ၸုမ်းယိပ်းၵွင်ႈၵၢင်ႇ ၵမ်ႈၼမ် ၵႆႉလၢတ်ႈဝႃႈ တႃႇတူၺ်းထိုင်ၵူၼ်းမိူင်း ၊ တႃႇၵႅတ်ႇၵင်ႈၽေးပၼ် ၵူၼ်းမိူင်း ဝႃႈၼႆလွၼ်ႉလွၼ်ႉ ။ ၵူၺ်းၵႃႈ ၵူၼ်းမိူင်းဢမ်ႇတွၼ်ႉလႆႈယူႇသႃႇမႃး ။ ပၢႆလႆႈလူႉသုမ်းၸွမ်းလၢႆၸိူဝ်ႉလၢႆပိူင် ။ ၺႃးလူ လၢႆဢဝ်တၢႆ ၶႃႈႁႅမ်ႁုၵ်ႉႁုၵ်ႉႁၢႆႉႁၢႆႉမႃးၶိူဝ်းယႂ်း။

ၼႂ်းလိူၼ်ၼႆႉ ႁၼ်ဝီႊတီႊဢူဝ်ႊ ဢၼ်ၵူၼ်းယိပ်းၵွင်ႈၵၢင်ႇလၢႆၵေႃႉ ႁူမ်ႈၵၼ် ႁဵတ်းႁၢႆႉၶႃႈႁႅမ်ၼၢင်းယိင်းၵေႃႉၼိုင်ႈ လုတ်ႈဢွၵ်ႇမႃးၼိူဝ်ၼႅင်ႈသိုဝ်ႇ။လွင်ႈၼႆႉ ႁဵတ်းႁႂ်ႈ ၵူၼ်းၼမ်ႁၼ်ဝႃႈ ၸုမ်းယိပ်းၵွင်ႈၵၢင်ႇၼႆႉ မိူၵ်ႈမႂ်ႈ ႁဵတ်းလႆႈတေႃႇၵူၼ်းမိူင်းဢၼ်ဢမ်ႇမီးသင် ဢမ်ႇႁူႉသင်ၼၼ်ႉ။ ၼႂ်းမိူင်းႁူမ်ႈ တုမ်မၢၼ်ႈ ပတ်းပိုၼ်ႉ ပႃးၸဵမ်မိူင်းတႆးၼႆႉ ၸုမ်းယိပ်းၵွင်ႈၵၢင်ႇမီးၼမ်လႄႈ ၵူၼ်းမိူင်းၸၢင်ႈၺႃးၽေးႁုၵ်ႉႁၢႆႉမိူၼ်ၼႆတင်းၼမ်။ ၸုမ်းယိပ်းၵွင်ႈၼႆႉ တေဢၢၼ်းယိပ်းၵွင်ႈသေမေႃၶႃႈမေႃႁႅမ်ၵူၺ်းယဝ်ႉႁႃႉ တေယဵၼ်းပဵၼ်ၸူၼ်ႁုၵ်ႉႁၢႆႉၵႂႃႇ ထိုင်တီႈ ၵူၼ်းမိူင်းယူႇၵိၼ်ဢမ်ႇလႆႈၵူၺ်းယဝ်ႉႁိုဝ်ၼႆ ပဵၼ်ၵႂၢမ်းထၢမ်ဝႆႉ ။

———————————————–00000000000———————————————-

ၸုမ်းယိပ်းၵွင်ႈၵၢင်ႇ ၼႆႉ လုၵ်ႉတီႈတၢင်းယိူင်းဢၢၼ်းလၢႆၸိူဝ်ႉလၢႆပိူင်သေ ၸင်ႇယိပ်းၵမ်ၵွင်ႈၵၢင်ႇမႃး ။ ဢမ်ႇဝႃႈ တေပဵၼ် ဢၼ်ယူႇတႂ်ႈသိုၵ်းမၢၼ်ႈ ဢၼ်ယူႇတႂ်ႈသိုၵ်းလုၵ်ႉၽိုၼ်ႉ လႄႈ ၸုမ်းယိပ်းၵွင်ႈၵၢင်ႇ ဢၼ်ဢမ်ႇယူႇတႂ်ႈၽႂ်ၸိူဝ်းၼႆႉ ၵမ်ႈၼမ် တိုၼ်းသႂ်ႇႁူဝ်ၶေႃႈဢၼ်ဝႃႈ တႃႇၵႅတ်ႇၶႄၵူၼ်းမိူင်းပဵၼ်ယႂ်ႇ ။

