သိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇဝႃႈတီႉလႆႈ  ၵူၼ်းႁဵတ်းၵၢၼ်လွၵ်ႇလႅၼ်ၵိၼ်ငိုၼ်းဢွၼ်ႊလၢႆႊ ၵျႃႊၽျႅၼ်ႉ  တီႈဝၢၼ်ႈမႂ်ႇ ထုင်ႉၼႃးယႆး (ၼႂ်းၼႃႈလိၼ်ၸုမ်းပျီႇတူႉၸိတ်ႉ ၵျဵဝ်းသၢင်း)  ၼႂ်းၸႄႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း    ။

သိုၵ်းမၢၼ်ႈပိုၼ်ၽၢဝ်ႇဝႃႈ ဝၼ်းတီႈ 4/8/2026 ယၢမ်းဝၢႆးဝၼ်း 2 မူင်းၶိုင်ႈ   ၵူတ်ႇထတ်း တီႉၺွပ်းလႆႈ ၵူၼ်းႁဵတ်းၵၢၼ်လွၵ်ႇလႅၼ်ၵိၼ်ငိုၼ်းတၢင်းဢွၼ်ႊလၢႆႊၵျႃႊၽျႅၼ်ႉ 49 ၵေႃႉ တီႈႁိမ်းဝၢၼ်ႈၼႃးယႆး (ယၢၼ်ၵႆၵၼ်မွၵ်ႈ 250 မီႊတႃႊၵူၺ်း) ဝႃႈၼႆ။  

ဢၼ်သိုၵ်းမၢၼ်ႈတီႉလႆႈၸုမ်းၵျႃႊၽျႅၼ်ႉ 49 ၵေႃႉၼႆႉ ပဵၼ်ၵူၼ်းမိူင်းၶႄႇ ၸၢႆး 36 ၵေႃႉ ၊ ယိင်း 2 ၵေႃႉ  ၊ ၵူၼ်းမိူင်းမၢၼ်ႈ ၸၢႆး 7 ၵေႃႉ ၊ ယိင်း 4 ၵေႃႉ ႁူမ်ႈသဵၼ်ႈ ၸၢႆး 43 ၵေႃႉ  ယိင်း 6 ၵေႃႉ ။

ၵူၼ်းၼုမ်ႇၸၢႆး ယူႇဝဵင်းၼမ်ႉၸၢင်လၢတ်ႈၽူႈတွႆႇႁွၵ်ႈဝႃႈ -“ ၶဝ်တီႉၺွပ်းၼႄဢဝ် ၾၢင်ႁၢင်ႈ မၼ်းၵူၺ်း ၊ တီႉၵူၼ်းဢၼ်ဢမ်ႇပေႃးႁဵတ်းၵၢၼ်ၶႅၼ်ႇမၼ်းၼၼ်ႉၼႃႇ။ တႃႇလႅၵ်ႈၵူၼ်းမႂ်ႇ ၵူၺ်းၵႂႃႈ ၊ ဢၼ်ၶဝ်တီႉၼႄၼႆႉ လႆႈဝႃႈ ပဵၼ်ၽိတ်ႇမၼ်းၵူၺ်းၵွၼ်ႇယဝ်ႉ ၊ တၢင်းၼႂ်းမၼ်း တႄႉတႄႉ ၼႆႉမီးၼမ်ၼႃႇ ။  ၶဝ်ယူႇဝႆႉ ဢၼ်လုၵ်ႉၼႃးယႆး  ၽႄႈၵႂႃႇတၢင်း မိူင်းၼၢႆး ပုၼ်ႉၼေႈ ၼမ်ၼႃႇ ပေႃးတင်ႈၸႂ်ၶႂ်ႈၵႂႃႇတီႉ ”- ဝႃႈၼႆ ။

