ၸိူဝ်းလုၵ်ႉၽိုၼ်ႉသိုၵ်းမၢၼ်ႈတႄႉ ၶႂ်ႈႁႂ်ႈသိုၵ်းမၢၼ်ႈ မွတ်ႈဝၢႆးၸူမ်လူမ်ႉထိုင်ႁၢၵ်ႈထိုင်တေႃဝႆးဝႆးၼႃႈယဝ်ႉၼႆသေတႃႉ ၾၢႆႇသိုၵ်းမၢၼ်ႈတႄႉ ႁႃႁူမ်ႈႁႅင်း မိူင်းၼိုင်ႈယဝ်ႉမိူင်းၼိုင်ႈမႃးၶိူဝ်းယႂ်း ။ ၼႂ်းလိူၼ်ဢေႃႊၵတ်ႉသ် 2026 ၼႆႉၵေႃႈ ၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇ ဢၼ်ၶိုၼ်ႈပဵၼ်ၸွမ်ၸိုင်ႈမိူင်းႁူမ်ႈတုမ်မၢၼ်ႈႁင်းၵူၺ်းဝႆႉၼႆႉ တေႁွတ်ႈထိုင် ႁူပ်ႉထူပ်းၸွမ်ၸိုင်ႈမိူင်းထႆး ။

လွင်ႈၼႆႉ ႁဵတ်းႁႂ်ႈ ၵူၼ်းၼမ်ပၵ်းတႃပႂ်ႉတူၺ်း။ ဢဝ်တိုဝ်ႉတၢင်းၼႆႉသေ ၾၢႆႇႁၵ်ႉသႃမႄႈၼမ်ႉမိူင်းထႆးၵေႃႈ ဢွၼ်ၵၼ်ႁၢင်ႈႁႅၼ်းယိုၼ်ႈလိၵ်ႈပၼ်မိၼ်းဢွင်ႇလၢႆႇၵမ်းသိုဝ်ႈ ။ ၵွၼ်ႇၼႃႈ မိၼ်းဢွင်ႇလၢႆႇပႆႇထိုင်ထႆးၼၼ်ႉ ဢွၼ်ၵၼ် ယိုၼ်ႈလိၵ်ႈဝႆႉတီႈလုမ်းတၢင်မၢၼ်ႈ လူင်ႈၼႃႈ။ ပိူင်လူင် ႁႂ်ႈမိၼ်းဢွင်ႇလၢႆႇ ဝႆႉၼမ်ႉၼၵ်း ၵႄႈလိတ်ႈပၼ် လွင်ႈမႄႈၼမ်ႉဝူၺ်ႇႁင်ႈ ဢၼ် ႁဵတ်းႁႂ်ႈၵူၼ်းမိူင်းတင်းသွင်ၾင်ႇထူပ်းၽေးယူႇၸိူဝ်းၼႆႉ ဝႃႈၼႆ။

ၵူၼ်းႁဵတ်းၵၢၼ်မိူင်း ၼႂ်းလုမ်ႈၾႃႉၵမ်ႈၼမ် ဢွၼ်ၵၼ်ပၵ်းတႃပႂ်ႉတူၺ်း မိၼ်းဢွင်ႇလၢႆႇ မႃးတႃႇသေႇ ဝႃႈမၼ်း တေၶၢႆႉလွၵ်းၵၢၼ်သိုၵ်းၵၢၼ်မိူင်းၸိူင်ႉႁိုဝ် ။
ဝၢႆးသေ မိၼ်းဢွင်ႇလၢႆႇ တႅင်ႇတင်ႈၶိုၼ်ႈပဵၼ် ၸွမ်ၸိုင်ႈႁင်းၵူၺ်းမႃးၼႆႉ ယိင်ႈၶႅၼ်းပဵၼ်တီႈ ပၵ်းတႃ ၵူၼ်းတင်း လုမ်ႈၾႃႉမႃး ပိူဝ်ႈတႃႇ တေလႆႈ လွင်ႈၵႄႈၶႆ ပၼ်ႁႃၵၢၼ်မိူင်းလၢႆ လွင်ႈ။

