ၸွမ်ၽွင်းလူင်မိူင်းထႆး ၸတ်းပၢင်ႁပ်ႉတွၼ်ႈ မိၼ်းဢွင်ႇလၢႆႇ ၶိုၵ်ႉတွၼ်းၼႃႇလႄႈ လုၵ်ႈႁဵၼ်းၸၼ်ႉၸွမ်ထႆးလႄႈၸုမ်းၽွမ်ႉႁူမ်ႈလုၵ်ႈႁဵၼ်းလၢႆၸုမ်း ဢမ်ႇႁၼ်လီၸွမ်း ။

ဝၼ်းတီႈ 11/08/2026 ၼႆႉ ၸုမ်းၽွမ်ႉႁူမ်ႈလုၵ်ႈႁဵၼ်းတႆး TSU(Tai Students’ Union) ဢွၵ်ႇလိၵ်ႈႁၼ်လီၸွမ်း  ၸုမ်းလုၵ်ႈႁဵၼ်းၸၼ်ႉၸွမ်ထႆး 3 တီႈ ဢၼ် ဢွၵ်ႇလိၵ်ႈသၢၼ်ၶတ်း လူင်ပွင်ၸိုင်ႈထႆး ၸတ်းပၢင်ႁပ်ႉတွၼ်ႈမိၼ်းဢွင်ႇလၢႆႇ လႄႈ ၾၢင်ႉ  ႁႂ်ႈၵိုတ်းၵၢၼ်ၵွင်ႉသၢၼ်ၵၼ်တင်းသိုၵ်းမၢၼ်ႈ  ။

ၽူႈၶဝ်ႈၸုမ်းၽွမ်ႉႁူမ်ႈလုၵ်ႈႁဵၼ်းတႆး TSU ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ ပိူင်လူင်မၼ်းတႄႉ ႁဝ်းၶႃႈ ၶႂ်ႈၸုၵ်းၸင်ႈၾၢႆႇဢၼ်မီးလွင်ႈၽဵင်ႇပဵၼ်ထမ်း ။ ၸင်ႇၼၼ် လႆႈႁၼ် ၸၼ်ႉၸွမ်ထႆး 3 ဢၼ်လႄႈ ၸုမ်းလုၵ်ႈႁဵၼ်းလၢႆၸုမ်း ႁူမ်ႈၵၼ်ဢွၵ်ႇလိၵ်ႈသၢၼ်ၶတ်းလွင်ႈလူင်ပွင်ၸိုင်ႈထႆးႁပ်ႉတွၼ်ႈမိၼ်းဢွင်ႇလၢႆႇၼၼ်ႉလႄႈ ၸုမ်းႁဝ်းၶႃႈ ႁၼ်လီၸွမ်း ယွၼ်ႉဝႃႈ သိုၵ်းမၢၼ်ႈၼႆႉ မၼ်းဢမ်ႇၵႅတ်ႇၶႄပၼ်ၵူၼ်းမိူင်းသင် ” – ဝႃႈၼႆ။

သိုပ်ႇလၢတ်ႈဝႃႈ မိၼ်းဢွင်ႇလၢႆႇၼႆႉ ပဵၼ်ၽူႈၼမ်းဢၼ်ပေႉၵိၼ်လူလၢႆၵူၼ်းမိူင်း ၊ သင်ထႆးၵွင်ႉသၢၼ်ၵၼ်တင်းသိုၵ်းမၢၼ်ႈၼႆ တႃႇၶၢဝ်းယၢဝ်းမၼ်းတေဢမ်ႇမီးၽွၼ်းလီသင်မႃး ၊ ႁႂ်ႈတူၺ်းၽွၼ်းပၢင်ႈတႃႇၵူၼ်းမိူင်းတင်းသွင်ၾင်ႇသေၵမ်း ဝႃႈၼႆ ။

မိၼ်းဢွင်ႇလၢႆႇ ဢၼ်ၶိုၼ်ႈပဵၼ်ၸွမ်ၸိုင်ႈမိူင်းႁူမ်ႈတုမ်မၢၼ်ႈႁင်းၵူၺ်းၼႆႉ လူင်ပွင်ၸိုင်ႈထႆးႁွင်ႉထူပ်းပဵၼ်တၢင်းၵၢၼ်ဝႆႉ မိူဝ်ႈ ဝၼ်းတီႈ 6-7 လိူၼ်ဢေႃႊၵတ်ႉသ် 2026 ၼႆႉ။