သိုၵ်းမၢၼ်ႈပိုၼ်ၽၢဝ်ႇဝႆႉဝႃႈ တီႉလႆႈပႃး ၵွင်ႈပွတ်းသႅၼ်း P-365 လဝ်းၼိုင်ႈ ၊ မၢၵ်ႇၵွင်ႈ 9 mm –   ႁႃႈလုၵ်ႈ၊  ၵွင်ႈသႅၼ်း UZI  လဝ်းၼိုင်ႈ ၊ မၢၵ်ႇၵွင်ႈ 38 ပွႆႉ( ပွိုင့် )  ၵဝ်ႈလုၵ်ႈ ၊  ၵွင်ႈ  AK- 47  သွင်လဝ်း မၢၵ်ႇၵွင်ႈ သွင်လုၵ်ႈလႄႈ ၊ မၢၵ်ႇၵွင်ႈ 7.62 mm  50 လဝ်း ၊ မိုဝ်းထိုဝ်ၵူႈသႅၼ်းသႅၼ်း 67 လုၵ်ႈ ၊All In One  သီႇလုၵ်ႈ ၊ Starlink  ႁူၵ်းဢၼ် လႄႈ CPU  လုၵ်ႈၼိုင်ႈ ဝႃႈၼႆ။

 ၵူၼ်းမိူင်းဝဵင်းၼမ်ႉၸၢင်လၢတ်ႈၽူႈတွႆႇႁွၵ်ႈဝႃႈ -“ ၼႂ်းဝဵင်းၼမ်ႉၸၢင်ၼႆႉ ပဵၼ်ဢွင်ႈတီႈၶဝ်မႃး သုၵ်ႈငိုၼ်း (ဢဝ်ငိုၼ်းဢၼ်ဢမ်ႇသႅၼ်ႈသႂ်မႃးလႅၵ်ႈႁႂ်ႈပဵၼ်ငိုၼ်းၽိူၵ်ႇ)  ၵူၺ်း ၊ ၶႄႇပႅၵ်ႇၼႃႈ ၵႂႃႇမႃးတူင်ႉၼိုင်ၼမ်ၼႃႇၼႂ်းဝဵင်း ၊ ၸွမ်းႁၢၼ်ႉၶၢႆၵုၼ်ႇၸိူဝ်းၼႆႉ ပေႃးၶဝ်မႃးသိုဝ်ႉၵုၼ်ႇၼိုင်ႈပွၵ်ႈ ၼႆႉ ၵႃးမွၵ်ႈ 2 လမ်းၼႆႉၼေႈ ”  ဝႃႈၼႆ ။

သိုၵ်းမၢၼ်ႈပိုၼ်ၽၢဝ်ႇလၢတ်ႈဝႃႈ – ၵူၼ်းမိူင်းၶႄႇၸိူဝ်းထုၵ်ႇတီႉၺွပ်းဝႆႉလႄႈ  ၶိူင်ႈၸႂ်ႉၶိူဝ်းတိုဝ်း ၼႂ်းၵၢၼ် ဢွၼ်ႊလၢႆႊၵျႃႊၽျႅၼ်ႉ ၼၼ်ႉ တေၵူတ်ႇထတ်းသေ  ႁဵတ်းသၢင်ႈၵႂႃႇ ၸွမ်းၼၼ် ပၵ်းပိူင်မၢႆမီႈၸိုင်ႈမိူင်းမီးဝႆႉၼၼ်ႉ ဝႃႈၼႆ။  

လွင်ႈၼႆႉ ၸဝ်ႈၵႃး ဢၼ်လႅၼ်ႈတူၼ်ႈတီး ၵေႃႉၼိုင်ႈတႄႉလၢတ်ႈဝႃႈ –  “ ၵူၼ်းၵျႃႊၽျႅၼ်ႉ မိူင်းၶႄႇ ဢၼ်သိုၵ်းမၢၼ်ႈယၢမ်ႈတီႉလႆႈမႃးၸိူဝ်းၼၼ်ႉတႄႉ ယၢမ်ႈႁၼ်ၶဝ်သူင်ႇပၼ် ၼႂ်းမိုဝ်းၶႄႇၶိုၼ်းလီလီ တႃႇသေႇယဝ်ႉ။ ဢမ်ႇႁၼ်ပၼ်တူတ်ႈတၢမ်ႇသင်။ ၶႆႈႁဵတ်းၶုၼ်လၢႆလၢႆၵူၺ်း ဢမ်ႇမေႃၸတ်းၵၢၼ်သင်။ ပေႃးပဵၼ်ၵူၼ်းမိူင်း ႁဝ်းၵူၺ်းဢိူဝ်ႈ ၶႄႇယွၼ်းဢဝ်ၵႂႃႇၸတ်းၵၢၼ်သေ ပၼ်တၢမ်ႇတၢႆပႅတ်ႈ လၢႆၵေႃႉယဝ်ႉ ” – ဝႃႈၼႆ။  

