ပၢႆးပၺ်ႇၺႃႇ ၼႆႉ ယိင်ႈလုမ်ႈၾႃႉၶိုၼ်ႈယႂ်ႇၶိုတ်းၵၢပ်ႈမႃး ယိင်ႈလမ်ႇလွင်ႈ ။ ပေႃးထၢၼ်ႈပၢႆးပၺ်ႇၺႃႇ တီႈလႂ်တီႈၼၼ်ႈ ဢမ်ႇၶိုတ်းၸၼ်ႉ ဢမ်ႇမီးလၵ်းၸဵင်ဢၼ်ၸၼ်ႉၵူႈမိူင်းမိူင်းမၵ်းမၼ်ႈ တႃႇၵူၼ်းၼုမ်ႇလႄႈၵူၼ်းမိူင်းၵူႈသႅၼ်းထၢၼ်ႈ တေသူႇၸူး ၵၢၼ်ယုၵ်ႉမုၼ်းၸၢတ်ႈပၢၼ်တူဝ်ၵဝ်ႇၼၼ်ႉယၢပ်ႇ ။

ၸင်ႇၼၼ်လႄႈ ၶူးသွၼ်မေႃသွၼ် တီႈ ၵေႃတႆး ၸၼ်ႉၸွမ်တူင်ႇၵူၼ်းတႆး ၵေႃႈ ဝူၼ်ႉယၢဝ်းႁၼ်ၵႆသေ ၼင်ႇႁိုဝ် လုၵ်ႈႁဵၼ်းတီႈၵေႃတႆး ပေႃးတေမီးတိုဝ်ႉတၢင်းလီ သုၼ်ႇလီ တႃႇပူၵ်းပွင်ၸၢတ်ႈပၢၼ်ၵႂႃႇလႆႈထၢင်ႇႁၢင်ႈၼၼ်ႉ ႁႃလၢႆးတၢင်းပၼ်ယူႇတႃႇသေႇ ။ ၼႂ်းလိူၼ်ဢေႃႊၵၢတ်ႉသ် ၼႆႉ ၵေႃတႆး လႆႈႁူပ်ႉထူပ်းၵၼ်တင်း ဢႃးၸၢရ်လႄႈၽူႈမီးပုၼ်ႈၽွၼ်း တီႈ ၸၼ်ႉၸွမ်ရၢတ်ႉၶျၽတ်းၵဵင်းႁၢႆးသေ လႆႈတူၵ်းလူင်းလႆႈၸႂ်ၵၼ်ဝႆႉလၢႆပိူင် တႃႇယုၵ်ႉမုၼ်းၸၼ်ႉပၢႆးပၺ်ႇၺႃႇလုၵ်ႈႁဵၼ်းၵေႃတႆး ။ ၵၢၼ်တူၵ်းလူင်း ၵၼ်ပွၵ်ႈ ၼႆႉ မီးလွင်ႈလီ တႃႇလုၵ်ႈႁဵၼ်း ၵႂႃႇမိူဝ်းၼႃႈတင်းၼမ် ဝႃႈၼႆ ။

ၸၼ်ႉၸွမ်တူင်ႇၵူၼ်းတႆး တႄႇပိုတ်ႇသွၼ်ႁဵၼ်းမႃး မိူဝ်ႈပီ 2017 ။ ၼႂ်းၶၢဝ်းတၢင်း ဢၼ်ၸၼ်ႉၸွမ်တူင်ႇၵူၼ်းတႆး ပိုတ်ႇသွၼ်ၵၢၼ်ႁဵၼ်းမႃးၼႆႉ မီးၵူၼ်းၼုမ်ႇ ဢၼ်ယူႇ ၼႂ်းမိူင်းတႆး ၊ မိူင်းၶၢင်၊ တိူင်းပႃႇၵိူဝ်လႄႈ ၼႂ်းမိူင်းမၢၼ်ႈတူင်ႈပဵင်း လၢႆပိုၼ်ႉတီႈ ပႃးၸဵမ်ၵူၼ်းၼုမ်ႇ ဢၼ်ၶၢတ်ႇ ၵၢၼ်ႁဵၼ်း ၽွင်းလႆႈပၢႆႈၽေးသိုၵ်းၸိူဝ်းၼၼ်ႉၵေႃႈ မႃးၶိုၼ်ႈႁဵၼ်း တင်းၼမ် ။

