႃႈၼႆႉၵေႃႈ ဢွၵ်ႇၶေႃႈပူင် ၸီႉသင်ႇ ႁႂ်ႈပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး (SSPP/SSA) ထွၼ်ႁႅင်းသိုၵ်းဢွၵ်ႇၼႂ်းပိုၼ်ႉတီႈ တင်းသဵင်ႈလႄႈ ဢဝ်ပႃးၶိူင်ႈၸၢၵ်ႈထုၺ်လိၼ် ၵႂႃႇယႃႉပႅတ်ႈတပ်ႉပၢင်သဝ်းသိုၵ်းတႆးထႅင်ႈ။

ၼႂ်းၸႄႈဝဵင်းမိူင်းမိတ်ႈၼႆႉ ပႅၵ်ႉသမ်ႉ သိုၵ်းလွႆ (တဢၢင်း) TNLA ထွႆသိုၵ်းဢွၵ်ႇၵႂႃႇပၼ် ၸွမ်းၼင်ႇ တူၵ်းလူင်းၵၼ်တင်းသိုၵ်းမၢၼ်ႈၼၼ်ႉသေတႃႉ ယင်းတိုၵ်ႉမီး ၸုမ်းသိုၵ်းၶၢင်  (KIA)၊ ၸုမ်းသိုၵ်းတႆး (SSPP/SSA) လႄႈ ၸုမ်းသိုၵ်းၵူၼ်းၼုမ်ႇၸၢဝ်းၶိူဝ်းမၢၼ်ႈ (PDF)  တင်း ၸုမ်းသိုၵ်းၵႅတ်ႇၶႄၵူၼ်းမိူင်း ၸၢဝ်းၶိူဝ်းၶၢင် (KPDF) ၶဝ်ၸိူဝ်းၼႆႉ တူင်ႉၼိုင်ယူႇ သဝ်းၵႂႃႇမႃးဝႆႉယူႇ။

ၸုမ်းသိုၵ်းၸၢဝ်းၶိူဝ်းၸိူဝ်းလၢတ်ႈမႃးတၢင်းၼိူဝ်ၼႆႉၵေႃႈ ၼွၵ်ႈလိူဝ်ၸုမ်းသိုၵ်းၵူၼ်းၼုမ်ႇၸၢဝ်းၶိူဝ်းမၢၼ်ႈ PDF ယဝ်ႉ ဢမ်ႇၸႂ်ႈဝႃႈၸိူဝ်းၶဝ်တိုၵ်ႉၶဝ်ႈၵႂႃႇတူင်ႉၼိုင်ယူႇသဝ်းဝႆႉ ၽွင်းပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ၼၼ်ႉၵူၺ်း။ ၵွၼ်ႇၼႃႈၼၼ်ႉၵေႃႈ တိုၼ်းပၵ်းတပ်ႉပၢင်သဝ်းသေ တူင်ႉၼိုင်ၵႂႃႇမႃး ၵုမ်းၵမ်ၽွင်းငမ်း ၼႃႈတီႈၽႂ်မၼ်းဝႆႉ။

ဝဵင်းမိူင်းမိတ်ႈၼႆႉ ပဵၼ်ဝဵင်းဢၼ်တိတ်းတေႃႇၵႂႃႇမႃးလႆႈ ဝဵင်းလိူဝ်ႇ- ၸႄႈၼႃး (မျိတ်ႉၵျီးၼႃး) ပဵၼ်သဵၼ်ႈတၢင်း တႃႇၵပ်းသၢၼ်ၵၼ် မိူင်းတႆး- မိူင်းၶၢင် သဵၼ်ႈၼိုင်ႈလႄႈ ပဵၼ်ဝဵင်းလမ်ႇလွင်ႈပိူဝ်ႈတႃႇ ၸုမ်းသိုၵ်းၸၢဝ်းၶိူဝ်းၶဝ်တေႉတေႉၼႆၵေႃႈ ဝႃႈလႆႈ။

မိူင်းမိတ်ႈၼႆႉ လမ်ႇလွင်ႈတႃႇ သိုၵ်းၶၢင် တင်း သိုၵ်းမၢၼ်ႈ ၼႂ်းၵၢၼ်သိုၵ်းၸိူင်ႉႁိုဝ်ၼႆ ထုၵ်ႇလီလဵပ်ႈႁဵၼ်း တူၺ်းၸွမ်းယူႇ။

