ႁႅင်းၵၢၼ် မိူင်းမၢၼ်ႈ၊ မိူင်းလၢဝ်း လႄႈ မိူင်းဝႅတ်ႉၼၢမ်း ၸိူဝ်းယိပ်းဝီႊသႃႊ (Visa) ႁဵတ်းၵၢၼ်ယူႇသဝ်းဝႆႉၼႂ်းမိူင်းထႆးသေ ဢႃႇယုမၼ်းတေမူတ်းသဵင်ႈၼႂ်းလိူၼ်မၢတ်ႉၶျ် ပီ 2027 ၼၼ်ႉ သင်မီးၽႅၼ်ၵၢၼ်တႃႇသိုပ်ႇယူႇၼႂ်းမိူင်းထႆးတေႉယူႇၸိုင် ႁွင်ႈၵၢၼ်ၾၢႆႇၵူတ်ႇထတ်းၵူၼ်းၶဝ်ႈဢွၵ်ႇမိူင်း လူင်ပွင်ၸိုင်ႈထႆးၶဝ် တေတွၵ်ႇၸုမ်ႈလူင်ႇထီႉ 1 ၼႂ်းဝၼ်းတီႈ 28/09/2026 ၼႆႉ ဝၼ်းလိုၼ်းသုတ်းၼႆလႄႈ ႁႂ်ႈဢွၼ်ၵၼ်ၵႂႃႇႁဵတ်းဝႆႉ ႁႂ်ႈထုၵ်ႇမႅၼ်ႈၸွမ်းပၵ်းပိူင် ဝႃႈၼႆ။

ၸၢႆးၸၢႆး ၵူၼ်းၸွႆႈႁဵတ်းဝတ်းဝႂ်ပၼ်ႁႅင်းၵၢၼ်ယၢၼ်မိူင်း မိူင်းၵဵင်းမႂ်ႇ လၢတ်ႈတီႈၽူႈတွႆႇႁွၵ်ႈဝႃႈ -“ ဢၼ်တေလႆႈတွၵ်ႇၵမ်းႁႅၵ်ႈၼႆႉ ပဵၼ်ၸုမ်းၸိူဝ်းဢၼ်လူဝ်ႇတေႃႇဢႃယုဝႂ်ႁဵတ်းၵၢၼ်။ ၸိူဝ်းဢၼ်တေမူတ်းဢႃယုၼႂ်းလိူၼ် မီးၼႃး(မၢတ်ႉၶျ်) 31 ၼႂ်းပီတေမႃးၼႆႉဢေႃႈ။ ၵူၼ်းၸုမ်းၼႆႉ မၢင်ၵေႃႉၵေႃႈမီး ၽၢတ်ႉသပွတ်ႇ (Passport) ပပ်ႉသီလႅင်ယဝ်ႉ မၢင်ၸိူဝ်းပႆႇမီး ၶႃႈ။ ၸိူဝ်းဢၼ်တေလႆႈတွၵ်ႇတႃပထပ်း တႃႇယူႇတေႃႇ(ဝီႊသႃႊ) 2 ၵမ်းၼႆၼၼ်ႉၶႃႈၼေႈ။ လူင်ထီႉ 1 ၼႆႉ ၵမ်ႈၽွင်ႈၵေႃႈတွၵ်ႇယဝ်ႉယဝ်ႉၶႃႈၼႃ။ ၵမ်ႈၽွင်ႈတႄႉပႆႇလႆႈတွၵ်ႇ။ ၵွပ်ႈၼႆ မိူဝ်ႈလဵဝ် ၶဝ်ၸင်ႇႁိပ်ႈႁႂ်ႈၵႂႃႇတွၵ်ႇယူႇၼႆႉ။ ၵူၼ်းၸိူဝ်းၼႆႉတေလႆႈတွၵ်ႇ ထႅင်ႈၵမ်းၼိုင်ႈ လူင်ႇထိ 2 ၼႂ်းဝၼ်းတီႈ 31/03/2026 ၼၼ်ႉၶႃႈၼႃ။ တေလႆႈၵႂႃႇတွၵ်ႇဢေႃႈၼၼ်ႉ။ ၵူဝ်ပဵၼ်ၵူၼ်းတူၵ်းလူၼ်ႇပႅတ်ႈႁေ ၵူဝ်ဢမ်ႇၸၢင်ႈတေႃႇဝီႊသႃႊ တႃႇႁဵတ်းၵၢၼ်ထႅင်ႈၶႃႈၼေႈ။ ပၢႆလိူဝ်သုၼ် သီႊဢၢႆႊ (CI) သမ်ႉပိၵ်ႉပႅတ်ႈႁေတလဵဝ်ၼႆႉ ။ မၢင်ၵေႃႉယင်းပႆႇမီး ၽၢတ်ႉသပွတ်ႇ ၶႃႈဢေႃႈၼၼ်ႉ” – ဝႃႈၼႆ။