ပွၵ်ႈၼႆႉ မိၼ်းဢွင်ႇလၢႆႇ မီးၽႅၼ်တႃႇႁွတ်ႈထိုင် မိူင်းထႆး တႃႇႁူပ်ႉထူပ်းဢုပ်ႇဢူဝ်းၸွမ်း ၸွမ်ၸိုင်ႈမိူင်းထႆး ဢၼုထိၼ်ႊ ၶျၢၼ်ႊဝီႊရၵုၼ်ႊ ၼႆလႄႈ သမ်ႉပေႃးလိုဝ်းလူင်ဝႆႉ။
ၵၼ်ႊၼဝီႊ သိုပ်ႇသႅင် กัณวีร์ สืบแสง တႅၼ်းၽွင်းမိူင်းထႆး ပိုတ်ႇလၢတ်ႈၵူၼ်းၼမ်ဝႆႉဝႃႈ ၶၢဝ်းတၢင်းမိၼ်းဢွင်ႇလၢႆႇ မႃးထႆး ပွၵ်ႈၼႆႉ ၸၢင်ႈၵွင်ႉၼွင်ႇၸွမ်းလၢႆလွင်ႈလၢႆဢၼ် ၸၢင်ႈဢုပ်ႇပႃးလွင်ႈ ထႆးႁၼ်ထိုင်မိူင်းမၢၼ်ႈၸိူင်ႉႁိုဝ် တေမီး ၽႅၼ်လႅၵ်ႈလၢႆႈမူႇပိူင်ထႆး-မၢၼ်ႈၸိူင်ႉႁိုဝ် ၼႆၸိူဝ်းၼႆႉ။ တေၸၢင်ႈ တုမ်ႉယွၼ်ႈထိုင် ၸုမ်းဢႃႊသီႊယၼ်ႊ လႄႈ လၢႆလၢႆၸိုင်ႈမိူင်းယူႇ ဝႃႈၼႆဝႆႉ။

သိုပ်ႇလၢတ်ႈဝႃႈ ထႆးလႄႈမိူင်းႁူမ်ႈတုမ်မၢၼ်ႈၼႆႉ ပဵၼ်မိူင်းဢၼ်တိတ်းၸပ်းၵၼ် ပဵၼ်မိူင်းဢိင်လင်ၾင်ၼွင်ႈ ၵၼ်မႃးပၢၼ်သိုပ်ႇပၢၼ်လႄႈ ၵၢင်းယၢၼ်ၵၼ်ဢမ်ႇလႆႈ ။ ၵႃႈတေလႆႈႁူႉၶိုတ်းၸွမ်းၽႅၼ်ၵၢၼ်မိူင်းမၢၼ်ႈ ၵႃႈတေလႆႈၵပ်းသိုပ်ႇၵပ်းသၢၼ်တေႃႇမိူင်းမၢၼ်ႈၵႂႃႇထႅင်ႈယူႇ ။ ပိူဝ်ႈတႃႇ လႅၼ်လိၼ်ဢၼ်တိတ်းၸပ်းၵၼ် ပေႃးတေမီးလွင်ႈႁူမ်ႇလူမ်ႈ လႄႈ တႃႇပႂ်ႉတူၺ်းၵႂၢတ်ႇလၢင်ႉၽူႈမီးတၢင်းၽိတ်းၶၢမ်ႈမိူင်း ၸိူဝ်းၼႆႉ ။ တႃႇလႆႈၽွၼ်းပၢင်ႈ တေႃႇၵူၼ်းမိူင်းၼၼ်ႉၵေႃႈ ဢမ်ႇသွၼ်ႇပႃးတိုၼ်းဢမ်ႇပဵၼ် ဝႃႈၼႆ။