ပိူင်ပဵၼ်တႄႉသမ်ႉ ပေႃးၵူၼ်းမိူင်းထူပ်းတၢင်းယၢပ်ႇမႃးတႄႉတႄႉ ဢမ်ႇၸၢင်ႈႁႃပိုင်ႈၸုမ်းလႂ် ၊ ပေႃးလႅၼ်ႈႁႃသိုၵ်းၸုမ်းၼိုင်ႈ ၸုမ်းၼိုင်ႈသမ်ႉထၢင်ႇဝႃႈ ပဵၼ်ၵူၼ်းၸုမ်းၼၼ်ႉၸုမ်းၼႆႉၼႆသေ ၺႃးပၼ်တၢမ်ႇ ၺႃးဢဝ်လိူင်ႈ ။

ဝၢႆးသိုၵ်းယိုတ်းမိူင်းၼႆႉသမ်ႉၶႅၼ်းၼႃႇ ၸုမ်းလုၵ်ႉၽိုၼ်ႉတႅၵ်ႇဢွၵ်ႇပဵၼ်လၢႆမူႇလၢႆၸုမ်း ၊  ၸုမ်းၵဝ်ႇ ယင်းပႆႇမီးပၵ်း မီးပိူင်သင်ၵႅၼ်ႇၶႅင် ၸုမ်းမႂ်ႇသမ်ႉပေႃးဢွၵ်ႇမႃးထႅင်ႈ ။ၸုမ်းၼိုင်ႈလႄႈၸုမ်းၼိုင်ႈၵေႃႈ ဢမ်ႇၶဝ်ႈၵၼ် ဢမ်ႇၽွမ်ႉၵၼ်။

 ၼႂ်းၵႄႈၼႆႉ ၵူၼ်းမိူင်းသမ်ႉၺႃးတီႉၺွပ်းဢဝ်ၵႂႃႇႁဵတ်းသိုၵ်း လူၺ်ႈၵူၼ်းမိူင်းဢမ်ႇတဵမ်ၸႂ် ။

 ပေႃးၺႃးၸုမ်းသိုၵ်းပႄႉၵိၼ်မႃးၼမ်ယဝ်ႉ ၵူၼ်းဝၢၼ်ႈၵူၼ်းသူၼ်ၶတ်းၸႂ် ဢွၵ်ႇယၢၼ် ပိုၼ်ႉတီႈလႂ်တီႈၼၼ်ႈ ။ ယွၼ်ႉဝႃႈ ပေႃးၺႃးသိုၵ်းၸုမ်းလႂ်ၸုမ်းၼၼ်ႉ သင်ႇမႃးလႄႈ ဢမ်ႇၸၢင်ႈႁဵတ်းၸွမ်းၸိုင် သၢႆၸႂ်ၸၢင်ႈလူႉၸွမ်းငၢႆႈငၢႆႈ။

ယိင်ႈမီးသိုၵ်းလၢႆမူႇလၢႆၸုမ်းယူႇလေႃးၵၼ်ယိင်ႈၶႅၼ်းလႆႈၵူဝ် ၊ ၽႂ်ၵေႃႈဝႃႈ ၼႃႈတီႈၽႂ်ၼႃႈတီႈမၼ်း တင်ႈၸႂ်ပၵ်းၵဵတ်ႉပၵ်းလၢၼ်ႇၼႂ်းဝၢၼ်ႈၼႂ်းသူၼ် ။ ၵူၼ်းမိူင်းတေၵႂႃႇတေမႃး ၺႃးထတ်းၺႃးထၢမ် ။ သင်မီးပၢင်တိုၵ်းလႄႈ လူဝ်ႇပၢႆႈလူဝ်ႇၼီၼႆ ၵုမ်ႇၶမ်ၸွမ်းၵဵတ်ႉသိုၵ်းပိုၼ်ႉတီႈၽႂ်မၼ်းၵူၺ်း ဢမ်ႇတၼ်းပၢႆႈပူၼ်ႉ။