မိူင်းမိတ်ႈၼႆႉ ပဵၼ်ဝဵင်းဢွၼ်ႇ ဢၼ်တိတ်းၸပ်းလႅၼ်လိၼ် မိူင်းတႆး – မိူင်းၶၢင်သေ မီးၵူၼ်းမိူင်းယူႇသဝ်းဝႆႉ မွၵ်ႈ ၼိုင်ႈမိုၼ်ႇၵေႃႉပၢႆသေ ၵမ်ႈၼမ် ပဵၼ်ၸၢဝ်းၶိူဝ်းတႆး လႄႈ ၸၢဝ်းၶိူဝ်းမၢၼ်ႈယူႇသဝ်းဝႆႉၼမ်လိူဝ် ပိူၼ်ႈ သုတ်း။

ၽွင်းပၢင်တိုၵ်းၽႅၼ်ယၼ်ႇသိုၵ်း 1027 ႁၢင်လိူၼ်ၵျူႊလၢႆႊ ပီ 2024 ၼၼ်ႉသိုၵ်းလွႆ (တဢၢင်း) ၶဝ်ႈ ယိုတ်းၵုမ်း မိူင်းၵုတ်ႈ၊ မိူင်းမိတ်ႈ။  ႁၢင်လိူၼ်ၼူဝ်ႊဝႅမ်ႊပိူဝ်ႊ ပီ 2025 မႃး ဢိင် ၼိူဝ်ၶေႃႈတူၵ်းလူင်း ၵၼ်တင်း သိုၵ်းမၢၼ်ႈယိုတ်းမိူင်းသေ လႆႈဢဝ် မိူင်းမိတ်ႈ မွပ်ႈပၼ်ၶိုၼ်းၼႂ်းမိုဝ်းသိုၵ်းမၢၼ်ႈ   ၵုမ်းၵမ်ပၼ်ႇၵၢၼ်ၽွင်းငမ်းပဵၼ် တၢင်းၵၢၼ် ဝႃႈၼႆသေတႃႉ ဢမ်ႇ ၶဝ်ႈၵုမ်းၵမ်လႆႈ တင်းၸႄႈဝဵင်းပတ်းပိုၼ်ႉ ၼင်ႇၵဝ်ႇ။ ၾၢႆႇၼွၵ်ႈဝဵင်းမိူင်းမိတ်ႈႁွပ်ႈႁွပ်ႈၼႆႉတိုၵ်ႉမီး သိုၵ်းၶၢင် (KIA) တင်း သိုၵ်းတႆး (SSPP) တူင်ႉၼိုင်ၵႂႃႇမႃး ၵုမ်းၵမ် ပၼ်ႇၵၢၼ်ၽွင်းငမ်းဝႆႉယူႇ။

ၽူႈလူင်ႉလႅၼ်ႇၵၢၼ်သိုၵ်း ၵၢၼ်မိူင်း ၼႂ်းတႆးၵေႃႉၼိုင်ႈတႄႉ ထတ်းသၢင်လၢတ်ႈဝႆႉဝႃႈ – ပေႃးၼပ်ႉတူၺ်း ၸွမ်း ၵၢၼ်သိုၵ်းဝႃႈတႄႉ မိူင်းမိတ်ႈၼႆႉ ယူႇႁၢင်ႇၵႆၵၼ်တင်း ဝဵင်းမၢၼ်ႈပဵင်း (မဘိမ်း) ဢၼ်သိုၵ်းၶၢင် (KIA) တင်း တပ်ႉသိုၵ်းၸုမ်းလုၵ်ႈႁဵၼ်း (ABSDF) ၵုမ်းၵမ်ဝႆႉၼၼ်ႉ မွၵ်ႈ 35 လၵ်းၵူၺ်း ပေႃးဢဝ်ရူတ်ႉၵႃးၵႂႃႇ ႁိုင်ၶၢဝ်းတၢင်းမွၵ်ႈ 1 ၸူဝ်ႈမူင်းၵူၺ်းလႄႈ သိုၵ်းမၢၼ်ႈၼႆႉ မီး ၽႅၼ်ၵၢၼ်ႁၢင်ႈႁႅၼ်းၶႂ်ႈၶဝ်ႈၵုမ်းဢဝ် မိူင်းမိတ်ႈ တင်း မၢၼ်ႈပဵင်းတင်းသဵင်ႈ။ ၵွပ်ႈဝႃႈ မိူင်းမိတ်ႈ တင်း မၢၼ်ႈ ပဵင်းၼႆႉ လမ်ႇလွင်ႈတႃႇၵၢၼ်သိုၵ်းတေႉတေႉလႄႈ ပၢင်တိုၵ်းၼႆႉ ၸၢင်ႈလၢမ်းၽႄႈၵႂၢင်ႈယႂ်ႇၶိုၼ်ႈမႃး ထႅင်ႈၵမ်းၼိုင်ႈ တၢင်းထုင်ႉမိူင်းမိတ်ႈ လႄႈ မၢၼ်ႈပဵင်း” ဝႃႈၼႆ။

