မိူဝ်ႈၼႆႉဝၼ်းတီႈ 23 လိူၼ်ဢေႃးၵၢတ်ႉသ် ယၢမ်းၵၢင်ၼႂ် သိုၵ်းၶၢင် KIA ၵႂႃႇႁဵတ်းသုမ်ႉ ႁၢင်ႈႁႅၼ်းတင်ႈၵဵတ်ႉလၢၼ်ႇၶိုၼ်း တီႈမၢၼ်ႈၼမ်ႉလႅင် ဢိူင်ႇၼွင်သႅင် ၼိူဝ်သဵၼ်ႈတၢင်းလူင်မူႇၸေႊ-ၼမ်ႉၶမ်း ဢွင်ႈတီႈၵူၼ်းမိူင်းၵႂႃႇယႃႉလႅဝ် ၸုတ်ႇၽဝ်ပႅတ်ႈဝႆႉၼၼ်ႉ ဝႃႈၼႆ။

ၵူၼ်းမိူင်းၵေႃႉယူႇၼႂ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ “မိူဝ်ႈပဵၼ်ပၼ်ႁႃၵၼ်ၼၼ်ႉ သိုၵ်းၶၢင် တင်း ၵူၼ်းဝၢၼ်ႈပေႃးဢုပ်ႇၵၼ်ႁႄ လူင်းလၢႆးမိုဝ်းၵၼ်ဝႆႉယဝ်ႉဝႃႈ ၶဝ်တေဢမ်ႇတင်ႈ ၵဵတ်ႉလၢၼ်ႇၶိုၼ်း တေထွႆႁႅင်းသိုၵ်းၶဝ်ဢွၵ်ႇပိုၼ်ႉတီႈၼႆ တူၵ်းလူင်းၵၼ်ယဝ်ႉလီငၢမ်းယဝ်ႉ။ ထိုင်ဝၼ်းမိူဝ်ႈၼႆႉ (23/8/2026) ၵေႃႈ သိုၵ်းၶဝ်ဢမ်ႇထွႆဢွၵ်ႇၵူၺ်းဢမ်ႇၵႃး သမ်ႉပၢႆမႃး ႁဵတ်းသုမ်ႉႁဵတ်းသွင်း တင်ႈတပ်ႉၶဝ်ၶိုၼ်းတီႈၵဝ်ႇထႅင်ႈ။ ပေႃးၶဝ်သိုပ်ႇယူႇၵႂႃႇၸိူင်ႉၼႆတႄႉ ႁဝ်းၵူၼ်းမိူင်းမႆႈၸႂ်ၵူဝ်ၶဝ်ၶိုၼ်းယိုဝ်းၵူၼ်းမိူင်းထႅင်ႈၵူၺ်းယဝ်ႉဢေႃႈ” ဝႃႈၼႆ။

မိူဝ်ႈပူၼ်ႉမႃး ဝၼ်းတီႈ 18/8/2026 ၼၼ်ႉ ၽူႈႁပ်ႉပုၼ်ႈၽွၼ်း တီႈၵဵတ်ႉလၢၼ်ႇ သိုၵ်းၶၢင် KIA ဢူးၼေႃႇမၢႆႇ ၊ ဢူးၸေႃႇသႅင်း၊ ဢူးတွႆးၼၼ်ႇ တင်း ၵွၼ်းဢိူင်ႇ ၸၢႆးလႃႉမိၼ်ႉ လႄႈ ပူႇၵၢင်ႉပူႇၵႄႇ ၼႂ်းပိုၼ်ႉတီႈ 11 ဝၢၼ်ႈ လူင်းလၢႆးမိုဝ်းၵၼ်ပဵၼ်တၢင်းၵၢၼ်ဝႆႉဝႃႈ – “ဢိင်ၼိူဝ် သိုၵ်းၶၢင် ဢဝ်ၵွင်ႈယိုဝ်းသႂ်ႇ ၵူၼ်းမိူင်း ထိုင်တီႈလႆႈမၢတ်ႇၸဵပ်းၵႂႃႇႁၢဝ်ႈႁႅင်းၼၼ်ႉ ၾၢႆႇ သိုၵ်းၶၢင် KIA တေလႆႈႁပ်ႉပုၼ်ႈၽွၼ်းတင်းသဵင်ႈ ပႃးၸဵမ်ၵႃႈယူတ်းယႃ လႄႈ ၶိူင်ႈၸၢၵ်ႈၸိူဝ်းလူႉသုမ်းၵႂႃႇၸိူဝ်းၼၼ်ႉၵူၺ်းဢမ်ႇၵႃး ဝၼ်းတီႈ 18/8/2026 တႄႇယၢမ်းၵၢင်ဝၼ်း 1 မူင်း ထိုင် ယၢမ်းတၢမ်းၶမ်ႈ 5 မူင်း သိုၵ်းၶၢင် KIA တေလႆႈထွႆဢွၵ်ႇပိုၼ်ႉတီႈၼၼ်ႉ ႁႂ်ႈယဝ်ႉတူဝ်ႈလီငၢမ်း” ဝႃႈၼႆ။

