ႁႅင်းၵၢၼ်ယၢၼ်မိူင်း ဢၼ်ၵႂႃႇလႃႇၵူၼ်းပိုၼ်ႉမိူင်း ၼႂ်းမိူင်းၵဵင်းမႂ်ႇ ၼၼ်ႉ ပလိၵ်ႈထႆးလိုပ်ႈလမ်းတီႉၺွပ်းၵုမ်းၶင်ဝႆႉယဝ်ႉဝႃႈၼႆ။

ဝၼ်းတီႈ 16/07/2026 မီးၶလိပ်ႉဝီႊတီႊဢူဝ်ႊပွတ်းပွတ်းဢၼ်ၼိုင်ႈ ၽႄႈၼႂ်းသိုဝ်ႇၼႅင်ႈသၢၼ် တူင်ႇဝူင်းၵူၼ်းထႆး- မီးႁႅင်းၵၢၼ်ယၢၼ်မိူင်းၵေႃႉၼိုင်ႈ မႃးလႃႇၼႃႈႁိူၼ်းၵူၼ်းမိူင်းၵဵင်းမႂ်ႇ လင်ၼိုင်ႈတီႈဢိူင်ႇသၼ်ၼႃးမဵင်း ၸႄႈဝဵင်းသၼ်သၢႆး ၸႄႈတွၼ်ႈၵဵင်းမႂ်ႇၸိုင်ႈထႆး ။ ၸဝ်ႈၶွင်ၶလိပ်ႉၼၼ်ႉ လၢတ်ႈဝႆႉဝႃႈ ၵေႃႉမႃးလႃႇပဵၼ်ႁႅင်းၵၢၼ်ယၢၼ်မိူင်း ပဵၼ်ၵူၼ်းတႆး- မၼ်းၸၢႆးလႃႇသေဢမ်ႇၵႃး မိူၼ်ၸူၵ်းၵွင်ႈၼႂ်းသိူဝ်ႈမၼ်းသေ လွၵ်ႇပႃးၸဝ်ႈႁိူၼ်းလႄႈ ၸဝ်ႈႁိူၼ်းမႆႈၸႂ်လွင်ႈႁူမ်ႇလူမ်ႈ- ယွၼ်းႁႂ်ႈပလိၵ်ႈထႆး ၸွႆႈတီႉၺွပ်းၵူတ်ႇထတ်းသေပၼ်တူတ်ႈတၢမ်ႇဝႆးဝႆးသေၵမ်း တႅမ်ႈတၢင်ႇဝႆႉ ၼင်ႇၼႆ။

လွင်ႈၼႆႉ ထိုင်မႃးဝၼ်းတီႈ 17 ယၢမ်းၵၢင်ၼႂ် မီးသိုဝ်ႇၶၢဝ်ႇထႆးလၢႆလၢႆဢၼ် တႅမ်ႈတၢင်ႇပိုၼ်ၽၢဝ်ႇဝႆႉဝႃႈ -ပလိၵ်ႈသၼ်သၢႆး လႆႈၵွင်ႉသၢၼ်ၵၼ်တင်းပလိၵ်ႈဝဵင်းမႄႈၸူဝ်ႉသေ ၵႂႃႇသွၵ်ႈႁႃႁိူၼ်းၸၢႆးၵေႃႉဢၼ်လႃႇ လႆႈၸႂ်ႉဢဵၼ်ႁႅင်းပလိၵ်ႈလႄႈၾၢႆႇၸွပ်ႇၶၢဝ်ႇၶဝ် ၶဝ်ႈၵႂႃႇတီႉဢဝ်ၸၢႆးႁႅင်းၵၢၼ်ၼၼ်ႉဝႆႉယဝ်ႉ။ တေၵူတ်ႇထတ်းသေ ပၼ်တူတ်ႈတၢမ်ႇၵႂႃႇဝႃႈၼႆဝႆႉ။

