မိူဝ်ႈၼႆႉ ဝၼ်းတီႈ 6 လိူၼ်ဢေႃးၵၢတ်ႉသ် ယၢမ်းၵၢင်ၼႂ် ဢူးမိၼ်းဢွင်ႇလၢႆႇ ၸွမ်ၸိုင်ႈယိုတ်းမိူင်း မိူင်းႁူမ်ႈတုမ် လုၵ်ႉဝဵင်းၼေႇပျီႇတေႃႇ ၶီႇႁိူဝ်းမိၼ်ဢွၵ်ႇၶၢဝ်းတၢင်း ႁွတ်ႈထိုင် ဝဵင်း လူင်မိူင်းၵွၵ်ႇ (ၵုင်းထဵပ်ႈ) မိူင်းထႆး ။

မီးၽႅၼ်ၵၢၼ်တေႁူပ်ႉဢုပ်ႇဢူဝ်းၸွမ်း ၸွမ်ၽွင်းလူင် မိူင်းထႆး ဢၼုထိၼ်ႊၶျၢၼ်ႊဝီႊရၵုၼ်ႊ လႆႈႁူႉၼင်ႇၼႆ။

ၶၢဝ်းတၢင်းဢူးမိၼ်းဢွင်ႇလၢႆႇ ၵမ်းၼႆႉ ၽွင်းလူင်မိူင်းႁူမ်ႈတုမ် ဢူးၶိၼ်ႇမွင်ႇယီႇ၊ ဢူးတိၼ်ႇမွင်ႇသူၺ်ႇ၊ ဢူးၵူဝ်ႇၵူဝ်ႇလုၼ်ႇ၊ ဢူးထုၼ်းဢူင်ႇ၊ ၸွမ်ၽွင်းလူင်ၸႄႈမိူင်းယၢင်းၽိူၵ်ႇ ဢူးၸေႃးမိၼ်ႉဢူး၊ ၸွမ်ၽွင်းလူင် တိူင်းတၼၢဝ်းသီ ဢူးၸေႃႇၼၢႆႇဢူး လႄႈ ၵႅမ်ၽွင်းလူင် တင်း ၽူႈမီးပုၼ်ႈၽွၼ်း ၼႂ်းႁွင်ႈၵၢၼ်လူင်ပွင်ၸိုင်ႈယိုတ်းမိူင်း ၵေႃႈပႃးၸွမ်း ။

ၸုမ်းၸိူဝ်းမိၼ်းဢွင်ႇလၢႆႇ လႄႈၽွင်းလူင်လၢႆလၢႆၵေႃႉ မီးၽႅၼ်ၵၢၼ်တေႁူပ်ႉထူပ်းၸွမ်း ၸွမ်ၽွင်းလူင် လူင်ပွင်ၸိုင်ႈမိူင်းထႆး- တႃႇဢုပ်ႇဢူဝ်းၵၼ် လွင်ႈၵၢၼ်ပၢႆးမၢၵ်ႈမီး ဢၼ်ၵဵဝ်ႇ ၵပ်းတင်းသွင်ၸိုင်ႈမိူင်း၊ ႁူပ်ႉထူပ်းၸွမ်း ႁူဝ်ပဝ်ႈၸူဝ်ႈၶၢဝ်း ၾၢႆႇလုမ်းသၽႃးၸိူဝ်ႉၸၢတ်ႈ လႄႈ ၽူႈမၢၵ်ႈၵူၼ်းမီး ၸဝ်ႈတိုၼ်းလၢင်း ၼႂ်းၸုမ်းပၢႆးမၢၵ်ႈမီးတင်းသွင်ၸိုင်ႈမိူင်းၵႂႃႇ – ၾၢႆႇတၢင်းမိူင်းထႆးၵေႃႈပိုၼ်ၽၢဝ်ႇဝႆႉၼင်ႇၼႆ။

လိူဝ်ၼၼ်ႉ ဢူးမိၼ်းဢွင်ႇလၢႆႇ တေၶဝ်ႈႁူမ်ႈၸွမ်း ပၢင်ၵုမ်လူင် ပၢႆးမၢၵ်ႈမီး မိူင်းမၢၼ်ႈ – မိူင်းထႆးသေ တေယူႇမိူင်းထႆးတႃႇၶၢဝ်းတၢင်း 2 ဝၼ်း လႆႈႁူႉၼင်ႇၼႆ။

