မိူဝ်ႈဝႃးဝၼ်းတီႈ 8/7/2026 ယၢမ်းဝၢႆးဝၼ်း သိုၵ်းၶၢင် KIA တင်း သိုၵ်းၶႄႇၵဝ်ႈၵၢင်ႉ (MNDAA) ထဵင်မေႃးပေႃႉထုပ်ႉၵၼ် ယွၼ်ႉလွင်ႈၵဵပ်းၶွၼ်ႇတီႈၵဵတ်ႉလၢၼ်ႇၵူတ်ႇထတ်း ဢၼ်သိုၵ်း ၶၢင် KIA တင်ႈဝႆႉတီႈဝၢၼ်ႈမေႃႇႁၢၼ်ႇ ဢၼ်မီးၼိူဝ်သဵၼ်ႈတၢင်းလူင်ၵႂႃႇမႃး ဝဵင်းၵူတ်ႉၶၢႆ – တႃႈမိူင်းငႅၼ်း ။

ၵူၼ်းမိူင်းပိုၼ်ႉတီႈၵေႃႉယူႇၼႂ်းဝဵင်းၵူတ်ႉၶၢႆၵေႃႉၼိုင်ႈ လၢတ်ႈ ၽူႈတွႆႇႁွၵ်ႈဝႃႈ “မိူဝ်ႈလဵဝ်ၼႆႉ ၸွမ်းၼိူဝ်သဵၼ်ႈတၢင်း လႄႈ ၼႂ်းဝဵင်းႁဝ်း ဢမ်ႇပေႃးမီးၵူၼ်းၵႂႃႇမႃးၵႃႈႁိုဝ်ယဝ်ႉ။ လႅပ်ႈပဵၼ်ယွၼ်ႉ ဢၼ်သိုၵ်းၶၢင် တင်း သိုၵ်းၶႄႇၵဝ်ႈၵၢင်ႉ ၽိတ်းၵၼ် တီႈမေႃႇႁၢၼ်ႇ မိူဝ်ႈဝႃးၼၼ်ႉဢေႃႈ။ လႆႈမႆႈၸႂ် ၵူဝ်ၶဝ်သွင်ၸုမ်း ယိုဝ်းၵၼ်ၶိုၼ်းႁႄ ပဵၼ်ပၢင်တိုၵ်းထႅင်ႈၵူၺ်းယဝ်ႉၶႃႈ” ဝႃႈၼႆ။

လွင်ႈသိုၵ်းၶၢင် တင်း သိုၵ်းၶႄႇၵဝ်ႈၵၢင်ႉ မီးပၼ်ႁႃၵၼ်ၼၼ်ႉ ၽႄႈၸွတ်ႇဝႆႉၼိူဝ်သိုဝ်ႇတူင်ႇဝူင်းၵူၼ်းၵႂႃႇ ႁၢဝ်ႈႁႅင်း။

ၼႂ်းငဝ်းႁၢင်ႈသဵင်ဢၼ်ၽႄႈၸွတ်ႇဢွၵ်ႇမႃးၼၼ်ႉ သိုၵ်းၶၢင် KIA လၢတ်ႈဝႃႈ – မီးလွင်ႈသင်ၵေႃႈ ႁဝ်းၵူၼ်းလူင်ၼင်ႇၵၼ် ဢုပ်ႇၵၼ်ဢဝ်လႆႈယူႇ ယွၼ်ႉသင်လႄႈ မႃးပေႃႉထုပ်ႉ ၵူၼ်းသိုၵ်းႁဝ်းဢၼ်ပႂ်ႉဝႆႉယူႇတီႈၵဵတ်ႉၼႆႉ။ ဢဝ်ၶေႃႈၸီႉသင်ႇၽႂ်သေမႃးယႃႉၵဵတ်ႉႁဝ်း။ ပဵၼ်သင်ဢမ်ႇလၢတ်ႈ ဢမ်ႇဢုပ်ႇၵၼ်လီလီ။