 ၾၢႆႇၸွမ်ၽွင်းလူင်မိူင်းထႆး ႁၢင်ႈႁႅၼ်းႁပ်ႉတွၼ်ႈၶိုၵ်ႉတွၼ်းႁႅင်းၼႃႇ ၵမ်ႈၼမ် ႁၼ်ဝႃႈ မၼ်း ဢမ်ႇၵိုင်ႇလႅပ်ႈၵၼ်တင်းမိၼ်းဢွင်ႇလၢႆႇ ယွၼ်ႉပူၼ်ႉပႅၼ်သုၼ်ႇလႆႈသုၼ်ႇပဵၼ်ၵူၼ်းမိူင်းၸဝ်ႈၵဝ်ႇဝႆႉ ၼႆယူႇ။

ၸင်ႇၼၼ်လႄႈ ဝၼ်းတီႈ 07/08 /2026  ၼႆႉ ယူႇတီႈၸၼ်ႉၸွမ် ၸုလႃႊလူင်ႊၵွၼ်ႊမႁႃဝိထယႃႊလႆႊ  จุฬาลงกรณ์มหาวิทยาลัย  ၊ ၸၼ်ႉၸွမ်မႁႃဝိထယႃႊလႆႊထမ်ႊမသၢတ်ႊ  มหาวิทยาลัยธรรมศาสตร์ လႄႈ ၸၼ်ႉၸွမ်ႉမႁႃႇဝိထယႃႊလႆႊၵသဵတ်ႊတသၢတ်ႊ  มหาวิทยาลัยเกษตรศาสตร์ ႁူမ်ႈပႃးတင်း ၸုမ်းၽွမ်ႉႁူမ်ႈလုၵ်ႈႁဵၼ်း 19 ၸုမ်း ဢွၵ်ႇလိၵ်ႈသၢၼ်ၶတ်း ထႆးႁပ်ႉတွၼ်ႈသိုၵ်းမၢၼ်ႈ။

ၸင်ႇၼၼ်လႄႈ ၸုမ်းၽွမ်ႉႁူမ်ႈလုၵ်ႈႁဵၼ်းတႆး TSU ပႃးၸဵမ် ၸုမ်းၽွမ်ႉႁူမ်ႈလုၵ်ႈႁဵၼ်းယၢင်းလႅင်(ၸုမ်းသမၵလုၵ်ႈႁဵၼ်းယၢင်းလႅင်) ၊ ၸုမ်းသမၵ လုၵ်ႈႁဵၼ်းမၢၼ်ႈပတ်းပိုၼ်ႉ ၊ ၸုမ်းသမၵလုၵ်ႈႁဵၼ်းၸၼ်ႉၸွမ်ဝဵင်းလိူဝ်ႇ ၾၢႆႇပၢႆးၸၢၵ်ႈ လႄႈ လုၵ်ႈႁဵၼ်းၸၼ်ႉၸွမ် တႃႈၵုင်ႈ ၸိူဝ်းၼႆႉ ။

ၼႂ်းလိၵ်ႈပိုၼ်ၽၢဝ်ႇၼၼ်ႉ ပႃးဝႆႉဝႃႈ – “ မိၼ်းဢွင်ႇလၢႆႇၼႆႉ ယိုတ်းဢႃႇၼႃႇသေ ႁဵတ်းႁႂ်ႈၵူၼ်းမိူင်းတူၵ်းတႅမ်ႇတူၵ်းယေႃႈ ။ ၵူၼ်းပၢႆႈၽေးၵေႃႈ ၼမ်လိူဝ်မႃး။ ပူၼ်ႉပႅၼ်သုၼ်ႇလႆႈၵူၼ်း ၊ ပူၼ်ႉပႅၼ်ပၵ်းပိူင်ၸိုင်ႈမိူင်း ။  ၵၢၼ်ၶုတ်းႁႄႈၶုတ်းၶမ်းၸိူဝ်းၼႆႉၵေႃႈ ပဵၼ်မၼ်းၵေႃႉပၼ်ၶႂၢင်ႉ ႁဵတ်းႁႂ်ႈ မိူင်းထႆး လႆႈလိူတ်ႇမႆႈၸွမ်း ။ ၸင်ႇၼၼ်လႄႈ ႁႂ်ႈဝႄႈၵၢၼ်ၵွင်ႉၸွမ်းသိုၵ်းမၢၼ်ႈ ” – ဝႃႈၼႆ။