မိူဝ်ႈဝႃး ဝၼ်းတီႈ 29 လိူၼ်ၵျူႊလၢႆႊ ၸွမ်ၽွင်းလူင် မိူင်းမလေးသျီႊယိူဝ်ႊ ပိုၼ်ၽၢဝ်ႇဢွၵ်ႇ ၼႂ်းပၢင်ႁူပ်ႉထူပ်းၵူၼ်းမိူင်းပိုၼ်ႉတီႈ ၵဵဝ်ႇလွင်ႈပၢင်လိူၵ်ႈတင်ႈၼၼ်ႉ လၢတ်ႈဝႃႈ – လူင်ပွင် ၸိုင်ႈသိုၵ်းမၢၼ်ႈ ႁပ်ႉပၢၵ်ႇ တေႁပ်ႉဢဝ်ၶိုၼ်း ၸၢဝ်းရူဝ်ႊႁိၼ်ႊၵျႃႊ ဢၼ်ပၢႆႈသေႃႉယူႇသဝ်းဝႆႉ ၼႂ်းမိူင်းမလေးသျီႊယိူဝ်ႊ တႃႇ 5000 ၵေႃႉ ၼႆယဝ်ႉ။

ၸွမ်ၽွင်းလူင် မိူင်းမလေးသျီႊယိူဝ်ႊ ဢၼ်ႊပရႃႊႁိၼ်ႊ လၢတ်ႈဝႃႈ “ယၢမ်းလဵဝ် မိူင်းမၢၼ်ႈ တင်း မလေးသျီႊယိူဝ်ႊၼႆႉ မီးလွင်ႈၸမ်ၸႂ်ၵၼ်လီၶိုၼ်ႈမႃးယဝ်ႉလႄႈ ၾၢႆႇတၢင်းမိူင်းမၢၼ်ႈၵေႃႈ တူၵ်းလူင်းၸွမ်းၵၼ်တင်းႁဝ်းဝႆႉဝႃႈ တေႁွင်ႉဢဝ်ၶိုၼ်း ၸၢဝ်းရူဝ်ႊႁိၼ်ႊၵျႃႊ တႃႇ 5000 ၵေႃႉ ပဵၼ်ၸုပ်ႈၵမ်းႁႅၵ်ႈ ၶဝ်ႈမိူဝ်းၼႂ်းမိူင်းၶဝ်ၶိုၼ်း” ဝႃႈၼႆ။

တႃႇၵႄႈလိတ်ႈပၼ်ႁႃ လွင်ႈၵူၼ်းပၢႆႈၽေး ၼႂ်းမိူင်းမလေးသျီႊယိူဝ်ႊၼၼ်ႉ တေလႆႈႁူပ်ႉဢုပ်ႇၵၼ်တင်း လူင်ပွင်ၸိုင်ႈသိုၵ်းမၢၼ်ႈယိုတ်းမိူင်းၵႂႃႇထႅင်ႈၼႆသေတႃႉ တင်းသွင်ၸိုင်ႈမိူင်း တေသူင်ႇမွပ်ႈပၼ် ၵူၼ်းပၢႆႈၽေးၸၢဝ်းရူဝ်ႊႁိၼ်ႊၵျႃႊၵၼ်ၵႂႃႇ မိူဝ်ႈလႂ်ဝၼ်းလႂ်ၼႆၼၼ်ႉတႄႉ ပႆႇလၢတ်ႈဢွၵ်ႇဝႆႉ ပႆႇပိုၼ်ၽၢဝ်ႇဝႆႉ တႅတ်ႈတေႃး။

မိတ်သတႃႊဢီႊပရႃႊႁိၼ်ႊၵေႃႈ လၢတ်ႈၵႂႃႇပႃးထႅင်ႈဝႃႈ – လူင်ပွင်ၸိုင်ႈသိုၵ်းမၢၼ်ႈ ၼေႇပျီႇတေႃႇ လႆႈတူၵ်းလူင်း ၽွမ်ႉၸႂ်ဝႆႉ တႃႇႁပ်ႉၶိုၼ်း ၵူၼ်းပၢႆႈၽေး ၸၢဝ်းရူဝ်ႊႁိၼ်ႊၵျႃႊ ၸိူဝ်း ႁွတ်ႈၽႅဝ်ဝႆႉ ၼႂ်းမိူင်းပင်ႊၵလႃႊတဵတ်ႉသ် မွၵ်ႈ 3 သႅၼ်ၵေႃႉ ဝႃႈၼႆ။

