ဝၼ်းတီႈ 20/07/2026 ၼၼ်ႉ ၵႅမ်ၽူႈၶၢၼ်ပၢၵ်ႇ လုမ်းၸွမ်ၽွင်းလူင်ၸိုင်ႈထႆး ႁူဝ်သိုၵ်းလူင်ယိင်း ၽတ်ႊတႃႊရူတ်ႊ ထွင်ႊသလူၺ်ႊၵွၼ်ႊ လၢတ်ႈဝႃႈ ယူႇတီႈႁွင်ႈၵၢၼ်ၾၢႆႇႁႅင်းၵၢၼ် လူင်ပွင်ၸိုင်ႈထႆးသေ တေပၼ်ၶၢဝ်းယၢမ်းႁႅင်းၵၢၼ်ယၢၼ်မိူင်း 3 မိူင်း မၢၼ်ႈ-လၢဝ်း- ဝႅတ်ႊၼၢမ်ႊ (ၸိူဝ်းမီးၶေႃႈမုလ်းၼႂ်းၸိုင်ႈထႆးယဝ်ႉၼၼ်ႉ) ပၼ်တေႃႇဝႂ်ႁဵတ်းၵၢၼ်ၵႂႃႇထႅင်ႈပီၼိုင်ႈ တေႃႇထိုင်ပီ 2027 သဵင်ႈ ဝႃႈၼႆ။

ၶေႃႈပိုၼ်ၽၢဝ်ႇဢၼ်ၼႆႉ ဢမ်ႇၸႂ်ႈတႃႇႁဵတ်းဝႂ်ႁဵတ်းၵၢၼ်ပၼ်ၵူၼ်းမႂ်ႇ ၵူၼ်းၸိူဝ်းပႆႇမီးၶေႃႈမုလ်းပႆႇမီးဝတ်းဝႂ်သင်။ ပဵၼ်တႃႇၵူၼ်းၸိူဝ်းမီးဝတ်းဝႂ် ၽၢတ်ႉသပွတ်ႇ၊ ဝီႊသႃႊလႄႈဝႂ်ႁဵတ်း ၵၢၼ် ၼႂ်းမိူင်းထႆး တႃႇ 770000 ၵေႃႉၼႆႉၵူၺ်း- ဝႂ်ႁဵတ်းၵၢၼ်ၸိူဝ်းၶဝ် တေမူတ်းဢႃယု ၼႂ်းႁၢင်ပီ ပီ 2026 ၼႆႉ ဝႃႈၼႆ။

ၵႅမ်ၽူႈၶၢၼ်ပၢၵ်ႇ လုမ်းၸွမ်ၽွင်းလူင်ၸိုင်ႈထႆး လၢတ်ဝႃႈ – ယိူင်းဢၢၼ်းတႃႇႁၵ်ႉသႃဝႆႉႁႅင်းၵၢၼ်ၸိူဝ်းမီးသဵၼ်ႈမၢႆလႄႈၶေႃႈမုလ်းဝႆႉမိူင်းထႆး ၼႆႉ၊ တႃႇတေႁဵတ်းၵၢၼ်ပၼ်ၼႂ်းၼႃႈၵၢၼ်လႃႈၼမ်ႉ ၊ ၵေႃႇသၢင်ႈ၊ ႁူင်းၸၢၵ်ႈ ၶူဝ်းၵိၼ်ၶူဝ်းၸႂ်ႉ၊ ဢိၵ်ႇ ၼႂ်းၵၢၼ်ၽုၵ်ႇသွမ်ႈ လဵင်ႉလူတူဝ်သတ်း။ သင်ဝႃႈ ဢမ်ႇတေႃႇဝႂ်ႁဵတ်းၵၢၼ်ပၼ်ၸိူဝ်းၶဝ်သေ တေလိုပ်ႈၶဝ်ပွၵ်ႈၶိုၼ်းဝၢၼ်ႈ ၽႂ်မိူင်းမၼ်းၸိုင် တွၼ်ႈတႃႇ ၸဝ်ႈၵၢၼ်ၸဝ်ႈငၢၼ်း မိူင်းထႆး တေယၢပ်ႇၽိုတ်ႇ၊ တေဢမ်ႇမီးၵူၼ်းႁဵတ်းၵၢၼ်ပၼ်ၶဝ်၊ ပေႃးဢမ်ႇမီးၵူၼ်းႁဵတ်းၵၢၼ်ပၼ်ၶဝ် – ၶူဝ်းၵုၼ်ႇမိူင်းထႆးၵေႃႈ တေဢမ်ႇဢွၵ်ႇလႆႈၼမ် ၊ တေၸၢင်ႈယွမ်းလူင်း၊ ပၢႆလိူဝ်ပၢႆးမၢၵ်ႈမီးတူၵ်းဝႆႉယဝ်ႉ သမ်ႉတေႁဵတ်းႁႂ်ႈၶူဝ်းၵုၼ်ႇၶၢတ်ႇထႅင်ႈၸိုင် ၸိုင်ႈမိူင်းၸၢင်ႈတူၵ်းၽၢၼ် – မၼ်းၼၢင်းလၢတ်ႈၵႂႃႇၼင်ႇ ၼႆ။