ၸင်ႇၼၼ် လႄႈ မိူဝ်ႈႁူႉဝႃႈ မိၼ်းဢွင်ႇလၢႆႇ တေႁွတ်ႈမိူင်းထႆး ၼႂ်းဝၼ်းတီႈ 6 – 7 လိူၼ်ဢေႃႊၵတ်ႉသ်ၼႆႉၼၼ်ႉ ၸုမ်းႁၵ်ႉသႃမႄႈၼမ်ႉ ဢၼ်တင်ႈၸိုဝ်ႈၸုမ်းဝႆႉဝႃႈ ၼႅင်ႈသၢၼ်ႁႄႉၵင်ႈမႄႈၼမ်ႉ เครือข่ายประชาชนปกป้องแม่น้ำกก สาย รวก โขง ၸင်ႇႁူမ်ႈၵၼ် ၵႂႃႇယိုၼ်ႈလိၵ်ႈတိုၵ်းသူၼ်းမိၼ်းဢွင်ႇလၢႆႇလူင်ႈၼႃႈ တီႈၵုင်းသုၼ်မၢၼ်ႈ(လုမ်းတၢင်မၢၼ်ႈ) ၼႂ်းၸႄႈတွၼ်ႈၵဵင်းမႂ်ႇ ၸိုင်ႈထႆး ဝႆႉ မိူဝ်ႈဝၼ်းတီႈ 03/08/2026 ။

ၼႂ်းၽိုၼ်လိၵ်ႈတိုၵ်းသူၼ်းၼၼ်ႉ ပႃးဝႆႉဝႃႈ ၵၢၼ်ဢၼ်ႁဵတ်းႁႂ်ႈမႄႈၼမ်ႉဝူၺ်ႇႁင်ႈၼႆႉ ႁႂ်ႈၵိုတ်းပၼ်ၵမ်းလဵဝ် ႁႂ်ႈၵႄႈလိတ်ႈပၼ်ၽႂ်းၽႂ်း ဝႃႈၼႆဝႆႉ။
ၶေႃႈပိုတ်ႇမၼ်းၵေႃႈ တိုၼ်းဝႃႈ ယိုၼ်ႈၸူး မိၼ်းဢွင်ႇလၢႆႇၵမ်းသိုဝ်ႈ ။ ပိူင်လူင်ၵေႃႈ ၸီႉၸမ်ႈတႅမ်ႈဝႆႉဝႃႈ ယွၼ်ႉပိူဝ်ႈ ၵၢၼ်ၶုတ်းႁႄႈၵူႈလွင်ႈလွင်ႈ ၼႂ်းမိူင်းႁူမ်ႈတုမ်မၢၼ်ႈသေ ႁဵတ်းႁႂ်ႈ ၵူၼ်းမိူင်းထႆး ၸိူဝ်းယူႇၸွမ်း သၢပ်ႇမႄႈၼမ်ႉၵူၵ်း ၼမ်ႉသၢႆ ၼမ်ႉႁူၵ်း ၼမ်ႉၶွင် ၸိူဝ်းၼႆႉ ထူပ်းၽေးၼမ်ႉဝူၺ်ႇၼမ်ႉႁင်ႈ မီးၵွင်ႉငူၼ်ႉ ။

ပႃးဝႆႉထႅင်ႈဝႃႈ မိူၼ်မႄႈၼမ်ႉၶွင်ၼႆႉ ၵူၼ်းမိူင်းၸိူဝ်းယူႇပိုင်ႈၵၢၼ်ၽုၵ်ႈသွမ်ႈသေ ယူႇသဝ်းၵိၼ်သၢင်ႈ မီးထိုင် 110000 ႁႆႈ( ၼပ်ႉဢေႊၶိူဝ်ႊ ဢမ်ႇယွမ်း 40000 ) ။ ပိူင်လူင် ၵူၼ်း ၸိူဝ်းၽုၵ်ႇၶဝ်ႈတူင်ႈၶဝ်ႈၼႃး တၵ်းလႆႈၸႂ်ႉတိုဝ်းမႄႈၼမ်ႉၶွင် ။ မႄႈၼမ်ႉၶွင်ဝူၺ်ႇႁင်ႈမီးၵွင်ႉၵေႃႈ တုမ်ႉတိူဝ်ႉတူၼ်ႈၶဝ်ႈလႄႈတူၼ်ႈၵူႈၸိူဝ်းၸိူဝ်း ဢၼ်ၽုၵ်ႇၵိၼ်ၽုၵ်ႇၶၢႆ ၼႂ်းၸိုင်ႈထႆး။

