ရူတ်ႉၵႃးလမ်းၼိုင်ႈ ဢၼ်တၢင်ႇၸဝ်ႈၶၢဝ် လႄႈ ၸဝ်ႈသၢင်ႇဢွၼ်ႇ  ဢၢၼ်းတေၵႂႃႇ  ဝဵင်းၸႄႈၵႅင်းၼၼ်ႉ  ပိၼ်ႈၶွမ်ႈ ၼိူဝ် သဵၼ်ႈတၢင်း ယႂႃႇငၢၼ်ႇ – ဝဵင်းလိူဝ် ႁဵတ်းႁႂ်ႈ ၸဝ်ႈၶၢဝ် 10 ပၢႆ မၢတ်ႇၸဵပ်းႁၢဝ်ႈႁႅင်းဝႃႈၼႆ ။ 

ဝၼ်းတီႈ 24/2/2026   ယၢမ်းၵၢင်ၼႂ် 9 မူင်းၶိုင်ႈၼၼ်ႉ ၵႃး light truck လမ်းၼိုင်ႈ တၢင်ႇၸဝ်ႈၶၢဝ်ဢွၼ်ႇ တင်းၸဝ်ႈသၢင်ႇဢွၼ်ႇ မွၵ်ႈ 20  ၵေႃႉ ၸိူဝ်းယူႇၼႂ်းၸႄႈဝဵင်းတူၼ်ႈတီး ၊ သီႇသႅင်ႇ ၊ ႁူဝ်ပူင်း ဢၢၼ်းတေၵႂႃႇ ဝဵင်းၸႄႈၵႅင်းၼၼ်ႉ ပဵၼ်ၽေးၵိုင်ႉၵၢင်ႉ ပိၼ်ႈၶွမ်ႈ မၢတ်ႇ ၸဵပ်းတင်းမူတ်းဝႃႈၼႆ ။

ၼႂ်းၼၼ်ႉ ၸဝ်ႈၶၢဝ်ဢွၼ်ႇ 10 ပႃး မၢတ်ႇၸဵပ်းႁၢဝ်ႈႁႅင်း ။  5 ပႃး လႆႈသူင်ႇယူတ်းယႃတူဝ်ဝႆႉ တီႈဝဵင်းလိူဝ်ႇ (မၼ်းလေး ) သေ ထႅင်ႈ 5 ပႃးလႆႈသူင်ႇယူတ်းယႃဝႆႉ တီႈဝဵင်းယႂႃႇငၢၼ်ႇ ဝႃႈၼႆ။  

ၼၢင်းယိင်းၵေႃႉဢၼ်ၵႂႃႇၸွႆႈထႅမ်ၽေးၵိုင်ႉၵၢင်ႉၼၼ်ႉလၢတ်ႈၽူႈတွႆႇႁွၵ်ႈဝႃႈ -“ မိူဝ်ႈဝႃးၽွင်းႁဝ်းၶႃႈ လူင်းၵႂႃႇတင်း ဝဵင်းလိူဝ်ႇၼၼ်ႉ ႁၼ်ၵႃးၸဝ်ႈၶၢဝ်ၶဝ် ပိၼ်ႈဢေႃႈ ၊ တီႈၼၼ်ႈ လႅင်းၾူင်းၵေႃႈဢမ်ႇလႆႈ ၊ ၸဝ်ႈၶၢဝ်ပႃးၼိုင်ႈ တိၼ်ပုတ်းၵႂႃႇဢေႃႈ မၢတ်ႇၸဵပ်းႁၢဝ်ႈႁႅင်းဝႆႉ ၊ ၸဝ်ႈၶၢဝ်ၸိူဝ်းၼၼ်ႉတိုၵ်ႉ ပဵၼ်လုၵ်ႈဢွၼ်ႇၵူၺ်း ဢႃယုတေမီးမွၵ်ႈ 12-13 ၸိူဝ်းၼႆႉၵူၺ်း ၊ ၵႂၢမ်းမၢၼ်ႈၵေႃႈ ဢမ်ႇမေႃလၢတ်ႈ လုၵ်ႉတီႈတၢင်းလႂ်မႃးလၢႆလၢႆၵေႃႈ ဢမ်ႇႁူႉၶႃႈ ၊ ႁဝ်းၶႃႈၵေႃႈ လႆႈၸွႆႈသူင်ႇႁူင်းယႃဝဵင်းယႂႃႇငၢၼ်ႇ ၽွင်ႈ ၊ ဝဵင်းလိူဝ်ၽွင်ႈ  10 ပႃးပၢႆၼႆႉ မၢတ်ႇၸဵပ်းႁၢဝ်ႈႁႅင်းဝႆႉ ပႆႇလႆႈတင်းၵပ်းသိုပ်ႇ ၵူၼ်းတီႈႁိူၼ်းၶဝ်ၶႃႈ”- ဝႃႈၼႆ ။