တႄႇတီႈ ၵေႃတႆးၼႆႉသေ ၶိုၼ်းသိုပ်ႇၵႂႃႇၶိုၼ်ႈႁဵၼ်းတီႈၸၼ်ႉၸွမ်ၼႂ်းမိူင်းထႆး ။ လိူဝ်ၼၼ်ႉ ဢၼ်ၵႂႃႇၶိုၼ်ႈတီႈမိူင်း Singapore ၊ မိူင်းၶႄႇ ၊ မိူင်း Spain လႄႈ မိူင်း Canada ၸိူဝ်းၼႆႉ ၵေႃႈမီး ။
ၼႂ်းလိူၼ်ၵျုၼ်ႊ ပူၼ်ႉမႃးၼႆႉ ၸၼ်ႉၸွမ်တူင်ႇၵူၼ်းတႆး ၵေႃတႆး ဝဵင်းၵႃလီႉ ၸတ်း ပၢင်ယိုၼ်ႈမွပ်ႈဝႂ် ၸုမ်ႈၶူးလႄႈ ဝႂ်ပူၼ်ႉၸၼ်ႉသုင် ပွၵ်ႈၵမ်း 5 ပီၼႆႉ မီးလုၵ်ႈႁဵၼ်းလႆႈၶိုၼ်ႈႁပ်ႉ ၼမ်လိူဝ်ၵူႈပီလူးၵွၼ်ႇ ။ၸင်ႇၼၼ်လႄႈ ယူႇတီႈၼမ်ႉၵတ်ႉလုၵ်ႈႁဵၼ်းလႄႈ တၢင်းသူၼ်ၸႂ်ၽႂ်မၼ်းသေ လုၵ်ႈႁဵၼ်းၸိူဝ်းၼႆႉ ၸၢင်ႈၽႅဝ်ၵႂႃႇလၢႆမိူင်း ။

ဢၼ်ၵေႃတႆး ၵွင်ႉသၢၼ် ၵၼ်တင်း ၸၼ်ႉၸွမ်ၼႂ်းမိူင်းထႆး ရၢတ်ႉၶျၽတ်း ၵဵင်းႁၢႆး CRRU ( Chiang Rai Rajabhat University) ၼႆႉတႄႉ မိူဝ်ႈပီ 2019 ။ ပီ 2023 ၼၼ်ႉ ဢိင်ၼိူဝ် ငဝ်းလၢႆး လၢႆလွင်ႈသေ ၵိုတ်းၵၢၼ်ၵွင်ႉသၢၼ်ၵၼ် ဝႆႉၵမ်းၼိုင်ႈ ။ ထိုင်မႃး 2026 ၼႆႉ ၸင်ႇၵွင်ႉၵၼ်ၶိုၼ်း ။

ၼႂ်းဝၼ်းတီႈ 11/08/2026 ၼႆႉ ၸၼ်ႉၸွမ်တူင်ႇၵူၼ်းတႆး ၵေႃတႆး ႁူပ်ႉဢုပ်ႇဢူဝ်းတူၵ်းလူင်းၵၼ်တင်း ၸၼ်ႉၸွမ် ရၢတ်ႉၶျၽတ်းၵဵင်းႁၢႆးသေ လႆႈလူင်းလၢႆးမိုဝ်း MOU ၵၼ်ထႅင်ႈ တႃႇၶၢဝ်းတၢင်း 5 ပီ ။

