မိူင်းတႆးၼႆႉ ၸဵမ်မိူဝ်ႈတၢင်းပဵၼ်ၶူဝ်ႊဝိတ်ႉလၢမ်းၽႄႈၼၼ်ႉမႃးတေႃႇထိုင်ယၢမ်းလဵဝ် ၵူၼ်းမိူင်းပႆႇထၢင်ႇႁၢင်ႈတူင်ႉၼိုင်သင်လီငၢမ်း ။ ဝၢႆးသိုၵ်းယိုတ်းမိူင်းသေ ပၢင်တိုၵ်းၵေႃႈလိူင်ႇၼမ် ယိင်ႈၶႅၼ်းႁဵတ်းႁႂ်ႈမိူင်းသုၵ်ႉ ၵူၼ်းမိူင်းၵုမ်ႇလႆႈၵူဝ်ႁႄၸုမ်းၼၼ်ႉၸုမ်းၼႆႉ ။

မိူၼ်ၼင်ႇပွႆးလၢမ်း ပွႆးၵိၼ်ပွႆးလူႇတႄႉ ၸတ်းလႆႈၽွင်ႈယူႇသေတႃႉ ပေႃးပဵၼ်ပၢင်ပၼ်တၢင်းႁူႉ ပၢင်သွၼ်ပူၵ်းပွင်ၵူၼ်းၼုမ်ႇၼႆဢမ်ႇထၢင်ႇႁၢင်ႈ။ၼႂ်းပီ 2026 ၼႆႉ သၢႆငၢႆဝၢၼ်ႈမိူင်းပၼ်မႃးၽွင်ႈယဝ်ႉလႄႈ တူင်ႇၵူၼ်းၼႂ်းမိူင်းတႆးမၢင်ဢွင်ႈတီႈဢဝ်တိုဝ်ႉတၢင်းလီသေ မီးလွင်ႈတူင်ႉၼိုင်တႃႇပူၵ်းပွင်ၼႂ်းဝၢၼ်ႈၼႂ်းၶူင်ႇမႃး။မိူၼ်ၼင်ႇတီႈ ၸႄႈဝဵင်းမူႇၸေႊၼႆႉ မိူဝ်ႈလဵဝ် ပိုတ်ႇသွၼ်ဝႆႉပၢင်သွၼ်လိၵ်ႈလၢႆးလႄႈၾိင်ႈငႄႈၾိင်ႈထုင်းတႆးၶၢဝ်းၾူၼ် တႃႇလုၵ်ႈလၢၼ်တႆး တေသိုပ်ႇႁၵ်ႉသႃၾိင်ႈလႄႈလိၵ်ႈလၢႆးတႆးၵႂႃႇၼႆယူႇ။

ပၢင်သွၼ်လိၵ်ႈလၢႆးလႄႈၾိင်ႈငႄႈၾိင်ႈထုင်းတႆးၶၢဝ်းၾူၼ် တီႈမူႇၸေႊၼႆႉ ယၢမ်ႈၸတ်းမႃးပီယၢဝ်းၶၢဝ်းႁိုင် ၊ လႆႈမႃး ၵိုတ်းယင်ႉပႅတ်ႈ ၽွင်းမိူဝ်ႈပၢၼ်တၢင်းပဵၼ်ၶူဝ်ႊဝိတ်ႉလၢမ်းၽႄႈ ၊ ငဝ်းလၢႆးဝၢၼ်ႈမိူင်းဢမ်ႇၼိမ်သဝ်းမႃး တေႃႇထိုင်ယၢမ်းလဵဝ် ။

ၽွင်းငဝ်းလၢႆးဝၢၼ်ႈမိူင်းဢမ်ႇၼိမ်ၼႆႉ ယွၼ်ႉမီးပိူင်ဢွၵ်ႇမႃးဝႃႈ တေဢမ်ႇလႆႈၶွၼ်ႈတုမ်ၵၼ် တေဢမ်ႇလႆႈသဵင်လင် တႄႇၵႂႃႇၸိူဝ်းၼႆႉ မီးလွင်ႈႁၢမ်ႈၵၼ်မႃးလႄႈ ၸင်ႇႁႃလႆႈပိုတ်ႇသွၼ်လိၵ်ႈလၢႆးတႆးၵၼ်ၶိုၼ်း ၼႂ်းပီ 2025 – 2026 ၶၢဝ်းတၢင်း 2 ပီၼႆႉ ။