မိူင်းမိတ်ႈ လမ်ႇလွင်ႈတႃႇၵၢၼ်သိုၵ်းၸိူင်ႉႁိုဝ်

သင်ဝႃႈ သိုၵ်းမၢၼ်ႈယိုတ်းမိူင်းၼႆႉ ၶဝ်ႈၵုမ်းၵမ်လႆႈ ဝဵင်းမိူင်းမိတ်ႈတင်းသဵင်ႈၸိုင် ၸၢင်ႈသူင်ႇဢဵၼ်ႁႅင်းသိုၵ်း ၶဝ်ႈၵႂႃႇလႆႈ ၼႂ်းဝဵင်းသူၺ်ႇၵူႇ၊ မၢၼ်ႈမေႃႇ (ဗန်းမော်) ၊ မၢၼ်ႈၸေႈ (မံစီ) ၸိူဝ်းၼၼ်ႉသေ ၸၢင်ႈၶဝ်ႈၵုမ်းၵမ် လႆႈဝဵင်းၸိူဝ်းၼၼ်ႉၶိုၼ်း။

ၾၢႆႇၼိုင်ႈၵေႃႈ ယၢမ်းလဵဝ် သိုၵ်းမၢၼ်ႈၼႆႉ ယိုတ်းၵုမ်းလႆႈဝႆႉ တပဵၵ်ႉၵျိၼ်ႊ၊ ၸိၼ်ႉၵူး ၼႂ်းတိူင်းမၢၼ်းတလေး (ဝဵင်းလိူဝ်ႇ) ၼၼ်ႉယဝ်ႉလႄႈ လုၵ်ႉတၢင်းပုၼ်ႉသေ ၸၢင်ႈသူင်ႇဢဵၼ်ႁႅင်းသိုၵ်းၶဝ်ႈၵႂႃႇတၢင်း မိူင်းၵုတ်ႈ ထိုင် မိူင်းမိတ်ႈၸိူဝ်းၼႆႉလႆႈငၢႆႈ။

ၽူႈလူင်ႉလႅၼ်ႇၵၢၼ်သိုၵ်းၵေႃႉၼိုင်ႈတႄႉ ထတ်းသၢင်လၢတ်ႈဝႆႉဝႃႈ “ပေႃးသိုၵ်းမၢၼ်ႈ လႆႈၵုမ်းမိူင်းမိတ်ႈၵႂႃႇ တင်းသဵင်ႈတႄႉ ၸွမ်းသဵၼ်ႈတၢင်း ဝဵင်းလိူဝ်ႇ-ၸႄႈၼႃး (မြစ်ကြီးနား) ၸိူဝ်းၼႆႉ ၸၢင်ႈပဵၼ်ပၢင်တိုၵ်းထႅင်ႈ ၸုမ်းယိပ်းၵွင်ႈၵၢင်ႇၸိူဝ်းၵုမ်းၵမ်ဝႆႉသဵၼ်ႈၼၼ်ႉ ၸၢင်ႈလႆႈပွႆႇပႅတ်ႈၼႃႈတီႈၵုမ်းၵမ်ၶဝ်ၶိုၼ်း” ဝႃႈၼႆ။

ၸွမ်းၼင်ႇၽႅၼ်ၵၢၼ် 100 ဝၼ်း ၶွင်လူင်ပွင်ၸိုင်ႈသိုၵ်း ၸွမ်ၸိုင်ႈယိုတ်းမိူင်းမိၼ်းဢွင်ႇလၢႆႇ တမ်းဝၢင်းဝႆႉၼၼ်ႉ ၼႂ်းၶၢဝ်းတၢင်း လိူၼ်ဢႄႊပရႄႊ ဝၼ်းတီႈ 20 ထိုင် လိူၼ်ၵျူႊလၢႆႊ ဝၼ်းတီႈ 31 ၼႆႉ လႆႈမွၵ်ႇႁွင်ႉၸုမ်းယိပ်းၵွင်ႈၵၢင်ႇၸၢဝ်းၶိူဝ်းၸိူဝ်းလူင်းလၢႆးမိုဝ်းၵိုတ်းတိုၵ်း NCA တင်း ၸုမ်းယိပ်းၵွင်ႈၵၢင်ႇ ၸိူဝ်းပႆႇလူင်းလၢႆးမိုဝ်းၼၼ်ႉ ႁႂ်ႈယဝ်ႉတူဝ်ႈၼႆယူႇ။

