သိုၵ်းမၢၼ်ႈဢဝ်ႁိူဝ်းမိၼ်သိုၵ်းယိုဝ်းတီႈ ၾင်ႇပၢင်ႇလၢႆႇ ငပလီႇ (တီႈဢႅဝ်ႇယဵမ်ႈ တၢင်းႁၢင်ႈလီ) တီႈဝဵင်းတၢၼ်ႇတွႆး မိူင်းရၶႅင်ႇ တိူဝ်ႉမႅၼ်ႈႁိူၼ်းယေးၵူၼ်းမိူင်း လႄႈႁူင်းလိုဝ်ႈသဝ်းၶႅၵ်ႇၼွၵ်ႈမိူင်းၼႂ်းမိူင်း မွၵ်ႈ 20 လင် ဝႃႈၼႆ။

ဝၼ်းတီႈ 3/8/2026 ယၢမ်းၵၢင်ၼႂ်မွၵ်ႈ 10 မူင်း သိုၵ်းမၢၼ်ႈဢဝ်ႁိူဝ်းမိၼ်သိုၵ်း 3 လမ်း Y12 လမ်းၼိုင်ႈ မႃးလဵပ်ႈၵၢင်ႁၢဝ်တီႈဝဵင်းတၢၼ်ႇတွႆးသေ ပွႆႇမၢၵ်ႇလူင်းသႂ်ႇတီႈ ပွၵ်ႉ ၵျဵၵ်ႉတေႃး ။ တူၵ်းတိူဝ်ႉသႂ်ႇႁိူၼ်းယေးၵူၼ်းမိူင်း လႄႈႁူင်းလိုဝ်ႈသဝ်း ပင်ႊၵလူဝ်ႊၶႅၵ်ႇ ဢမ်ႇယွမ်း 60 လုၵ်ႈ ၊ ၵူၼ်းဝၢၼ်ႈ မၢတ်ႇၸဵပ်းၸၢၵ်ႇမၢၵ်ႇ 2 ၵေႃႉ ပဵၼ် ဢူးၵျေႃႇတူႇၼၢႆႇ ဢႃယု 41 ပီလႄႈ တေႃႇမသၢၼ်းမျိၼ်ႉ ဢႃယု 60 ပီ ။ တၢင်ႇၵေႃႉတႄႉတၼ်းပၢႆႈလွတ်ႈလႄႈ ဢမ်ႇမီးလွင်ႈမၢတ်ႇၸဵပ်းလူႉတၢႆ။

ဢၼ်မၢၵ်ႇတူၵ်းသႂ်ႇယၢမ်းလဵဝ်ၼႆႉတႄႉပဵၼ်ပိုၼ်ႉတီႈ ဢၼ်ႁၢင်ႇၵႆ ပွၵ်ႉၶူင်ႇႁိူဝ်းမိၼ် ပွၵ်ႉဢၼ်မီးႁူင်းႁႅမ်းၸိူဝ်းၼၼ်ႉလႄႈ တိူဝ်ႉမႅၼ်ႈ ပင်ႊၵလူဝ်ႊဢွၼ်ႇ မွၵ်ႈ 20 လင်ၵူၺ်း ၵူၼ်းပိုၼ်ႉတီႈလၢတ်ႈၼင်ႇၼႆ။

မိူဝ်ႈဝၼ်းတီႈ 31/07/2026 ၼၼ်ႉၵေႃႈ သိုၵ်းမၢၼ်ႈဢဝ်ႁိူဝ်းမိၼ်ၵျႅတ်ႉၾၢႆႊတိူဝ်ႊမႃးပွႆႇမၢၵ်ႇသႂ်ႇ 3 လုၵ်ႈ တူၵ်းသႂ်ႇတီႈဝၢၼ်ႈ သူၺ်ႇလေႇ ။ မိူဝ်ႈၼၼ်ႉၵေႃႈ ၵူၼ်းဝၢၼ်ႈတၢႆ 4 ၵေႃႉ ။ ပဵၼ် 3 ၵေႃႉပေႃႈမႄႈလုၵ်ႈ လႄႈ ၵူၼ်းၶၢႆၶူဝ်းၵေႃႉၼိုင်ႈ။

ဝဵင်းငပလီႇ ၼႆႉပဵၼ်ဝဵင်းႁၢင်ႈလီ ဢၼ်ၸပ်းၾင်ႇပၢင်ႇလၢႆႇ မီးၼႂ်းမိူင်းရၶႅင်ႇ။ ၽွင်းဝၢၼ်ႈမိူင်းလီၼၼ်ႉ ၵူၼ်းမႃးဢႅဝ်ႇယဵမ်ႈၵိုၼ်းၶွၼ်ႈတင်းပီ။ ၵူၼ်းပိုၼ်ႉတီႈၵေႃႈမီးၵၢၼ်လီ။ ပဵၼ်ပိုၼ်ႉတီႈဢၼ်မီးငိုၼ်းၶဝ်ႈၸိုင်ႈမိူင်းၼမ်သုတ်း ထိ 1။ ၵူၺ်းၵႃႈ ယၢမ်းလဵဝ် သိုၵ်းမၢၼ်ႈၼႄၶေႃႈဢၢင်ႈဝႃႈ သိုၵ်းရၶႅင်ႇ AA ၵုမ်းဝႆႉၼႆသေ ဢဝ်ႁိူဝ်းမိၼ်သိုၵ်းၵႂႃႇယိုဝ်းယူႇတိၵ်းတိၵ်း ႁဵတ်းႁႂ်ႈပိုၼ်ႉတီႈဢၼ်ႁၢင်ႈလီၼၼ်ႉယဵၼ်းပဵၼ်ပိုၼ်ႉတီႈဢၼ်ဢမ်ႇလွတ်ႈၽေး။ ငိုၼ်းၶဝ်ႈၸိုင်ႈမိူင်းၵေႃႉလူတ်းယွမ်း

တီႈမိူင်းရၶႅင်ႇၼႆႉ ၼႂ်းၶၢဝ်းတၢင်း 6 လိူၼ် ပီ 2026 ၼႆႉ သိုၵ်းမၢၼ်ႈဢဝ်ႁိူဝ်းမိၼ်မႃးပိုတ်းယိုဝ်းလႄႈ ၵူၼ်းမိူင်းတၢႆၵႂႃႇ 83 ၵေႃႉ မၢတ်ႇၸဵပ်း 187 ၵေႃႉ ၺႃးသိုၵ်းမၢၼ်ႈတီႉၵႂႃႇၸွမ်းသၢႆသိုၵ်း 65 ၵေႃႉယဝ်ႉၼႆ ၾၢႆႇ AA ပိုၼ်ၽၢဝ်ႇဢွၵ်ႇမႃးမိူဝ်ႈဝၼ်းတီႈ 3/7/2026 ၼႆႉၼင်ႇၼႆ။