ပလိၵ်ႈထႆး ၵူတ်ႇထတ်းၵူၼ်းႁဵတ်းၵၢၼ်ပၢႆးမၢၵ်ႈမီး ၼႂ်းၸႄႈတွၼ်ႈၵဵင်းမႂ်ႇ ၸိုင်ႈထႆး ဢၢၼ်းၵူတ်ႇ ထတ်း 3 မိုၼ်ႇၶွမ်ႊပၼီႊ၊ ၼႂ်းၼၼ်ႉ ဢၼ်ၸဝ်ႈၼႃႈတီႈထႆး မီးလွင်ႈငမ်းငဝ်းသေ ပိုၼ်ၽၢဝ်ႇဝႆႉသဵၼ်ႈၸိုဝ်ႈ တႃႇႁွင်ႉမႃးၵူတ်ႇထတ်း မီး 22 ၵေႃႉ ၼႂ်းၼၼ်ႉပႃးၵူၼ်းမိူင်းမၢၼ်ႈ 7 ၵေႃႉ တီႉလႆႈၽွင်ႈယဝ်ႉ။

ပလိၵ်ႈထႆးပိုၼ်ၽၢဝ်ႇ ၼႂ်းဝၼ်းတီႈ 20/07/2026 မိူဝ်ႈဝႃးၼႆႉဝႃႈ- ယိူင်းဢၢၼ်းတႃႇၽဵဝ်ႈလၢင်ႉၵူၼ်းၼွၵ်ႈမိူင်းၸိူဝ်း ဢဝ်တိုဝ်ႉတၢင်း လွၵ်းဢူၼ်ႈပၵ်းပိူင်မၢႆမီႈၸိုင်ႈမိူင်းသေ မႃးႁဵတ်းၵၢၼ်တႃႇလႆႈၼမ်ႉတွၼ်းၼမ်ႉမျၢတ်ႈ တူဝ်ၵဝ်ႇ ၵူၺ်းဢမ်ႇၵႃး ႁဵတ်းပႃးၵၢၼ်ၽိတ်းပၵ်းပိူင် – လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊၼႆသေ လႆႈလူင်းပိုၼ်ႉတီႈၽဵဝ်ႈမူၺ်ႉ ၶွမ်ႊပၼီႊဢၼ်ၽိတ်းပၵ်းပိူင်ၸိုင်ႈမိူင်း ၼႂ်းၸႄႈတွၼ်ႈၵဵင်းမႂ်ႇ – ဝႃႈၼႆ။

လိူဝ်ၼၼ်ႉပလိၵ်ႈထႆးလၢတ်ႈထႅင်ႈဝႃႈ ဢၢၼ်းတေၵူတ်ႇထတ်း ၶွမ်ႊပၼီႊ 33144 ဢၼ်၊ ၼႂ်းၼၼ်ႉမီးၵူၼ်းၼွၵ်ႈမိူင်းယိပ်းၵမ်ဝႆႉ 4741 ဢၼ်၊ ၼႂ်းၼၼ်ႉသမ်ႉ မီးၶွမ်ႊပၼီႊ ဢၼ်လီထၢင်ႇထိူမ်ဝႃႈ ဢဝ်ၸိုဝ်ႈၵူၼ်းထႆးဢွၵ်ႇဝႆႉသေ ႁဵတ်းၼမ်ႉတွၼ်းတႃႇတၢင်ႇၸိုင်ႈမိူင်း ဢၼ်ဢမ်ႇမီးၽွၼ်းလီတႃႇၵူၼ်းမိူင်းထႆးၼႆႉမီးယူႇ 1591 ဢၼ်။ ၼႂ်းၶွမ်ႊမၼီႊဢၼ်ႁဵတ်းၽိတ်းပၵ်းပိူင်ပၢႆးမၢၵ်ႈမီးမိူင်းထႆး 1000 ပၢႆၼၼ်ႉၸဝ်ႈၼႃႈတီႈပလိၵ်ႈထႆး ၵူတ်ႇထတ်းႁၼ်ဝႆႉသဵၼ်ႈၸိုဝ်ႈၵူၼ်းဢၼ်လီထၢင်ႇထိူမ်ႁႅင်းသုတ်းမီး 22 ၵေႃႉ။ ၼႂ်းၼၼ်ႉပဵၼ် ၵူၼ်းထႆး 2 ၊ မၢၼ်ႈ 7 ၵလႃးဢိၼ်ႊတီႊယႃႊ 3 ဢိင်းၵလဵတ်ႈ 1 ၶႄႇ 9 ၵေႃႉ။ ၶဝ် 22 ၵေႃႉၼႆႉ ပၼ်ႇၵၢၼ်ဝႆႉ ၼိူဝ်တီႈလိၼ်ထႆး ။ ၵႃႈတီႈလိၼ်ၵွႆးၵွႆး မီးၶၼ်ငိုၼ်းထႆး 633 လၢၼ်ႉ။ လိၼ်ၸိူဝ်းၼႆႉၵေႃႈဢဝ်ၸိုဝ်ႈၵူၼ်းထႆးသေသိုဝ်ႉဝႆႉ။ ပလိၵ်ႈထႆးဝႃႈ – ၸိူဝ်းၶဝ်ပၼ်ႇၵၢၼ်ဝႆႉၼႆႉ ပဵၼ်ၵၢၼ်ဢၼ်ၶဵင်ႇတႃႉၵၢၼ်မၢၵ်ႈမီးၸိုင်ႈမိူင်းထႆးလႄႈၵူၼ်းမိူင်းထႆးဝႆႉ ၵွပ်ႈၼႆ ၸင်ႇလႆႈပိုၼ်ၽၢဝ်ႇသဵၼ်ႈၸိုဝ်ႈတႃႇတေႁွင်ႉမႃးၵူတ်ႇထတ်းဝႆႉဝႃႈၼႆ။

