ၽွင်းၶၢဝ်း ပွႆးသွၼ်းၼမ်ႉ 3 ဝၼ်း ၼႂ်းမိူင်းထႆး ၵူၼ်းတၢႆယွၼ်ႉ ရူတ်ႉၵႃးပဵၼ် ၽေးၵိုင်ႉၵၢင်ႉမီး 152 ၵေႃႉ၊ ရူတ်ႉၵႃးပဵၼ်ၽေးၵိုင်ႉၵၢင်ႉသေၽႃႇၺႃးၵၼ်သမ်ႉ တေႃႇထိုင်တဵင်ႈၶိုၼ်း ၼႂ်းဝၼ်းတီႈ 13 ၼၼ်ႉ မီးၵႂႃႇ 755 ၵမ်းပၢႆ ဝႃႈၼႆ။

ၸဝ်ႈၼႃႈတီႈ ၽူႈမီးပုၼ်ႈၽွၼ်းၶဝ် လၢတ်ႈဝႃႈ တႄႇဢဝ်ဝၼ်းတီႈ 10 ထိုင် 13 လိူၼ်ဢေႊပရိူဝ်ႊၼႆႉ လွင်ႈရူတ်ႉၵႃးပဵၼ်ၽေးၵိုင်ႉၵၢင်ႉၽႃႇၺႃးၵၼ်မီး 755 ၵမ်း၊ မီးၵူၼ်းလူႉတၢႆ 152 ၵေႃႉ၊ မၢတ်ႇၸဵပ်း 700 ပၢႆ ဝႃႈၼႆ။

ပိုၼ်ႉတီႈဢၼ်မီး ရူတ်ႉၵႃးပဵၼ်ၽေးၵိုင်ႉၵၢင်ႉၽႃႇၵၼ်ၼမ်သုတ်းၼႆႉ ပဵၼ်ၼႂ်းၸႄႈတွၼ်ႈလမ်းပၢင်း။ ၼႂ်းဝၼ်းတီႈ 12 ဝၼ်းလဵဝ် တူဝ်ႈမိူင်းထႆးပတ်းပိုၼ်ႉ ရူတ်ႉၵႃးပဵၼ်ၽေးၵိုင်ႉၵၢင်ႉၽႃႇၵၼ် 171 ၵမ်း၊ မီးၵူၼ်းလူႉတၢႆ 24 ၵေႃႉ၊ မၢတ်ႇၸဵပ်း 169 ၵေႃႉ ၼႆယဝ်ႉ။

လွင်ႈတၢင်းဢၼ်ႁဵတ်းႁႂ်ႈ ရူတ်ႉၵႃးပဵၼ်ၽေးၵိုင်ႉၵၢင်ႉၽႃႇၵၼ်ၼႆႉ ပိူင်လူင်မၼ်း ပဵၼ်ယွၼ်ႉ ႁေႃးၶပ်း ရူတ်ႉၵႃးဝႆး 46% ၊ ၵိၼ်းမဝ်းသေ ႁေႃႈရူတ်ႉၵႃးသမ်ႉမီး 24.5%။ ၼႂ်းၼၼ်ႉမွၵ်ႈ 77%ၼႆႉ ပဵၼ်ရူတ်ႉၶိူင်ႈ၊ ၵမ်ႈၼမ် ပဵၼ်ၸွမ်း တီႈၼိူဝ်သဵၼ်ႈတၢင်းဝႆး သိုဝ်ႈယၢဝ်းၼၼ်ႉ ဝႃႈၼႆ။

ၸႄႈတွၼ်ႈၵဵင်းမႂ်ႇၼႆႉ ပဵၼ်ပိုၼ်ႉတီႈဢၼ်မီးၵူၼ်း ၵိၼ်မဝ်းသေ ႁေႃႈၶပ်းရူတ်ႉၵႃးၽႃႇၺႃး ၵၼ်ၼမ် လိူဝ်ပိူၼ်ႈသုတ်း ၼႂ်းမိူင်းထႆး။

ၵွပ်ႈၼၼ်လႄႈ ၼင်ႇႁိုဝ်တေလူတ်းယွမ်း လွင်ႈရူတ်ႉၵႃးပဵၼ်ၽေးၵိုင်ႉၵၢင်ႉၽႃႇၵၼ်ၼၼ်ႉ ယူႇတီႈ လူင်ပွင်ၸိုင်ႈထႆး လႆႈတမ်းဝၢင်းၵိတ်ႉ/လၢၼ်ႇ ၶဵင်ႈၶႅင်ၵၢၼ်ၵူတ်ႇထတ်းဝႆႉႁၢဝ်ႈႁႅင်း ၼႆယဝ်ႉ