လႆႈႁူႉဝႃႈ ၵူၼ်းၸိူဝ်းတေလႆႈတွၵ်ႇၸုမ်ႈ ( တႃပထပ်း) တႃႇသိုပ်ႇယူႇၼႂ်းမိူင်းထႆးၼႆႉ တေလႆႈတွၵ်ႇ 2 ၵမ်း။ ၼႂ်းဝၼ်းတီႈ 28/09/2026 ၼႆႉ ဝႆႉပဵၼ်ဝၼ်းလိုၼ်းသုတ်းၵမ်းၼိုင်ႈသေ ပေႃးထိုင်ဝၼ်းတီႈ 31/03/2027 မႃးတေလႆႈတွၵ်ႇထႅင်ႈၵမ်းၼိုင်ႈ ၼႆယဝ်ႉ။

ဝၢႆးလင် ၸွမ်ၸိၵ်းသိုၵ်းမၢၼ်ႈယိုတ်းမိူင်း မိၼ်းဢွင်ႇလၢႆႇ ဢႅဝ်ႇယဵမ်ႈမိူင်းထႆးသေပွၵ်ႈမိူဝ်းၶိုၼ်းၼႆႉ လူင်ပွင်ၸိုင်ႈထႆး ပိုၼ်ၽၢဝ်ႇပၵ်းပိူင်မၢႆမီႈဢၼ်မႂ်ႇ ၵဵဝ်ႇၵပ်းႁႅင်းၵၢၼ်ယၢၼ်မိူင်း ၊ ၸွမ်းၼင်ႇပၵ်းပိူင်တမ်းဝၢင်းဝႆႉဢွၼ်တၢင်းၼၼ်ႉၵေႃႈ ပိုၼ်ၽၢဝ်ႇႁႂ်ႈ ႁိပ်ႈၼႅတ်ႈလူင်းသဵၼ်ႈၸိုဝ်ႈထႅင်ႈ – ၼႆၵေႃႈမီးမႃး။

ႁႅင်းၵၢၼ်ၸိူဝ်းဢၼ်ဝီႊသႃႊတေမူတ်း ၼႆႉဢမ်ႇၵႃး ၸုမ်းဢၼ်တေလႆႈတွၵ်ႇလူင်ႇထိ 2 ၼႂ်းဝၼ်းတီႈ 31/03/2026 ၼႆႉၵူၺ်း။ ဢၼ်တေမူတ်း လိူၼ်ထူၼ်ႈ 12 (တီႊသႅမ်ႊပိူဝ်ႊ) ပီၼႆႉၵေႃႈမီး။ ဢၼ်တေမူတ်းၼႂ်းလိူၼ်ထူၼ်ႈ 2 ပီ 2027 တေမႃးၵေႃႈမီး။

ၵူၼ်းႁၵ်ႉၸိူဝ်ႉၸၢတ်ႈထႆးၵမ်ႈၽွင်ႈတႄႉလၢတ်ႈဝႃႈ ႁႂ်ႈၵူတ်ႇထတ်းၵူၼ်းၸိူဝ်းႁဵတ်းၵၢၼ်ဢမ်ႇမႅၼ်ႈၸွမ်းပၵ်းပိူင်မၢႆမီႈႁႅင်းၵၢၼ် ၊ ၸိူဝ်းမႃးႁိမ်ၵၢၼ်ၵူၼ်းပိုၼ်ႉတီႈ ၸိူဝ်းၼႆႉသေ ပၼ်တူတ်ႈတၢမ်ႇ လိုပ်ႈပွၵ်ႈၶိုၼ်းမိူင်းၽႂ်မၼ်း ဝႃႈၼႆ။ ၵူၺ်းၵႃႈ ၸဝ်ႈၵၢၼ်ပၢႆးမၢၵ်ႈမီး ၼႂ်းမိူင်းထႆးၵမ်ႈၼမ်သမ်ႉ မႆႈၸႂ်ၵူဝ်ဢမ်ႇမီးႁႅင်းၵၢၼ်၊ ဢမ်ႇၶႂ်ႈသူင်ႇႁႅင်းၵၢၼ်ၸိူဝ်းၼႆႉပွၵ်ႈၶိုၼ်း။ ၵွပ်ႈၼႆလႄႈ ၼႂ်းႁၢင်လိူၼ်ၵျူႊလၢႆႊပူၼ်ႉမႃး တႅၼ်းၽွင်းၸိုင်ႈမိူင်းၶဝ်လႆႈဢဝ်ဢုပ်ႇၼႂ်းပၢင်ၵုမ်သၽႃးသေ တႅပ်းတတ်းၵႂႃႇ ႁႂ်ႈလူင်ပွင်ၸိုင်ႈထႆး ပၼ်ႁႅင်းၵၢၼ်ယၢၼ်မိူင်းၸိူဝ်းဢႃယု ဝီႊသႃႊ (Visa)ႁဵတ်းၵၢၼ်မူတ်းၵႂႃႇ ၸိူဝ်းၼၼ်ႉ လႆႈသိုပ်ႇယူႇထႅင်ႈပီၼိုင်ႈၼႆ ၽူႈၶၢၼ်ပၢၵ်ႇႁွင်ႈၵၢၼ်လူင်ပွင်ၸိုင်ႈထႆး လၢတ်ႈဝႆႉပဵၼ်တၢင်းၵၢၼ်။