သိုၵ်းၵမ်ႈၼမ်သမ်ႉ မေႃတွပ်ႇတႅၼ်းၵၼ်ၶိုၼ်းၵူၺ်း ၊ ဢမ်ႇမေႃၵႄႈလိတ်ႈပၼ်ႁႃ ပေႃးၸုမ်းၼိုင်ႈႁဵတ်းႁၢႆႉၵေႃႈ မေႃႁဵတ်းႁၢႆႉတႅၼ်းၶိုၼ်းၵူၺ်း ပၼ်ႁႃဢမ်ႇယဝ်ႉဢမ်ႇဝၢႆးၼႆ ၽူႈတၢင်ၼႃႈ ဢၼ်ႁူႉၸွမ်းပိူင်သိုၵ်းၵေႃႉၼိုင်ႈ လၢတ်ႈၼင်ႇၼႆ –

လွင်ႈႁဵတ်းသၢင်ႈသိုၵ်းၶဝ်ၼႆႉ မီးဝႃႈ ပေႃးပိူၼ်ႈတိုၵ်းမႃးၵေႃႈ တေတိုၵ်းၶိုၼ်း ၊ ပေႃးယိပ်းၵွင်ႈၵၢင်ႇမႃးၵေႃႈ တေယိပ်းၵွင်ႈၵၢင်ႇတွပ်ႇၶိုၼ်းၼႆ မီးပိူင်ၸိူဝ်းၼႆႉ ႁူမ်ႇငမ်းဝႆႉၵူၺ်း။

ၵူၼ်းဢၼ်ယၢမ်ႈပၢႆႈၽေးၽွင်း ပၢင်ယၼ်ႇသိုၵ်း 1027 ၼႆႉ လၢတ်ႈၼႄဝႃႈ – “ ၽွင်းပဵၼ်ပၢင်တိုၵ်းယူႇၼၼ်ႉ ယွၼ်ႉမီးၵဵတ်ႉဝႆႉ လၢႆတီႈလႄႈ တေပၢႆႈတၢင်းလႂ်ၵေႃႈ လိူၵ်ႈယၢပ်ႇ ။ သမ်ႉၵူဝ်ၺႃး သိုၵ်းၶဝ်ထၢင်ႇထိူမ်လၢႆလွင်ႈသေ တီႉၺွပ်းၵုမ်းၶင် ။ ၸင်ႇၼၼ်လႄႈ ဢၼ်ၶဝ် ႁဵတ်းၵဵတ်ႉသေ ပႂ်ႉဢဝ်ႁူမ်ႇလူမ်ႈၵူၼ်းမိူင်းဢၼ်ဝႃႈၼၼ်ႉ ၵမ်းလိုၼ်း ၶိုၼ်းပဵၼ်ၶဵၼ်ၵူၼ်းမိူင်းၶိုၼ်းၵူၺ်း ” – ဝႃႈၼႆ။

သိုၵ်းမၢင်ၸုမ်း ႁွင်ႉၵူၼ်းမိူင်းၵႂႃႇၵူတ်ႇထတ်းၵမ်းၼိုင်ႈၼႆသေ ၵမ်းလိုၼ်းဢမ်ႇပွႆႇပၼ်ၶိုၼ်း ပွႆႇပၼ်ၶိုၼ်းၵေႃႈ မီးပႃးႁွႆးပေႃႉႁွႆးထုပ်ႉ ၊ မၢင်ၵေႃႉ ၺႃးဢဝ်တၢႆယဝ်ႉၵေႃႈ ဢမ်ႇသူင်ႇၶၢဝ်ႇသူင်ႇငၢဝ်းပၼ် ၵူၼ်းႁူမ်ႈႁိူၼ်းၶဝ်ၵေႃႈမီး ။