ၾၢႆႇသိုၵ်းၶႄႇၵဝ်ႈၵၢင်ႉ MNDAA တွပ်ႇဝႃႈ – ႁဝ်းမႃးလၢတ်ႈသူၶဝ်ဝႆႉလၢႆၵမ်းၼႃႇယဝ်ႉ ပွၵ်ႈၼႆႉၵေႃႈ တိုၵ်ႉမႃးႁေႉၵႃးပလိၵ်ႈႁဝ်းသေယွၼ်း ပေႃးဢမ်ႇပၼ်သၢမ်ပုင်းၼႆႉဢမ်ႇၽွမ်ႉ ။ တေလႆႈသႂၢင်းၶွၼ်ႇပၼ်ႁဝ်း သၢမ်ၵေႃႉ 1 ပုင်းယဝ်ႉၸင်ႇၸၢင်ႈပၼ်ၵႂႃႇ – ၼႆထႅင်ႈယူႇ။ ႁဝ်းတႄႉ ၾၢႆႇၽူႈယႂ်ႇၵူၼ်းလူင်ႁဝ်း ၸီႉသင်ႇမႃးယဝ်ႉလႄႈၵေႃႈ ႁဝ်းလႆႈႁဵတ်းၸွမ်းၶေႃႈသင်ႇၵူၺ်း- ဝႃႈၼႆ။

ၾၢႆႇသိုၵ်းၶၢင် KIA ၵေႃႈလၢတ်ႈဝႃႈ ၵၢၼ်တင်ႈၵဵတ်ႉလၢၼ်ႇ ၼိူဝ်သဵၼ်ႈတၢင်းသေ ၵဵပ်းၶွၼ်ႇယူႇၼႆႉ ပဵၼ်ၶေႃႈၸီႉသင်ႇၽူႈယႂ်ႇၵူၼ်းလူင်တီႈငဝ်ႈငုၼ်း ၼႆလႄႈ ၾၢႆႇသိုၵ်းၶႄႇၵဝ်ႈၵၢင်ႉ MNDAA ၵေႃႈဝႃႈ လႆႈႁဵတ်းၸွမ်းၼင်ႇ ၶေႃႈၸီႉသင်ႇ ၽူႈၵွၼ်းၸႄႈတွၼ်ႈ တီႈငဝ်ႈငုၼ်းၶဝ်မိူၼ်ၵၼ် – ဝႃႈၼႆ။

“ႁဝ်းဢမ်ႇၸႂ်ႈၸုမ်းဢၼ်ယူႇတႂ်ႈငဝ်းဢႃႇၼႃႇ ၸုမ်းသူ၊ သူၵေႃႈမႃးသင်ႇႁဝ်းႁႂ်ႈယႃႉပႅတ်ႈၵဵတ်ႉ လၢၼ်ႇဢမ်ႇလႆႈ၊ ႁဝ်းၵေႃႈ ၵႂႃႇၸီႉသင်ႇသူ ယႃႉပႅတ်ႈၵဵတ်ႉလၢၼ်ႇဢမ်ႇလႆႈမိူၼ်ၵၼ်။ သူၶဝ်ၵေႃႈ တင်ႈၵဵတ်ႉလၢၼ်ႇႁႄ ပႂ်ႉၵဵပ်းငိုၼ်းၼိူဝ်သဵၼ်ႈတၢင်းယူႇမိူၼ်ၵၼ် ၵႂႃႇၵေႃႈ 1000 ပျႃး မႃးၵေႃႈ 1000 ပျႃး ႁဝ်းလႆႈပၼ်တႃႇသေႇ။ မိူဝ်ႈလဵဝ်သမ်ႉ သူၶဝ်မႃးပေႃႉထုပ်ႉၵူၼ်း သိုၵ်းႁဝ်းႁႄ ယႃႉၵဵတ်ႉႁဝ်း သူၶဝ်တေလႆႈႁဵတ်းတႅၼ်းၶိုၼ်းတင်းသဵင်ႈဢိူဝ်ႈ” ၼႆ ၽူႈမီးပုၼ်ႈၽွၼ်း ၸုမ်းသိုၵ်းၶၢင် ၵေႃႉယူႇၼႂ်းပိုၼ်ႉတီႈ တွပ်ႇလၢတ်ႈၵႂႃႇတီႈသိုၵ်းၶႄႇၵဝ်ႈၵၢင်ႉ MNDAA ၼင်ႇၼႆ။