ဢိင်ၼိူဝ် လႆႈၵိုတ်း MOU ၵၼ်တင်း ၸၼ်ႉၸွမ်ရၢတ်ႉၶျၽတ်းၵဵင်းႁၢႆးၵႂႃႇ ၶၢဝ်းတၢင်း 3 ပီၼႆႉသေ မေႃသွၼ် ၸၢႆးထုၼ်းသႃႇ ၸၼ်ႉၸွမ်တူင်ႇၵူၼ်းတႆး လၢတ်ႈၼႄလွင်ႈတၢင်းမၼ်း ဝႆႉၼင်ႇၼႆ –

ၼႂ်းၵႄႈမၼ်းၼႆႉ ဢၼ်ယင်ႉလိုဝ်ႈၵႂႃႇဢၼ်ဝႃႈၼႆႉ ပွင်ႇဝႃႈ ၾၢႆႇႁဝ်းၵေႃႈ ပႆႇတူဝ်ႈတၼ်း ၾၢႆႇၶဝ်ၵေႃႈ ပႆႇတူဝ်ႈတၼ်း ပိုတ်ႇပၼ် မေႊၵျႃႊ Major ဢၼ်ႁဝ်းၶႂ်ႈလႆႈၼၼ်ႉၼေႈ။ၼႂ်းၵႄႈၼႆႉ မီးလွင်ႈပၢင်ၵုမ်ဢုပ်ႇဢူဝ်းၵၼ်သေယဝ်ႉၵေႃႈ ၾၢႆႇၶဝ်ၵေႃႈ ႁၢင်ႈႁဵၼ်းတူဝ်ႈတၼ်းယဝ်ႉၽွင်ႈသေ ၾၢႆႇၼိုင်ႈၵေႃႈ လုၵ်ႈႁဵၼ်းႁဝ်းထၢၼ်ႈၼမ်ႉၵတ်ႉမၼ်းၵေႃႈ ၶိုတ်းႁေၼၼ်ႉၶႃႈၼႃႇ။ယုၵ်ႉၼမ်ႉၵတ်ႉလုၵ်ႈႁဵၼ်းတီႈႁဝ်းသေ ၾၢႆႇၶဝ်ၵေႃႈ လူဝ်ႇႁၢင်ႈႁႅၼ်းမေႊၵျႃႊဢၼ်ၶဝ် ပၼ်လႆႈၼၼ်ႉၶႃႈ ။ တေပဵၼ်တွၼ်ႈၼၼ်ႉၶႃႈ

ၵၢၼ်လူင်းလၢႆးမိုဝ်း MOU တီႈၵဵင်းႁၢႆး ပွၵ်ႈၼႆႉ လႆႈၶေႃႈတူၵ်းလူင်းၸွမ်းၵၼ်လၢႆဢၼ် ၊ ပိူင်လူင်ၵေႃႈ တႃႇလုၵ်ႈႁဵၼ်း တီႈၵေႃတႆး ၸိူဝ်းၶဝ်ႈႁဵၼ်း ပေႃးတေမီးသုၼ်ႇတိုဝ်ႉတၢင်းလီတႃႇၶိုၼ်ႈသင်ႉၶိုၼ်ႈသုင် လႄႈ ႁႂ်ႈငၢႆႈလူမ်ၸႂ်လၢႆလွင်ႈ ။

ဢၼ်ၶိုၵ်ႉတွၼ်းၵေႃႈ လုၵ်ႈႁဵၼ်းၵေႃတႆး မီးတၢင်းလိူၵ်ႈ ပၢႆးႁဵၼ်း ၼႂ်းၸၼ်ႉၸွမ်ရၢတ်ႉၶျၽတ်း ၵဵင်းႁၢႆးၼႆႉ ၼမ်မႃး လိူဝ်ၵဝ်ႇ ။ လုၵ်ႉတီႈ ႁဵၼ်းလႆႈ မွၵ်ႈ 2 ပၢႆးၼႆႉၵူၺ်းသေ လိူၵ်ႈႁဵၼ်းလႆႈပႃးလၢႆပၢႆး ။