ၽွင်းပလိၵ်ႈထႆးၶဝ်ႈၵူတ်ႇထတ်းၼႂ်းႁွင်ႈမၼ်းၸၢႆးၼၼ်ႉထူပ်းႁၼ်သိူဝ်ႈၶူဝ်းဢၼ်မၼ်းၸၢႆးၼုင်ႈၵႂႃႇလႃႇၼႃႈႁိူၼ်းပိူၼ်ႈ၊ ထူပ်းႁၼ်ပႃးၵွင်ႈသတ်ႉယၢမ်းလဝ်းၼိုင်ႈ ။ ပလိၵ်ႈလၢတ်ႈဝႃႈမၼ်းၸၢႆးပဵၼ်ထႆးယႆႇ(တႆး)။ မၼ်းၸၢႆးမီးၵွင်ႈလဝ်းၼိုင်ႈလူၺ်ႈဢမ်ႇမီးဝႂ်ၶႂၢင်ႉ – လွင်ႈၼႆႉပဵၼ်လွင်ႈၽိတ်းပၵ်းပိူင်မၢႆမီႈ။ မၼ်းၸၢႆးပဵၼ်ၵူၼ်းလၵ်ႉၶဝ်ႈမိူင်း-လွင်ႈၼႆႉၵေႃႈၽိတ်းပၵ်းပိူင်မၢႆမီႈၸိုင်ႈမိူင်း ၵွပ်ႈၼႆလႄႈလႆႈဢဝ်တူဝ်မၼ်းၸၢႆးသူင်ႇႁူင်းပလိၵ်ႈတႃႇၵူတ်ႇထတ်းဝႆႉတႃႇပၼ်တူတ်ႈတၢမ်ႇဝႃႈၼႆ။

ၵူၺ်းၵႃႈၸိုဝ်ႈမၼ်းၸၢႆးဝႃႈႁိုဝ် မၼ်းၸၢႆးလုၵ်ႈလႂ်မႃးၼႆၸိူဝ်းၼႆႉတႄႉ ဢမ်ႇလၢတ်ႈပႃး။

ယၢမ်းလဵဝ် ၾၢႆႇၼိုင်ႈတိုၵ်ႉပဵၼ်ၽွင်းၶၢဝ်း ပလိၵ်ႈပၵ်းတႃပႂ်ႉတူၺ်းႁႅင်းၵၢၼ်ယၢၼ်မိူင်းၼႂ်းမိူင်းထႆး။ တႃႇတေၵူတ်ႇထတ်းၽဵဝ်ႈမူၺ်ႉၸုမ်းႁဵတ်းၵၢၼ်ၽိတ်းမၢႆမီႈ၊ တႃႇတေၵုမ်းယိပ်းလႆႈႁႅင်းၵၢၼ်ယၢၼ်မိူင်းၸိူဝ်းႁဵတ်းဝတ်းဝႂ်ဢမ်ႇထုၵ်ႇပၵ်းပိူင်မၢႆမီႈၼႆၸိူဝ်းၼႆႉသေ ႁွင်ႈၵၢၼ်ၽွင်းလူင်ၾၢႆႇႁႅင်းၵၢၼ် မိူင်းထႆး တမ်းဝၢင်းၶူင်းၵၢၼ်လူင်းပိုၼ်ႉတီႈၵူတ်ႇထတ်း တႃႇၶၢဝ်းတၢင်း 100 ဝၼ်း။ လူင်းပိုၼ်ႉတီႈၸွမ်းႁၢၼ်ႉၸွမ်းႁိူၼ်း ၵူတ်ႇထတ်းၵူၼ်းႁဵတ်းၵၢၼ်လႄႈဝတ်းဝႂ်ႁဵတ်းၵၢၼ်။ လူင်းၵူတ်ႇထတ်းထိုင်ႁူင်းသဝ်း ႁွင်ႈၶၢတ်ႈၼႂ်းဝၢၼ်ႈၼႂ်းသူၼ် ၸွင်ႇမီးၵူၼ်းမႃးလၵ်ႉယူႇသဝ်းသေ ႁဵတ်းၵၢၼ်ၵျႃႊၽျႅၼ်ႉၸိူဝ်းၼႆႉ။

