မိူဝ်ႈၶမ်ႈဝႃးဝၼ်းတီႈ 23/07/2026 ယၢမ်းၵၢင်ၶမ်ႈမွၵ်ႈ 7 မူင်းပၢႆ ရူတ်ႉၽႃႇၺႃးလုၵ်ႈဢွၼ်ႇၸၢႆး ဢႃယု 13 ပီၵေႃႉၼိုင်ႈထိုင်တၢႆ တီႈဢိူင်ႇပႃႇၻႅတ်ႇ(ပႃႇလႅတ်ႇ) ၸႄႈဝဵင်းမိူင်း ၸႄႈတွၼ်ႈၵဵင်းမႂ်ႇ ၸိုင်ႈထႆး။
လုၵ်ႈဢွၼ်ႇၼၼ်ႉၸိုဝ်ႈ ၸၢႆးပုၼ်းၼမ်း လုင်းမိၼ်ႉ ႁိုဝ် ၸိုဝ်ႈလဵၼ်ႈႁွင်ႉ ၼွင်ႉသတိပ်း ဢႃယု 13 ပီ ယူႇၼႂ်းဢိူင်ႇပႃႇလႅတ်ႇ ႁဵၼ်းလိၵ်ႈဝႆႉတီႈႁူင်းႁဵၼ်းပႃႇလႅတ်ႇ။ ပဵၼ်လုၵ်ႈၸၢႆး ၼၢင်းၶႆႇ လုင်းမိၼ်ႉ ပဵၼ်ၸၢဝ်းဢိတ်ႉသလၢမ်းမိူင်းတႆး ႁဵတ်းၵၢၼ်ယူႇတီႈဝဵင်းလမ်းပုၼ်း။
ၽွင်းၼွင်ႉသတိပ်း တိုၵ်ႉပႆယူႇႁိမ်းၶၢင်ႈတၢင်း (ၼႃႈၶူင်းၵၢၼ်ဝၢၼ်ႈ ၽဵတ်းမၼီး) ႁိမ်းၶွင်းၼမ်ႉ ဢိူင်ႇပႃႇလႅတ်ႇၼၼ်ႉ ရူတ်ႉၵႃး တူဝ်ႇယူဝ်ႇတႃႇ ရီႊဝူဝ်ႉ ပိၵ်ႉဢပ်ႉ လမ်းၼိုင်ႈႁေႃႈမႃးဝႆးၼႃႇသေ ၽႃႇသႂ်ႇၼွင်ႉသတိပ်း ။ ၵူၼ်းႁေႃႈရူတ်ႉပဵၼ် ၸၢႆးၵျေႃႇ ဢႃယုမွၵ်ႈ 40 ပီ ။ ပဵၼ်ႁႅင်းၵၢၼ်တႆး ဢၼ်ၶၢတ်ႈႁွင်ႈထႅဝ်ယူႇၼႂ်းဢိူင်ႇပႃႇလႅတ်ႇ ၊ မီးႁိမ်းဢၼ်ၽႃႇၺႃးလုၵ်ႈဢွၼ်ႇၼၼ်ႉၵူၺ်း ယၢၼ်ၵႆမွၵ်ႈ 5 ၵီႊလူဝ်ႊမီႊတႃႊ -ဝႃႈၼႆ။
ၶႅပ်းတိၼ်ၼွင်ႉသတိပ်းတႄႉလုတ်ႈဝႆႉတီႈဢၼ်ၵႃးၽႃႇၺႃးၼၼ်ႉသေတႃႉ တူဝ်ၼွင်ႉတႄႉပႃးၵႂႃႇၸွမ်းရူတ်ႉၵႃးယၢၼ်ၵႂႃႇမွၵ်ႈ 5 မဵတ်ႉ။ ၺႃးရူတ်ႉၵႃးၶိုတ်ႈသႂ်ႇပႃး။ ၸုမ်းၸွႆႈထႅမ်ၵူၼ်းထူပ်းၽေးၵိုင်ႉၵၢင်ႉ မႃးဢဝ်တူဝ်ၼွင်ႉသတိပ်း ၵႂႃႇႁူင်းယႃ ။ မၢတ်ႇၸဵပ်းႁႅင်းၼႃႇလႄႈ ၶၢဝ်းယၢမ်းမွၵ်ႈ 9 မူင်းၼႆႉ ၼွင်ႉသတိပ်း တၢႆၵႂႃႇပႅတ်ႈ။
