မိူဝ်ႈၼႆႉ ဝၼ်းတီႈ 31 လိူၼ်ၵျူႊလၢႆႊ မိၼ်းဢွင်ႇလၢႆႇ ၸွမ်ၸိၵ်းသိုၵ်းမၢၼ်ႈယိုတ်းမိူင်း ၶိုၼ်ႈႁပ်ႉၼႃႈတီႈပုၼ်ႈၽွၼ်း ၸွမ်ၸိုင်ႈ ႁင်းၵူၺ်း ပဵၼ်တၢင်းၵၢၼ် တဵမ် 100 ဝၼ်း။ မၼ်းၸၢႆး ၵႂႃႇၶဝ်ႈႁူမ်ႈၸွမ်း ပၢင်ၵုမ်လူင် လုမ်းသၽႃးမိူင်းႁူမ်ႈတုမ်သေ လၢတ်ႈၵႂႃႇဝႃႈ တေသိုပ်ႇၸႂ်ႉတိုဝ်း ပၵ်းပိူင် ၵူၼ်းမိူင်းႁၢပ်ႇၵၢၼ်သိုၵ်း ဝႃႈၼႆ။

ဢူးမိၼ်းဢွင်ႇလၢႆႇ ၸွမ်ၸိုင်ႈယိုတ်းမိူင်း လၢတ်ႈဝႃႈ “ၼင်ႇႁိုဝ် တေမီးဢဵၼ်ႁႅင်းသိုၵ်းတႃႇၵႅတ်ႇၶႄ ဝၢၼ်ႈမိူင်း ႁႂ်ႈမီးလွင်ႈႁူမ်ႇလူမ်ႈၼၼ်ႉ တေသိုပ်ႇၸႂ်ႉတိုဝ်းၵႂႃႇ ပၵ်းပိူင် ၾိင်ႈမိူင်း ႁၢပ်ႇၵၢၼ်သိုၵ်း ဢၼ်လႆႈမၵ်းမၼ်ႈပဵၼ်တၢင်းၵၢၼ်ဝႆႉ မိူဝ်ႈဝၼ်းတီႈ 10 လိူၼ်ၾႅပ်ႉပိဝ်ႊရီႊ ပီ 2024 ၼၼ်ႉထႅင်ႈသေ ႁဵတ်းသၢင်ႈၽေႃႇၼမ်ႉၼႄတူဝ်ၵႂႃႇ” ဝႃႈၼႆ။

ၸွမ်းၼင်ႇၾိင်ႈမိူင်း တွၼ်ႈ 340 ဢၼ်မီးဝႆႉၼႂ်းလၵ်းမိူင်း 2008 ၼၼ်ႉ ယူႇတီႈလူင်ပွင်ၸိုင်ႈသေ တေလႆႈ ႁဵတ်းသၢင်ႈၽေႃႇၼမ်ႉၼႄတူဝ်ၵႂႃႇ ႁႂ်ႈၵူၼ်းမိူင်းၶဝ်ႈပႃးမႃးၸွမ်း ၵၢၼ် ဢွၼ်ႁူဝ်တပ်ႉသိုၵ်း၊ ၵၢၼ်ဝၢင်း ၽႅၼ် မႁႃႇပိဝ်ႇႁႃႇသိုၵ်းၵူၼ်းမိူင်း ႁႂ်ႈပေႃးမီးၼမ်ႉၵတ်ႉ ၵၢၼ်တိုၵ်းၼႆလႄႈ ၸင်ႇလႆႈသိုပ်ႇတမ်းဝၢင်း မၵ်းမၼ်ႈ မူႇပိူင်ၵႂႃႇထႅင်ႈ – ဢူးမိၼ်းဢွင်ႇလၢႆႇ လၢတ်ႈၵႂႃႇၼင်ႇၼႆ။