မိူၼ်ၶလိပ်ႉဝီႊတီႊဢူဝ်း ဢၼ်လုတ်ႈဢွၵ်ႇမႃး ၼိူဝ်ၼႅင်ႈသိုဝ်ႇၼႆႉၵေႃႈ ၼၢင်းယိင်း ဢႃယု 50 ပၢႆ ၺႃးၵူၼ်းၸၢႆးၸုမ်းၼိုင်ႈ မတ်ႉမိုဝ်းပႄႈလင်သေ  ဢဝ်ၽႃႉတႅပ်းၵၢၼ်ႈၶေႃး ၶႃႈႁႅမ်တၢႆဝႆႉ ။ ၼၢင်းယိင်းၵေႃႉၼၼ်ႉ လၢတ်ႈၵႂၢမ်းယွမ်းၼွမ်း လၢႆၸိူဝ်ႉလၢႆပိူင်သေတႃႉ ၵူၼ်းၸုမ်းၼၼ်ႉ ဢမ်ႇထွမ်ႇဢမ်ႇဢဝ်သႂ်ႇၼႂ်းၸႂ်သေ  တိုၼ်းဝႃႈ ဢမ်ႇပၼ်လွတ်ႈ။

သိုဝ်ႇၶၢဝ်ႇမိူင်းမၢၼ်ႈလၢႆဢၼ်တႄႉ တႅမ်ႈတၢင်ႇဝႆႉဝႃႈ ႁၢင်ႈၼႂ်းဝီႊတီႊဢူဝ်ႊၼၼ်ႉ ပဵၼ်ၵႂႃႇၼႂ်းဝၢၼ်ႈဝႃႇရႃႇသုပ်ႉ ၸႄႈမိူင်းၶၢင် ပဵၼ်ၼိူဝ်သဵၼ်ႈတၢင်းၵႂႃႇ ဝဵင်းတၼၢႆး ဝႃႈၼႆဝႆႉ။    

ၼၢင်းယိင်းၼၼ်ႉ ၼွမ်းသေလၢတ်ႈတင်းၵႂၢမ်းမၢၼ်ႈဝႃႈ “ ၸၢႆးၶဝ် လူဝ်ႇထၢမ်သင်ၵေႃႈ ထၢမ်လႄႈ မႄႈႁူႉသင်ၵေႃႈ တေလၢတ်ႈပၼ်မူတ်းမူတ်း ယႃႇႁဵတ်းႁၢႆႉမႄႈၼႃႈ ” ၼႆ သေတႃႉ ၵူၼ်းၸၢႆးၸိူဝ်းၼၼ်ႉ တိုၵ်ႉဢဝ် ၽႃႉငႃဝႆႉယူႇ။

ၼၢင်းယိင်းၼၼ်ႉ သိုပ်ႇလၢတ်ႈဝႃႈ – “  ပေႃးၸၢႆးၶဝ် ဢဝ်ၽႃႉငႃဝႆႉႁဵတ်းၼၼ် မႄႈပႃႈၵူဝ်ၼႃႇ ၊ ၸၢႆးၶဝ် ၶႂ်ႈထၢမ် သင်ၵေႃႈ ထၢမ်လႄႈ တေတွပ်ႇပၼ်သိုဝ်ႈသိုဝ်ႈ ၊ မႄႈပႃႈ တေယွၼ်းဝႆႈၵၼ်တေႃးၼႃႈ ” ၼႆသေ လၢတ်ႈယူႇယႂ်းယႂ်း ဢမ်ႇထၢတ်ႇ။

ၵူၺ်းၵႃႈ ဢမ်ႇမိူၼ်ၼင်ႇ ၼၢင်းယိင်းမႄႈပႃႈၵေႃႉၼႆႉ ၶႂ်ႈပဵၼ် ၊ ၵမ်းလိုၼ်း ၺႃးၽၼ်းတီႈၵၢၼ်ၶေႃး ၊ ထိုင်တီႈမႄႈပႃႈၼၼ်ႉလူမ်ႉတၢႆဢမ်ႇႁူႉၶိင်းယဝ်ႉၵေႃႈ ၸုမ်းသိုၵ်းၸုမ်းၼၼ်ႉ တိုၵ်ႉတႅပ်းတႅပ်းၽၼ်းၽၼ်း ထႅင်ႈပဵၼ်လၢႆၵမ်း မိူၼ်ဢမ်ႇမီးၸႂ်ၵူၼ်း ဢမ်ႇမီးၸႂ်မဵတ်ႉတႃႇ ၵရုၼႃႇ ဢမ်ႇမီးၸႂ်ဝႆႉၵႃႈၶၼ်ၼိူဝ်သၢႆၸႂ် ၵူၼ်းယူႇႁူမ်ႈလူၵ်ႈၵၼ်ၼိုင်ႈသဵၼ်ႈ။   ၵူၼ်းၸၢႆး ဢၼ်ႁူမ်ႈၵၼ်ၶႃႈႁႅမ် မႄႈပႃႈၵေႃႉၼႆႉ  ဢဵၼ်ႁႅင်းမီးမွၵ်ႈ 2-3ၵေႃႉ ။ ဢွၼ်ၵၼ်လၢတ်ႈပႃးဝႃႈ “ပေႃးယၢမ်ႈၶႃႈႁႅမ်ၵူၼ်းတၢႆၸိူင်ႉၼႆယဝ်ႉတႄႉ  ထႅင်ႈတၢင်ႇပွၵ်ႈမႃး တေဢမ်ႇမီးလွင်ႈယၢပ်ႇယဝ်ႉ ဝႃႈၼႆထႅင်ႈ။