မိူၼ်ၼင်ႇ – Sociology and Anthropology (ပၢႆးတူင်ႇဝူင်းၵူၼ်း လႄႈ ပၢႆးလႅင်ႊၶိူဝ်းၵူၼ်း) ၊ English for International Communication (ၽႃသႃ ဢိင်းၵလဵတ်ႈ/ဢင်းၵိတ်း) ၊ Tourism and Hospitality Management (ၵၢၼ်ၸတ်းၵၢၼ် ၵၢၼ်ဢႅဝ်ႇယဵမ်ႈ လႄႈ ၵၢၼ်ႁူင်းႁႅမ်း ) လႄႈမိူဝ်းၼႃႈ တေၽိူမ်ႉပႃးထႅင်ႈ Business Administration (ၵၢၼ်ၵုမ်းပၢႆးမၢၵ်ႈမီး) ၸိူဝ်းၼႆႉ ။

လူင်းလၢႆးမိုဝ်း MOU ယဝ်ႉတူဝ်ႈယဝ်ႉသေတႃႉ တႃႇပိုတ်ႇႁဵၼ်းပိုတ်ႇသွၼ်ၵႂႃႇတႄႉ လူဝ်ႇပႂ်ႉႁႂ်ႈ ၸၼ်ႉၸွမ် တူင်ႇၵူၼ်းတႆး မွပ်ႈဝႂ်ၶူး ထႅင်ႈ ၸုပ်ႈၼိုင်ႈ ပီၼႃႈ ၼႂ်း 2027 ၼႆႉၵွၼ်ႇ ။ ပွင်ႇဝႃႈ လုၵ်ႈႁဵၼ်းၸၼ်ႉၸွမ်ၵေႃတႆး ဢၼ်တေဢွင်ႇပူၼ်ႉၸၼ်ႉ ပီႈၼႃႈတႄႉ ၸၢင်ႈမီးတၢင်းလိူၵ်ႈၼမ်လိူဝ်သေ လုၵ်ႈႁဵၼ်းၸုပ်ႈဢၼ်ပူၼ်ႉမႃးၸိူဝ်းၼႆႉ ဝႃႈၼႆ။

လုၵ်ႈႁဵၼ်းၸၼ်ႉၸွမ်တီႈၵေႃတႆးၼႆႉ မိူဝ်ႈဢွၼ်တၢင်း ႁဵၼ်းလႆႈပၢႆးသၢႆႊတူင်ႇၵူၼ်း Social Science ၵူၺ်း ၊ ပၢႆးၼႆႉ လႆႈ ႁဵၼ်း 3 ပီ ၸင်ႇလႆႈႁပ်ႉ Associate Degree ။ မိူဝ်ႈလဵဝ်တႄႉ ထႅမ်မႃး ထႅင်ႈပၢႆးၼိုင်ႈ ပၢႆးမၢၵ်ႈမီးတူင်ႇၵူၼ်း Social Business ၊ ပၢႆးၼႆႉတႄႉ ႁဵၼ်း 2 ပီၵူၺ်းၵေႃႈ သိုပ်ႇႁဵၼ်းဢဝ် BA တီႈၸၼ်ႉၸွမ်မိူင်းထႆး ၸွမ်းၼင်ႇ ပၢႆးဢၼ်တမ်းဝႆႉပၼ် လႆႈ ၼႆ – မေႃသွၼ်ၵေႃတႆးၵေႃႉၼိုင်ႈလၢတ်ႈ။