တႃႇၽဵဝ်ႈမူၺ်ႉၸုမ်းၵျႃႊၽျႅၼ်ႉ (ၸုမ်းၸိူဝ်းႁဵတ်းၵၢၼ်လွၵ်ႇၵိၼ်ငိုၼ်းတၢင်းဢွၼ်ႊလၢႆႊ)   ယူႇၼႆႉ သိုၵ်းမၢၼ်ႈပၢႆပိုၼ်ၽၢဝ်ႇဢွၵ်ႇဝႆႉပဵၼ်တၢင်းၵၢၼ်ထႅင်ႈဝႃႈ တေႁူမ်ႈမိုဝ်းၵၼ်တင်း မိူင်းၶႄႇ- မိူင်းထႆးသေ  ၸတ်းၵၢၼ်ၵႂႃႇ ႁႂ်ႈထိုင်တီႈထိုင်တၢင်း – ၼႆလူးၵွၼ်ႇ။

ၸုမ်းပျီႇတူႉၸိတ်ႉ ၼႃးယႆးၼႆႉ ပဵၼ်ၵျဵဝ်းသၢင်း ဢွၼ်ႁူဝ်ဝႆႉ ။ မိူဝ်ႈပီ 1996   ဝၢႆးတပ်ႉသိုၵ်းမိူင်းတႆး MTA ဝၢင်းၶိူင်ႈၼၼ်ႉ   ယူႇတီႈသိုၵ်းမၢၼ်ႈဢၼ်ၽွင်းငမ်းမိူင်း ပၢၼ်ၼၼ်ႉ ပၼ်ပုၼ်ႈၽွၼ်းႁဵတ်းပျီႇတူႉၸိတ်ႉသေ ႁႂ်ႈတူင်ႉၼိုင်ယူႇသဝ်းၼႂ်း ပိုၼ်ႉတီႈၼႃးယႆးမႃး – တႃႇၸွႆႈထႅမ်ၵၢၼ်သိုၵ်းမၢၼ်ႈၵမ်းသိုဝ်ႈ  ။

ဝၢၼ်ႈမႂ်ႇၼႆႉ ယူႇၼႂ်းၼႃႈလိၼ်ၵုမ်းၵမ် ၸုမ်းသိုၵ်းၵူၼ်းမိူင်း (ပျီႇတုၸိတ်ႉ) ၼႃးယႆး ယူႇၼႂ်းဢိူင်ႇမိူင်းၸိတ်ႇ ၸႄႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း။

ယူႇၼိူဝ်သဵၼ်ႈတၢင်းၼမ်ႉၸၢင်-မိူင်းၸိတ်ႇ၊ ဝၢၼ်ႈၼႆႉၵေႃႇတင်ႈမႃးလၢႆသိပ်းပီသေ ၸုမ်းၼႃးယႆးပူၵ်းပွင်ဝႆႉ။

ဝၢႆးလင်သိုၵ်းမၢၼ်ႈယိုတ်းမိူင်းယဝ်ႉ ဝၢၼ်ႈမိူင်းသုၵ်ႉယုင်ႈၼႆႉ ၸွမ်းလႅၼ်လိၼ် မိူင်းတႆး- မိူင်းထႆး ပဵၼ်မႃးဢွင်ႈတီႈၵူၼ်းႁဵတ်းၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊၶဝ် သေႃႉမူၵ်းယူႇသဝ်းဝႆႉ ၵူၺ်းဢမ်ႇၵႃး မိူၼ်ၼင်ႇပွတ်းတၢင်း  မိူင်းၼွင်၊ မိူင်းသူႈ၊ လၢႆးၶႃႈ၊ ၶူဝ်လမ်၊ ၵုၼ်ႁဵင် ၸိူဝ်းၼႆႉၵေႃႈမီးၸုမ်းၵျႃႊၽျႅၼ်ႉ မူၵ်းယူႇသဝ်းဝႆႉတင်းၼမ်ၼႆ ၵူၼ်းမိူင်းပိုၼ်ႉတီႈလၢတ်ႈၽူႈတွႆႇႁွၵ်ႈ ၼင်ႇၼႆ။

ႁၢင်ႈ –  ၸုမ်းၵျႃႊၽျႅၼ်ႉ ဢၼ်သိုၵ်းမၢၼ်ႈတီႉလႆႈ ၼႂ်းၸႄႈဝဵင်းၼမ်ႉၸၢင်