လိူဝ်ၼၼ်ႉ ၵူၼ်းထၢႆႇၶလိပ်ႉ ဝီႊတီႊဢူဝ်ႊၼၼ်ႉလၢတ်ႈပႃးဝႃႈ “ ယိပ်းၵွၵ်းႁူဝ်မၼ်းမႃးလႄႈ ဝၢႆႇမႃးတၢင်းၵွင်ႈထၢႆႇၼႆႉလႄႈ ” ၼႆသေ တႅပ်းၶေႃးၵူၼ်းယဝ်ႉ လၢတ်ႈမိူၼ် ႁၢၼ်ႉၸႂ် ဢဝ်ၵုင်ႇမုၼ်လူင်ဝႆႉ ။

ဢိင်ၼိူဝ်လွင်ႈၼႆႉ ၶၢဝ်ႇတႄႉ လိုဝ်းဢွၵ်ႇလၢႆပိူင် မၢင်ၸိူဝ်းၵေႃႈဝႃႈ ပဵၼ်ဝီႊတီႊဢူဝ်ႊ ဢၼ်ၵဝ်ႇပူၼ်ႉမႃးလၢႆပီ ၊  မၢင်ၸိူဝ်းၵေႃႈဝႃႈ ဢၼ်မႂ်ႇ ။ ၸိူဝ်းပဵၼ်ၸႂ်ၾၢႆႇသိုၵ်းမၢၼ်ႈသမ်ႉၼႄးဝႃႈ ပဵၼ်ၸုမ်းလုၵ်ႉၽိုၼ်ႉၵေႃႉပူၼ်ႉပႅၼ် ၊ ၸိူဝ်းပဵၼ်ၸႂ်ၾၢႆႇၸုမ်းလုၵ်ႉၽိုၼ်ႉသမ်ႉဝႃႈ ပဵၼ်ၸုမ်း ပျီႇတူႉၸိတ်ႉဝရႃႇသုပ်ႉ ၵူၼ်းသိုၵ်းမၢၼ်ႈ ၵေႃႉပူၼ်ႉပႅၼ် ၼႆသေ ႁဵတ်းၵဝ်ႉၼႄးၵႃ ၵႃၼႄးၵဝ်ႉ ဝႆႉ ။ တေႃႇထိုင်မိူဝ်ႈၼႆႉ ဢမ်ႇမီးၽႂ်ၸုမ်းလႂ် ဢွၵ်ႇမႃးႁပ်ႉပုၼ်ႈၽွၼ်း ၵႄႈလိတ်ႈပၼ်ႁႃလွင်ႈၼႆႉ  ။  ၽႂ်ၵေႃႈဢမ်ႇပႆႇႁူႉလွင်ႈႁူႉတၢင်းပိူင်ပဵၼ်ဢၼ်တႄႉမၼ်း – ဝႃႈပဵၼ်ယွၼ်ႉသင်ၼႆတႄႉတႄႉ။

