မိူဝ်ႈၼႆႉ ဝၼ်းတီႈ 3/08/2026 ႁွင်ႈၵၢၼ်ၶၢဝ်ႇတႂ်ႈသိုၵ်းမၢၼ်ႈယိုတ်းမိူင်း ဢွၵ်ႇၶၢဝ်ႇမႃးဝႃႈ – တူဝ်တႅၼ်း ၸုမ်းၶႂၢႆႇၶႃပႄလႅင် ICRC ၵဵဝ်ႇၵပ်းမိူင်းမၢၼ်ႈ မႃးႁူပ်ႉထူပ်းၵၼ်တင်း ၽူႈၵိူဝ်းၵုမ်ၸိုင်ႈမိူင်း တေႃႇဢွင်ႇသၢၼ်းၸူႉၵျီႇ ဝႃႈၼႆ။

ၽူႈၶၢၼ်ပၢၵ်ႇ ၶွင်ႇသီႇသိုၵ်းမၢၼ်ႈ တေႃႇၶၢႆႇၶၢႆႇၸူဝ်း တႅမ်ႈတၢင်ႇဝႆႉတီႈ ထႄႊလီႊၵရႅမ်ႊ ဝႃႈ – Mr. Arnaude de Baqque တူဝ်တႅၼ်း ၸုမ်းၶႂၢႆႇၶႃပႄလႅင် ICRC ၵဵဝ်ႇၵပ်းမိူင်းမၢၼ်ႈ မႃးႁူပ်ႉထူပ်း တေႃႇဢွင်ႇသၢၼ်းၸူႉၵျီႇ ဝႃႈၼႆသေ တၢင်ႇဝႆႉၶႅပ်းႁၢင်ႈ 4 ဢၼ်။ 2 ဢၼ် ပဵၼ်ႁၢင်ႈ Mr. Arnaude de Baqque လႄႈ ဢွင်ႇသၢၼ်းၸူႉၵျီႇ ႁူပ်ႉထူပ်းယိပ်းမိုဝ်းၵၼ်ဝႆႉ။ ထႅင်ႈ 2 ဢၼ်တႄႉ ပဵၼ်ႁၢင်ႈဢၼ်ဢွင်ႇသၢၼ်းၸူႉၵျီႇ ထိူဝ်ၶဝ်ႈမုၼ်းၶဵၵ်ႉဝၼ်းၵိူတ်ႇ။

ၵူၺ်းၵႃႈ ၼႂ်းၽူတ်ႉသ် တေႃႇၶၢႆႇၶၢႆႇၸူဝ်းၼၼ်ႉ ဢမ်ႇႁၼ်တႅမ်ႈဝႆႉပႃးဝႃႈ ႁူပ်ႉထူပ်းၵၼ် ဝၼ်းလႂ်၊ တီႈလႂ်၊ ဢုပ်ႇဢူဝ်းသင်ၵၼ် ၼႆၸိူဝ်းၼႆႉ။ ၶႅပ်းႁၢင်ႈ တီႈၶဝ်ႈမုၼ်းၶဵၵ်ႉဝၼ်းၵိူတ်ႇမၼ်းၼၢင်းၼၼ်ႉၵေႃႈတႅမ်ႈဝႆႉပဵၼ်ဝၼ်းတီႈ 29/06/2026 ၼႆဝႆႉ ။ လွင်ႈၼႆႉ ယူႇတီႈ ICRC ၵေႃႈပႆႇႁၼ်ဢွၵ်ႇၶၢဝ်ႇသင်။ သိုဝ်ႇၶၢဝ်ႇ Reuters ၼွၵ်ႈမိူင်းတႄႉၵေႃႈဢိင်ၼိူဝ်ၶႅပ်းႁၢင်ႈတေႃႇၶၢႆႇၶၢႆႇၸူဝ်း သေဢွၵ်ႇၶၢဝ်ႇဝႆႉယူႇ။