ၼႂ်းပိုၼ်ႉတီႈတႄႉ ယွၼ်ႉပိူင်ၵၢၼ်ၵဵပ်းသိုၵ်းမႂ်ႇ ဢၼ်လူင်ပွင်ၸိုင်ႈသိုၵ်းမၢၼ်ႈယိုတ်းမိူင်း တမ်းဝၢင်း မၵ်းမၼ်ႈ ဝႆႉၼႆႉသေ ၽူႈၵွၼ်းပွၵ်ႉ/ၵွၼ်းဢိူင်ႇ လႄႈ ၶႃႈႁၢပ်ႇၵၢၼ်ၶုၼ် တႂ်ႈဢႃႇ ၼႃႇ လူင်ပွင်ၸိုင်ႈ သိုၵ်းမၢၼ်ႈၶဝ် ဢဝ်ၶေႃႈဢၢင်ႈလွင်ႈၼႆႉ ၵဵပ်းငိုၼ်း ယွၼ်းၵိၼ်တီႈၵူၼ်းမိူင်း ဢဝ်ႁဵတ်းပဵၼ် ၵၢၼ် မၢၵ်ႈမီးသုၼ်ႇတူဝ်ဝႆႉ- ၵူၼ်းမိူင်းဢၼ်လႆႈပၼ်လုၵ်ႈၸၢႆးၸဝ်ႈ ၵဝ်ႇၵႂႃႇႁၢပ်ႇၵၢၼ် သိုၵ်းမၢၼ်ႈၼၼ်ႉလၢတ်ႈၼင်ႇၼႆ။

ၾၢႆႇၼိုင်ႈၵေႃႈ သိုၵ်းမၢၼ်ႈယိုတ်းမိူင်းၼႆႉ တဵၵ်းၺွပ်းတီႉဢဝ်ၵူၼ်းၼုမ်ႇ၊ ဢမ်ႇၵူတ်ႇထတ်းထဵတ်ႈထၢမ် သင်သေ လွမ်တီႉၺွပ်း ၵူၼ်းမိူင်း။ ၶၢဝ်းၵၢင်ၶမ်ႈၵၢင်ၶိုၼ်းၵေႃႈ ဢဝ်ၶေႃႈဢၢင်ႈ ၶဝ်ႈၵူတ်ႇထတ်းသဵၼ်ႈမၢႆၶႅၵ်ႇၼႆသေ တီႉၺွပ်းၵူၼ်းယဝ်ႉ ယွၼ်းငိုၼ်းၵႃႈထုတ်ႇတူဝ် မၢင်ၸိူဝ်းလႆႈပၼ် ထိုင် 100 သႅၼ်ပျႃး ၸိူဝ်းၼႆႉ ဝႃႈၼႆ။

ယွၼ်ႉၼၼ် ၸိူဝ်းပဵၼ်ၵူၼ်းၼုမ်ႇ လႄႈ လုၵ်ႈဢွၼ်ႇသႅၼ်းႁုၼ်ႈမႂ်ႇ ပၢၼ်သိၵ်ႉႁိၵ်ႉၸိူဝ်းၼႆႉ လႆႈငိူင်ႉပၢႆႈ ဢွၵ်ႇဝၢၼ်ႈယၢၼ်ႁိူၼ်းၽႂ်မၼ်း။

ၸဵမ်မိူဝ်ႈပိုၼ်ၽၢဝ်ႇႁွင်ႉၵူၼ်းၼုမ်ႇမႃးၾိုၵ်းၵၢၼ်သိုၵ်းၸုပ်ႈႁႅၵ်ႈၼၼ်ႉသေ တေႃႇထိုင်ယၢမ်းလဵဝ် ၶၢဝ်းတၢင်းပီပၢႆၼႆႉသိုၵ်းမၢၼ်ႈပိုတ်ႇသွၼ်ပၼ်ၵၢၼ်သိုၵ်းယဝ်ႉတူဝ်ႈၵႂႃႇ 26 ၸုပ်ႈ ယဝ်ႉ။ ယၢမ်းလဵဝ်ၼႂ်းမိူင်းတႆး မႅၼ်ႈၽွင်းၵၢင်ႉၵႄႇႁႃၵူၼ်းတႃႇၵႂႃႇၾိုၵ်းၵၢၼ်သိုၵ်းၸုပ်ႈထိ 27 ယူႇ။