လႆႈႁူႉဝႃႈ ၸဝ်ႈၸၢင်းပႃးၼိုင်ႈလုၵ်ႉ တီႈဝဵင်းၸႄႈၵႅင်းမႃးႁွင်ႉဢဝ်ၸဝ်ႈၶၢဝ် ၸဝ်ႈသၢင်ႇဢွၼ်ႇ မိူင်းတႆး  ဢၢၼ်းတေဢဝ်ၵႂႃႇသွၼ်ပၼ် လိၵ်ႈ တီႈၵျွင်း မၼ်းၸဝ်ႈတီၸႄႈၵႅင်း- ဝႃႈၼႆ  ။

မၼ်းၼၢင်းသိုပ်ႇလၢတ်ႈထႅင်ႈဝႃႈ -“ ၸဝ်ႈၶၢဝ်ၸိူဝ်းၼၼ်ႉဢမ်ႇမေႃၵႂၢမ်းမၢၼ်ႈ ၊ ၵမ်ႈၼမ် မေႃၵႂၢမ်းတႆး ၊ ပဢူဝ်း ၊ တဢၢင်း ၊ ဢမ်ႇႁူႉဝႃႈ လုၵ်ႉတီႈလႂ်မႃး ၊ ဢွၼ်ၵၼ်ႁွင်ႉႁႆႈလၢတ်ႈဝႃႈ ၶႂ်ႈမိူဝ်းႁိူၼ်းၼႆၵူၺ်း ၊ လႅပ်ႈတေပဵၼ် လုၵ်ႈဢွၼ်ႇၵူၼ်းပၢႆႈၽေးသိုၵ်းသေ ၵၢၼ်ႁႃၵိၼ် လဵင်ႉတွင်ႉယၢပ်ႇလႄႈ ပေႃႈမႄႈၶဝ် ဢဝ်ၵႂႃႇၼုင်ႈၸဝ်ႈၶၢဝ်ၸဝ်ႈသၢင်ႇသေ ဢၢပ်ႈပၼ်မုၼ်ၸဝ်ႈဝႆႉၶႃႈဢေႃႈၼၼ်ႉ”- ဝႃႈၼႆ ။

ယၢမ်းလဵဝ် ၸဝ်ႈၶၢဝ်ႇဢွၼ်ႇၸိူဝ်းၼၼ်ႉ  ယူတ်းယႃတူဝ်ဝႆႉ တီႈႁူင်းယႃ ဝဵင်းလိူဝ်ႇ  ၊ ၵမ်ႈၽွင်ႈယင်းပႆႇလႆႈတၢင်းၵပ်းသိုပ်ႇတီႈႁိူၼ်း   ဝႃႈၼႆ ။ 

ၵဵဝ်ၵပ်းလွင်ႈၼႆႉ တီႈၼႂ်းၸႄႈဝဵင်းသီႇသႅင်ႇ ၊ တူၼ်ႈတီး ၊ ႁူဝ်ပူင်းၸိူဝ်းၼႆႉ သင်ထိုင်မႃး ၶၢဝ်းမႆႈ ၽွင်းပိၵ်ႉႁူင်းႁဵၼ်းၸိုင် ၵႆႉဢဝ်လုၵ်ႈလၢင်း ၼုင်ႈသၢင်ႇ ၼုင်ႈၶၢဝ်သေ သူင်ႇႁဵၼ်းသွၼ်လိၵ်ႈ တီႈဝဵင်းၸႄႈၵႅင်းမႃးတႃႇသေႇ – ၵူၼ်းၸၢႆးပိုၼ်ႉတီႈသီႇသႅင်ႇလၢတ်ႈ ။

သဵၼ်ႈတၢင်း ဝဵင်းလိူဝ် – ယႂႃႇငၢၼ်ႇၼႆႉ ပဵၼ် သဵၼ်ႈတၢင်းၶိုၼ်ႈလွႆ မီးတၢင်းၵူင်ႉတၢင်းငွၵ်းၼမ်၊ ၸဝ်ႈၵႃးသမ်ႉ ႁေႃႈၶိုၼ်ႈႁေႃႈလူင်း ဝႆးႁႅင်း၊ ၸဝ်ႈၵႃး ၸိူဝ်းလုၵ်ႉတီႈၵႆမႃးသမ်ႉ ဢမ်ႇႁူႉသၢႆတၢင်းလီလီလႄႈ ၵႆႉပဵၼ်ၽေးၵိုင်ႉၵၢင်ႉၽႃႇၺႃးၵၼ်၊ ဢိင်ၼိူဝ်လွင်ႈၼႆႉ ၵူၼ်းပိုၼ်ႉတီႈတႄႉလၢတ်ႈဝႃႈ – ႁႂ်ႈၾၢင်ႉၵၼ်ႁေႃႈၶပ်းလွႆးလွႆး ၼင်ႇႁိုဝ်တေလွတ်ႈၽေးၵၼ် ဝႃႈၼႆ။