မိူဝ်ႈဝၼ်းတီႈ 16 လိူၼ်ၵျုၼ်ႊ မိၼ်းဢွင်ႇလၢႆႇ ၸွမ်ၸိုင်ႈသိုၵ်းမၢၼ်ႈယိုတ်းမိူင်း ၵႂႃႇႁူပ်ႉထူပ်းဢုပ်ႇဢူဝ်း တင်း သျီႊၵျိၼ်ႉၽိင်ႊ ၸွမ်ၸိုင်ႈမိူင်းၶႄႇသေ လူင်းလၢႆးမိုဝ်း တူၵ်းလူင်းပၼ်မိူင်းၶႄႇမႃးႁဵတ်းၶူင်းၵၢၼ်ပၢႆးမၢၵ်ႈမီးလူင်ၼႂ်းမိူင်းမၢၼ်ႈ တႃႇ 18 ဢၼ် ပၼ်ၵႂၢမ်းမၼ်ႈမႃးဝႃႈ သိုၵ်းမၢၼ်ႈတေႁပ်ႉပုၼ်ႈၽွၼ်း ဢဝ်ႁူမ်ႇလူမ်ႈပၼ်ပႃး ဝႃႈၼႆ။

ဢၼ်လူင်းလၢႆးမိုဝ်းၵၼ်ၵႂႃႇ 18 ဢၼ်ၼႆႉ ပႆႇသွၼ်ႇပႃး ၶူင်းၵၢၼ်လူင်မိူင်းၶႄႇ ဢၼ်လႆႈၵိုတ်းယင်ႉဝႆႉ မိူဝ်ႈၽွင်းပၢင်တိုၵ်းၽႅၼ်ၵၢၼ်ယၼ်ႇသိုၵ်း လင်သိုၵ်းမၢၼ်ႈယိုတ်းမိူင်း – မိူၼ် ၼင်ႇၶူင်းၵၢၼ်သဵၼ်ႈတၢင်းႁွပ်ႈလူၵ်ႈ BRI တင်း ၶူင်းၵၢၼ်သဵၼ်ႈတၢင်းရူတ်ႉၾႆး မူႇၸေႊ-ဝဵင်းလိူဝ်ႇ လႄႈ တႃႈႁိူဝ်းၼမ်ႉလိုၵ်ႉ ၸိူဝ်းၼႆႉ ဝႃႈၼႆ။

ၶူင်းၵၢၼ်လူင်သွင်ဢၼ်ၼႆႉ လႆႈၵိုတ်းယင်ႉဝႆႉ ၸဵမ်မိူဝ်ႈသိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်း ပီ 2021 ၼၼ်ႉသေ ႁၢၼ်ႉတေႃႇထိုင်ယၢမ်းလဵဝ်ၵေႃႈ ပႆႇတႄႇႁဵတ်းၶိုၼ်း ။

ၶူင်းၵၢၼ်ဢၼ်မိၼ်းဢွင်ႇလၢႆႇ ၸွမ်ၸိုင်ႈယိုတ်းမိူင်းလူင်းလၢႆးမိုဝ်းမႃးၼၼ်ႉ ပဵၼ်ၼႂ်းၶၵ်ႉတွၼ်ႈ ၵၢၼ်တေႃႉသူင်ႇ၊ ၵၢၼ်ၵႃႉၶၢႆ ၶူဝ်းၵုၼ်ႇလွတ်ႈလႅဝ်း၊ ၵၢၼ်ၵမ်ႉၸွႆႈ ၵဵဝ်ႇလူၺ်ႈၽေးသ ၽႃႇဝ ၊ ၵၢၼ်ပၢႆးယူႇလီ လႄႈ ၶၵ်ႉတွၼ်ႈၵၢၼ်သိုဝ်ႇ ၼႂ်းပိုၼ်ႉတီႈၵိင်ႇၽႄထုင်ႉမႄႈၶွင် ၸဵမ်ၸိူဝ်းၼႆႉၼႆ ႁွင်ႈၵၢၼ်သိုဝ်ႇၶၢဝ်ႇ CCTV ႁၢႆးငၢၼ်းဢွၵ်ႇဝႆႉၼင်ႇၼႆ။

တီႈပၢင်ႁူပ်ႉထူပ်းဢုပ်ႇဢူဝ်းၼၼ်ႉ သျီႊၵျိၼ်ႉၽိင်ႊ ၸွမ်ၸိုင်ႈမိူင်းၶႄႇၵေႃႈ တူၵ်ႇတၵ်ႉလၢတ်ႈၵႂႃႇဝႃႈ “မီးၵၢင်ၸႂ် တေသိုပ်ႇႁဵတ်းသၢင်ႈ လႄႈ ယုၵ်ႉမုၼ်း ၵၢၼ်ႁူမ်ႈမိုဝ်းၵၼ်တင်းသွင် မိူင်း ႁႂ်ႈပဵၼ်ၸၼ်ႉဢူၺ်းလီ ဢၼ်မိုတ်ႈၵိုဝ်းၸမ်ၸႂ်ၵၼ်ၵႂႃႇလိူဝ်ၼႆႉထႅင်ႈသေ တေႁူမ်ႈၵၼ်ဝၢင်းၽႅၼ်ၵၢၼ်မႁႃႇပိဝ်ႇႁႃႇၵူႈလွင်ႈ ႁႂ်ႈပေႃးလိုၵ်ႉလမ်ႇလိူဝ်ၼႆႉထႅင်ႈ” ဝႃႈၼႆ။