လိူဝ်သေ ၸၼ်ႉၸွမ် ရၢတ်ႉၶျၽတ်း တီႈၵဵင်းႁၢႆးယဝ်ႉ မိူၼ်ၼင်ႇ ၸၼ်ႉၸွမ် ရၢတ်ႉၶျၽတ်း တီႈၵဵင်းမႂ်ႇၵေႃႈ ၵွင်ႉ MOU ဝႆႉ ။ လိူဝ်ၼၼ်ႉ တီႈ ၸၼ်ႉၸွမ် ၽႃႊယပ်ႊ Payap University ၵေႃႈ လႆႈၵွင်ႉဝႆႉ တေႃႇထိုင် မိူဝ်ႈလဵဝ်။

ၸွမ်းၼင်ႇ လုၵ်ႈႁဵၼ်းၸၼ်ႉၸွမ်ၵေႃတႆး ဢၼ်ယၢမ်ႈႁဵၼ်းတီႈရၢတ်ႉၶျၽတ်းၵဵင်းႁၢႆးၵေႃႉၼိုင်ႈ လၢတ်ႈ တၢင်းႁၼ်ထိုင်ဝႆႉ တႄႉ – “ လႆႈႁဵၼ်းတီႈၵဵင်းႁၢႆးၼႆႉ ၵႃႈႁဵၼ်းၵေႃႈသၢင်ႇထုၵ်ႇ ၊ တီႈယူႇတီႈၵိၼ်ၵေႃႈဢမ်ႇႁႃယၢပ်ႇ။ ပေႃးမီးၵၢၼ် ဢၼ်လႆႈၸွႆႈလႆႈထႅမ်တီႈၶူးသွၼ်ၶဝ်ၵေႃႈ လႆႈငိုၼ်းၸူၵ်းငိုၼ်းၸၢႆႇပႃးလႄႈ ဢမ်ႇပေႃးလႆႈမႆႈၸႂ်ငိုၼ်းတွင်းၵႃႈႁိုဝ်၊ လႆႈဝႃႈသၢင်ႇထုၵ်ႇသေတၢင်ႇတီႈယူႇ ” – ဝႃႈၼႆ။

ၼွၵ်ႈလိူဝ်ၼၼ်ႉ ၸၼ်ႉၸွမ် ဢၼ်ဢမ်ႇလႆႈလူင်းလၢႆးမိုဝ်း MOU ဝႆႉၸိူဝ်းၼၼ်ႉၵေႃႈ လုၵ်ႈႁဵၼ်းၵေႃတႆး ၶဝ်ႈထိုင်ႁဵၼ်းဝႆႉယူႇလၢႆတီႈ မိူၼ်ၼင်ႇ ၸၼ်ႉၸွမ် ၵဵင်းမႂ်ႇ ၊ ၸၼ်ႉၸွမ်မႄႈၸူဝ်ႉ ၊ ၸၼ်ႉၸွမ်ဝိထယႃႊ ထမ်ႇမသၢတ်ႊ ၊ ၸၼ်ႉၸွမ် ရင်ႊသိတ်ႊ ၊ ၸၼ်ႉၸွမ်ၵုင်းထဵပ်ႈ ၊ ၸၼ်ႉၸွမ်မႁႃႇၸူႊလႃႊလူင်ႊၵွၼ်ႊ ၸိူဝ်းၼႆႉၵေႃႈလုၵ်ႈႁဵၼ်းၵေႃတႆး ၶဝ်ႈႁဵၼ်းဝႆႉ ။
ၽွင်းမိူင်းတႆး တိုၵ်ႉမီးလွင်ႈၶွင်ႈၶမ်လၢႆၾၢႆႇယူႇၼႆႉ ၵူၼ်းၼုမ်ႇသႅၼ်းႁုၼ်ႈမႂ်ႇဢမ်ႇၵိုင်ႇလီ ဝူၼ်ႉၵႂင် ပႆသဵၼ်ႈတၢင်းၽိတ်း ။ ပၢႆးပၺ်ႇၺႃႇသႅၼ်းလႂ်ၵေႃႈ ၵႃႈၼင်ႇ ဝၵ်ႉငမ်လႆႈၼၼ်ႉ ၵိုင်ႇလီၶဝ်ႈထိုင်လဵပ်ႈႁဵၼ်းဝႆႉယူႇ။ ၵၢပ်ႈယၢမ်းလဵဝ် ပဵၼ်ၵၢပ်ႈ ဢေႊဢၢႆႊလႄႈ 6 လိူၼ်ၼိုင်ႈပွၵ်ႈ သမ်ႉပေႃးမီးဢၼ်ၶိုပ်ႈၼႃႈယူႇၵူႈၵမ်း
။ ပေႃးဢမ်ႇလဵပ်ႈႁဵၼ်းၸၢင်ႈတူၵ်းလႃႈတူၵ်းလိုၼ်းတိၵ်းတိၵ်းၼႆ မေႃသွၼ် ၸၢႆးထုၼ်းသႃႇတႄႉလၢတ်ႈတိုၵ်းသူၼ်း ၵူၼ်းၼုမ်ႇၼႂ်းမိူင်းတႆး ၼင်ႇၼႆ –