ပႃးၸဵမ်ၵူၼ်းႁႃပူႁႃပႃ ၸိူဝ်းပဵၼ်လႃႈၼမ်ႉၸိူဝ်းၼႆႉၵေႃႈ ထူပ်းၽေးရေႃးၵႃႇတၢင်းပဵၼ် ၼိူဝ်ႉၼင် ၶူမ်းၵၢႆး ၸဵပ်းယဵၼ်း မႃးၶိူဝ်းယႂ်း ။ တူဝ်သတ်းယူႇၼႂ်းၼမ်ႉၵေႃႈ ဢမ်ႇမူတ်းသႂ် လႄႈ ၵူၼ်းၵိၼ်မၼ်းၵေႃႈ တၵ်းမီးၽေး။

ဢမ်ႇၵွမ်ႉ ၵူၼ်းၽုၵ်ႇသွမ်ႈ ၵူၼ်းႁႃပူႁႃပႃ ၵူၺ်း ဢၼ်တုမ်ႉတိူဝ်ႉ ။ သင်ဝႃႈ ၶူဝ်းဢွၵ်ႇၼႂ်းသူၼ်ႁႆႈၼႃး ၊ ႁွႆပူပႃ ၼႂ်းမႄႈၼမ်ႉၸိူဝ်းၼႆႉ ၸွတ်ႇႁွတ်ႈထိုင် ပတ်းပိုၼ်ႉမိူင်းၸိုင်ႈထႆးၵေႃႈ တေပႃးၵၼ်ထူပ်းၽေးတင်းမူတ်း။

ၸင်ႇၼၼ်လႄႈ တင်ႈၸႂ်တိုၵ်းသူၼ်းႁႂ်ႈမိၼ်းဢွင်ႇလၢႆႇ ႁပ်ႉႁူႉႁဵတ်းၸွမ်းၵမ်းလဵဝ် ၼႆ ၼၢင်းသႅင်မိူင်းလီ မူလၼိထိရူမ်ႊၽူဝ်ႊ မႄႈဢၢႆး လၢတ်ႈၼႄလွင်ႈတၢင်းဝႆႉၼင်ႇၼႆ –

လွင်ႈၼႆႉ ထိုင်တႄႉထိုင်တီႈမိၼ်းဢွင်ႇလၢႆႇၼႄႉၼွၼ်းယဝ်ႉ ၊ ၵူၺ်းၵႃႈ မၼ်းတေဢဝ်ဢမ်ႇဢဝ်ၼၼ်ႉၼႃႇ။ မၼ်းယူႇတီႈလူင်ပွင်ၸိုင်ႈသွင်ၾၢႆႇၼၼ်ႉၼႃႇၼေႃႈ။ႁဝ်းၵေႃႈမွင်းဝႃႈ ၶဝ်တေသႂ်ႇၸႂ်သႂ်ႇၶေႃးပၼ် လိူင်ႈၸိူဝ်းၼႆႉ ၵႄႈၶႆပၼ်ႁႃလွင်ႈၸိူဝ်းၼႆႉၼၼ်ႉၵႃႈ

