ဝၼ်းတီႈ 16 /8/2026 သိုၵ်းမၢၼ်ႈ ဢၼ်ၶဝ်ႈပၵ်းတပ်ႉယူႇသဝ်းၼႂ်းဝၢၼ်ႈ တီႈၸႄႈဝဵင်း ယႂႃႇငၢၼ်ႇ ၸိုင်ႈတႆးပွတ်းၸၢၼ်းၼၼ်ႉ ၼႄၶေႃႈဢၢင်ႈလွင်ႈႁူမ်ႇလူမ်ႈပိုၼ်ႉတီႈ ၸၢင်ႈၵိူတ်ႇပဵၼ် ပၢင်တိုၵ်းၼႆသေ ၸႂ်ႉၵူၼ်းဝၢၼ်ႈလၢႆလၢႆတီႈ ပၢႆႈဢွၵ်ႇဝၢၼ်ႈဝႆႉဝႃႈၼႆ ။ 

သိုၵ်းမၢၼ်ႈ ထႅမ်ႁႅင်းသိုၵ်းႁႅင်းၵွင်ႈၵၢင်ႇ ၶဝ်ႈဢဝ်တီႈယူႇဝႆႉၼႂ်းဝၢၼ်ႈလႄႈ ႁဵတ်းႁႂ်ႈၵူၼ်းဝၢၼ်ႈမႆႈၸႂ် လွင်ႈႁူမ်ႇလူမ်ႈသေ  ပၢႆႈဢွၵ်ႇႁိူၼ်းယေးဝႆႉ ဝႃႈၼႆ ။

ၼၢင်းယိင်းၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“မၢင်ၸိူဝ်းၵေႃႈ ဢွၼ်ၵၼ်ၶၢႆႉမိူဝ်ႈဝႃး ၊ မၢင်ၸိူဝ်းၵေႃႈ ဢွၼ်ၵၼ်ၶၢႆႉၼႂ်ၼႆႉ ၊ သမ်ႉပေႃးဢမ်ႇႁူႉဝႃႈ တေလႆႈၶၢႆႉၵႂႃႇတၢင်းလႂ်ယဝ်ႉ ”- ဝႃႈၼႆ ။

ဢၼ်သိုၵ်းမၢၼ်ႈ ၸႂ်ႉၵူၼ်းမိူင်းပၢႆႈဢွၵ်ႇၼၼ်ႉ ပဵၼ်ဝၢၼ်ႈ ဢလႄႇၶျွင်ႇ၊ မျေႇၼီႇၵူင်း ၊ မျၢႆႇ  ဢိၵ်ႇထႅင်ႈ လၢႆလၢႆတီႈ ၼႂ်းၸႄႈဝဵင်းယႂႃႇငၢၼ်ႇ။ လိူဝ်ၼၼ်ႉ  သိုၵ်းမၢၼ်ႈထူဝ်းသိုၵ်းၶဝ်ႈၼႂ်း ၸႄႈဝဵင်းယႂႃႇငၢၼ်ႇ ႁၢဝ်ႈႁႅင်းသေ တီႉၺွပ်းၵူၼ်းပိုၼ်ႉတီႈပႃးၼႆ ၽူႈၶၢၼ်ပၢၵ်ႇ DSNDA  လၢတ်ႈၼင်ႇၼႆ ။

“ၶဝ် (သိုၵ်းမၢၼ်ႈ )ဝႃႈ ၸုမ်းလုၵ်ႉၽိုၼ်ႉမီးၼႂ်းပိုၼ်ႉတီႈၼႆသေ ထူဝ်းသိုၵ်းၶဝ်ႈၼႂ်း ထုင်ႉယႂႃႇငၢၼ်ႇၼႆႉ ႁၢဝ်ႈႁႅင်း သေ လႄႇလမ်းႁႃတီႉၺွပ်းၵူၼ်းဝၢၼ်ႈလွၵ်ႇငိုတ်ႈၵူၼ်းဝၢၼ်ႈဝႆႉ”- ဝႃႈၼႆ ။ 