ၼႂ်းပီ 2026 ၼႆႉၵေႃႈ ၵေႃလိၵ်ႈလၢႆးလႄႈၾိင်ႈငႄႈတႆးဝဵင်းမူႇၸေႊ ႁႃတိုဝ်ႉတၢင်းသေ ၸတ်းပိုတ်ႇ ပၢင်သွၼ် လိၵ်ႈတႆးထႅင်ႈႁႂ်ႈလႆႈ – ၼႂ်းၵႄႈငဝ်းလၢႆးၵၢၼ်မိူင်းဢမ်ႇၼိမ် ၼႂ်းၵႄႈငဝ်းလၢႆးပၢႆးမၢၵ်ႈမီးၵပ်ႉၵိၼ်း – လွင်ႈႁူမ်ႇလူမ်ႈ ဢမ်ႇမီး – ၸိူဝ်းၼႆႉ။

ၼင်ႇႁိုဝ် ၵူၼ်းၼုမ်ႇၼႂ်းပွၵ်ႉၼႂ်းယွမ်ႇ ပေႃးတေဢမ်ႇၶၢတ်ႇတိုဝ်ႉတၢင်းလႆႈႁဵၼ်းလႆႈသွၼ်ဢဝ် ၾိင်ႈလႄႈ လိၵ်ႈလၢႆး ၸဝ်ႈၵဝ်ႇၼၼ်ႉ ႁႃတိုဝ်ႉတၢင်းသေ ပိုတ်ႇသွၼ်မႃး ဢမ်ႇဝႃႈ တေပဵၼ်ၶၢဝ်းမႆႈ ၶၢဝ်းၾူၼ် ၶၢဝ်းၼႂ်းဝႃႇ ၸိူဝ်းၼႆႉၵေႃႈ ယင်းပိုတ်ႇသွၼ်မႃး ။ ပေႃးလႆႈၸတ်းမႃး ၶပ်ႉၶပ်ႉတၢမ်းတၢမ်းတႄႉ ၼႂ်းပီ 2026 ပၢင်သွၼ်လိၵ်ႈလၢႆးလႄႈၾိင်ႈတႆးၶၢဝ်းၾူၼ်ၼႆႉ ပဵၼ်မွၵ်ႈ ပွၵ်ႈၵမ်း 50 ပၢႆယဝ်ႉ ၽူႈတူင်ႉၼိုင်ၼႂ်းၵေႃလိၵ်ႈလၢႆးမူႇၸေႊလၢတ်ႈ ။

ပၢင်သွၼ်ၶၢဝ်းၾူၼ် တီႈမူႇၸေႊၼႆႉ တေၽႄဝႆႉပဵၼ် 3 တွၼ်ႈ 1) လိၵ်ႈလၢႆးတႆး 2)ၾိင်ႈငႄႈၾိင်ႈထုင်းတႆး လႄႈ 3) ပူၵ်းပွင်ယုၵ်ႉမုၼ်းၼမ်ႉၵတ်ႉၵူၼ်းၼုမ်ႇ ။

ၸင်ႇၼၼ်လႄႈ မိူဝ်ႈတႄႇသွၼ်ၶၢဝ်းတၢင်းၼိုင်ႈလိူၼ်ၼႆႉ ပိူင်လူင်တေသွၼ်ပၼ်လိၵ်ႈလၢႆးၵူၺ်း ။ ၼႂ်းတွၼ်ႈၼႆႉ ၼင်ႇႁိုဝ် လုၵ်ႈႁဵၼ်းပေႃးတေဢမ်ႇၶၢၼ်ႉဢမ်ႇမိူဝ်ႇၼၼ်ႉ တေၸိမ်သွၼ်ပၼ်ပႃး လၢႆးႁွင်ႉၵႂၢမ်းတူၵ်းသူး ၸိူဝ်းၼႆႉ ။ လိူၼ်ၼႃႈမႃးတႄႉ ၸင်ႇသိုပ်ႇသွၼ်ပၼ်ပႃးလၢႆးၵႃႈၵွင် ႁႆႇၵွင် လၢႆးၵႃႈၼူၵ်ႉၵႃႈတူဝ်း ၸဵမ်ၸိူဝ်းၼႆႉဝႃႈၼႆ။