လိၵ်ႈယိုၼ်ႈၸူးမိၼ်းဢွင်ႇလၢႆႇၼၼ်ႉ လၢတ်ႈပႃးဝႃႈ ၼႂ်းၸိုင်ႈထႆးၼႆႉ ယၢမ်းလဵဝ် မူႇဝၢၼ်ႈ ဢမ်ႇယွမ်း 60 ဝၢၼ်ႈ ဢၼ်ယူႇတိတ်းၸပ်းၾင်ႇမႄႈၼမ်ႉၸိူဝ်းလၢတ်ႈမႃးၼႆႉ ၵူၼ်းဝၢၼ်ႈ ၺႃးၵွင်ႉငူၼ်ႉ ဢၼ်လုၵ်ႉမႃးတီႈ ထၢတ်ႈ(သၢၼ်) ဢၼ်ၸႂ်ႉၼႂ်းၵၢၼ်ၶုတ်းႁႄႈၶုတ်းၶမ်း မိူၼ်ၼင်ႇ ထၢတ်ႈၸိုၼ်း ၊ ထၢတ်ႈၶတ်ႊမီႊယမ်ႊ(cadmium) လႄႈ ထၢတ်ႈ ဢၼ်ၸႂ်ႉၼႂ်းၶၵ်ႉတွၼ်ႈထွင်ၶမ်း (ပြဒါးဓာတ်) ၸိူဝ်းၼႆႉထႅင်ႈ။ ယွၼ်ႉၵွင်ႉၸိူဝ်းၼႆႉသေ ၸိူဝ်းလႆႈၵိုတ်းယင်ႉ ၵၢၼ်ႁႃၵိၼ်လဵင်ႉတွင်ႉၵႂႃႇၵေႃႈမီး ။

ၾၢႆႇပၢႆးယူႇလီမိူင်းထႆးၵေႃႈ ပိုၼ်ၽၢဝ်ႇဝႆႉဝႃႈ ႁွႆ ၵုင်ႈ ပႃ ပူ ဢၼ်ဢွၵ်ႇၸွမ်းမႄႈၼမ်ႉဢၼ်မီးၵွင်ႉမီးငူၼ်ႉၸိူဝ်းၼႆႉ ဢမ်ႇလီတေႃႇပၢႆးယူႇလီ ဢမ်ႇၵိုင်ႇလီ ႁႃၵိၼ်ႁႃၶၢႆ ။
မႄႈၼမ်ႉမီးၵွင်ႉငူၼ်ႉယူႇၵေႃႈ ဢမ်ႇမီးတၢင်းလိူၵ်ႈလႄႈ မိူၼ်ၵူၼ်းမိူင်းၼႂ်းၵဵင်းႁၢႆး ၸိူဝ်းၼႆႉ ထိုင်မိူဝ်ႈလဵဝ် လႆႈၸႂ်ႉ ပဵၼ်ၼမ်ႉၵိၼ်ၼမ်ႉလၢင်ႉၵေႃႈမီး ။ ၵူၼ်းဢၼ်လႆႈ ပိုင်ႈၼမ်ႉၵူၵ်း ၼမ်ႉၶွင်ၸိူဝ်းၼႆႉ ၼႂ်းၵဵင်းႁၢႆးၼႆႉ မီးထိုင် 40000(သီႇမိုၼ်ႇ)မုင်ႉႁေႃႁိူၼ်း ၊ ပေႃးၼပ်ႉႁူဝ်ၵူၼ်းၵေႃႈ 120000 (ၼိုင်ႈသႅၼ်သွင်မိုၼ်ႇ) ။ ၵူၼ်းၸိူဝ်းၼႆႉ လႆႈၸႂ်ႉ ၼမ်ႉဢၼ်တိုၵ်ႉဝူၺ်ႇ ႁင်ႈဝႆႉယူႇ။ ယွၼ်ႉဝႃႈ ၸဵမ်ပိုင်းၵေႃႈ လူင်ပွင်ၸိုင်ႈ တိုၼ်း တေႃႇလွတ်ႇၼမ်ႉ ပၼ်ထိုင်ႁိူၼ်း ဢၼ်လုတ်ႇဢဝ်မႃးတီႈမႄႈၼမ်ႉဢၼ်ၸမ်ဝဵင်းတီႈသုတ်း ။