တပ်ႉသိုၵ်းမၢၼ်ႈၼႆႉ လွၵ်ႇငိုတ်ႈၵူၼ်းမိူင်း ႁႂ်ႈၶၢႆႉဢွၵ်ႇယဝ်ႉ တေမူၵ်းသေႃႉယူႇ ၼႂ်းႁိူၼ်းယေးၵူၼ်းဝၢၼ်ႈ၊ ၵႆႉလၵ်ႉဢဝ်ၶူဝ်းၶွင် ဢၼ်မီးၵႃႈၶၼ်လႄႈ လၵ်ႉၵိၼ်မူၵႆႇ လႄႈသတ်းလဵင်ႉၵိုၵ်းႁိူၼ်း။  ယွၼ်ႉၼၼ် သင်ဝႃႈ တေငိူင်ႉပၢႆႈဢွၵ်ႇဝၢၼ်ႈၼႆ ၶတ်းၸႂ်ဢဝ်ပႃးၵႂႃႇ ၶူဝ်းၶွင်ငိုၼ်းၶမ်း၊ ၽိုၼ်လိၵ်ႈလၢႆးဢၼ်လွင်ႈယႂ်ႇ၊ ၸဵမ်ဢဝ်မၢႆၾၢင် ဝႂ်မုင်ႉႁေႃႁိူၼ်းၸိူဝ်းၼႆႉတၢင်းသဵင်ႈၼႆ – တပ်ႉၵွင် 1003 ပိုၼ်ၽၢဝ်ႇတိုၵ်းသူၼ်းဝႆႉ ၼင်ႇၼႆ။

ၼၢင်းယိင်းၼႂ်းပိုၼ်ႉတီႈသိုပ်ႇလၢတ်ႈထႅင်ႈဝႃႈ -“ မၢင်ၸိူဝ်းတႄႉဢဝ်မူ  ဢဝ်ၵႆႇပၢႆႈၸွမ်းၵေႃႈမီးယူႇ သိုၵ်းမၢၼ်ႈၸႂ်ႉၶၢႆႉၶိုၵ်ႉၶၵ်ႉလႄႈ ဢမ်ႇၸၢင်ႈဢဝ် ၶိူဝ်းၶွင်ႁိူၼ်းယေးသင်တေႉတေႉ  ၊ ၵူၼ်းဝၢၼ်ႈပဵၼ်ၵူၼ်းၽုၵ်ႇသွမ်ႈသူၼ်ႁႆႈၼႃး ႁႃၵိၼ်လဵင်ႉတွင်ႉလႄႈ တႃႇတေဢဝ် မူ ၊ ဝူဝ်းၶၢႆႉပၢႆႈၸွမ်းၵေႃႈ ဢမ်ႇငၢႆႈၶႃႈ ”- ဝႃႈၼႆ ။  

ၼႂ်းလိူၼ်ဢေႃးၵၢတ်ႉသ်ၼႆႉ သိုၵ်းမၢၼ်ႈတင်း ၸုမ်းလုၵ်ႉၽိုၼ်ႉ လႆႈပဵၼ်ပၢင်တိုၵ်းၵၼ် ႁိမ်းဝၢၼ်ႈ ဢလႄႇၶျွင်ႇ လႄႈ ၽယႃးၵူင်း ၼႂ်းၸႄႈဝဵင်းယႂႃႇငၢၼ်ႇ၊ ဝၢႆးၼၼ်ႉ သၢႆသိုၵ်းမၢၼ်ႈ ၶဝ်ႈပၵ်းတပ်ႉ ၼႂ်းဝၢၼ်ႈသေ တဵၵ်းလိုပ်ႈဢွၵ်ႇဝၢၼ်ႈ၊ ၵမ်ႈၽွင်ႈ ဢွၼ်ၵၼ်သိမ်း  ၶူဝ်းႁိူၼ်းယေး သေပၢႆႈဢွၵ်ႇ ႁဵတ်းႁႂ်ႈၵူၼ်းမိူင်းထူပ်းတၢင်းယၢပ်ႇၽိုတ်ႇ တႃႇတီႈယူႇသဝ်းဝႆႉ။