ပလိၵ်ႈတူၺ်းၸွမ်း CCTV သေ လိုပ်ႈလမ်းၸွမ်းရူတ်ႉၵႃးဢၼ်ၽႃႇသေႁေႃႈပၢႆႈၼၼ်ႉ။ ၵႂႃႇထူပ်းႁၼ်တီႈႁွင်ႈထႅဝ်ႈၶၢတ်ႈယူႇ ဢၼ်မီးၼႂ်းဢိူင်ႇပႃႇလႅတ်ႇၼၼ်ႉၵူၺ်း။ ပလိၵ်ႈၵူတ်ႇထတ်းတူၺ်းထူပ်းမႅၼ်ႈဝႃႈ ၸၢႆးၵျေႃႇ ၵိၼ်လဝ်ႈမဝ်းဝႆႉ- တီႈႁူဝ်ရူတ်ႉၼၼ်ႉၵေႃႈမီးႁွႆးၽႃႇၺႃးသေ မူပ်ႇဝႆႉ- ဝႃႈၼႆ။
တူဝ်တၢႆၼွင်ႉသတိပ်းတႄႉ ၵေႃႉပဵၼ်မႄႈလႄႈပီႈၼွင်ႉဢိၵ်ႇၶူးသွၼ်တီႈႁူင်းႁဵၼ်းပႃႇလႅတ်ႇၵႂႃႇဢဝ် တူဝ်တၢႆမႃးယဝ်ႉတႃႇမိူဝ်းႁႅၼ်းပၢင်မႃႇသႃႇပၼ် ၸွမ်းၼင်ႇၾိင်ႈဢိတ်ႉသလၢမ်း တီႈဝဵင်းလမ်းပုၼ်း ဝႃႈၼႆ။ လႆႈႁူႉဝႃႈၼွင်ႉသတိပ်းပဵၼ်လုၵ်ႈဢွၼ်ႇဝႃႈငၢႆႈၵူၼ်းလီ။ မေႃၸွႆႈထႅမ်ၼႂ်းဝၢၼ်ႈၼႂ်းပွၵ်ႉ။မၼ်းၸၢႆးၵႆႉၵႂႃႇၸွႆႈၵၢၼ်ၸုမ်းၶႅၵ်ႇလီပၢင်ၸႃႉၼႂ်းပွၵ်ႉ ဢၼ်မၼ်းၸၢႆးယူႇသဝ်းဝႆႉယူႇယၢမ်းလဵဝ် လႄႈႁဵတ်းႁႂ်ႈၶူးသွၼ်ဢိၵ်ႇၸုမ်းၶႅၵ်ႇလီပၢင်ၸႃႉ ပဵၼ်ဢၼ်သေးလၢႆတႄႉတႄႉ- ၵေႃႉပဵၼ်မႄႈလၢတ်ႈတီႈပလိၵ်ႈဝႃႈ ႁႂ်ႈဢဝ်လိူင်ႈပၼ်တူတ်ႈတၢမ်ႇၵေႃႉႁဵတ်းၽိတ်း ႁႂ်ႈထိုင်တီႈ – ဝႃႈၼႆ။
ၸၢႆးၵျေႃႇ ၵူၼ်းၶပ်းႁေႃႈရူတ်ႉၼၼ်ႉတႄႉ ၺႃးပလိၵ်ႈ ၵုမ်းၶင်ဝႆႉသေ တေၵူတ်ႇထတ်းသေ ဢဝ်တၢင်းၽိတ်းလူၺ်ႈၵိၼ်လဝ်ႈမဝ်းသေၶပ်းရူတ်ႉ၊ တင်ႈၸႂ်ႁဵတ်းႁႂ်ႈပိူၼ်ႈတၢႆ – ၼႆသေပၼ်တူတ်ႈတၢမ်ႇၸွမ်းၼင်ႇပၵ်းပိူင်မၢႆမီႈဝၢၼ်ႈမိူင်းမီးဝႆႉၼၼ်ႉဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