မိူဝ်ႈၼႆႉ ဝၼ်းတီႈ 15/6/2026 ယၢမ်းၵၢင်ၼႂ် မိၼ်းဢွင်ႇလၢႆႇ ၸွမ်ၸိုင်ႈယိုတ်းမိူင်း ဢွၵ်ႇၶၢဝ်းတၢင်းၵႂႃႇမိူင်းၶႄႇ ပိူဝ်ႈတႃႇႁူပ်ႉထူပ်းၸွမ်း သျီႊၸျိၼ်ႉၽိင်ႊ ၸွမ်ၸိုင်ႈမိူင်းၶႄႇ ဝႃႈၼႆ။

ၸွမ်းၼင်ႇၸွမ်ၸိုင်ႈမိူင်းၶႄႇ မွၵ်ႇမႃးသေ မိၼ်းဢွင်ႇလၢႆႇ ၸွမ်ၸိုင်ႈယိုတ်းမိူင်း လုၵ်ႉတီႈၶူင်ႇႁိူဝ်းမိၼ်သိုၵ်း ဝဵင်းလူင်ၼေႇပျီႇတေႃႇ ဢွၵ်ႇၶၢဝ်းတၢင်းၵႂႃႇမိူင်းၶႄႇ တင်ႈတႄႇဝၼ်းတီႈ 15 ထိုင် 19/06/2026 တႃႇၶၢဝ်း တၢင်း 5 ဝၼ်း။ ၶၢဝ်းတၢင်းၼၼ်ႉ မိၼ်းဢွင်ႇလၢႆႇ ႁွင်ႉဢဝ်ပႃးၸုမ်းတူဝ်တႅၼ်း လူင်ပွင်ၸိုင်ႈ သိုၵ်းမၢၼ်ႈ ဢၢၼ်းတေ ႁူပ်ႉဢုပ်ႇၸွမ်း ၸွမ်ၽွင်းလူင်မိူင်းၶႄႇ ၊ ႁူဝ်ပဝ်ႈၵေႃႇမတီႇၵွၼ်ႇၵရႅတ်ႉၸိူဝ်ႉၸၢတ်ႈၶႄႇ ၸဵမ်ၸိူဝ်းၼႆႉ။

မိူဝ်ႈပူၼ်ႉမႃး လိူၼ်ၵျုၼ်ႊ 5 ဝၼ်းၼႆႉၵေႃႈ ၽွင်းလူင်ၾၢႆႇၼွၵ်ႈမိူင်း မိူင်းၶႄႇ ဝင်ႊယိ ႁူပ်ႉထူပ်းၵၼ်တင်း ဢူးတိၼ်ႇမွင်ႇသူၺ်ႇ ၽွင်းလွင်ၾၢႆႇၵၢၼ်မိူင်း ၼႂ်းၸုမ်းလူင်ပွင်ၸိုင်ႈယိုတ်းမိူင်းယဝ်ႉပွၵ်ႈၼိုင်ႈယဝ်ႉ။

လႆႈႁူႉဝႃႈ မိၼ်းဢွင်ႇလၢႆႇ ဢွၵ်ႇၶၢဝ်းတၢင်းၵႂႃႇမိူင်းၶႄႇပွၵ်ႈၼႆႉ လမ်ႇလွင်ႈတႃႇ လူင်ပွင်ၸိုင်ႈယိုတ်းမိူင်းတေႉတေႉသေ ယိူင်းဢၢၼ်းႁႂ်ႈၸိုင်ႈမိူင်းၼွၵ်ႈယွမ်းႁပ်ႉ လႄႈ ၵမ်ႉထႅမ် ႁၼ်လီၼိူဝ် လူင်ပွင်ၸိုင်ႈယိုတ်းမိူင်းမႃးၵူၺ်းဢမ်ႇၵႃး ပဵၼ်တႃႇႁူမ်ႈမိုဝ်းၵၼ်တင်း ၸိုင်ႈမိူင်းဢၼ်မီးဢဵၼ်ႁႅင်းယႂ်ႇသေ ႁဵတ်းသၢင်ႈၵၢၼ်ငၢၼ်းၵႂႃႇလႆႈတေႉတေႉၼၼ်ႉၼႆ Global Times ႁၢႆးငၢၼ်းဝႆႉၼင်ႇၼႆ။

ၾၢႆႇသိုဝ်ႇၶၢဝ်ႇမိူင်းၶႄႇတႄႉ ႁၢႆးငၢၼ်းဢွၵ်ႇဝႆႉဝႃႈ ၶၢဝ်းတၢင်းပွၵ်ႈၼႆႉ လမ်ႇလွင်ႈတႃႇ ၶၵ်ႉၵၢၼ်ၵႂၢတ်ႇလၢင်ႉ ၸုမ်းႁဵတ်းၵၢၼ်ၵျႃႊၽျႅၼ်ႉ ၸွမ်းလႅၼ်လိၼ် ၊ ၶူင်းၵၢၼ်သဵၼ်ႈတၢင်းႁွပ်ႈလူၵ်ႈ BRI တင်း ၶူင်းၵၢၼ်ၵေႃႇသၢင်ႈႁူင်းၵေႃႇၵၢႆႇ လႄႈ တႃႈႁိူဝ်းၼမ်ႉလိုၵ်ႉ ၸဵမ်ၸိူဝ်းၼႆႉ ဝႃႈၼႆ။

မိၼ်းဢွင်ႇလၢႆႇၼႆႉ ဝၢႆးလင်လႆႈၶိုၼ်ႈၸၼ်ႉပဵၼ်ၸွမ်ၸိုင်ႈမႃး ဢွၵ်ႇၶၢဝ်းတၢင်းၵႂႃႇႁူပ်ႉထူပ်းတင်း ၸွမ်ၸိုင်ႈ မိူင်းဢိၼ်ႊတီႊယိူဝ်ႊ မိူဝ်ႈလိူၼ်မေႊ ဝၼ်းတီႈ 31 ထိုင် လိူၼ်ၵျုၼ်ႊ ဝၼ်းတီႈ 3 ပဵၼ်ပွၵ်ႈၵမ်းႁႅၵ်ႈယဝ်ႉ ၶိုၼ်းဢွၵ်ႇၶၢဝ်းတၢင်းၵႂႃႇမိူင်းၶႄႇ ပွၵ်ႈၼႆႉ ပဵၼ်ပွၵ်ႈၵမ်းသွင် ဝႃႈၼႆ။