လွင်ႈဝႃႈ ၵူၼ်းမိူင်းထူပ်းၽေးၼမ်ႉ ဢၼ်မီးသၢၼ်ၵွင်ႉသၢၼ်ငူၼ်ႉယူႇၼႆႉ ၸုမ်းတူင်ႇၵူၼ်းလၢႆၸုမ်းႁူမ်ႈၵူၼ်းမိူင်းသေ ယၢမ်ႈဢွၵ်ႇၼႄၵၢင်ၸႂ်မႃးလၢႆၵမ်းယဝ်ႉသေတႃႉ ပႆႇႁၼ်ၾၢႆႇလႂ်လူင်းမိုဝ်းၵႄႈလိတ်ႈပၼ်လႆႈ ။ တေႃႈၼင်ႇ ၼႂ်းလိူၼ်ဢေႊပရိူဝ်ႊလ်ဝၼ်းတီႈ 21 ပီ 2026 ၼႆႉ ယင်းဢွၵ်ႇလိၵ်ႈၵိုၵ်းၸွမ်းၸၢတ်ႈၸိုင်ႈလုမ်ႈၾႃႉဝႆႉယူႇသေတႃႉ ၾၢႆႇၶွမ်ႊမသျိၼ်ႊသိုၵ်းမၢၼ်ႈ ယင်းဢွၵ်ႇလိၵ်ႈလၢတ်ႈၵႄႈတူဝ်ဝႄႈႁူဝ်ဝႆႉဝႃႈ ၸွမ်းၾင်ႇႁိမ်းၼမ်ႉၵူၵ်း ဢမ်ႇလႆႈၶုတ်းႁႄႈသင် ၼႆလူးၵွၼ်ႇ ။

လွင်ႈၼႆႉ ၼႂ်းၽိုၼ်လိၵ်ႈတိုၵ်းသူၼ်း ၸုမ်းႁၵ်ႉသႃမႄႈၼမ်ႉမိူင်းထႆး တူၵ်ႇတၵ်ႉလၢတ်ႈပႃးဝႃႈ ဢၼ်သိုၵ်းမၢၼ်ႈ တုမ်ႉတွပ်ႇလၢတ်ႈဝႃႈ ဢမ်ႇလႆႈၶုတ်းႁႄႈသင်ၼႆၼၼ်ႉ မိူၼ်တင်း လူလၢႆတေႃႇ ၸၢတ်ႈၸိုင်ႈလုမ်ႈၾႃႉလႄႈၵူၼ်မိူင်းထႆး ၊ မၼ်းၼႄပိူင်ၾၢင်ဢၼ်ဢမ်ႇၼပ်ႉယမ်တေႃႇၵၼ်။

ၸင်ႇၼၼ်လႄႈ ၸင်ႇလႆႈဢွၵ်ႇလိၵ်ႈတိုၵ်းသူၼ်းဝႆႉႁၢဝ်ႈႁႅင်းဝႃႈ ၵၢၼ်ၶုတ်းၶမ်းမိူင်းႁူမ်ႈတုမ်မၢၼ်ႈ ဢၼ်မီးၸွမ်းၾင်ႇၼမ်ႉၵူၵ်း ၼမ်ႉသၢႆ ၼမ်ႉႁူၵ်း ၼမ်ႉၶွင် ၸိူဝ်းၼႆႉႁႂ်ႈယွမ်းႁပ်ႉ လွင်ႈဢၼ်ပဵၼ်တေႉမီးတေႉသေ ၵိုတ်းပၼ်ၽႂ်းၽႂ်း ။ သင်ဝႃႈ ပႆႇမီးလွၵ်းလၢႆးၵႄႈလိတ်ႈသင်ဝႆႉၼႆ ၵွၼ်ႇပႆႇႁဵတ်းသင်လႆႈၼႆႉ ႁႂ်ႈၵိုတ်းပၼ်ၵမ်းလဵဝ် ဝႃႈၼႆဝႆႉ ။