တႄႇလိူၼ်ဢေႃးၵၢတ်ႉသ်မႃး ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းပႆႇလူင်းလၢႆးမိုဝ်းၵိုတ်းတိုၵ်း NCA သေ ၶွတ်ႇၽွတ်ႈပဵၼ်ၸုမ်း FPNCC ဝႆႉ မိူၼ်ၼင်ႇၸုမ်းသိုၵ်းဝႃႉ (UWSA) ၊ ၸုမ်းသိုၵ်းတႆး (SSPP/SSA) လႄႈ ၸုမ်းသိုၵ်းမိူင်းလႃး (NDAA) ၶဝ် ဢွၼ်ၵၼ်ၵႂႃႇႁူပ်ႉဢုပ်ႇဢူဝ်းၸွမ်း ၵေႃႇမတီႇပွင်သၢင်ႈလွင်ႈငမ်းယဵၼ် လႄႈ ၵၢၼ်ၽွမ်ႉႁူမ်ႈၸိူဝ်ႉၸၢတ်ႈ NSPNC ဢၼ်ၸွမ်သိုၵ်းယႃႇပျေႉ ပဵၼ်ႁူဝ်ပဝ်ႈသေ ယူႇတႂ်ႈဢႃႇၼႃႇသိုၵ်းမၢၼ်ႈယိုတ်းမိူင်းဝႆႉၼၼ်ႉ ၵမ်းၸုမ်းၸုမ်း။

သိုၵ်းမၢၼ်ႈယိုတ်းမိူင်းၼႆႉ ၾၢႆႇၼိုင်ႈၵေႃႈ ႁွင်ႉၵႂႃႇဢုပ်ႇလွင်ႈငမ်းယဵၼ် ၼႂ်းၶၢဝ်းယၢမ်းလဵဝ်ၵၼ် ၽူႈၵွၼ်းသိုၵ်း ၼႂ်းၸႄႈဝဵင်းမိူင်းမိတ်ႈၶဝ် ဢဝ်ႁႅင်းသိုၵ်းၵႂႃႇမိပ်ႇဢီး လိုပ်ႈၵူၼ်းသိုၵ်းပႃႇတီႇမႂ်ႇသုင်ၸိုင်ႈတႆး (SSPP/SSA) ထွႆဢွၵ်ႇၼႂ်းပိုၼ်ႉတီႈထႅင်ႈ။

ၵဵဝ်ႇၵပ်းၵၢၼ်ဢုပ်ႇဢူဝ်းလွင်ႈငမ်းယဵၼ် ဢၼ်လူင်ပွင်ၸိုင်ႈသိုၵ်းမၢၼ်ႈယိုတ်းမိူင်း ၼမ်းၸတ်းၼၼ်ႉသေ ၾၢႆႇသိုၵ်းၶၢင် (KIA) တႄႉ ဢမ်ႇလႆႈတုမ်ႉတွပ်ႇသင်ၶိုၼ်း ၽူႈၶၢၼ်ပၢၵ်ႇ ၸုမ်းသိုၵ်းၶၢင် ၸဝ်ႈသိုၵ်းၼေႃႇပူႇ တွပ်ႇလၢတ်ႈဝႆႉၼင်ႇၼႆ။

ၵွၼ်ႇပႆႇထိုင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 မိူဝ်ႈပီ 2024 ၽွင်းႁူဝ်လိူၼ်ၵျႅၼ်ႊၼိဝ်ႊရီႊ ထိုင် ႁူဝ် လိူၼ်ၾႅပ်ႉပိဝ်ႊရီႊၼၼ်ႉၵေႃႈ ၸုမ်းသိုၵ်းလွတ်ႈလႅဝ်းသဝ်းၶေႃၶၢင် (KIA) ၊ တပ်ႉသိုၵ်းတီႊမူဝ်ႊၶရႅတ်ႉတိၵ်ႉ ၸုမ်းလုၵ်ႈႁဵၼ်းပတ်းပိုၼ်ႉမိူင်းႁူမ်ႈတုမ် (ABSDF) လႄႈ ၸုမ်းသိုၵ်းၵူၼ်းၼုမ်ႇ PDF  ၸိူဝ်းတူင်ႉၼိုင်ယူႇ ၼႂ်း ပိုၼ်ႉတီႈၶဝ် ႁူမ်ႈၵၼ်ၶဝ်ႈလူမ်ႇယိုဝ်း သိုၵ်းမၢၼ်ႈ ဢၼ်ယူႇတႂ်ႈတပ်ႉမ 99 ၼၼ်ႉသေ တင်းသွင်ၾၢႆႇ လႆႈ ပဵၼ်ပၢင်တိုၵ်းၵၼ်ႁိုင် ၶၢဝ်းတၢင်း 1 လိူၼ်ပၢႆ။

