ၼႂ်းၶၢဝ်းတၢင်းဝၼ်းတီႈ 7 လႄႈ 8 လိူၼ်ဢေႃႊၵတ်ႉသ်ၼႆႉ ပလိၵ်ႈထႆး တီႉလႆႈၵူၼ်းမိူင်းမၢၼ်ႈ ဢၼ်လၵ်ႉၶၢမ်ႈလႅၼ်လိၼ်ၶဝ်ႈမိူင်းထႆး 23 ၵေႃႉ – တီႈလၢၼ်ႇ 3 တီႈ။
ဝၼ်းတီႈ 7/8/2026 ၼၼ်ႉ ပလိၵ်ႈထႆး ႁႄႉထတ်းရူတ်ႉၵႃးလမ်းၼိုင်ႈ တီႈၼိူဝ်သဵၼ်ႈတၢင်းလူင် တၢင်းၶဝ်ႈဝဵင်း ၵၢၼ်ႊၵျၼပူႊရီႊ ၊ ထူပ်းႁၼ်မႅၼ်ႈ ၵူၼ်းမိူင်းမၢၼ်ႈ ၶီႇမႃးၼႂ်းရူတ်ႉ တင်းမူတ်း 11 ၵေႃႉ။ ပဵၼ်ၵူၼ်းၸၢႆး 10 ၵေႃႉလႄႈ ၼၢင်းယိင်း ၵေႃႉၼိုင်ႈ။ ၵမ်ႈၽွင်ႈၶီႇသွၼ်ႉၵၼ်ၼႂ်းၶွင်ႉတၢင်းၼႃႈ ၊ တႃႇမွၵ်ႈ 3-4 ၵေႃႉသမ်ႉ ၼွၼ်းမႃးတၢင်းလင်ရူတ်ႉသေ ဢဝ်တႃၶၢႆႇႁူမ်ႇမႃး။ ၸိူဝ်းၶဝ်လၢတ်ႈဝႃႈ ဢမ်ႇမီးဝတ်းဝႂ်ဢၼုယၢတ်ႈၶဝ်ႈမိူင်း ၊ ပဵၼ်ၵူၼ်းမိူင်းမၢၼ်ႈ ၶၢမ်ႈလႅၼ်လိၼ်သေၶဝ်ႈမိူင်းထႆး ။ ဢၢၼ်းတေၵႂႃႇႁႃႁဵတ်းၵၢၼ်ႁႃငိုၼ်း ဝႃႈၼႆ။ ဢၼ်ၶပ်းရူတ်ႉ တၢင်ႇဢဝ်ၸိူဝ်းၶဝ်မႃးသမ်ႉပဵၼ် ၽူႈၸၢႆး ၵူၼ်းမိူင်းထႆး ဢႃယု 28 ပီ။ မၼ်းၸၢႆးၵေႃႈသမ်ႉဢမ်ႇမီးဝတ်းဝႂ်ၵပ်းတူဝ်သင်မိူၼ်ၵၼ်။ ၵွပ်ႈၼႆ ပလိၵ်ႈတီႉဢဝ်ၸိူဝ်းၶဝ်တင်း 12 ၵေႃႉသေ သူင်ႇဝႆႉတီႈႁူင်းပလိၵ်ႈ ၵၢၼ်ႊၵျၼပူႊရီႊယဝ်ႉဝႃႈၼႆ။
ၼွၵ်ႈလိူဝ်ၼၼ်ႉ ၼႂ်းဝၼ်းတီႈ 8 ၼၼ်ႉၵူၺ်းၼင်ႇၵဝ်ႇ ပလိၵ်ႈႁႄႉထတ်းရူတ်ႉလမ်းၼိုင်ႈတီႈဢယုတ်ႉထယႃး။ ထူပ်းၺႃးႁႅင်းၵၢၼ်ယၢၼ်မိူင်း 4 ၵေႃႉ (ပဵၼ်ၵူၼ်းၸၢႆး 2 ၵေႃႉလႄႈ ၼၢင်းယိင်း 2 ၵေႃႉ) ဢၼ်လၵ်ႉလွမ်ၶဝ်ႈမိူင်းထႆးလူၺ်ႈဢမ်ႇမီးဝတ်းဝႂ်သင်။ ၵူၼ်းႁေႃႈရူတ်ႉသူင်ႇၶဝ်ပဵၼ်ၵူၼ်းမိူင်းထႆးဢႃယု 35 ပီ။ မၼ်းၸၢႆးလၢတ်ႈဝႃႈ ၸိူဝ်းၶဝ်ၸၢင်ႈမၼ်းၸၢႆး ႁႂ်ႈသူင်ႇပၼ်တီႈဢယုတ်ႉထယႃး လႄႈ သမုတ်ႇသႃၶွၼ်း။ လႆႈၵႃႈၸၢင်ႈၼိုင်ႈၵေႃႉ 500 ဝၢတ်ႇဝႃႈၼႆ။
ၵူၼ်းမိူင်းမၢၼ်ႈၸိူဝ်းၼၼ်ႉ လႆႈပၼ်ၵႃႈၸၢင်ႈတီႈၼၢႆးၼႃႈဢၼ်ႁႃၵၢၼ်ပၼ် ယူႇၵၢင်ၵပ်းသိုပ်ႇတိတ်းတေႃႇပၼ်တႃႇတေႃႉသူင်ႇၼၼ်ႉ ၼိုင်ႈၵေႃႉ 15000 ဝၢတ်ႇ ဝႃႈၼႆ။
ၼႂ်းဝၼ်းလဵဝ်ၵၼ်ၼၼ်ႉၵူၺ်း ပလိၵ်ႈထႆးႁႄႉရူတ်ႉၵႃးထႅင်ႈ 2 လမ်းတီႈၼိူဝ်ႈသဵၼ်ႈတၢင်းလူင်မၢႆ 12 ၸႄႈတွၼ်ႈတၢၵ်ႇၼၼ်ႉတီႉလႆႈထႅင်ႈၵူၼ်းမိူင်းမၢၼ်ႈ ဢၼ်ဢမ်ႇမီးဝတ်းဝႂ်သင် 8 ၵေႃႉ၊ ၵူၼ်းၶပ်းရူတ်ႉၵႃးပဵၼ်ၵူၼ်းမိူင်းထႆး 2 ၵေႃႉ။ ၸဝ်ႈၵႃးလၢတ်ႈဝႃႈ ၵူၼ်းမိူင်းမၢၼ်ႈၸိူဝ်းၼႆႉၸၢင်ႈရူတ်ႉၵႃးၶဝ် ၵႂႃႇသူင်ႇတီႈ ၼၶွၼ်ႊသဝၼ်ႊ၊ လႆႈၵႃႈၸၢင်ႈၼိုင်ႈၵေႃႉ 2000 ဝၢတ်ႇဝႃႈၼႆ။
ယၢမ်းလဵဝ် ၵူၼ်းၶပ်းရူတ်ႉ ၵူၼ်းမိူင်းထႆး 4 ၵေႃႉလႄႈ ၵူၼ်းမိူင်းမၢၼ်ႈၸိူဝ်းဢမ်ႇမီးဝတ်းဝႂ်သင် တႃႇ 23 ၵေႃႉၸိူဝ်းၼၼ်ႉ ၺႃးပလိၵ်ႈထႆး တီႉၺွပ်းသူင်ႇတူဝ်ၵူတ်ႇထတ်းဝႆႉတီႈႁူင်းပလိၵ်ႈ ၸႄႈတွၼ်ႈၽႂ်မၼ်းဝႆႉယဝ်ႉ လႆႈႁူႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