ၾၢႆႇၼိုင်ႈ ၸုမ်းႁၵ်ႉၸိဝ်ႉၸၢတ်ႈထႆး ၵေႃႈဢွၼ်ၵၼ်တုၵ်းယွၼ်းႁႂ်ႈသၽႃးဢုပ်ႇၵုမ်ၵၼ်သေ ႁဵတ်းဢွၵ်ႇပၵ်းပိူင်မၢႆမီႈ တႃႇလိုပ်ႈႁႅင်းၵၢၼ်ယိင်းၸိူဝ်းပႃးတွင်ႉဝႆႉ ႁႂ်ႈမိူဝ်းၵိူတ်ႇလုၵ်ႈၶိုၼ်းဝၢၼ်ႈၽႂ်မိူင်းမၼ်း ၊ ဢမ်ႇၶႂ်ႈပၼ်ၶႂၢင်ႉၵိူတ်ႇလုၵ်ႈၼႂ်းၽႅၼ်ႇလိၼ်ထႆး။ ယိူင်းဢၢၼ်းတႃႇႁႄႉၵင်ႈ “လုၵ်ႈလၢၼ်းႁႅင်းၵၢၼ်ၸိူဝ်းၵိူတ်ႇမိူင်းထႆး – ယွၼ်းပဵၼ်ၵူၼ်းၵိုၵ်းမိူင်း ယွၼ်းမၢႆၾၢင်မၢတ်ႉပူင်ႇတိၼ်ႇၵိုၵ်းမိူင်း ယွၼ်းသုၼ်ႇလႆႈသုၼ်ႇပဵၼ် ႁိမ်တီႈယူႇတီႈၵိၼ်ၵူၼ်းမိူင်းပိုၼ်ႉတီႈ” ဝႃႈၼႆ။

လွင်ႈၼႆႉၼႂ်းသၽႃး ပႆႇဢဝ်ဢုပ်ႇၵၼ်ဝႃႈႁိုဝ်သေတႃႉ ပူၼ်ႉမႃး 2-3 ဝၼ်းၼႆႉတႄႉ လုမ်းၸွမ်ၽွင်းလူင် လူင်ပွင်ၸိုင်ႈမိူင်းထႆး တူၵ်းလူင်းလႆႈၸႂ်တႃႇမီးပၵ်းပိူင်မၢႆမီႈ “လိုပ်ႈႁႅင်းၵၢၼ်ယၢၼ်မိူင်းၸိူဝ်းမီးၼႂ်းမိူင်းထႆး ပွၵ်ႈၶိုၼ်းဝၢၼ်ႈၵိူတ်ႇမိူင်းၼွၼ်းဝႆးဝႆး- ၽွင်းမိူဝ်ႈႁဵတ်းၽိတ်းပၵ်းပိူင်မၢႆမီႈမိူင်းၸိုင်ႈထႆး” – ဝႃႈၼႆ။

ၵဵဝ်ႇၵပ်းလွင်ႈၼႆႉ ၽူႈယႂ်ႇၵူၼ်းလူင်တႆး ၼႂ်းမိူင်းထႆး ၸဝ်ႈၼိုင်ႈ ပၼ်ၾၢင်ႉဝႃႈ – ၽွင်းယၢၼ်ႁိူၼ်းယေး မႃးႁဵတ်းၵၢၼ်ႁႃၵိၼ်လဵင်ႉတွင်ႉယူႇမိူင်းပိူၼ်ႈၼႆႉ ႁႂ်ႈဢွၼ်ၵၼ်မေႃထွမ်ႇ မေႃႁဵၼ်းပၵ်းပိူင်မၢႆမီႈ ၸိုင်ႈမိူင်းပိူၼ်ႈသေ ႁႂ်ႈမေႃယူႇသဝ်းၵိၼ်သၢင်ႈၵႂႃႇ ယႃႇႁႂ်ႈမီးပၼ်ႁႃ၊ ႁႂ်ႈမေႃယူႇလွတ်ႈၽေး” ဝႃႈၼႆ။