ယွၼ်ႉသိုၵ်းမၢၼ်ႈယိုတ်းမိူင်းၸႂ်ႉတိုဝ်းႁိူဝ်းမိၼ်တိုၵ်း လႄႈ ၶိူင်ႈၵွင်ႈလူင်ပွႆႇမၢၵ်ႇၸွႆႈလႄႈ ႁဵတ်းႁႂ်ႈၸုမ်းယိပ်း ၵွင်ႈၵၢင်ႇၸၢဝ်းၶိူဝ်း လႆႈထွႆထွၼ်ဢွၵ်ႇ ၼႂ်းပိုၼ်ႉတီႈၼၼ်ႉၵႂႃႇ။ ၽွင်းပဵၼ်ပၢင်တိုၵ်းၼၼ်ႉ ၵူၼ်းမိူင်းလူႉတၢႆ ၵႂႃႇၸွမ်း 27 ၵေႃႉ၊ ၵၢတ်ႇလူင် လႄႈ ႁိူၼ်းယေးၵူၼ်းမိူင်း ဢိၵ်ႇပႃး ႁူင်းႁဵၼ်းသွၼ်လိၵ်ႈၸိူဝ်းၼႆႉၵေႃႈ လူႉၵွႆ ၵႂႃႇၸွမ်းတင်းၼမ်။ ၵူၼ်းမိူင်းၼပ်ႉ ႁူဝ်ႁဵင်ၵေႃႉၵေႃႈ လႆႈပၢႆႈငိူင်ႉဢွၵ်ႇၼႂ်းပိုၼ်ႉတီႈၸွမ်း။

သိုၵ်းၶၢင် (KIA) ၼႆႉ ပဵၼ်ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ဢၼ်ဢမ်ႇလူင်းလၢႆးမိုဝ်းၵိုတ်းတိုၵ်း NCA ၸွမ်းသိုၵ်း မၢၼ်ႈယိုတ်းမိူင်းသေ ၽွင်းသိုၵ်းလွႆ (တဢၢင်း) TNLA တေဢဝ်ဝဵင်း မိူင်းမိတ်ႈ မွပ်ႈဢၢပ်ႈပၼ် ၶိုၼ်းတီႈသိုၵ်း မၢၼ်ႈၵုမ်းၵမ်ၶိုၼ်းၼၼ်ႉၵေႃႈ ၺႃးလူင်ပွင်ၸိုင်ႈမိူင်းၶႄႇ ပၼ်ၾၢင်ႉတူၵ်ႇတၵ်ႉလၢတ်ႈဝႃႈ “ယႃႇၶဝ်ႈယုင်ႈ ၸွမ်းလွင်ႈၼႆႉ” ၼႆ တီႈမိူင်းၶႄႇ မိူဝ်ႈဝၼ်းတီႈ 20 လိူၼ်ၼူဝ်ႊဝႅမ်ႊပိူဝ်ႊ ပီ 2025 ၼၼ်ႉဝႆႉ။

ပၢင်တိုၵ်းသိုၵ်းမၢၼ်ႈယိုတ်းမိူင်း တင်း ၸုမ်းသိုၵ်းၶၢင် (KIA) တီႈမိူင်းမိတ်ႈပွၵ်ႈၵမ်းၼႆႉလူး ၸွင်ႇလူင်ပွင်ၸိုင်ႈမိူင်းၶႄႇ တေၸၢင်ႈၶဝ်ႈမႃးၵုမ်းၵမ် မိပ်ႇငႅၼ်းတေႃႇ ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းထႅင်ႈႁိုဝ် ၼႆၼၼ်ႉတႄႉ တေလႆႈပၵ်းတႃပႂ်ႉတူၺ်းၸွမ်းဝႆႉထႅင်ႈ ဢမ်ႇထၢတ်ႇယူႇမိူၼ်ၵၼ်။