ပူၼ်ႉမႃး ၼႂ်းဝၼ်းတီႈ 15 လိူၼ်ထူၼ်ႈၵဝ်ႈ ယၢမ်းၵၢင်ၼႂ်ၸဝ်ႉမွၵ်ႈ 4မူင်း ၸဝ်ႈၼႃႈတီႈထႆး တင်း ၸုမ်းတေႃႉယႃႈ ပဵၼ်လွင်ႈပိုတ်းယိုဝ်းၵၼ် တီႈမႄႈၾႃႉလူင် ၸႄႈတွၼ်ႈၵဵင်းႁၢႆး လႅၼ်လိၼ် တႆး-ထႆး၊ ၸဝ်ႈၼႃႈတီႈထႆးယိုတ်းလႆႈ ယႃႈမႃႉ 4 လၢၼ်ႉမဵတ်ႉပၢႆ ဝႃႈၼႆ။
ဝၼ်းၼၼ်ႉ ၵူၼ်းၸုမ်းၼိုင်ႈ ႁူဝ်ၵူၼ်းသိပ်းပၢႆ ၶၢမ်ႈလႅၼ်လိၼ် တႆး-ထႆးသေ ၶဝ်ႈၸူးၾင်ႇထႆး၊ မိူဝ်ႈၸဝ်ႈၼႃႈတီႈထႆး ၾၢႆႇႁူမ်ႇလူမ်ႈလႅၼ်လိၼ် ဢၢၼ်းၵႂႃႇႁႄႉႁၢမ်ႈၵူတ်ႇထတ်းၼၼ်ႉ သဵင်ၵွင်ႈတႅၵ်ႇသေလႆႈပိုတ်းယိုဝ်းၵၼ်။
ဝၢႆးသဵင်ၵွင်ႈယဵၼ် ၸဝ်ႈၼႃႈတီႈထႆး ၵႂႃႇသွၵ်ႈႁႃတီႈပဵၼ်လွင်ႈပိုတ်းယိုဝ်းၵၼ်ၼၼ်ႉ ထူပ်းႁၼ် ထူင်ၸၢၼ်ႈ 15 ထူင်၊ ၼႂ်းၼၼ်ႉသႂ်ႇဝႆႉ ယႃႈမႃႉ ဢၼ်မီးမိၵ်ႈမၢႆ L 999 သီလႅင် 4လၢၼ်ႉမဵတ်ႉပၢႆ၊ ၸုမ်းတေႃႉယႃႈၼၼ်ႉတႄႉ ပၢႆႈပူၼ်ႉလွတ်ႈၵႂႃႇၼႆ ၸဝ်ႈၼႃႈတီႈၾၢႆႇႁူမ်ႇလူမ်ႈၸႄႈတွၼ်ႈၵဵင်းႁၢႆး ပိုၼ်ၽၢဝ်ႇဢွၵ်ႇ ၼႂ်းဝၼ်းပုတ်ႉၼႆႉ ၼင်ႇၼႆ။
မိူၼ်ၼႆ ပူၼ်ႉမႃး မိူဝ်ႈဝၼ်းတီႈ 14/09/2025 ၼၼ်ႉၵေႃႈ ၸဝ်ႈၼႃႈတီႈထႆး ထူပ်းႁၼ်ရူတ်ႉၵႃးသီၶၢဝ် လမ်းၼိုင်ႈ ၵိုတ်းၸွတ်ႇဝႆႉ ၼႂ်းထိူၼ်ႇတီႈၼိုင်ႈ တီႈဝဵင်းၵဵင်းႁၢႆး၊ ၽွင်းၵႂႃႇသွၵ်ႈတူၺ်းၼႂ်းရူတ်ႉ ထူပ်းႁၼ် ယႃႈမႃႉ မွၵ်ႈ 2သႅၼ်မဵတ်ႉ၊ ယူႇတီႈၽူႈမီးပုၼ်ႈၽွၼ်းၶဝ် တိုၵ်ႉၸွပ်ႇႁႃ ၸဝ်ႈၶွင်ရူတ်ႉၵႃးၼၼ်ႉယူႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