ႁူဝ်လိူၼ်ဢေႃးၵၢတ်ႉသ်ၼႆႉ ပလိၵ်ႈထႆး မႄႈသွတ်ႇ ၸွမ်းတီႉၺွပ်း ၸိူဝ်းႁဵတ်းၵၢၼ် ဢမ်ႇထုၵ်ႇ မႅၼ်ႈၸွမ်းပၵ်းပိူင်မၢႆမီႈမိူင်းထႆး – တီႈဝဵင်းမႄႈသွတ်ႇ – တီႉလႆႈ 10 ပၢႆ ၼႂ်းၼၼ်ႉပႃး ၵူၼ်းယိပ်းဝႂ် 10 ပီၼမ်လႄႈ တေသိုပ်ႇၵူတ်ႇထတ်းၵူၼ်းယိပ်းဝႂ် 10 ပီၵႂႃႇထႅင်ႈဝႃႈၼႆ။

မိူဝ်ႈၼႆႉ ဝၼ်းတီႈ 4 လိူၼ်ဢေႃးၵၢတ်ႉသ် ယၢမ်းၵၢင်ၼႂ် ၸုမ်းပလိၵ်ႈထႆး ဢဵၼ်ႁႅင်း မွၵ်ႈ 130 ၵေႃႉ လမ်းတီႉၵူၼ်းၸိူဝ်းႁဵတ်းၵၢၼ် ဢမ်ႇမႅၼ်ႈတီႈလဵဝ်တင်းၼႂ်းဝႂ်ႁဵတ်းၵၢၼ်/ ႁဵတ်း ၵၢၼ်တီႈဢၼ် လူင်ပွင်ၸိုင်ႈထႆးဢမ်ႇပၼ်သုၼ်ႇႁႅင်းၵၢၼ်ႁဵတ်းၸိူဝ်းၼၼ်ႉ။

ၵူၼ်းမိူင်းမၢၼ်ႈ ၵေႃႉဢၼ်ႁဵတ်းၵၢၼ်ၸွႆႈထႅမ် ႁႅင်းၵၢၼ်မၢၼ်ႈ ၼႂ်းမိူင်းထႆး လၢတ်ႈဝႃႈ “ မိူဝ်ႈၼႆႉၵၢင်ၼႂ် 6 မူင်းၶိုင်ႈၼၼ်ႉ ပလိၵ်ႈထႆးၶဝ် ၶဝ်ႈထတ်းၸွမ်းႁၢၼ်ႉတၢင်းၶၢႆၼႂ်းဝဵင်းမႄႈသွတ်ႇ။ တီႉလႆႈၵႂႃႇ 13 ၵေႃႉၼႂ်းၼၼ်ႉၵေႃႈ ပႃးၵူၼ်းမိူင်းမၢၼ်ႈႁေ ။ ၵွပ်ႈၼၼ် ၸူဝ်ႈၶၢဝ်းၶိဝ်းၼႆႉ ၶႂ်ႈႁႂ်ႈ ၵူၼ်းမိူင်းမၢၼ်ႈ ၾၢင်ႉယူႇၾၢင်ႉၵိၼ်ၾၢင်ႉတၢင်းၵႂႃႇတၢင်းမႃးၵၼ်ၽွင်ႈ” ဝႃႈၼႆ။