ပလိၵ်ႈထႆးပိုၼ်ၽၢဝ်ႇမိူဝ်ႈဝႃးၼႆႉထႅင်ႈဝႃႈ – ဢဝ်ႁႅင်း ပလိၵ်ႈၽၢၵ်ႈ 5 ၊ ပလိၵ်ႈပိုၼ်ႉတီႈ၊ ပလိၵ်ႈၾၢႆႇဢႅဝ်ႇယဵမ်ႈတွင်ႈတဵဝ်း၊ ၾၢႆႇၽွင်းငမ်းၼႂ်းပိုၼ်ႉတီႈလႄႈ ႁွင်ႈၵၢၼ်ၾၢႆႇသဵၼ်ႈမၢႆၼႃႈလိၼ်ၸိူဝ်းၼႆႉမွၵ်ႈ 250 ၵေႃႉ၊ ဢၼ်လႆႈလူင်းၵူတ်ႇထတ်းတႄႉတႄႉယဝ်ႉၼႆႉ တိုၵ်ႉမီး 18 တီႈ။ ၼႂ်းၵူၼ်းၸိူဝ်းထုၵ်ႇပိုၼ်ၽၢဝ်ႇသဵၼ်ႈၸိုဝ်ႈဝႆႉ 22 ၵေႃႉၼၼ်ႉတီႉလႆႈဝႆႉ 8 ၵေႃႉ။ ပဵၼ်ၵူၼ်း မိူင်းမၢၼ်ႈ 3 ၵေႃႉ ၵူၼ်းမိူင်းၵလႃး 2 ၵေႃႉ ၶႄႇ 2 ၵေႃႉလႄႈ ထႆး ၵေႃႉၼိုင်ႈ။ တူဝ်ယၢင်ႇဢၼ်ၼႄလႆႈဢၼ်ၼိုင်ႈၵေႃႈပဵၼ် ၶူင်းၵၢၼ်ၵေႃႇသၢင်ႈႁိူၼ်းယေး K-12 ဢၼ်မီးတီႈပွၵ်ႉ ၶျႆးယသထၢၼ် ၸႄႈဝဵင်းသႃရၽီး ၸႄႈတွၼ်ႈၵဵင်းမႂ်ႇ ။ ၼႂ်းၼၼ်ႉပဵၼ်ၶွမ်ႊပၼီႊၵူၼ်းၼွၵ်ႈမိူင်း 4 ဢၼ် ဢဝ်ၸိုဝ်ႈၵူၼ်းထႆးဢွၵ်ႇၼႃႈဝႆႉ ဝႃႈၼႆ။

