ဝၼ်းတီႈ 17/08/2026 ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ဢၼ်ၶိုၼ်ႈပဵၼ်ၸွမ်ၸိုင်ႈ ၸိုင်ႈမိူင်းဝႆႉယူႇယၢမ်းလဵဝ် ဢွၵ်ႇၶၢဝ်းတၢင်းၵႂႃႇမိူင်းရတ်ႉသျႃႊ ပဵၼ်ၵမ်းထိ 5 ၸူဝ်ႈမၼ်းယိုတ်းဢႃႇၼႃႇၸိုင်ႈမိူင်းမႃးၼႆႉ။

ၶၢဝ်းတၢင်းမိၼ်းဢွင်ႇလၢႆႇ ၵႂႃႇရတ်ႉသျႃႊၵမ်းၼႆႉပဵၼ်တႃႇဢုပ်ႇဢူဝ်းလွင်ႈ ပၢႆးမၢၵ်ႈမီးသွင်ၸိုင်ႈမိူင်း (မြန်မာ- ရုရှား စီးပွါးရေးဖိုရမ်) ဝႃႈၼႆ။

ၸူဝ်ႈမိၼ်းဢွင်ႇလၢႆႇ ယိုတ်းဢႃႇၼႃႇၸိုင်ႈမိူင်းၼႆႉ ၵႆႉၵႆႉၵႂႃႇမိူင်းရတ်ႉသျႃႊ။ ၵႂႃႇၵမ်းလႂ်ၵေႃႈ ဢုပ်ႇလွင်ႈတႃႇႁဵတ်းၵၢၼ်ပၢႆးမၢၵ်ႈမီးၸွမ်းၵၼ် တႃႇယုၵ်ႉမုၼ်းၵၢၼ် IT ၸွမ်းၵၼ် တႃႇႁဵတ်းၵၢၼ်လွင်ႈၵႅတ်ႇၶႄ ၸွမ်းၵၼ် ၼႆတႃႇသေႇ ။

ၶၢဝ်းတၢင်းပွၵ်ႈၼႆႉ ပဵၼ်တႃႇဢုပ်ႇဢူဝ်း လွင်ႈလူင်းတိုၼ်းလၢင်းၸွမ်းၵၼ်၊ လွင်ႈသိုဝ်ႉၶၢႆ ႁႅင်းထၢတ်ႈ သႂ်ႇႁူဝ်ၶေႃႈဝႆႉဝႃႈၼႆသေတႃႉ ပိူင်လူင် လႅပ်ႈပဵၼ် တႃႇဢုပ်ႇၵၼ်လွင်ႈ တႃႇႁဵတ်းၵၢၼ်ပၢႆးမၢၵ်ႈမီးလႄႈ ၶုတ်းၼမ်ႉမၼ်းဢိၵ်ႇ ႁႅင်းထၢတ်ႈ တီႈတႃႈၼမ်ႉလိုၵ်ႉ တႃႈဝၢႆ ၊တႃႇႁူမ်ႈၵၼ်ႁဵတ်းသၢင်ႈလွင်ႈၵၢၼ်သိုၵ်း လႄႈ ႁႅင်းထၢတ်ႈၼိဝ်ႊၶလီႊယႃႊ ၸဵမ်ၸိူဝ်းၼႆႉ – ၼႆ ၶၢဝ်ႇၼွၵ်ႈမိူင်းလၢႆလၢႆဢၼ် တႅမ်ႈတၢင်ႇထတ်းသၢင်ဝႆႉၼင်ႇၼႆ။

ယွၼ်ႉဝႃႈ ၽွင်းမၼ်းၸၢႆးၵႂႃႇမိူင်းရတ်ႉသျႃႊ မိူဝ်ႈႁူဝ်ပီ ပီၵၢႆၼႆႉ မၼ်းၵႂႃႇလူင်းလၢႆးမိုဝ်းတႃႇ ၵေႃႇသၢင်ႈႁူင်းၸၢၵ်ႈ ႁႅင်းထၢတ်ႈၼိဝ်ႊၶလီႊယႃႊသႅၼ်းလဵၵ်ႉ။တႃႇၵေႃႇသၢင်ႈပိုၼ်ႉတီႈပၢႆးမၢၵ်ႈမီး ၶိုၵ်ႉတွၼ်း (ၻေႊဝႃႊ) မိူင်းမၢၼ်ႈ- မိူင်းရတ်ႉသျႃႊ ၊ တႃႇၵေႃႇသၢင်ႈ တႃႈႁိူဝ်းၼမ်ႉလိုၵ်ႉလႄႈ ႁူင်းႁုင် ၼမ်ႉမၼ်းမဵၼ် ၸဵမ်ၸိူဝ်းၼႆႉ။