ၼႂ်းၵႄႈၼႆႉ မီးၵူၼ်းၸၢႆးၵေႃႉၼိုင်ႈ ယူႇၾၢႆႇၸုမ်း PDF ၼႂ်းမိူင်းၶၢင်သေ  ဢွၵ်ႇလၢတ်ႈၼိူဝ်ၼႅင်ႈသိုဝ်ႇဝႆႉဝႃႈ – “ မိူဝ်ႈဢမ်ႇႁိုင်သင်ၼႆႉ လႆႈပဵၼ်ပၢင်တိုၵ်းၵၼ် ၊ ၾၢႆႇ ပျီႇတူႉၸိတ်ႉလူႉတၢႆ 5 ၵေႃႉ  ၊ ၸင်ႇၼၼ်လႄႈ ယိုတ်းလႆႈပႃး ၶိူင်ႈၶူဝ်းၸႂ်ႉသွႆပျီႇတူႉၸိတ်ႉၸိူဝ်းၼၼ်ႉ ။ ယိုတ်းလႆႈပႃးၾူၼ်း ။ မိူဝ်ႈပိုတ်ႇတူၺ်းၾူၼ်းပျီႇတူႉၸိတ်ႉၼၼ်ႉ ၸင်ႇလႆႈႁၼ်ဝီႊတီႊဢူဝ်ႊ ဢၼ်ၶႃႈႁႅမ်ဝႆႉၼၢင်းယိင်းၼႆႉ ။ ၸင်ႇ ဢဝ်တၢင်ႇၼိူဝ်ၼႅင်ႈသိုဝ်ႇႁႂ်ႈပိူၼ်ႈႁူႉႁၼ်ဝႃႈ ပျီႇတူႉၸိတ်ႉ ႁဵတ်းႁၢႆႉၵူၼ်းမိူင်း ” – ၼႆသေ လၢတ်ႈၵႂႃႇၼႂ်းဝၼ်းတီႈ 19/08/2026 ။

ၵမ်ႈၼမ်ၵေႃႈ ဢွၼ်ၵၼ်ပိုၼ်ၽႄႈၼိူဝ်သိုဝ်ႇ ဝႃႈ ပဵၼ်ၾၢႆႇပျီႇတူႉၸိတ်ႉဝႃႇရႃႇသုပ်ႉ  ၼႂ်းၸႄႈမိူင်းၶၢင် ၵေႃႉပူၼ်ႉပႅၼ်ၼႆၵမ်းသိုဝ်ႈ လႄႈ ၾၢႆႇပျီႇတူႉၸိတ်ႉ ၸင်ႇဢွၵ်ႇလိၵ်ႈသပ်းၸႅင်ႈၶိုၼ်း ဝၼ်းတီႈ 20/08/2026 ၼႆႉ။

ၼႂ်းၽိုၼ်လိၵ်ႈ ပျီႇတူႉၸိတ်ႉၼၼ်ႉ ပႃးဝႆႉဝႃႈ – ထွမ်ႇတူၺ်းသဵင်ၼႂ်းဝီႊတီႊဢူဝ်ႊယဝ်ႉ ဢမ်ႇၸႂ်ႈသဵင်ၵူၼ်းၼႂ်းမိူင်းၶၢင် လႅပ်ႈပဵၼ်တၢင်း မိူင်းမၢၼ်ႈထုင်ႉပဵင်းသေတီႈတီႈ ။ ပေႃးတူၺ်း လၢႆးတႃးသၼၢပ်ႈၶႃး ပိူင်ၾၢင်ၼုင်ႈၶူဝ်းၼၢင်းယိင်း ၼၼ်ႉ ငၢႆးၵူၼ်းပွတ်းတၢင်းဝဵင်းသိူဝ် ၼႂ်းတိူင်းၸႄႈၵႅင်း  ။ ယဝ်ႉၵေႃႈ သမ်ႉၼႄးဝႃႈ ပဵၼ်ပျီႇတူႉၸိတ်ႉ ။ ၶဝ်တင်ႈၸႂ် ၶႂ်ႈယႃႉၸိုဝ်ႈသဵင်ပျီႇတူႉၸိတ်ႉ ဝႃႇရႃႇသုပ်ႉ ၵူၺ်း  – ဝႃႈၼႆ။