ပလိၵ်ႈထႆးလၢတ်ႈဝႆႉထႅင်ႈဝႃႈ ၵူၼ်းထႆးၸိူဝ်းထုၵ်ႇၸႂ်ႉၸိုဝ်ႈသဵင်ဝႆႉၼႂ်းမၢႆၾၢင် ၶွမ်ႊပၼီႊ ဢၼ်ၵူၼ်းၼွၵ်ႈမိူင်း ၵုမ်းၵမ်ပၼ်ႇၵၢၼ်ဝႆႉၼၼ်ႉ – ၵမ်ႈၽွင်ႈၵေႃႈ တူၵ်းၶွၵ်ႈဝႆႉလူၺ်ႈတၢင်းၽိတ်းတၢင်ႇဢၼ်၊ ၵမ်ႈၽွင်ႈၵေႃႈ ယင်းဢမ်ႇႁူႉတူဝ်ဝႃႈ ၸိုဝ်ႈၸဝ်ႈၵဝ်ႇပဵၼ်ၸဝ်ႈၶွင်ၶွမ်ႊပၼီႊယဝ်ႉ။ ယွၼ်ႉပိူဝ်ႈဝႃႈ – ၵူၼ်းထႆးၸိူဝ်းၼႆႉ ယၢမ်ႈဢဝ်ဢဵၵ်ႇၵသၢၼ် (ဝႂ်မိူၼ်)ဝတ်းဝႂ်လႄႈ ဝႂ်မုင်ႉႁေႃႁိူၼ်းၶဝ် ပၼ်ၵူၼ်းဢၼ်ႁူႉၸၵ်းၶဝ်။ ၵူႈပွၵ်ႈသမ်ႉ ယၢမ်ႈႁပ်ႉႁႅင်းၵၢၼ်ယၢၼ်မိူင်းမႃးႁဵတ်းၵၢၼ်၊ ယၢမ်ႈႁပ်ႉပဵၼ်ပေႃႈလဵင်ႉ မႄႈလဵင်ႉဝႆႉ ၸိူဝ်းၼႆႉ – ဝႃႈၼႆ။ ၼႂ်းၼၼ်ႉတႃႇၵေႃႉၼိုင်ႈတႄႉ ယွမ်းႁပ်ႉဝႃႈ – ပၼ်ဢဝ်ၸိုဝ်ႈမၼ်းၵႂႃႇၸႂ်ႉတင်ႈၶွမ်ႊပၼီႊ တႄႉယူႇ။ မၼ်းၸၢႆးယွမ်းႁပ်ႉလူင်းလၢႆးမိုဝ်းပၼ် ၵၢၼ်ၸိူဝ်းၵဵဝ်ႇၶွင်ႈၶွမ်ႊပၼီႊ။ ၼိုင်ႈလိူၼ်လႆႈငိုၼ်း 7000 ဝၢတ်ႇ – ဝႃႈၼႆ။

ယိူင်းဢၢၼ်းဢၼ်လႆႈၵူတ်ႇထတ်းၽဵဝ်ႈလၢင်ႉၵၢၼ်ပၢႆးမၢၵ်ႈမီး ဢၼ်ဢဝ်ၸိုဝ်ႈၵူၼ်းထႆးပၼ်ႇၵၢၼ်ယူႇၼႂ်းမိူင်းထႆးၼႆႉ – ပဵၼ်တႃႇၵႅတ်ႇၶႄႁႄႉၵင်ႈပၼ်သုၼ်ႇလႆႈၵူၼ်းမိူင်းထႆး ဢၼ်ၺႃးဢဝ်ၸိုဝ်ႈသဵင်ၸႂ်ႉၼႂ်းၵၢၼ်ငၢၼ်းသေ ဢမ်ႇမီးၼမ်ႉတွၼ်းတႃႇတူဝ်ၸဝ်ႈၵဝ်ႇလႄႈဝၢၼ်ႈမိူင်းၸဝ်ႈၵဝ်ႇ၊ တႃႇဢဝ်ၵၢၼ်ၼႂ်းမိူင်းထႆး ပၼ်ၶိုၼ်းၼႂ်းမိုဝ်းၵူၼ်းမိူင်းထႆး ။ တႃႇယုၵ်ႉမုၼ်းပၢႆးမၢၵ်ႈမီးမိူင်းထႆး ႁႂ်ႈၵူၼ်းမိူင်းထႆး လႆႈယူႇငၢႆႈၵိၼ်လီ ၸဵမ်ၸိူဝ်းၼႆႉ။ ၵူၺ်းၵႃႈ တေဢမ်ႇပိၵ်ႉတၢင်း တႃႇၵူၼ်းၼွၵ်ႈမိူင်းတေမႃးမႃးလူင်းတိုၼ်း ႁဵတ်းပၢႆးမၢၵ်ႈမီးမိူင်းထႆး။ တေပၼ်တၢင်းႁူႉၵဵဝ်ႇၵပ်းပၵ်းပိူင်မၢႆမီႈဢၼ်ထႆးမီးဝႆႉသေ ၼင်ႇႁိုဝ်တေဢမ်ႇတုမ်ႉတိူဝ်ႉပၢႆးမၢၵ်ႈမီးမိူင်းထႆးၼၼ် တေပၼ်တိုဝ်ႉတၢင်းႁဵတ်းသၢင်ႈၵႂႃႇ။ ဢၼ်လမ်ႇလွင်ႈသုတ်း တေၶူၼ်ႉႁႃ ၶႃႈႁၢပ်ႇၵၢၼ်ၶုၼ်ၸိူဝ်းဢမ်ႇႁဵတ်းၸွမ်းၾိင်ႈတိုဝ်းၵမ်သေ ႁဵတ်းၽိတ်းပၵ်းပိူင်မၢႆမီႈၸိုင်ႈမိူင်းၸိူဝ်းၼၼ်ႉၵႂႃႇၼႆ ၵႅမ်ၽူႈၵွၼ်းပလိၵ်ႈ ၸႄႈတွၼ်ႈၵဵင်းမႂ်ႇလၢတ်ႈၼင်ႇၼႆ။