လွင်ႈတၢင်းဢၼ်သိုၵ်းၶၢင် KIA ပႂ်ႉၵဵတ်ႉလၢၼ်ႇယိုဝ်းသႂ်ႇထေႃႈလႃႈၵျီႈၵူၼ်းမိူင်းၵႂႃႇမႃးသေ တိူဝ်ႉၺႃးၵူၼ်းႁေႃႈထေႃႈထိုင်မၢတ်ႇၸဵပ်းႁၢဝ်ႈႁႅင်းၼၼ်ႉ ၾၢႆႇသိုၵ်းၶၢင် KIA တုမ်ႉတွပ်ႇ ပိုၼ်ၽႄႈၼႂ်းသိုဝ်ႇၶၢဝ်ႇတႄႉဝႃႈ – ပဵၼ်ယွၼ်ႉထေႃႈလႃႈၵျီႈဢမ်ႇၵိုတ်းပၼ်ႁႂ်ႈၵူတ်ႇထတ်းသေ ပၼ်ငိုၼ်းၵႃႈၶွၼ်ႇလႄႈ ၸင်ႇလႆႈလၼ်ႇၵွင်ႈယိုဝ်းသႂ်ႇ။ မၢၵ်ႇၵွင်ႈသမ်ႉသဵၼ်ၵႂႃႇတိူဝ်ႉသႂ်ႇထေႃႈလမ်းဢၼ်ၵိုတ်းဝႆႉၼၼ်ႉ ၼႆယူႇ။

ၵူၼ်းမိူင်းပိုၼ်ႉတီႈ ၵေႃႉႁူႉႁၼ်ၸွမ်းပိူင်ပဵၼ်ၼႆႉ လၢတ်ႈတီႈၽူႈတွႆႇႁွၵ်ႈဝႃႈ “လွင်ႈၵူၼ်းၼႂ်းၼႅင်ႈသၢၼ်သိုဝ်ႇတူင်ႇဝူင်း ၵၢဝ်ႇၼႄးဝႃႈ ၵူၼ်းမိူင်းၵႂႃႇတီႉ သိုၵ်းၶၢင်ၵေႃႉဢၼ်ဢဝ်ၵွင်ႈ ယိုဝ်း ၼၼ်ႉသေ ၼႄၵူၼ်းမိူင်းပေႃႉထုပ်ႉဢၼ်ဝႃႈၼၼ်ႉ မၼ်းဢမ်ႇၸႂ်ႈလႃးလႃး။ တႄႇၸဵမ်မိူဝ်ႈႁဝ်းၶႃႈ ပႆႇၽႅဝ်တီႈတပ်ႉပၢင်သဝ်းၼၼ်ႉ ၵႅမ်ၽူႈၵွၼ်းတပ်ႉၶဝ် ပေႃးမတ်ႉဝႆႉၵူၼ်း သိုၵ်းၵေႃႉဢဝ်ၵွင်ႈယိုဝ်းၼၼ်ႉယဝ်ႉၶႃႈဢေႃႈ။ ႁဝ်းၶႃႈၵေႃႈ လႆႈယွၼ်းၶႂၢင်ႉၶဝ်သေ ၵႂႃႇထႆႇၶႅပ်းႁၢင်ႈ မိူဝ်ႈတေထႆႇၼၼ်ႉမၼ်းၵူမ်ႈၼႃႈဝႆႉ ဢမ်ႇယွမ်းၼႄၼႃႈမၼ်းလႄႈ ၸင်ႇၵမ်ၼႃႈမၼ်းယုၵ်ႉၶိုၼ်ႈမႃးႁႂ်ႈၵူၼ်းတင်းၼမ်ႁၼ်လီလီၼႆၵူၺ်း။ ၽွင်းၼၼ်ႉ သိုၵ်းၶၢင်ၶဝ်သၢမ်ၵေႃႉ ဢၼ်ပႂ်ႉႁူမ်ႇလူမ်ႈၸွမ်းတူၺ်းၼၼ်ႉသမ်ႉမၢပ်ႇၼႄးသႂ်ႇဝႃႈ ႁဝ်းၵူၼ်းမိူင်းပေႃႉထုပ်ႉၼႆမႃး။ ပၢႆလွၵ်ႇငိုတ်ႈပႃးထႅင်ႈဝႃႈ တေဢဝ်လိူင်ႈၵူၼ်းၸိူဝ်းၵႂႃႇယႃႉ ၵဵတ်ႉလၢၼ်ႇၼၼ်ႉထႅင်ႈၼႆဢေႃႈ” ဝႃႈၼႆ။