ပိူင်လူင်မၼ်း ၼႂ်းၶၢဝ်းၾူၼ်ၼႆႉ ယိူင်းၸူး ၵူၼ်းၼုမ်ႇ ဢႃယု 16 ပီ ၶိုၼ်ႈၼိူဝ် ၊ ပေႃးဢဝ်ၵၢၼ်ႁဵၼ်း ၼႂ်းႁူင်းႁဵၼ်း လူင်ပွင်ၸိုင်ႈဝႃႈၵေႃႈ တီႈဢေႇသုတ်းႁႂ်ႈထိုင် ၸၼ်ႉသုင်(ၸၼ်ႉသိပ်းသွင်ယၢမ်းလဵဝ်) ႁိုဝ်ဢမ်ႇၼၼ် ပူၼ်ႉၸၼ်ႉ သုင် ယဝ်ႉ ။

တႃႇပဵၼ်မႃးပၢင်သွၼ်ၼႆႉၵေႃႈ မေႃသွၼ်ၸိူဝ်းပဵၼ် ၽူႈၶဝ်ႈၸုမ်းၵေႃလိၵ်ႈလၢႆး လႆႈၶတ်းၸႂ်သႂ်ႇၶေႃး လႆႈမႅင်ႇၸႅၵ်ႇပၼ် ၶၢဝ်းယၢမ်း ၊ ၸိူဝ်းလူင်ႉလႅၼ်ႇၾၢႆႇလိၵ်ႈလၢႆးၵေႃႈ သွၼ်ပၼ်လိၵ်ႈလၢႆး ၊ ၸိူဝ်းၵတ်ႉၼႂ်းတွၼ်ႈလၢႆးၵႃႈ ၼႆၵေႃႈ ပူင်သွၼ်တၢင်းၵႃႈ ႁႂ်ႈမႅၼ်ႈလွၵ်းမႅၼ်ႈပိူင်မၼ်း ။

လိူဝ်ၼၼ်ႉ ၼင်ႇႁိုဝ် ၵူၼ်းၼုမ်ႇၸိူဝ်းမႃးလဵပ်ႈႁဵၼ်း တေႁူႉပွင်ႇၸႂ်ၼိူဝ်ပၵ်းပိူင်မၢႆမီႈ ဢၼ်ၶဝ်ႈတၢင်းတိုဝ်း ၼႂ်းၵူႈဝၼ်းဝၼ်းလႄႈသင် ၵၢၼ်ၸွႆႈၶႅၵ်ႇလီပၢင်ၸႃႉ ၸိူဝ်းၼႆႉၼႆၵေႃႈ တေသႂ်ႇၼႂ်းၶၵ်ႉတွၼ်ႈၵၢၼ်ႁဵၼ်းၵၢၼ်သွၼ်ၵႂႃႇ ။ ၼင်ႇႁိုဝ် ၵူၼ်းၼုမ်ႇ ပေႃးတေမေႃႁၼ်ၵႃႈၶၼ်တူင်ႇၵူၼ်း ။ ႁႂ်ႈမေႃၸွႆႈၵၼ် ၊ ပေႃးမေႃၸွႆႈမေႃထႅမ်ၵၼ်ၼႆ ၼႂ်းငဝ်းလၢႆးဝၢၼ်ႈမိူင်းဢမ်ႇၼိမ် ၊ ၵၢၼ်ႁႃၵိၼ်လဵင်ႉတွင်ႉယၢပ်ႇၵိၼ်းၵၼ်ယူႇၼႆႉ ၸၢင်ႈလူတ်းယွၼ်ႇလႆႈၵႃႈၸႂ်ႉၸၢႆႇၼႂ်းလၢႆၶၵ်ႉတွၼ်ႈလႆႈ ၼႆ ၸၢႆးသၢႆၸွမ်မိူင်း ၽူႈၼမ်းၼႂ်း ၵေႃႈလိၵ်ႈလၢႆးလႄႈၾိင်ႈငႄႈတႆးၸႄႈဝဵင်းမူႇၸေႊ လၢတ်ႈၼႄၼင်ႇၼႆ-