ၵၢပ်ႈပၢၼ်ဢေႊဢၢႆႊၼႆႉ 6 လိူၼ်ၼိုင်ႈပွၵ်ႈ ပေႃးလႅၵ်ႈလၢႆႈယူႇတႃႇသေႇလႄႈ ပွၵ်ႈဝႃႈ မီးတိုဝ်ႉတၢင်းသင်ၵေႃႈ ႁဝ်းလူဝ်ႇႁဵၼ်းတိၵ်းတိၵ်းၵူၺ်းယဝ်ႉ။ဢၼ်ၼႆႉပဵၼ်လွင်ႈလီယဝ်ႉၶႃႈ ။ ယႃႇပေပၼ်ၵၢၼ်ႁဵၼ်းႁဝ်းၸုတ်ႈႁဝ်းႁၢမ်း။ယႃႇပေဝႃႈ ၵဝ်တၢင်းဢမ်ႇႁဵတ်းၵိၼ်ၵၢၼ် ၼိူဝ်ႁူဝ်ၶေႃႈၼႆႉလူင် ၵဝ်ဢမ်ႇႁဵတ်းၵၢၼ်ၼိူဝ်လွင်ႈၼၼ်ႉလွင်ႈၼႆႉ ယႃႇပေဝႃႈ ။ တိုဝ်ႉတၢင်းဢၼ်မီးမႃးၼႆႉ လူဝ်ဝၵ်ႉဢဝ်တၢဝ်းဢဝ်သေ ႁႂ်ႈမၼ်းပဵၼ်သိၵ်ႈၶူဝ်လႆ တႃႇႁႂ်ႈႁဝ်းလႆႈယၢင်ႈသိုပ်ႇၶိုၼ်ႈၼႃႈၵႂႃႇထႅင်ႈ ဢၼ်ထၢၼ်ႈသုင်လိူဝ်သေၼၼ်ႉ

သိုပ်ႇလၢတ်ႈဝႃႈ – ၵေႃႉပဵၼ်ပေႃႈမႄႈၼႆၵေႃႈ ႁႂ်ႈတိူဝ်းပွင်ႇၸႂ်ၼိူဝ်သဵၼ်ႈတၢင်းပၢႆးပၺ်ႇၺႃႇလုၵ်ႈႁဵၼ်း။ ႁႂ်ႈမေႃပွင်ႇၸႂ်ဝႃႈ တႃႇလုၵ်ႈလၢင်းၸဝ်ႈၵဝ်ႇ တေထိုင်ၼင်ႇယိူင်းဢၢၼ်းၼၼ်ႉ တေယူႇၸဵင်ႇလႂ်သေ ၵမ်ႉထႅမ်။ ႁႂ်ႈမေႃႁၢင်ႈႁႅၼ်းတူဝ်တၼ်းဝႆႉ ပၢႆးတူဝ်ပၢႆးၸႂ် ႁႅင်းငိုၼ်း ၸိူဝ်းၼႆႉ။ ပိူင်လူင်ၵေႃႈ ႁႂ်ႈမီးမႃး ၵူၼ်းၼုမ်ႇဢၼ်ၵတ်ႉဢၼ်ၵႃႈ ဢၼ်ႁႃတၢင်းၶိုၼ်ႈယႂ်ႇၸဝ်ႈၵဝ်ႇလႆႈလႄႈ ဢၼ်ၵူၼ်းၼမ်လႆႈပိုင်ႈ ၼႆယဝ်ႉ။