လွင်ႈၼႆႉ ၼၢင်းသႅင်မိူင်းလီ မူလၼိထိရူမ်ႊၽူဝ်ႊ မႄႈဢၢႆး သိုပ်ႇလၢတ်ႈၼင်ႇၼႆ –

ၸူဝ်ႈမိူင်းထႆးတင်းမိူင်းမၢၼ်ႈၼႆႉ ပႆႇႁႃလွၵ်းလၢႆးတၢင်း တႃႇတေၵႄႈၶႆၸိူဝ်းၼႆႉလႆႈ ၶႂ်ႈႁႂ်ႈၵိုတ်းပၼ်လွင်ႈၼႆႉသေၵွၼ်ႇ။ပေႃးဝႃႈ ၼမ်ႉၼွင်းၼမ်ႉထူမ်ႈမႃးထႅင်ႈၵမ်းၼိုင်ႈ တႃႇမႃးၸွႆႈၵၼ်ၼႆႉ ၽႂ်ၵေႃႈ တေဢမ်ႇၶႂ်ႈလူင်းၼမ်ႉယဝ်ႉ။ၵမ်ႈၽွင်ႈ ဢၼ်ပိူၼ်ႈၶူမ်းပိူၼ်ယဵၼ်းၸိူဝ်းၼၼ်ႉ မၼ်းပဵၼ်တေႉမီးတေႉလူး

ၼႂ်းၵၢၼ်တူင်ႉၼိုင် ယိုၼ်ႈလိၵ်ႈတိုၵ်းသူၼ်းၸူး မိၼ်းဢွင်ႇလၢႆႇ တီႈလုမ်းတၢင်သိုၵ်းမၢၼ်ႈ ၸႄႈတွၼ်ႈၵဵင်းမႂ်ႇၼၼ်ႉ ပႃး ၼၢႆးသိုပ်ႇသၵုၼ်ႊ ၵိတ်ႇၼုၵွၼ်ႊ ၽူႈၵတ်ႉလႅၼ်ႇၾၢႆႇသိင်ႇ ဝႅတ်ႉလွမ်ႉလႄႈတူင်ႇၵူၼ်း တီႈ ၸၼ်ႉၸွမ် မႄႈၾႃႉလူင် ႁူမ်ႈတင်း ၸုမ်းႁၵ်ႉသႃမႄႈၼမ်ႉ ၼႂ်းၸႄႈတွၼ်ႈၵဵင်းႁၢႆး ၸႄႈတွၼ်ႈၵဵင်းမႂ်ႇ ႁူမ်ႈၵၼ်ဝႆႉ။ လိၵ်ႈဢၼ်ယိူင်းသူင်ႇၸူးမိၼ်းဢွင်ႇလၢႆႇၼၼ်ႉတႄႉ ၽူႈမီးၸၼ်ႉပလိၵ်ႈထႆးၸႄႈဝဵင်းၸၢင်ႉၽိူၵ်ႇ ႁပ်ႉဢဝ်ဝႆႉ ။

လွင်ႈမိၼ်းဢွင်ႇလၢႆႇ တေႁွတ်ႈထိုင်မိူင်းထႆး ပွၵ်ႈၼႆႉ ၽွၼ်းတုမ်ႉယွၼ်ႈတေမီးသင်လၢႆလၢႆ ၼႆ ပႆႇလၢတ်ႈလႆႈ တႅတ်ႈၼႅတ်ႈသေတႃႉ ဢၼ်မိူင်းထႆးပိုတ်ႇၸႂ်ႁပ်ႉတွၼ်ႈ မိၼ်းဢွင်ႇလၢႆႇ ၵေႃႉဢၼ်ၶိုၼ်ႈၽွင်းငမ်းၸိုင်ႈမိူင်းႁင်းၵူၺ်း လူၺ်ႈဢမ်ႇထွမ်ႇၵၢင်ၸႂ်ၵူၼ်းမိူင်းၼႆႉ မိူၼ်တင်း ႁၼ်လီၸွမ်းလွင်ႈႁဵတ်းသၢင်ႈသိုၵ်းမၢၼ်ႈ မိူၼ်တင်းၵမ်ႉထႅမ် ဢၼ်ဢမ်ႇၽဵင်ႇပဵင်းပဵၼ်ထမ်းၵူၺ်း ၼႆ ၽူႈလဵပ်ႈႁဵၼ်းၵၢၼ်မိူင်းၵမ်ႈၼမ် တႄႉ ဢွၼ်ၵၼ်လၢတ်ႈၼင်ႇၼႆ ။