ၵွၼ်ႇၼႃႈဢူးမိၼ်းဢွင်ႇလၢႆႇ တင်း ၸုမ်းၽွင်းလူင် ၼႂ်းလူင်ပွင်ၸိုင်ႈသိုၵ်းၸတ်းတင်ႈ မိူင်းႁူမ်ႈတုမ်မၢၼ်ႈ တေၶဝ်ႈ မိူင်းထႆးၼၼ်ႉ ၽူႈမီးပုၼ်ႈၽွၼ်း ၸိူဝ်းတူင်ႉၼိုင်ႁဵတ်းသၢင်ႈ လွင်ႈႁၵ်ႉသႃသိင်ႇဝႅတ်ႉလွမ်ႉ လႄႈ မႄႈၼမ်ႉၸွမ်းလႅၼ်လိၼ် မိူင်းထႆး-မိူင်းမၢၼ်ႈၶဝ် လႆႈႁူမ်ႈၵၼ်ၵႂႃႇယိုၼ်ႈလိၵ်ႈသၢၼ်ၶတ်း လွင်ႈၵၢၼ်ၶုတ်းႁႄႈၶုတ်းၶမ်း ၼႂ်းမိူင်းမၢၼ်ႈ ၸွမ်းလႅၼ်လိၼ်တႆး-ထႆးဝႆႉ။

ၼႂ်းပီ 2026 ၼႆႉၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇ ဢၼ်ၶိုၼ်ႈပဵၼ်ၸွမ်ၸိုင်ႈမိူင်းႁူမ်ႈတုမ်ဝႆႉၼၼ်ႉ လႆႈဢွၵ်ႇၶၢဝ်းတၢင်းၵႂႃႇဢႅဝ်ႇယဵမ်ႈမိူင်းႁိမ်ႁွမ်း လူၺ်ႈၶၢဝ်းတၢင်းၸၼ်ႉၸိုင်ႈ မိူင်း။ ဝၼ်းတီႈ 31 မေႊ ထိုင် ဝၼ်းတီႈ 3 ၵျုၼ်ႊ ၵႂႃႇမိူင်းၵြႃးဢိၼ်ႊတီႊယႃႊ ။ ဢုပ်ႇၵၼ်တင်းၸွမ်ၽွင်းလူင်မိူင်းၵြႃး လွင်ႈႁူမ်ႇလူမ်ႈလႅၼ်လိၼ်- လွင်ႈၵႃႉၵူးၸူးၵၼ်ၼႂ်းၵႄႈသွင် ၸိုင်ႈမိူင်း – တႃႇႁူမ်ႈမိုဝ်းၵၼ်ႁဵတ်းသၢင်ႈၵၢၼ်ပၢႆးမၢၵ်ႈမီး ၸဵမ်ၸိူဝ်းၼႆႉ။

ထိုင်မႃးဝၼ်းတီႈ 15 ထိုင် 19 လိူၼ်ၵျုၼ်ႊ မိၼ်းဢွင်ႇလၢႆႇ ၵႂႃႇဢႅဝ်ႇယဵမ်ႈမိူင်းၶႄႇ။ ႁူပ်ႉဢုပ်ႇတင်းၸွမ်ၸိုင်ႈၶႄႇ သျီႊၵျိၼ်ႉၽိင် တႃႇႁူမ်ႈၵၼ်ႁဵတ်းၵၢၼ်ပၢႆးမၢၵ်ႈမီး- လွင်ႈႁူမ်ႇလူမ်ႈလႄႈၵူႈလွင်ႈလွင်ႈတႃႇၶိုၼ်ႈယႂ်ႇ ၼႆသေ လႆႈလူင်းလၢႆးမိုဝ်းလိၵ်ႈႁူမ်ႈမၢႆ ပၢႆးမၢၵ်ႈမီးၵၢၼ်ၵႃႉၶၢႆ ၸွမ်းၵၼ် 18 ၽိုၼ်။

ထိုင်မႃးဝၼ်းတီႈ 3-5 ၵျူႊလၢႆႊၼႆႉ မိၼ်းဢွင်ႇလၢႆႇၵႂႃႇဢႅဝ်ႇမိူင်းလၢဝ်း။ ႁူပ်ႉတင်းၸွမ်ၸိုင်ႈမိူင်းလၢဝ်း ထွင်ႊလုၼ်ႊ သိသူႇလိတ်း ။ ဢုပ်ႇၵၼ်လွင်ႈမၢႆတွင်း ၵၢၼ်ၵပ်းသိုပ်ႇတိတ်းတေႃႇတၢင်းၵၢၼ်ထုတ်ႉ(ၽွင်းတၢင်) ၶွပ်ႈတဵမ် 70 ပီ- ဢိၵ်ႇပႃးလွင်ႈတူၵ်းလူင်းၵၼ်တႃႇႁူမ်ႈၵၼ်ႁဵတ်းၵၢၼ်လူင်းတိုၼ်းလၢင်းပၢႆးမၢၵ်ႈမီး ၸဵမ်ၸိူဝ်းၼႆႉ။