တူၺ်းပၼ်ႁႃၼႆႉ ပဵၼ်ပိူင်တႅၵ်ႈသေ ပေႃးမိူၼ်ၼႂ်းမိူင်းတႆးၵေႃႈ ၸုမ်းယိပ်းၵွင်ႈၵၢင်ႇၼမ် ၵူၼ်းမိူင်းၵမ်းၵမ်းၺႃး သိုၵ်းပႄႉၵိၼ်လူလၢႆဢဝ်တၢႆမႃး ပၢၼ်သိုပ်ႇပၢၼ် ။ ဢၼ်တိုၵ်ႉပဵၼ်ၵႂႃႇ ၽွင်းပၢင်ယၢၼ်ႇသိုၵ်း 1027 ၼႆႉ မိူၼ်ၼင်ႇ လႃႈသဵဝ်ႈ ၵျွၵ်ႉမႄး သီႇပေႃႉ မိူင်းမိတ်ႈ သီႇသႅင်ႇ ၸိူဝ်းၼႆႉ ၵူၼ်းမိူင်း ၺႃးတၢမ်ႇသိုၵ်းပေႉၵိၼ်တင်းၼမ်။

ပၼ်ႁႃၸိူဝ်းၼႆႉၵေႃႈ ပဵၼ်ယွၼ်ႉ သိုၵ်းဢမ်ႇယူႇသုၼ်ႇသိုၵ်း ၊ မၼ်းမႃးၶူၼ်းၶဝ်းလေႃးလႄးၵၼ်တင်းၵူၼ်းမိူင်းလႄႈ ၵူၼ်းမိူင်းၸင်ႇထူပ်းၽေးၸိူဝ်းၼႆႉမႃး ၼႆ ၽူႈလဵပ်ႈႁဵၼ်းၾၢႆႇပၵ်းပိူင် ၼႂ်းမိူင်းတႆးပွတ်းၸၢၼ်း ၵေႃႉၼိုင်ႈလၢတ်ႈၼင်ႇၼႆ –

သိုၵ်းၼႆႉ မၼ်းဢမ်ႇယူႇႁင်းမၼ်း မၼ်းမႃးယူႇလေႃးၼႂ်းၵၢၼ်ၽွင်းငမ်းဝႆႉလႄႈ ပၼ်ႁႃၼမ်။ ယဝ်ႉၵေႃႈ တၢင်းယူပ်ႈယွမ်းၼႆႉ ပၢႆးပၺ်ႇၺႃႇၼႆႉ မၼ်းလူႉၵႂႃႇတင်းမူတ်း။တီႈတႄႉမၼ်းသင်ဝႃႈ သိုၵ်းယူႇသုၼ်ႇသိုၵ်း ၊ ၾၢႆႇပၵ်းပိူင်ၵေႃႈ ယူႇၽႂ်မၼ်းသေ ၸတ်းပွင် ၾၢႆႇၽွင်းငမ်းၵေႃႈ ႁဵတ်းၵၢၼ်လႆႈၽဵၼ်ႈၽဵၼ်ႈၼႆတႄႉ လီဢေႃႈ။ၼႆႉသမ်ႉ ဢၼ်လႂ်ၵေႃႈ ပဵၼ်သိုၵ်းသဵင်ႈမူတ်းလႄႈ ပေႃးၶဝ်ဢမ်ႇမႅၼ်ႈၵၼ်မႃး တိုၵ်းၵၼ်ႁေ ပေႃးယဝ်ႉ ပႃးၵၼ်လူႉမူတ်း ႁဵတ်းၼႆၶႃႈၼေႈ

ပၼ်ႁႃဢၼ်ၵူၼ်းမိူင်းလႆႈထူပ်းယူႇၸိူဝ်းၼႆႉ သိုၵ်းၵူႈၸုမ်းၸုမ်း တၵ်းလူဝ်ႇမီးပၵ်းပိူင်ၵႅၼ်ႇၶႅင် ဢၼ်တူၺ်းထိုင်ၵူၼ်းမိူင်းလႆႈ ။ ပိူင်လူင်မၼ်း လူဝ်ႇမီးပၢႆးပၺ်ႇၺႃႇ ဢၼ်ၵိုင်ႇငၢမ်ႇၵၼ်တင်းမိူင်းတႆး သိုၵ်းၵေႃႈလူဝ်ႇႁူႉ ၊ ၸုမ်းတူင်ႇၵူၼ်း လႄႈၵူၼ်းမိူင်းထမ်းမၻႃးၵေႃႈလူဝ်ႇႁူႉ ။