ႁူဝ်လိူၼ်ဢေႃးၵၢတ်ႉသ်ၼႆႉ ၸုမ်းသိုၵ်းပျီႇတူႉၸိတ်ႉၶၢင် ဝႃႇရႃႇသုပ်ႊ တႂ်ႈဢႃႇၼႃႇသိုၵ်းမၢၼ်ႈယိုတ်းမိူင်းၵုမ်း ၵမ် လႄႈ ၸုမ်းသိုၵ်းၶၢင် KIA ပဵၼ်ပၢင်တိုၵ်းၵၼ်ဝႆႉသေ တီႉၺွပ်းဢဝ် ၵူၼ်းၼုမ်ႇၸၢဝ်းၶိူဝ်းၶၢင်ၵႂႃႇ 4 ၵေႃႉ ႁဵတ်းတူဝ်ယိူဝ်ႇယဝ်ႉ ၶႃႈႁႅမ်တၢႆပႅတ်ႈ ႁိမ်းပိုၼ်ႉတီႈပဵၼ်ပၢင်တိုၵ်းၵၼ်ၼၼ်ႉ ၼႆယဝ်ႉ။

မိူဝ်ႈဝၼ်းတီႈ 8 လိူၼ်ဢေႃးၵၢတ်ႉသ် ယၢမ်းတၢမ်းၶမ်ႈ တပ်ႉသိုၵ်းလွတ်ႈလႅဝ်းသဝ်းၶေႃၶၢင် (KIA) ဢဝ်ၶိူင်ႈ ၻရူၼ်ႊ လႄႈ ၶိူင်ႈၵွင်ႈလူင် ယိုဝ်းသႂ်ႇ ၼႂ်းၼႃႈတီႈၸုမ်းသိုၵ်းပျီႇတူႉၸိတ်ႉ ၸၢဝ်းၶိူဝ်းၶၢင် ဢၼ်ယူႇတႂ်ႈဢႃႇ ၼႃႇသိုၵ်းမၢၼ်ႈယိုတ်းမိူင်းသေ ႁဵတ်းႁႂ်ႈၵူၼ်းၼႂ်းၸုမ်းသိုၵ်းပျီႇတူႉၸိတ်ႉ လူႉတၢႆၵႂႃႇ မွၵ်ႈ 5 ၵေႃႉၵူၺ်းဢမ်ႇၵႃး မၢတ်ႇၸဵပ်းၵႂႃႇပႃးထႅင်ႈလၢႆၵေႃႉ။

ၵူၼ်းၼုမ်ႇၸၢဝ်းၶိူဝ်းၶၢင် 4 ၵေႃႉ ၸိူဝ်းၺႃးၶႃႈႁႅမ်တၢႆၵႂႃႇၼၼ်ႉ ပဵၼ်ၵူၼ်းဝၢၼ်ႈၼွင်မီ ဢၼ်မီးဝႆႉၾၢႆႇ ၸၢၼ်းဝၢၼ်ႈသျတူႊသုပ်ႊ ႁၢင်ႇၵႆၵၼ်တင်းဝၢၼ်ႈမွၵ်ႈ 13 လၵ်း ၸိုဝ်ႈႁွင်ႉထွႆႇသၼ်ႊဢွင်ႇ ဢႃယု 18 ပီ၊ သုတ်ႉဢွင်ႇ ဢႃယု 19 ပီ၊ လမၢႆႊၵုၼ်ႊမၢႆႇ ဢႃယု 21 ပီ လႄႈ တွင်ႊလွၼ်ႊ ဢႃယု 25 ပီ ၺႃးၸုမ်းသိုၵ်းပျီႇတူႉၸိတ်ႉၶၢင် ၶဝ်ႈသွၵ်ႈတဝ်ၼႂ်းဝၢၼ်ႈသေ တီႉၺွပ်းဢဝ်ၵႂႃႇၶႃႈႁႅမ်တၢႆၼႆ ၽူႈမီးၸၼ်ႉၼႂ်းၸုမ်းၸွပ်ႇၶၢဝ်ႇ သိုၵ်းၶၢင် KIA ၵေႃႉၼိုင်ႈဢွၵ်ႇမႃးပိုၼ်ၽၢဝ်ႇလၢတ်ႈၼင်ႇၼႆ။

လႆႈႁူႉဝႃႈ ယၢမ်းလဵဝ် ၸုမ်းသိုၵ်းပျီႇတူႉၸိတ်ႉၶၢင် ဝႃႇရႃႇသုပ်ႊ ဢဝ်တၢင်းၵမ်ႉၸွႆႈသိုၵ်းမၢၼ်ႈယိုတ်းမိူင်းသေ ၸတ်းၽႅၼ်ၶဝ်ႈဢဝ်တီႈယူႇဝႆႉ ၼိူဝ်သဵၼ်ႈတၢင်းလူင်လီႊတူဝ်ႊ လႄႈ ၼႂ်းဝဵင်းတၼၢႆႊသေ ၸွမ်းတီႉၺွပ်း ဢဝ် ၵူၼ်းၸိူဝ်းထၢင်ႇထိူမ်လႆႈဝႃႈ ၵဵဝ်ႇၶွင်ႈၸွမ်း ၸုမ်းသိုၵ်းၶၢင် KIA ၸဵမ်ၸိူဝ်းၼႆႉ ၼႆယဝ်ႉ။

ၸုမ်းသိုၵ်းပျီႇတူႉၸိတ်ႉၶၢင် ဝႃႇရႃႇသုပ်ႊၼႆႉ မိၼ်းၸေႇတၢၼ်ႉ ၵေႃႉၼမ်းၼႃႈဢွၼ်ႁူဝ်ဝႆႉသေ သိုၵ်းမၢၼ်ႈပၼ်ၶႂၢင်ႉၵေႃႇတင်ႈမႃးမိူဝ်ႈ ပီ 2016 ႁႂ်ႈပၵ်းငဝ်ႈငုၼ်းတပ်ႉပၢင်သဝ်းဝႆႉတီႈ ဝၢၼ်ႈသျတူႊသုပ်ႊ ၸႄႈမိူင်းၶၢင်။

ဝၢႆးလင်သိုၵ်းမၢၼ်ႈယိုတ်းမိူင်း ပီ 2021 ယဝ်ႉသေ ၸုမ်းသိုၵ်းပျီႇတူႉၸိတ်ႉၶၢင် လႆႈယူႇတႂ်ႈတိူင်းသိုၵ်းပွတ်းႁွင်ႇလႄႈ ႁဵတ်းႁႂ်ႈဢဵၼ်ႁႅင်းယႂ်ႇၶိုၼ်ႈမႃးလိူဝ်ၵဝ်ႇ။ ယၢမ်းလဵဝ် ႁူမ်ႈၵၼ်တင်း သိုၵ်းမၢၼ်ႈယိုတ်းမိူင်းသေ တူင်ႉၼိုင်ၵႂႃႇမႃးယူႇဝႆႉ ၼႂ်းပိုၼ်ႉတီႈ ၸႄႈဝဵင်းၽႃၵၢၼ်ႉ – တၼၢႆႊ ၼႆယဝ်ႉ။