မိူဝ်ႈၼႆႉ ဝၼ်းတီႈ 18 လိူၼ်ဢေႃးၵၢတ်ႉသ် ယၢမ်းၵၢင်ၼႂ်မွၵ်ႈ 10 မူင်းၶိုင်ႈ သိုၵ်းၶၢင် KIA ၸိူဝ်းတင်ႈၵဵတ်ႉ လၢၼ်ႇ ပႂ်ႉၵဵပ်းၶွၼ်ႇ တီႈမၢၼ်ႈၼမ်ႉလႅင်ႊ ဢိူင်ႇၼွင်သႅင် ၼိူဝ်သဵၼ်ႈတၢင်းလူင်မူႇၸေႊ-ၼမ်ႉၶမ်း မိူင်းတႆးပွတ်းႁွင်ႇၼၼ်ႉ လၼ်ႇၵွင်ႈယိုဝ်းၺႃးၵူၼ်းမိူင်း ။

ၵူၼ်းမိူင်းပိုၼ်ႉတီႈၵေႃႉႁူႉႁၼ်ၸွမ်း ပိူင်ပဵၼ်ၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ၵႃးၸိူဝ်းၼႆႉၵေႃႈၵိုတ်းဝႆႉ ယူႇ။ ၶဝ်ယိုဝ်းၵႃးတၢင်ႇသၢႆးလမ်းၼိုင်ႈ တိူဝ်ႉၺႃးၵူၼ်းႁေႃႈမၼ်း တီႈႁူဝ်မႃႇၾၢႆႇသၢႆႉ ယၢမ်းလဵဝ် တိုၵ်ႉႁွင်ႉၵႂႃႇ ယူတ်းယႃတူဝ်တီႈ ၼႂ်းမိူင်းၶႄႇဝႆႉယူႇ။ ယွၼ်ႉသင်လႄႈၶဝ်ယိုဝ်းၼႆတႄႉ ဢမ်ႇပႆႇလႆႈႁူႉလွင်ႈတၢင်း” ဝႃႈၼႆ။

ၵေႃႉဢၼ်ၺႃးသိုၵ်းၶၢင်ယိုဝ်းတိူဝ်ႉၼၼ်ႉၸိုဝ်ႈႁွင်ႉၸၢႆးလႅင်းသႂ် ဢႃယု 32 ပီ ပဵၼ်ၵူၼ်းမၢၼ်ႈၸၢင်ႉ။

ၵဵတ်ႉလၢၼ်ႇသိုၵ်းၶၢင် တီႈမၢၼ်ႈၼမ်ႉလႅင်ႊၼႆႉ တင်ႈမႃးၼႂ်းႁူဝ်ပီၼႆႉသေ တႄႇၵဵပ်းၶွၼ်ႇ ရူတ်ႉၵႃးၵူၼ်းမိူင်းၸိူဝ်းလတ်းၽၢၼ်ႇၵႂႃႇမႃး ၼိူဝ်သဵၼ်ႈတၢင်းၼၼ်ႉ မိူဝ်ႈလိူၼ်ၵျုၼ်ႊ ၼႂ်းပီ 2026 ၼႆႉ ၼႆၵူၼ်းမိူင်းပိုၼ်ႉတီႈလၢတ်ႈ။

ၵူၼ်းမိူင်းဝဵင်းမူႇၸေႊ ၵေႃႉယူႇၼႂ်းပိုၼ်ႉတီႈ သိုပ်ႇလၢတ်ႈၼႄထႅင်ႈဝႃႈ “ၵႃးတၢင်ႇသၢႆး ပီႈၼွင်ႉမၢၼ်ႈၸၢင်ႉႁဝ်း ၺႃးလွင်ႈၵူတ်ႇထတ်းတီႈၵဵတ်ႉၼၼ်ႉ သိုၵ်းၶၢင်ၶဝ်ဢဝ်ၵွင်ႈယိုဝ်းသႂ်ႇ။ တပ်ႉၼႆႉ မိူဝ်ႈတႄႇမၼ်းၶဝ်ဝႃႈ တေမႃးယူႇမွၵ်ႈ 6 လိူၼ်ၼႆၵူၺ်း။ တေႃႇထိုင်မိူဝ်ႈလဵဝ်ၵေႃႈ ၶဝ်ဢမ်ႇပႆႇပူတ်းၵဵတ်ႉၶဝ် ပေႃးမီးမွၵ်ႈ 1 ပီယဝ်ႉ” ဝႃႈၼႆ။

ၸႄႈဝဵင်းမူႇၸေႊၼႆႉ မီးၸုမ်းသိုၵ်းၶၢင်၊ သိုၵ်းတႆး၊ သိုၵ်းၶႄႇၵဝ်ႈၵၢင်ႉ၊ သိုၵ်းတဢၢင်း လႄႈ ၸုမ်းသိုၵ်းဢူၺ်းလီတၢင်ႇၸုမ်း တူင်ႉၼိုင်ယူႇသဝ်း ပၼ်ႇၵၢၼ်ၽွင်းငမ်းဝႆႉသေတႃႉ ၼႂ်း ဝဵင်းတႄႉ ပဵၼ်သိုၵ်းမၢၼ်ႈ တင်း ၸုမ်းသိုၵ်းပျီႇတူႉၸိတ်ႉၵုမ်းၵမ်ဝႆႉ ပဵၼ်တၢင်းၵၢၼ်။

ယၢမ်းၵၢင်ဝၼ်းၼႆႉ ၵူၼ်းဝၢၼ်ႈဢွၼ်ၵၼ်ၵႂႃႇၼႄၵၢင်ၸႂ်တီႈၵဵတ်ႉလၢၼ်ႇ သိုၵ်းၶၢင်ၼၼ်ႉသေ လိုပ်ႈသိုၵ်းၶၢင်ဢွၵ်ႇပိုၼ်ႉတီႈ။ ၵူၼ်းဝၢၼ်ႈဢွၼ်ၵၼ်ယႃႉပႅတ်ႈၵဵတ်ႉသိုၵ်းၶၢင်ၼၼ်ႉယဝ်ႉ -လႆႈႁူႉၼင်ႇၼႆ။