လွင်ႈၸွႆႈထႅမ်ၵၼ်ၸိူင်ႉၼၼ်ဢေႃႈ ။ တေလႆႈႁူႉပုၼ်ႈၽွၼ်း ၼႂ်းဝၢၼ်ႈၼႂ်းသူၼ်ၸိူင်ႉၼႆၵေႃႈ ႁဝ်းၶႃႈတေသႂ်ႇပႃးလွၵ်းလၢႆးမၼ်း ၼင်ႇႁိုဝ်ၶဝ်တေႁူႉၵႃႈၶၼ်မၼ်းၸိူင်ႉၼၼ်။ႁဝ်းၶႃႈတေလႆႈႁႃလၢႆးတၢင်းမၼ်းသေ ၸိမ်သႂ်ႇၸိမ်သႂ်ႇၸိူင်ႉၼႆၶႃႈဢေႃႈ

တၢင်းယိူင်းဢၢၼ်း ဢၼ်သွၼ်လိၵ်ႈလၢႆးတႆးၼႆႉ ၸဵမ်ပိုင်းၵေႃႈ တႃႇတႆးၵူႈတီႈတီႈ ႁူႉပွင်ႇၵႂၢမ်းတႆးလိၵ်ႈတႆးႁႂ်ႈမိူၼ်ၵၼ် ၊ ႁႂ်ႈၵပ်းသိုပ်ႇၵပ်းသၢၼ်ၵၼ်လႆႈ ။ ၵူၺ်းၵႃႈ ပပ်ႉႁဵၼ်းလိၵ်ႈတႆးသမ်ႉ ဢွၵ်ႇမႃး လၵ်းသုတ်ႇမၼ်းၼမ်ၼႃႇ ။ ပေႃးပဵၼ်လႆႈတႄႉ ၶႂ်ႈႁႂ်ႈဢဝ် ပပ်ႉႁဵၼ်းလိၵ်ႈတႆးဢၼ် ငဝ်ႈငုၼ်းၵေႃလိၵ်ႈလၢႆးလႄႈၾိင်ႈငႄႈတႆး တႅပ်းတတ်းဝႆႉပၼ်တႃႇႁဵၼ်းသွၼ်ၼၼ်ႉၸႂ်ႉတိုဝ်း ၸင်ႇလီ ၊ ၸင်ႇတေၶဝ်ႈဢွၵ်ႇၵၼ်လႆႈ ၸင်ႇတေမႅၼ်ႈႁွႆးလဵဝ်ၵၼ် ၼႆ ၸၢႆးသၢႆၸွမ်မိူင်း ၽူႈၼမ်းၼႂ်းၵေႃလိၵ်ႈလၢႆးလႄႈၾိင်ႈငႄႈတႆးဝဵင်းမူႇၸေႊ လၢတ်ႈဝႆႉၼင်ႇၼႆ-

ၵေႃႈလိၵ်ႈလၢႆးလႄႈၾိင်ႈငႄႈတႆးၵူႈတီႈတီႈ တႆးၵူႈမိူင်းမိူင်း တိုၼ်းတေလႆႈႁဵတ်းၸွမ်းဢၼ်ငဝ်ႈငုၼ်းႁဝ်းတႅပ်းတတ်းဝႆႉပၼ်။ႁဝ်းဢမ်ႇၸႂ်ႈဝႃႈ ၶႂ်ႈသွၼ်ၸိူင်ႉႁိုဝ်သွၼ် ၊ ဢမ်ႇမီးမူႇမီးပိူင် ၶူင်သၢင်ႈႁင်းၽႂ်ႁင်းမၼ်းသေသွၼ်ၸိူင်ႉၼၼ် ။ ပေႃးႁဝ်းႁဵတ်းၼၼ်သေသွၼ် ႁဝ်းၶႃႈတေပွင်ႇၵၼ်ၵူႈၵေႃႉယူႇႁႃႉ ။ ဢၼ်ႁဝ်းဢဵၼ်းဢၢၼ်းဝႆႉဝႃႈ ႁႂ်ႈတႆးၵူႈၵေႃႉတႆးၵူႈတီႈႁူႉပွင်ႇလိၵ်ႈလၢႆးတႆး တႅမ်ႈၵေႃႈႁႂ်ႈပွင်ႇ လၢတ်ႈၵေႃႈႁႂ်ႈပွင်ႇၵၼ်ၼႆၼၼ်ႉ ၸွင်ႇႁဝ်းတေထိုင်တီႈလႆႈ ပေႃးဝႃႈႁဝ်း ၵတ်ႉႁူးၽႂ်တၢင်းမၼ်းၸိူင်ႉၼၼ်