ၵွပ်ႈပိူဝ်ႈ လူင်ပွင်ၸိုင်ႈထႆးတေပႆႇပိုတ်ႇပၼ်တႃႇႁႅင်းၵၢၼ်သႅၼ်းမႂ်ႇ တေႁဵတ်းဝတ်းဝႂ်ပဵၼ်တၢင်းၵၢၼ်လႄႈ ယူႇတီႈၸဝ်ႈၵၢၼ်ၸဝ်ႈငၢၼ်းၵေႃႈထုၵ်ႇလီ ၾၢင်ႉႁႂ်ႈလီ ၵူဝ်ၺႃးၸုမ်းႁဵတ်း ၵိၼ်ၸိူဝ်းၼၼ်ႉလွၵ်ႇလႅၼ်ဝႃႈတႃႇႁဵတ်းဝတ်းၼႆသေ ၵဵပ်းငိုၼ်းၵႂႃႇၸိူဝ်းၼႆႉ မၼ်းၼၢင်းလၢတ်ႈပႃးၼင်ႇၼႆ။

ဢၼ်လႆႈၶိုင်ပွင်လွင်ႈၼႆႉၵေႃႈပဵၼ်တႃႇႁႄႉၵင်ႈ ၵူၼ်းလၵ်ႉၶဝ်ႈမိူင်း၊ တႃႇႁႄႉၵင်ႈၸဝ်ႈၼႃႈတီႈ / ၸုမ်းယူႇၵၢင် ၵိၼ်သူးၵိၼ်လၢပ်ႈ ၊တႃႇႁႄႉၵင်ႈ ပၼ်ႁႃဢၼ် ဢမ်ႇထုၵ်ႇလႆႈၵိူတ်ႇ ၶိုၼ်ႈပဵၼ်မႃး တႃႇၵႅတ်ႇၶႄႁႄႉၵင်ႈ ၵူၼ်းၼင်ႇၵၼ်တဵၵ်းတဵင်ၵၼ် ၸိူဝ်းၼႆႉၼႆသေ ၶေႃႈမုလ်းႁႅင်းၵၢၼ်ၸိူဝ်းမီးဝႆႉၼႆႉၵေႃႈ တေယုၵ်ႉမုၼ်းပိူင်ၵဵပ်းၶေႃႈမုလ်းႁႂ်ႈတႅတ်ႈတေႃး ႁႂ်ႈၶိုတ်းတၼ်းၵၢပ်ႈပၢၼ် လိူဝ်ၼႆႉထႅင်ႈ – ၵႅမ်ၽူႈၶၢၼ်ပၢၵ်ႇ လၢတ်ႈၵႂႃႇၼင်ႇၼႆ။