ၵူၼ်းမိူင်း ဝဵင်းၵူတ်ႉၶၢႆၵေႃႉၼိုင်ႈတႄႉ လၢတ်ႈတီႈၽူႈတွႆႇႁွၵ်ႈဝႃႈ “ ဢၼ်ၸုမ်းသိုၵ်းၸၢဝ်းၶိူဝ်းၼင်ႇၵၼ် ပဵၼ်ပၼ်ႁႃၵၼ် ၽိတ်းၵၼ် မေႃးၵၼ် ပေႃႉထုပ်ႉၵၼ်ယူႇ ၼႂ်းပိုၼ်ႉတီႈႁဝ်း ၼႆႉ ထွမ်ႇတူၺ်းၵႂၢမ်းလၢတ်ႈၶဝ်ပွၵ်ႈလႂ် ၸုမ်းလႂ်ၵေႃႈဝႃႈ ပဵၼ်ၶေႃႈၸီႉသင်ႇ ၽူႈယႂ်ႇၵူၼ်းလူင် တီႈငဝ်ႈငုၼ်း ၼႆလၢႆလၢႆ။ ပေႃးပဵၼ်ၼၼ်တႄႉၸိုင် ၽူႈယႂ်ႇၵူၼ်းလူင် တီႈငဝ်ႈငုၼ်း ၼင်ႇၵၼ် ထုၵ်ႇလီသူင်ႇလိၵ်ႈႁႃၵၼ်သေ ၵႄႈလိတ်ႈၵၼ်ၵႂႃႇၼိူဝ်ၽိူၼ်ၵူၺ်း။ ဢမ်ႇထုၵ်ႇလီၸႂ်ႉလုၵ်ႈၼွင်ႉပွင်ႈပၢႆ ၽိတ်းမေႃးၵၼ်ၼႂ်းပိုၼ်ႉတီႈ ၾၢႆႇၼႃႈ ၵူၼ်းမိူင်း။ လၢႆးတၢင်းဢၼ် ႁဵတ်းယူႇၸိူင်ႉၼႆမိူဝ်ႈလဵဝ်ၼႆႉ ၸၢင်ႈမီးၽေးၼမ်ႁႅင်းတႃႇတင်းသွင်ၸုမ်းၵူၺ်းဢမ်ႇၵႃး ၵူၼ်းမိူင်းၵေႃႈ လႆႈတုၵ်ႉၶၸႂ်ၸွမ်းထႅင်ႈ” ဝႃႈၼႆ။

မိူဝ်ႈပူၼ်ႉမႃး ပီ 2024 ၼၼ်ႉၵေႃႈ သိုၵ်းၶၢင် KIA တင်း သိုၵ်းၶႄႇၵဝ်ႈၵၢင်ႉ MNDAA ယၢမ်ႈၵႄႈလိတ်ႈပၼ်ႁႃၵၼ်မႃး လွင်ႈၵၢၼ်ၵဵပ်းၶွၼ်ႇၼိူဝ်သဵၼ်ႈတၢင်း လႃႈသဵဝ်ႈ-မူႇၸေႊ ၊ ၵူတ်ႉ ၶၢႆ- ၼမ်ႉၽၵ်းၵႃ ၸဵမ်ၸိူဝ်းၼႆႉမႃး လၢႆပွၵ်ႈလၢႆၵမ်း။

ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 မႃးၼႆႉ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၼႂ်းတူင်ႉၼိုင်ယူႇ ၼႂ်းမိူင်းတႆးပွတ်းႁွင်ႇ မိူၼ်ၼင်ႇ သိုၵ်းၶၢင် (KIA)၊ သိုၵ်းတႆး (SSPP/SSA)၊ သိုၵ်းလွႆ (တဢၢင်း) (TNLA)၊ သိုၵ်းၶႄႇၵဝ်ႈၵၢင်ႉ (MNDAA) ၶဝ် ၵႆႉမီးပၼ်ႁႃၵၼ် လွင်ႈၵၢၼ်ၵဵပ်းၶွၼ်ႇ ၸွမ်းသဵၼ်ႈတၢင်းၵႂႃႇမႃး၊ ၵၢၼ်ၽွင်းငမ်းပိုၼ်ႉတီႈ လႄႈ လွင်ႈၸတ်းၵၢၼ် လွင်ႈႁူမ်ႇလူမ်ႈ ၸဵမ်ၸိူဝ်းၼႆႉ။