ပၢင်သွၼ်လိၵ်ႈလၢႆးလႄႈၾိင်ႈငႄႈၾိင်ႈထုင်းတႆးၶၢဝ်းၾူၼ်ၼႆႉ တႄႇပိုတ်ႇမႃးမိူဝ်ႈဝၼ်းတီႈ 03/07/2026 ပိုတ်ႇသွၼ်ပၼ်တီႈႁူင်းၵေႃလိၵ်ႈလၢႆးလႄႈၾိင်ႈငႄႈတႆးၸႄႈဝဵင်းမူႇၸေႊ ၊ ပွၵ်ႉၸၢၼ်း။ လုၵ်ႈႁဵၼ်း မီး 45 ၵေႃႉ ။ ၸိူဝ်းႁူႉတူၵ်းလိုၼ်းၵေႃႈတေမီးလႄႈ ၸၢင်ႈၶဝ်ႈမႃးႁဵၼ်းထႅင်ႈတၢင်းလင်ၵေႃႈမီး ဝႃႈၼႆ။

ၾၢႆႇၼိုင်ႈၵေႃႈ ပွတ်းတၢင်းၸႄႈဝဵင်းမူႇၸေႊၼႆႉ ၸဵမ်မိူဝ်ႈပၢၼ်ပူႇပၢၼ်မွၼ်ႇၵေႃႈ ၼမ်ႉၸႂ်ႁၵ်ႉႁွမ်ၸွႆႈထႅမ် တူင်ႇၵူၼ်း မီးတဵမ်ထူၼ်ႈၵၼ်ၵူႈၵေႃႉ။ ၸင်ႇၼၼ်လႄႈ ပၢၼ်မႂ်ႇၼႆႉၵေႃႈ ၶႂ်ႈႁႂ်ႈၵူၼ်းၼုမ်ႇသႅၼ်းႁုၼ်ႈမႂ်ႇ မေႃၶဝ်ႈဢွၵ်ႇၵၼ် မေႃႁူမ်ႈၵၼ်ႁဵတ်းသၢင်ႈတူင်ႉၼိုင် တႃႇလိၵ်ႈလၢႆး တႃႇၾိင်ႈငႄႈၾိင်ႈထုင်းတႆးၵႂႃႇၼၼ်ႉ လူဝ်ႇလႆႈမီးပၢင်ၾိုၵ်းၽွၼ်ႉ ပၼ်ၼမ်ၼမ်။ ဢမ်ႇၵွမ်ႉၵူၺ်း တီႈမူႇၸေႊၵူၺ်း တၢင်ႇဝၢၼ်ႈတၢင်ႇဝဵင်းၵေႃႈ ၵႃႈၼင်ႇပွင်ပဵၼ်လႆႈၼၼ်ႉ ၵိုင်ႇလီႁႃ တိုဝ်ႉတၢင်း ပူၵ်းပွင်ပၼ် လုၵ်ႈဢွၼ်ႇၵူၼ်းၼုမ်ႇတႆးၵႂႃႇၼမ်ၼမ်ယူႇ ၼႆ ၽူႈၶဝ်ႈၸုမ်းၵေႃႈလိၵ်ႈလၢႆးလႄႈ ၾိင်ႈငႄႈတႆးမူႇၸေႊၵေႃႉၼိုင်ႈလၢတ်ႈၼင်ႇၼႆ။