သိုၵ်းမၢၼ်ႈမိၼ်းဢွင်ႇလၢႆႇၼႆႉ ဝၢႆးလင်ယိုတ်းဢႃႇၼႃႇၸိုင်ႈမိူင်းယဝ်ႉ လႆႈ 5 လိူၼ် ၽွင်းပီ 2021 ၼၼ်ႉ ၵႂႃႇမိူင်းရတ်ႉသျႃႊ ပွၵ်ႈၼိုင်ႈ၊ ပီ 2022 ၵႂႃႇမိူင်းရတ်ႉသျႃႊ 2 ပွၵ်ႈ လႄႈ ပီ 2025 ၽွင်းလိူၼ်မၢတ်ႉၶျ် ၼၼ်ႉၵႂႃႇမိူင်းရတ်ႉသျႃႊ ပွၵ်ႈၼိုင်ႈ ႁူမ်ႈၵၼ်ပဵၼ် 4 ၵမ်းယဝ်ႉ ။ ဢၼ်ၵႂႃႇမိူင်းရတ်ႉသျႃႊၵမ်းၼႆႉပဵၼ်ၵမ်းထူၼ်ႈ 5။

ၸူဝ်ႈလႆႈဢုပ်ႇၵၼ်တႃႇၵေႃႇသၢင်ႈတႃႈႁိူဝ်းၼမ်ႉလိုၵ်ႉ တႃႈဝၢႆ ၼႆႉ လွင်ႈၵပ်းသိုပ်ႇၵပ်းသၢၼ်ၼႂ်းၵႄႈ မိူင်းမၢၼ်ႈ- ရတ်ႉသျႃႊ 2 ၸိုင်ႈမိူင်းၵေႃႈတိူဝ်းၸမ်ၸႂ် ၵၼ်မႃးလိူဝ်ၵဝ်ႇ။ ယွၼ်ႉဝႃႈ တႃႈႁိူဝ်းၼမ်ႉလိုၵ်ႉ တႃႈဝၢႆၼႆႉပဵၼ်သဵၼ်ႈတၢင်းတႃႇႁဵတ်းၵၢၼ်မၢၵ်ႈမီးၶႅမ်ႉ ၊ ပဵၼ်ပိုၼ်ႉတီႈ ဢၼ်ၸၢင်ႈတိတ်းတေႃႇၵပ်းသိုပ်ႇ ၵႂႃႇၸူး ၼႂ်းၸႄႈတွၼ်ႈၵုၼ်ၶဵဝ်ဢေႊသျႃႊလႄႈ သမ်ႊမုတ်ႉတြႃႊ ဢိၼ်ႊတီႊယႃႊ၊ ၵွပ်ႈၼႆလႄႈ ပဵၼ်ၶူင်းၵၢၼ်ဢၼ် လၢႆလၢႆၸိုင်ႈမိူင်းယႂ်ႇပႃးၸဵမ် ရတ်ႉသျႃႊ သူၼ်ၸႂ်ပႃးၸႂ်ၶႂ်ႈလႆႈ ။

ဝၢႆးလင်ၼႆႉၵေႃႈ ရတ်ႉသျႃႊ သူင်ႇၽူႈလူင်ႉလႅၼ်ႇၵတ်ႉၶႅၼ်ႇ ၾၢႆႇၵၢၼ်သိုၵ်း မႃးၾိုၵ်းပၼ်သိုၵ်းမၢၼ်ႈ။ ယူႇတီႈၸိုင်ႈမိူင်းရတ်ႉသျႃႊသေပၼ်သူႊၵၢၼ်ႁဵၼ်းလိၵ်ႈလၢႆး ၸူးလုၵ်ႈဢွၼ်ႇမိူင်းမၢၼ်ႈ ၊ သူင်ႇၶိူင်ႈၵွင်ႈၵၢင်ႇ လႄႈၶူဝ်းၸႂ်ႉသွႆ (ဢၼ်မိူင်းတူၵ်းဢိုတ်းႁႅတ်ႉဝႆႉၼၼ်ႉ) ပၼ်သိုၵ်းမၢၼ်ႈ။ ၼႂ်းႁူဝ်ပီၼႆႉ မိူင်းရတ်ႉသျႃႊပၼ်ၵႂၢမ်းမၼ်ႈတီႈသိုၵ်းမၢၼ်ႈဝႆႉဝႃႈ တေၾိုၵ်းပၼ်ၵူၼ်းမိူင်းမၢၼ်ႈတႃႇႁႂ်ႈပဵၼ်မႃး ၵူၼ်းၶပ်းၶိူင်ႈမိၼ်ဢႃႇၵႃႇသ ( အာကာသယာဉ်မှူး) ၵေႃႉႁႅၵ်ႈၶွင်ၸိုင်ႈမိူင်းမၢၼ်ႈ – ၼႆလူးၵွၼ်ႇ။