လိူဝ်ၼၼ်ႉ လႆႈလူင်းလၢႆးမိုဝ်းၵၼ်ဝႆႉ ၵၢၼ်ႁူမ်ႈမိုဝ်းၵၼ်ယုၵ်ႉမုၼ်း ၶၵ်ႉၵၢၼ်လွင်ႈႁူမ်ႇလူမ်ႈ ၸၼ်ႉလုမ်ႈၾႃႉ၊ ဝၢင်းၽႅၼ်ၶၵ်ႉၵၢၼ်လွင်ႈယဵၼ်ႇငႄႈ ၸၼ်ႉလုမ်ႈၾႃႉ၊ ၵၢၼ်ႁူမ်ႈၵၼ် ၼမ်းႁဵတ်းသၢင်ႈၽေႃႇၼမ်ႉၼႄတူဝ် လွင်ႈႁုၼ်ႈမုၼ်းၶိုၼ်ႈယႂ်ႇ ၸၼ်ႉလုမ်ႈၾႃႉ၊ ပိူဝ်ႈတႃႇၵေႃႇသၢင်ႈၶိုၼ်း ႁူင်းလဵၼ်ႈႁႅင်းဢွင်ႇသၢၼ်း ဢၼ်မႂ်ႇ ၸဵမ်ၸိူဝ်းၼႆႉ။

လွင်ႈၵၢၼ်တေႃႉသူင်ႇ တူၼ်ႈယႃၸွမ်ႇၵွမ်ႇ (ယႃႈယႃသၽႃႇဝ/ယႃႈယႃတႆး) ၊ ၵၢၼ်တေႃႉသူင်ႇ တူၼ်ႈၵူၺ်ႈ – ၸိူဝ်းပဵၼ်တႃႇၶၵ်ႉၵၢၼ်ပၢႆးယူႇလီ ၸိူဝ်းၼၼ်ႉလႄႈသင်၊ ၵၢၼ်ၵူတ်ႇထတ်းပၢႆးယူႇလီသတ်းၼမ်ႉ လႄႈတႃႇ တေႃႉသူင်ႇၶဝ်ႈဢွၵ်ႇ ၸွမ်းလႅၼ်လိၼ် ၸိူဝ်းၼႆႉၵေႃႈ လႆႈလူင်းလၢႆးမိုဝ်းမႃး တႃႇႁူမ်ႈၵၼ်ႁဵတ်းသၢင်ႈၵႂႃႇ ဝႃႈၼႆ။

ပိူဝ်ႈတႃႇ မိူင်းႁူမ်ႈတုမ် တေမီးလွင်ႈႁုၼ်ႈမုၼ်းၶိုၼ်ႈယႂ်ႇလိူဝ်ၵဝ်ႇ လႄႈ တႃႇႁဵတ်းသၢင်ႈလွင်ႈငမ်းယဵၼ်လႆႈႁႂ်ႈ ထိုင်တီႈၼၼ်ႉၵေႃႈ သျီႊၵျိၼ်ႉၽိင်ႊ ၸွမ်ၸိုင်ႈမိူင်းၶႄႇ တေဝႆႉပဵၼ်ပိူင်ယႂ်ႇၵၢၼ်လမ်ႇလွင်ႈသေ ၵမ်ႉၸွႆႈၵႂႃႇ တေႉတေႉဝႃႈဝႃႈ ၼႆယဝ်ႉ။

လူင်ပွင်ၸိုင်ႈမိူင်းၶႄႇၼႆႉ လူင်းတိုၼ်းလၢင်းဝႆႉ ၼႂ်းၶူင်းၵၢၼ် ဢၼ်ႁဵတ်းသၢင်ႈယူႇၼႂ်းမိူင်းမၢၼ်ႈ မိူၼ်ၼင်ႇ ၶူင်းၵၢၼ်တေႃႈလွတ်ႇၵႅတ်ႉသ် လႄႈ တႃႈႁိူဝ်းၼမ်ႉလိုၵ်ႉ ဢိၵ်ႇပႃး ၵၢၼ် ၵေႃႇသၢင်ႈႁူင်းၵေႃႇၵၢႆႇ ၼႂ်းမိူင်းႁူမ်ႈတုမ် ၸဵမ်ၸိူဝ်းၼႆႉ ဝႃႈၼႆ။