ၼွၵ်ႈလိူဝ်ၼၼ်ႉ ႁၢင်ႈၾၢင်ဢွင်ႇသၢၼ်းၸူႉၵျီႇၵေႃႈ တိုၵ်ႉပဵၼ်ႁၢင်ႈၾၢင်ဢၼ် ၵွၼ်ႇၼႃႈၺႃးတီႉၺွပ်းပုၼ်ႉ ။ ၵွပ်ႈၼႆလႄႈ ၵူၼ်းမိူင်းမၢၼ်ႈၸိူဝ်းၶဝ်ႈတူၺ်းၶၢဝ်ႇတၢင်းဢွၼ်ႊလၢႆႊတႄႉဢွၼ်ၵၼ်တႅမ်ႈတၢင်ႇ/ ၶွမ်ႊမႅၼ်ႉဝႆႉဝႃႈ ပဵၼ်ၶၢဝ်ႇပွမ်လႄႈၶႅပ်းႁၢင်ႈပွမ်ဢၼ်သိုၵ်းမၢၼ်ႈသၢင်ႈၶိုၼ်ႈမႃးလွၵ်ႇလႅၼ်ၵူၼ်းမိူင်းလႄႈၵူၼ်းတင်းလုမ်ႈၾႃႉၵူၺ်း။ ဢမ်ႇၸႂ်ႈၶႅပ်ႈႁၢင်ႈဢၼ်တႄႉမၼ်း ဝႃႈၼႆ။ ၵူၺ်းၵႃႈ ဢမ်ႇမီးၽႂ်ယိုၼ်ယၼ်လႆႈတႅတ်ႈတေႃးဝႃႈ ဢွင်ႇသၢၼ်းၸူႉၵျီႇၸွင်ႇတိုၵ်ႉမီးယူႇတႄႉ- ယူႇလီယူႇႁႃႉၸဵမ်ၸိူဝ်းၼႆႉ။

တေႃႇဢွင်ႇသၢၼ်းၸူႉၵျီႇၼႆႉ ၸဵမ်မိူဝ်ႈတပ်ႉသိုၵ်းမၢၼ်ႈ ယိုတ်းဢဝ်ဢႃႇၼႃႇၸိုင်းမိူင်း ၼႂ်းႁူဝ်ပီ 2021 ၼၼ်ႉ ထုၵ်ႇတီႉၺွပ်းၵုမ်းၶင်မႃး ႁိုင်မႃးၶၢဝ်းတၢင်း 2000 ဝၼ်းပၢႆယဝ်ႉ။ ၼႂ်းၶၢဝ်းတၢင်း 5 ပီပၢႆမႃးၼႆႉ လၢႆမူႇလၢႆၸုမ်း ၼႂ်းမိူင်းၼွၵ်ႈမိူင်း ဢိၵ်ႇပႃး ဢႃႊသီႊယၼ်ႊ ယၢမ်ႈတိုၵ်းသူၼ်းသိုၵ်းမၢၼ်ႈ ႁႂ်ႈပွႆႇၶိုၼ်း ဢွင်ႇသၢၼ်းၸူႉၵျီႇ ယူႇသေတႃႉ ႁၢၼ်ႉတေႃႇထိုင်ယၢမ်းလဵဝ်တႄႉ သိုၵ်းမၢၼ်ႈ ပႆႇပွႆႇပၼ်သေဢမ်ႇၵႃး ဢမ်ႇပၼ်ၽႂ်ၵႂႃႇႁူပ်ႉထူပ်းပႃး။ ၸင်ႇၼၼ် လုၵ်ႈၸၢႆးမၼ်းၼၢင်း မိတ်ႊသတိူဝ်ႊ ၶိမ်ႊဢေႊရိတ်ႉသ် ၸင်ႇလႆႈဢွၵ်ႇမႃးလၢတ်ႈ- တုၵ်းယွၼ်း သင်ဝႃႈ မႄႈမၼ်း ဢွင်ႇသၢၼ်းၸူႉၵျီႇ ဢမ်ႇပႆႇတၢႆၸိုင် ဢဝ်တူဝ်မႄႈမၼ်းဢွၵ်ႇမႃးၼႄပၼ်ၽွင်ႈ – ယွၼ်ႉသင်လႄႈ ၶင်ဝႆႉၼၢႆးထဝ်ႈ ဢႃယု 81 ပီ ထိုင်တီႈဢမ်ပၼ်တိတ်းတေႃႇလၢတ်ႈတေႃႈလုၵ်ႈလၢင်း ၸဵမ်ၸိူဝ်းၼႆႉ။

ယွၼ်ႉၼၼ်လႄႈသိုၵ်းမၢၼ်ႈမႃးတၢင်ႇၶႅပ်းႁၢင်ႈ ၼႄလုမ်ႈၾႃႉၵေႃႈပဵၼ်လႆႈ ၵူၼ်းတၢင်းဢွၼ်ႊလၢႆႊထတ်းသၢင်ၼင်ႇၼႆ။