ဝၼ်းတီႈ 3/09/2026 ယၢမ်းၵၢင်ၼႂ်မွၵ်ႈ 9 မူင်း ၼၢင်းယိင်းၵေႃႉၼိုင်ႈၵႂႃႇသူင်ႇလုၵ်ႈတီႈႁူင်းႁဵၼ်းသေပွၵ်ႈႁိူၼ်း ၽွင်းထိုင်တီႈ လၵ်းမၢႆ 32 ၼိူဝ်သဵၼ်ႈတၢင်းႁေႃႈဝႆး ႁၢႆႊဝေႊ တႃႈၵုင်ႈ- ၼေႇပျီႇတေႃႇ ၼၼ်ႉ မၼ်းၼၢင်းၵိုတ်းရူတ်ႉသေ ထၢႆႇထိၵ်ႉထွၵ်ႉ တီႈၾင်ႇတၢင်း ၺႃးရူတ်ႉၵႃးႁေႃႈမႃးၽႃႇၺႃးမၢတ်ႇၸဵပ်းႁႅင်းထိုင်တီႈလႆႈႁၢမ်သူင်ႇႁူင်းယႃ ဝႃႈၼႆ။
ၵူၼ်းမိူင်းၼေႇပျီႇတေႃႇ ဢၼ်ႁၼ်တေႃႇၼႃႈတေႃႇတႃ လၢတ်ႈတီႈသိုဝ်ႇၶၢဝ်ႇမၢၼ်ႈ People’s Spring ဝႃႈ – “ ၽွင်းမၼ်းၼၢင်း တိုၵ်ႉထၢႆႇထိၵ်ႉထွၵ်ႉယူႇၼၼ်ႉ ရူတ်ႉၵႃးဢၼ်လုၵ်ႉတၢင်းတႃႈၵုင်ႈၶိုၼ်ႈမႃးၼၼ်ႉ ႁေႃႈမႃးဝႆးၼႃႇသေမႃးၽႃႇၺႃးမၼ်း ။ တီႈလၵ်းမၢႆ 32 ၼၼ်ႉ ၵႆႉရူတ်ႉၵႆႉၽႃႇၵူၼ်းၼႃႇ။ ပဵၼ်တီႈၽေးၼမ်။ မိူဝ်ႈဝၼ်းတီႈ 1/09/2026 ပူၼ်ႉမႃးၼႆႉၵေႃႈ ၵူၼ်းတိုၵ်ႉၶၢမ်ႈတၢင်းယူႇ ရူတ်ႉၽႃႇသႂ်ႇ တၢႆထင်တီႈ ။ ပဵၼ်တီႈလဵဝ်ၵၼ်ယဝ်ႉ” ဝႃႈၼႆ။
ၵဵဝ်ႇလူၺ်ႈလွင်ႈၼႆႉ ၵူၼ်းမိူင်းဝဵင်းတူၼ်ႈတီးၵေႃႉၼိုင်ႈၵေႃႈလၢတ်ႈဝႃႈ – ၼႂ်းဝၼ်းမိူဝ်ႈၼႆႉ ၵူၼ်းၼုမ်ႇ လုၵ်ႈဢွၼ်ႇတႄႉဢမ်ႇပေႃးၵႃႈႁိုဝ် ဢၼ်ပဵၼ်ၵူၼ်းသႅၼ်းပၢၼ်ၵၢင် မွၵ်ႈဢႃယု 30 ၸိူဝ်း ၼႆႉၼေႈ ၶဝ်လဵၼ်ႈ ထိၵ်ႉထွၵ်ႉ။ ၵႂႃႇတၢင်းလႂ်ၵေႃႈႁၼ်ၵူၼ်းထၢႆႇ ထိၵ်ႉထွၵ်ႉ ယဝ်ႉ။ ၼႂ်းၵၢတ်ႇ ၼႂ်းသႃးၵေႃႈထၢႆႇယဝ်ႉ။ ၼိူဝ်သဵၼ်ႈတၢင်းၵႃးၵေႃႈထၢႆႇ။ မီးၽေးၼမ်ၼႃႇၼႃ ၵူဝ်ၵႃးၽႃႇ ရူတ်ႉၶိူင်ႈၽႃႇၵျႃႉလႆ- ဝႃႈၼႆ။
TikTok ၼႆႉပဵၼ်ဢႅပ်ႉပလီၵေးသျိၼ်းၶႄႇႁဵတ်းဢွၵ်ႇ တႃႇထၢႆႇၶလိပ်ႈပိတ်းပွတ်းတၢင်ႇလဵၼ်ႈတၢင်းဢွၼ်ႊလၢႆႊ။ တေၸၢင်ႈလႆႈၵူၼ်းတူၺ်းၼမ်၊ ပေႃးမီးၵူၼ်းတိတ်းတၢမ်းၼမ်ၼႆ ၸၢင်ႈလႆႈငိုၼ်း လႄႈႁဵတ်းႁႂ်ႈ ၵူၼ်းလဵၵ်ႉယႂ်ႇၼုမ်ႇထဝ်ႈ သူင်လဵၼ်ႈ။
ပေႃးဢမ်ႇတူၺ်းၼႃႈလင် ႁိမ်းႁွမ်းသေ ထၢႆႇလူင်ၵႂႃႇၵူႈတီႈတႄႉ ၼွၵ်ႈလိူဝ်ၸၢင်ႈပဵၼ်ၽေးလွင်ႈရူတ်ႉၵႃးၽႃႇ ၊ ၺႃးၽူႈလၵ်ႉၸၵ်ႉၶုတ်ႈယဝ်ႉ ၾၢႆႇတၢင်းလွင်ႈႁူမ်ႇလူမ်ႈလွၵ်းလၢႆးပၢႆးသၢင်ႈၵေႃႈ ဢမ်ႇမီး(ပိူၼ်ႈၸၢင်ႈလႆႈၶေႃႈမုလ်းသုၼ်ႇတူဝ်ႁဝ်းၵႂႃႇငၢႆႈၼႃႇ) လႄႈ ၽူႈလူင်ႉလႅၼ်ႇၾၢႆႇ IT ၶဝ်ပၼ်ၾၢင်ႉဝႆႉယႂ်ႇၼမ်ယူႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