ဝၢႆးလင်ၸွမ်ၸိုင်ႈယိုတ်းမိူင်း မိၼ်းဢွင်ႇလၢႆႇ ဢႅဝ်ႇယဵမ်ႈမိူင်းထႆးသေပွၵ်ႈၶိုၼ်းမိူင်းမၢၼ်ႈၼႆႉ ၾၢႆႇတၢင်းႁွင်ႈၵၢၼ် ႁႅင်းၵၢၼ်မိူင်းထႆးၵေႃႈ ဢွၵ်ႇလိၵ်ႈပိုၼ်ၽၢဝ်ႇထႅင်ႈၽိုၼ်ၼိုင်ႈ။ ၵဵဝ်ႇၵပ်းလွင်ႈ ၵူၼ်းမိူင်းမၢၼ်ႈ ၸိူဝ်းယိပ်း ၽၢတ်ႉသပွတ်ႇ သႅၼ်းဢႅဝ်ႇယဵမ်ႈ PV သေ မီးယူႇတီႈမိူင်းထႆးၼၼ်ႉ သင်ဝႃႈလူဝ်ႇလႆႈလၢႆႈ ပပ်ႉၽတ်ႉသပွတ်ႇ (Passport) ပပ်ႉသီလႅင်ၸိုင် တၵ်းတေလႆႈတၢင်ႇယိုၼ်ႈတီႈ လုမ်းတၢင်မၢၼ်ႈတီႈဝဵင်းလူင်ၵုင်းထဵပ်ႈၵမ်းသိုဝ်ႈယဝ်ႉ သိုပ်ႇယိုၼ်ႈသူင်ႇၸူးၼေႇပျီႇတေႃႇ။ သင်ဝႃႈတၢင်းၼေႇပျီႇတေႃႇ ထတ်းသၢင်တူၺ်းသေ ပၼ်ဢၼုယၢတ်ႈယဝ်ႉၸင်ႇ လုမ်းတၢင်မၢၼ်ႈၼႂ်းမိူင်းထႆး ၸင်ႇတေလၢႆႈပၼ်ပပ်ႉ- ဝႃႈၼႆ။

ဢိင်ၼိူဝ်လွင်ႈၼႆႉသေ ဢၼ်တေယၢပ်ႇၽိုတ်ႇႁႅင်းပဵၼ် ၸိူဝ်းဢၼ်ဢဝ်ပပ်ႉၽတ်ႉသပွတ်ႇ သႅၼ်းဢႅဝ်ႇယဵမ်ႈ (PV) ၶဝ်ႈမိူင်းထႆးသေ ၶဝ်ႈမႃးႁဵၼ်းလိၵ်ႈၼႂ်းမိူင်းထႆး။ ဝၢႆးလင်လႆႈႁဵၼ်းယဝ်ႉ တႃႇလႅၵ်ႈပဵၼ်ပပ်ႉႁဵတ်းၵၢၼ် PJ ၼၼ်ႉ တေလႆႈလႅၵ်ႈပဵၼ် လူဝ်ႇၶိုၼ်းလႅၵ်ႈပဵၼ် PE ဢွၼ်တၢင်း။ ယွၼ်ႉဝႃႈတႃႇတေလၢႆႈပပ်ႉၼႆႉ တေလႆႈတၢင်ႇၸူးတီႈ လူင်ပွင်ၸိုင်ႈမၢၼ်ႈၼေႇပျီႇတေႃႇႁိုင်ၶၢဝ်းယၢမ်း 2 လိူၼ်ထိုင် 4 လိူၼ် လႄႈ ဢွၼ်ၵၼ်မႆၸႂ်ဝႃႈၵူဝ် ဢမ်ႇၸၢင်ႈတေႃႇဝီႊသႃႊ၊ ၵူဝ်မႅၼ်ႈၽွင်းဝီႊသႃႊမူတ်း ဝႃႈၼႆ။