လႆႈႁူႉဝႃႈ ႁၢၼ်ႉတေႃႇထိုင်ဝၼ်းမိူဝ်ႈၼႆႉ 23/8/2026 ၼႆႉၵေႃႈ ၸၢႆးလႅင်းသႂ် ဢႃယု 32 ပီ ၵူၼ်းမၢၼ်ႈၸၢင်ႉ ၵေႃႉၺႃးသိုၵ်းၶၢင်ယိုဝ်းၼၼ်ႉ ယင်းပႆႇလႆႈလူင်းႁူင်းယႃ။ တေလႆႈၽႃႇ တတ်းဢဝ်မၢၵ်ႇၵွင်ႈဢၼ်ၶမ်ဝႆႉၼႂ်းတူဝ်မၼ်းၸၢႆးဢွၵ်ႇမႃးထႅင်ႈ 1 လုၵ်ႈ။ ဝၼ်းဢၼ်ၵိူတ်ႇပၼ်ႁႃၼၼ်ႉ လႆႈၽႃႇတတ်းဢဝ်မၢၵ်ႇၵွင်ႈဢွၵ်ႇဝႆႉယဝ်ႉ 2 လုၵ်ႈသေ ယူတ်းယႃတူဝ်ဝႆႉတီႈ ႁူင်းယႃထုင်ႉမွၵ်ႇၵွၼ် တီႈဝဵင်းမူႇၸေႊ ဝႃႈၼႆ။

ၾၢႆႇသိုၵ်းၶၢင် KIA ႁပ်ႉပၢၵ်ႇဝႆႉဝႃႈ တေဢဝ်ပုၼ်ႈၽွၼ်း သၢႆႈတႅၼ်းၵႃႈယူတ်းယႃ လႄႈ လွင်ႈလူႉသုမ်းတင်းသဵင်ႈဝႃႈၼႆသေတႃႉ ႁၢၼ်ႉတေႃႇထိုင်ဝၼ်းမိူဝ်ႈၼႆႉ (23/8/2026) ၼႆႉၵေႃႈ ဢမ်ႇႁၼ်မီးၽႂ်ၵႂႃႇသူႇၸႂ်း ၵူၼ်းပဵၼ် (ၸၢႆးလႅင်းသႂ်) ၵေႃႉၺႃးယိုဝ်းၼၼ်ႉ တီႈႁူင်းယႃ – ၼႆယဝ်ႉ။

ၸႄႈဝဵင်းမူႇၸေႊၼႆႉ မီးၸုမ်းသိုၵ်းၶၢင်၊ သိုၵ်းတႆး၊ သိုၵ်းၶႄႇၵဝ်ႈၵၢင်ႉ၊ သိုၵ်းတဢၢင်း လႄႈ ၸုမ်းသိုၵ်းဢူၺ်းလီတၢင်ႇၸုမ်း တူင်ႉၼိုင်ယူႇသဝ်း ပၼ်ႇၵၢၼ်ၽွင်းငမ်းဝႆႉသေတႃႉ ၼႂ်း ဝဵင်းတႄႉ ပဵၼ်သိုၵ်းမၢၼ်ႈ တင်း ၸုမ်းသိုၵ်းပျီႇတူႉၸိတ်ႉၵုမ်းၵမ်ဝႆႉ ပဵၼ်တၢင်းၵၢၼ်။