လိူၼ်ဢေႃးၵၢတ်ႉသ် ဝၼ်းတီႈ 4 ထိုင် ဝၼ်းတီႈ 7 ပီ 2026 ၼႆႉ လူင်ပွင်ၸိုင်ႈသိုၵ်းမၢၼ်ႈ တေလႆႈႁပ်ႉပုၼ်ႈၽွၼ်း ပဵၼ်ၸဝ်ႈႁိူၼ်းသေ ၸတ်းပၢင်ၵုမ်ဢုပ်ႇဢူဝ်းလွင်ႈသိင်ႇဝႅတ်ႉလွမ်ႉ ဢႃႊသီႊယၼ်ႊ ပွၵ်ႈၵမ်း (37) ၼႆယဝ်ႉ။

မိူဝ်ႈဝၼ်းတီႈ 18 လိူၼ်ၵျူႊလၢႆႊပူၼ်ႉမႃးၼႆႉ ၸုမ်းတူင်ႉၼိုင်ၵၢၼ်တူင်ႇဝူင်းၵူၼ်း 123 ၸုမ်း ၼႂ်းမိူင်းႁူမ်ႈ တုမ် ယိုၼ်ႈလိၵ်ႈတၢင်ႇထိုင်တီႈ ႁူဝ်ပဝ်ႈမိူင်းဢႃႊသီႊယၼ်ႊ မိူင်းၾိလိပ်းပိၼ်း တင်း မိူင်းယူႊရူပ်ႊ (EU) ၊ မိူင်းဢမေႊရိၵၼ်ႊ၊ မိူင်းၵျႃႇပၢၼ်ႇ၊ မိူင်းၵူဝ်ႊလီႊယိူဝ်ႊၸိူဝ်းပဵၼ်လုၵ်ႈၸုမ်းဢႃႊသီႊ ယၼ်ႊ ယႃႇႇႁႂ်ႈမိူင်း မၢၼ်ႈလႆႈႁပ်ႉပဵၼ်ၸဝ်ႈႁိူၼ်းသေ ၼမ်း ၸတ်းပၢင်ဢုပ်ႇဢူဝ်းၵႂႃႇ – ဝႃႈၼႆ။

ၼႂ်းပၢင်ၼၼ်ႉ ၽူႈမီးၸၼ်ႉ ၼႂ်းၸုမ်းၸိုင်ႈမိူင်းဢႃႊသီႊယၼ်ႊ တေမႃးၶဝ်ႈႁူမ်ႈၸွမ်းသေ ဢုပ်ႇဢူဝ်းလွင်ႈ ၾိင်ႈၾႃႉရႃႇသီႇ၊ သႅၼ်းၸိူဝ်ႉၾၼ်းတူဝ်သတ်းလၢၵ်ႇလၢႆ လႄႈ ငဝ်းလၢႆးသိင်ႇဝႅတ်ႉလွမ်ႉၵူႈၸိုင်ႈမိူင်း ၸဵမ်ၸိူဝ်းၼႆႉ ႁိုင်ၶၢဝ်းတၢင်း 4 ဝၼ်း ၼႆယဝ်ႉ။

ၸုမ်းတူင်ႉၼိုင်ၵၢၼ်တူင်ႇဝူင်းၵူၼ်းၼႂ်းမိူင်းႁူမ်ႈတုမ် ဢွၼ်ၵၼ်သူင်ႇယိုၼ်ႈၽိုၼ်လိၵ်ႈတုၵ်းယွၼ်းဝႆႉဝႃႈ – ၶႂ်ႈႁႂ်ႈၶၢႆႉၵႂႃႇၸတ်းတီႈ မိူင်းၾိလိပ်းပိၼ်း ဢမ်ႇၼၼ် ၸတ်းႁဵတ်းၵႂႃႇၼိူဝ် ဢွၼ်ႊလၢႆႊ။ မိူဝ်းၼႃႈထႃႈပၢႆမႃး ၶႂ်ႈႁႂ်ႈၸုမ်းဢႃႊသီႊယၼ်ႊ ပၢၵ်ႈပၢႆႇပႅတ်ႈ ၸုမ်းလူင်ပွင်ၸိုင်ႈသိုၵ်းမၢၼ်ႈ ဢွၵ်ႇၼႂ်းလွင်ႈတူင်ႉၼိုင်တင်းသဵင်ႈ – ဝႃႈၼႆ။

လႆႈႁူႉဝႃႈ ၵၢၼ်တီႈၸုမ်းတူင်ႉၼိုင်တူင်ႇဝူင်းၵူၼ်းၶဝ် ဢမ်ႇၶႂ်ႈပၼ်မိူင်းမၢၼ်ႈ ႁပ်ႉပဵၼ်ၸဝ်ႈႁိူၼ်း ၸတ်းပၢင်ၵုမ်လူင်ၼၼ်ႉ ယွၼ်ႉသိုၵ်းလူင်ပွင်ၸိုင်ႈသိုၵ်းမၢၼ်ႈ ပဵၼ်ငဝ်ႈႁၢၵ်ႈ ႁဵတ်း ႁႂ်ႈသိင်ႇဝႅတ်ႉလွမ်ႉ မိူင်းႁူမ်ႈတုမ်လူႉၵွႆ။ ၾၢႆႇၼိုင်ႈၵေႃႈ ၽူႈၼမ်းသိုၵ်းမၢၼ်ႈၶဝ် ၶႂ်ႈဢဝ်ၵၢၼ်ထိင်းသိမ်းပႅင်း သိင်ႇဝႅတ်ႉလွမ်ႉၼႆႉ မႃးႁူမ်ႇငမ်း လွင်ႈႁုၵ်းႁၢႆႉၵၢၼ်မိူၵ်ႈလိူင်းၶဝ်ပႅတ်ႈတင်းသဵင်ႈလႄႈ ၸင်ႇလႆႈသၢၼ်ၶတ်းၼႆ – Defend Myanmar Democracy ႁၢႆးငၢၼ်းဢွၵ်ႇဝႆႉ။

ပၢင်ၵုမ်လူင်ၼႆႉ ႁွင်ႈၵၢၼ်ၽွင်းလူင်ထိင်းသိမ်းသိင်ႇဝႅတ်ႉလွမ်ႉ လႄႈ ၶူဝ်းႁႄႈတိုၼ်းလၢင်း (MONREC) ၸိူဝ်းယူႇတႂ်ႈဢႃႇၼႃႇသိုၵ်းမၢၼ်ႈ ႁၢင်ႈႁႅၼ်းၶိုင်ပွင်တႃႇၼမ်းၼႃႈၸတ်းႁဵတ်း ၵႂႃႇ။ ဢူးသၢၼ်းဢူး ၵေႃႉပဵၼ်ၽွင်းလူင် MONREC ၼႆႉ ပဵၼ်ႁူဝ်ပဝ်ႈၵဝ်ႇ ၸုမ်းၵၢၼ်ပၢႆးမၢၵ်ႈမီးမိူင်းမၢၼ်ႈ (MEHL) သေ ၺႃးလူင်ပွင်ၸိုင်ႈမိူင်းဢမေႊရိၵ်ၼ်ႊ တင်း ယူႊရူပ်ႊ ဢိုတ်း ႁပ်းပႅတ်ႈၵၢၼ်မၢၵ်ႈမီးမၼ်းဝႆႉတင်းသဵင်ႈ – ၼႆယဝ်ႉ။