လႆႈႁူႉဝႃႈ ၽႅၼ်ၵၢၼ် ပလိၵ်ႈထႆးၼႆႉ ပဵၼ်တႃႇၽဵဝ်ႈမူၺ်ႉၸုမ်းႁဵတ်းၵၢၼ် ၵႃႉၶၢႆၵူၼ်း၊ ၵၢၼ်ၽိတ်းမၢႆမီႈ၊ ၵၢၼ်လွၵ်ႇလႅၼ်ၵိၼ်ငိုၼ်းၸိူဝ်းယူႇသဝ်းဝႆႉ ၼႂ်းဝဵင်းမႄႈသွတ်ႇ- ၵူၺ်းၵႃႈၽိူဝ်ႇ ၵူတ်ႇထတ်းယဝ်ႉသမ်ႉႁၼ်မႅၼ်ႈၸိူဝ်းပဵၼ်ဝတ်းဝႂ် 10 ပီ ဢၼ်ၵႂႃႇသိုဝ်ႉဢဝ်ၶွင်ပိူၼ်ႈမႃးၸႂ်ႉၸိူဝ်းၼႆႉပႃးလႄႈ တေသိုပ်ႇၵူတ်ႇထတ်းၵႂႃႇထႅင်ႈ – သိုဝ်ႇၶၢဝ်ႇထႆးပိုၼ်ၽၢဝ်ႇဝႆႉၼင်ႇၼႆ။

ၸိူဝ်းၵႂႃႇၵူတ်ႇထတ်းၼၼ်ႉ ၼွၵ်ႈလိူဝ်ၸုမ်းပလိၵ်ႈယဝ်ႉ တေပႃးၽူႈႁၢပ်ႇၵၢၼ် ၼႂ်းႁွင်ႈၵၢၼ်ၵူတ်ႇထတ်းၵူၼ်းၶဝ်ႈဢွၵ်ႇမိူင်း၊ ႁွင်ႈၵၢၼ်ၾၢႆႇၵႂၢတ်ႇလၢင်ႉၽဵဝ်ႈမူၺ်ႉ ၸုမ်းၵေႃႇၵၢၼ်ႁၢႆႉ ၊ ၾၢႆႇၵႂၢတ်ႇလၢင်ႉၵူၼ်းၸိူဝ်းယိပ်းဝတ်းဝႂ်ပွမ် ၊ ဝတ်းဝႂ်ဢမ်ႇမႅၼ်ႈၸွမ်းပၵ်းပိူင်မၢႆမီႈ ၸဵမ်းၸိူဝ်းၼႆႉ ဝႃႈၼႆ။

မိူဝ်ႈႁူဝ်လိူၼ်ၵျူႊလၢႆႊပူၼ်ႉမႃးၼၼ်ႉၵေႃႈ ၸဝ်ႈၼႃႈတီႈပလိၵ်ႈထႆးၶဝ် ၸတ်းၽႅၼ်ၵၢၼ် တီႉၺွပ်းဢဝ် ၵူၼ်းမိူင်းၼွၵ်ႈၸိူဝ်းယူႇၼႂ်းၸႄႈတွၼ်ႈသူႊရတ်ႊထႃႊၼီႊၼၼ်ႉၵႂႃႇ 11 ၵေႃႉ ၼၼ်ႉၵေႃႈ ပႃးၵူၼ်းမိူင်းမၢၼ်ႈ 7 ၵေႃႉ။

လိူဝ်ၼၼ်ႉပလိၵ်ႈထႆးလႆႈဝႆႉၶၢဝ်ႇ မီးၵူၼ်းလုၵ်ႉမိူင်းမၢၼ်ႈမႃး သိုဝ်ႉဝတ်းဝႂ် 10 ပီ မႃးၸႂ်ႉ လူၺ်ႈၵႃႈၶၼ် သီႇႁႃႈမိုၼ်ႇဝၢတ်ႇသေ ယူႇသဝ်း ၵႂႃႇမႃး ႁဵတ်းၵၢၼ်ယူႇၼႂ်းမိူင်းထႆးၼႆႉ လႆႈသဵၼ်ႈမၢႆဝႆႉယူႇ 240 ၵေႃႉ ။ ၸိူဝ်းၼၼ်ႉတေသိုပ်ႇၵူတ်ႇထတ်းတီႉၺွပ်းပၼ်တူတ်ႈတၢမ်ႇၵႂႃႇ – ၼႆသိုဝ်ႇၶၢဝ်ႇ ထႆး ႁၢႆးငၢၼ်းဢွၵ်ႇဝႆႉၼင်ႇၼႆ။