လႆႈႁူႉဝႃႈ ၵွၼ်ႇၸွမ်ၽွင်းလူင် မိူင်းမလေးသျီႊယိူဝ်ႊ ပႆႇပိုၼ်ၽၢဝ်ႇဢွၵ်ႇ လွင်ႈမိူင်းမၢၼ်ႈတေႁပ်ႉၶိုၼ်း ၸၢဝ်းရူဝ်ႊႁိၼ်ႊၵျႃႊၼၼ်ႉ ၵူၼ်းပၢႆႈၽေး မွၵ်ႈ 100 ၵေႃႉပၢႆ ၸိူဝ်းယူႇသဝ်း ၼႂ်းၸႄႈမိူင်းပီႊၼၼ်ႊ ၾၢႆႇတၢင်းပွတ်းႁွင်ႇ မိူင်းမလေးသျႃႊ ၺႃးလိုပ်ႈဢွၵ်ႇဝၢၼ်ႈၵႂႃႇယူႇသဝ်း ၸူႉတုမ်ၵၼ်ဝႆႉ တီႈၾၢႆႇၼႃႈလုမ်းၽွင်းတၢင် ၸၢတ်ႈၸိုင်ႈလုမ်ႈၾႃႉ (UN) ဝဵင်းလူင် ၵႂႃႊလႃႊလမ်ႊပူဝ်ႊၼၼ်ႉ ၼႆယဝ်ႉ။

ၵဵဝ်ႇလူၺ်ႈ လူင်ပွင်ၸိုင်ႈသိုၵ်းမၢၼ်ႈ တေႁပ်ႉၶိုၼ်း ၵူၼ်းပၢႆႈၽေး ၸၢဝ်းရူဝ်ႊႁိၼ်ႊၵျႃႊၶဝ်ႈၶိုၼ်းၼႂ်းမိူင်းၼၼ်ႉသေ ၸုမ်းတႅၼ်းၽွင်းလုမ်းသၽႃးဢႃႊသီႊယၼ်ႊ ၸိူဝ်းႁဵတ်းသၢင်ႈ ၵၢၼ်ငၢၼ်းၵဵဝ်ႇၵပ်း သုၼ်ႇလႆႈသုၼ်ႇပဵၼ်ၵူၼ်း (APHR) ၵေႃႈ ႁၢႆးငၢၼ်းဝႃႈ – မိူဝ်ႈပီ 2017 ၽွင်းၸၢဝ်းရူဝ်ႊႁိၼ်ႊၵျႃႊ လႆႈလုၵ်ႉတၢင်း ၸႄႈမိူင်းရၶႅင်ႇ ပၢႆႈၽေးဢွၵ်ႇၵႂႃႇသေႃႉယူႇဝႆႉ ၼႂ်းၸိုင်ႈမိူင်းႁိမ်းႁွမ်း ပင်ႊၵလႃႊတဵတ်ႉသ်ၼၼ်ႉ ပဵၼ်ယွၼ်ႉသိုၵ်းမၢၼ်ႈ ႁဵတ်းၵၢၼ်ၵႂၢတ်ႇလၢင်ႉၽဵဝ်ႈၸွမ်းၼႂ်းပိုၼ်ႉတီႈ၊ ယၢမ်းလဵဝ် ၾၢႆႇလူင်ပွင်ၸိုင်ႈမိူင်းမလေးသျီႊယိူဝ်ႊ ပိုၼ် ၽၢဝ်ႇဢွၵ်ႇမႃး လွင်ႈလူင်ပွင်ၸိုင်ႈသိုၵ်းမၢၼ်ႈယိုတ်းမိူင်း တေႁပ်ႉၶဝ်ႈၵႂႃႇၶိုၼ်းၼႂ်းမိူင်းၼႆႉ ပေႃးတူၺ်းၶိုၼ်း ငဝ်းလၢႆးၼႂ်းၸႄႈမိူင်းရၶႅင်ႇယၢမ်းလဵဝ်ၸိုင် လီမႆႈၸႂ်တႃႇ လွင်ႈႁူမ်ႇလူမ်ႈ ၵူၼ်းပၢႆႈၽေး ၸၢဝ်းရူဝ်ႊႁိၼ်ႊၵျႃႊဝႆႉယူႇ – ၼႆယဝ်ႉ။