ၼင်ႇႁိုဝ် တေၵိူတ်ႇဢွၵ်ႇမႃး ၵူၼ်းၼုမ်ႇၼေႃႇတႅၼ်းၶိူဝ်း ဢၼ်ၸၢင်ႈၸွႆႈထႅမ် ပူၵ်းပွင်ၶိုၼ်းဢိူင်ႇ ဝၢၼ်ႈ ပိုၼ်ႉတီႈတူဝ်ၸဝ်ႈၵဝ်ႇလႄႈ ႁႂ်ႈၵူၼ်းၼုမ်ႇ ၵူၼ်းမိူင်းမီးၾိင်ႈယၢမ်ႈလီ ၊ မီးတၢင်းႁူႉတၢင်းႁၼ် ၶိုတ်းၸၼ်ႉ ပဵင်းပိူၼ်ႈ ၸိူဝ်းၼႆႉၵေႃႈ ယူႇတီႈၵေႃတႆးသေ ၸတ်းႁဵတ်းပၢင်သွၼ် ယုၵ်ႉမုၼ်းၼမ်ႉ ၵတ်ႉ ပၼ်ၵူၼ်းၼုမ်ႇ မႃးၵူႈပီ ဝႃႈၼႆ။

ၵေႃတႆး ပိုၼ်ၽၢဝ်ႇ ၶေႃႈယုမ်ႇယမ်မၼ်ႈၵႅၼ်ႇဝႆႉဝႃႈ ၵူၼ်းမိူင်းပဵၼ်ၽူႈဢၼ်သၢင်ႈႁႂ်ႈတူင်ႇဝူင်းၵူၼ်းၶိုၼ်း။ ၵေႃတႆးၸုၵ်းၸင်ႈပုၼ်ႈတႃႇ ၵူၼ်းမိူင်း ထၢၼ်ႈငဝ်ႈသေ သၢင်ႈတၢင်ႉႁႅင်းၵူၼ်းမိူင်း ႁႂ်ႈၵူၼ်းမိူင်းၸၢင်ႊႁူမ်ႈသၢင်ႈပႃးၸွမ်းလႆႈ ။

တႃႈမုင်ႈ ၵေႃတႆး မီး ဝႆႉဝႃႈ “ လုၵ်ႉတီႈပၢႆးပၺ်ႇၺႃႇသေ ပၼ်ပိုၼ်ႉႁူႉၵူၼ်းမိူင်း ၼိူဝ်ႁူဝ်ၶေႃႈ ၵၢၼ်မိူင်း၊ ၵၢၼ်ပၢႆးမၢၵ်ႈမီး၊ ၵၢၼ်ၵူၼ်းၸိူဝ်းၼႆႉသေ ႁႂ်ႈမီးမႃးပိူင်တီႇ မူဝ်ႊၵရေႊၸီႊ၊ ႁႂ်ႈမီးမႃးၶိုၼ်းလွင်ႈငမ်းယဵၼ် လႄႈလွင်ႈတြႃးတီႈၼႂ်ႈတူင်ႇဝူင်းၵူၼ်း ” ဝႃႈၼႆဝႆႉ ။