ၵူၺ်းၵႃႈ ၽွင်းမိၼ်းဢွင်ႇလၢႆႇ ၵႂႃႇမိူင်းရတ်ႉသျႃႊပွၵ်ႈၵမ်းၼႆႉ ၸိုင်ႈမိူင်းသူင်ႇၵူၼ်းမႃးႁပ်ႉတွၼ်ႈ မၼ်းၸၢႆးတီႈလူင်းႁိူဝ်းမိၼ်ၼၼ်ႉ ႁၢင်ႇႁီႈႁၢင်ႇႁၢႆး ၊ ဢမ်ႇၵိုၼ်းၶွၼ်ႈၶိုၵ်ႉၶၵ်ႉမိူၼ် ဢၼ်ပႂ်ႉႁပ်ႉတွၼ်ႈၽူႈၼမ်းၸိုင်ႈမိူင်း ၶႄႇ၊ ၵဝ်ႊရီႊၼိူဝ် ၊ ဝႅတ်ႉၼၢမ်း ၸိူဝ်းယၢမ်ႈမႃးဢႅဝ်ႇယဵမ်ႈမိူင်းရတ်ႉသျႃႊၸိူဝ်းၼၼ်ႉ -လႆႈႁၼ်ၶႅပ်းႁၢင်ႈဢၼ်ၾၢႆႇၸိုင်ႈမိူင်းမၢၼ်ႈ ထၢႆႇသေ ပိုၼ်ၽႄႈတၢင်ႇဝႆႉၼိူဝ်သိုဝ်ႇၼႅင်ႈသၢၼ်ၸိူဝ်းၼၼ်ႉ။

ၸွမ်ၸိုင်ႈမိၼ်းဢွင်ႇလၢႆႇၼႆႉ ၼႂ်းပီ 2026 ၼႆႉ ဢွၵ်ႇၶၢဝ်းတၢင်းၵႂႃႇၼွၵ်ႈမိူင်း ၵမ်းၼႆႉပဵၼ် ၵမ်းထိ 6 ။ ၵွၼ်ႇၼႃႈၼႆႉ မၼ်းၸၢႆးၵႂႃႇမိူင်းရတ်ႉသျႃႊ မိူင်းၵြႃး ဢိၼ်ႊတီႊယႃႊ ၊ ၵႂႃႇမိူင်းၶႄႇ၊ မိူင်းလၢဝ်း လႄႈ မိူင်းထႆး။ ၵမ်ႈၼမ် ၵႂႃႇဢုပ်ႇတႃႇႁဵတ်းၵၢၼ်ပၢႆးမၢၵ်ႈမီးၸွမ်းၵၼ်၊ တႃႇပၼ်တၢင်ႇၸိုင်ႈမိူင်းၶဝ်ႈမႃးၶုတ်းႁႄႈၶုတ်းၶမ်း ယႃႉသိင်ႇဝႅတ်ႉလွမ်ႉၼႂ်းၸိုင်ႈမိူင်းလွၼ်ႉလွၼ်ႉ။

မိၼ်းဢွင်ႇလၢႆႇၼႆႉ လၢႆလၢႆၸိုင်ႈမိူင်းမိူင်းဝၼ်းတူၵ်း ဢိုတ်းႁႅတ်ႉပၢႆးမၢၵ်ႈမီးမၼ်းဝႆႉသေ ပၢၵ်ႈပႅတ်ႈမၼ်းၸၢႆးဝႆႉ။ ၵူၺ်းၵႃႈမၼ်းၸၢႆးၵေႃႈ ၶဝ်ႈႁႃမိူင်းၶႄႇမိူင်းထႆးသေ ၶိၼ်ႁဵတ်းပၢင်လိူၵ်ႈတင်ႈ – ၶိုၼ်ႈပဵၼ်ၸွမ်ၸိုင်ႈၵႃႈဢမ်ႇလႆႈဢမ်ႇၸူး။ ဝၢႆးလင်ပဵၼ်ၸွမ်ၸိုင်ႈယဝ်ႉ တႃႇလႆႈလွင်ႈမၵ်းမၼ်ႈတီႈလုမ်ႈၾႃႉ ၼၼ်ႉမၼ်းၸၢႆးၶတ်းၸႂ်ၶဝ်ႈႁႃ။ ၵူၺ်းၵႃႈၼႂ်းသၽႃးတႄႉ ဢမ်ႇပႃးပႃႇတီႇၵၢၼ်မိူင်းၸိူဝ်းၶတ်းၶၢၼ်ႉ ၸဝ်ႈဢႃႇၼႃႇသိုၵ်း ။