ဝၼ်းတီႈ 3-4/8/2026 ၼႆႉ ၸုမ်းသိုၵ်းဝႃႉ (UWSA) ဢွၵ်ႇၶၢဝ်းတၢင်းၵႂႃႇႁူပ်ႉ ၵေႃႇမ တီႇ ပွင်သၢင်ႈဢုပ်ႇဢူဝ်းငူပ်ႉငီႉလွင်ႈငမ်းယဵၼ် လႄႈ ၵၢၼ်ၽွမ်ႉႁူမ်ႈၸိူဝ်ႉၸၢတ်ႈ (NSPNC) တႂ်ႈသိုၵ်းမၢၼ်ႈယိုတ်းမိူင်း တီႈႁူင်းႁႅမ်း Horizon Lake View ဝဵင်းလူင်ၼေႇပျီႇတေႃႇ။

ဝၢႆးလင်သိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်း ပီ 2021 ယဝ်ႉၼႆႉ ၸွမ်သိုၵ်းယႃႇပျေႉ ႁူဝ်ပဝ်ႈ NSPNC လႄႈ ၸုမ်းသိုၵ်းဝႃႉ (UWSA) ႁူပ်ႉထူပ်းၵၼ်ပဵၼ်ပွၵ်ႈၵမ်းသွင်။

ပွၵ်ႈၼႆႉၶပ်းၶိုင်ဝႆႉတႃႇဢုပ်ႇၵၼ်ၶၢဝ်းတၢင်းသွင်ဝၼ်း။ ၾၢႆႇၸုမ်းသိုၵ်းဝႃႉၼႆႉ လုၵ်ႈၸၢႆးႁူဝ်ပဝ်ႈ ပဝ်းယဵဝ်ႇၶျႅင် ၵႅမ်ႁူဝ်ပဝ်ႈ ၵျႅဝ်ႉၵူဝ်ႇဢၢင်း ၵေႃႉၼမ်းၼႃႈသေ ဢုပ်ႇဢူဝ်းလွင်ႈၵၢၼ် မိူင်း၊ ၵၢၼ်သိုၵ်းၵႂႃႇ ဝႃႈၼႆ။

ၽူႈၸမ်ၸႂ်ၵၼ်တင်း ၸုမ်းသိုၵ်းဝႃႉၵေႃႉၼိုင်ႈ လၢတ်ႈဝႃႈ “ ဝႃႉတႄႉ ၸွမ်းၼင်ႇမူႇပိူင်မၼ်းမီးဝႆႉၼၼ်ႉ ၵႂႃႇဢုပ်ႇႁႂ်ႈလႆႈ ႁႂ်ႈပဵၼ်မႃး ၸႄႈမိူင်းဝႃႉၵူၺ်း။ ပွၵ်ႈၼႆႉ ပႃးလုၵ်ႈၸၢႆးပဝ်းယဵဝ်ႇ ၶျႅင်မႃးဢုပ်ႇ။ တၢင်ႇၵေႃႉတႄႉ ၸၼ်ႉသိုၵ်းၶဝ် ပဵၼ်ၸၼ်ႉဢွၼ်ႇၵူၺ်း။ ငိၼ်းဝႃႈ တေႁူပ်ႉဢုပ်ႇတင်းသိုၵ်းမၢၼ်ႈတူၺ်း ၵမ်းသိုဝ်ႈထႅင်ႈ။ ပေႃးငဝ်းလၢႆးၶႅမ်ႉၵေႃႈ ၸၢင်ႈတေႁူပ်ႉဢုပ်ႇတင်း ဢူးမိၼ်းဢွင်ႇလၢႆႇ ၵမ်းသိုဝ်ႈ” ၼႆ သိုဝ်ႇၶၢဝ်ႇ BBC ႁၢႆးငၢၼ်းဝႆႉၼင်ႇၼႆ။

ၵဵဝ်ႇၵပ်းလူၺ်ႈၵၢၼ်ဢုပ်ႇဢူဝ်း သိုၵ်းဝႃႉ တင်း ၵေႃႇမတီႇၵေႃႇသၢင်ႈၵၢၼ်ငမ်းယဵၼ် တႂ်ႈဢႃႇၼႃႇၸုမ်းသိုၵ်းမၢၼ်ႈယိုတ်းမိူင်း ႁူပ်ႉဢုပ်ႇၵၼ်တီႈဝဵင်းၼေႇပျီႇတေႃႇၼၼ်ႉ ႁဝ်းၶႃႈလႆႈ ၵပ်းသိုပ်ႇတွင်ႈထၢမ်ဝႆႉတီႈ ဢူးၺီႇယၢၼ်း ၽူႈၶၢၼ်ပၢၵ်ႇၸုမ်းသိုၵ်းဝႃႉသေတႃႉ ဢမ်ႇတုမ်ႉတွပ်ႇသင်မႃးၶိုၼ်း။

မိူဝ်ႈလိူၼ်ၵျုၼ်ႊ ဝၼ်းတီႈ 18 ၼၼ်ႉၵေႃႈ ၸွမ်သိုၵ်းယႃႇပျေႉ ႁွင်ႉဢဝ်ၽူႈမီးပုၼ်ႈၽွၼ်းၼႂ်းၸုမ်းၶဝ်သေ ဢွၵ်ႇၶၢဝ်းတၢင်းၵႂႃႇ ႁူပ်ႉထူပ်းဢုပ်ႇဢူဝ်းၸွမ်း ၽူႈၼမ်းသိုၵ်းဝႃႉ တီႈဝဵင်းပၢင်သၢင်း ငဝ်ႈငုၼ်း (UWSA)။

ၾၢႆႇသိုၵ်းမၢၼ်ႈယိုတ်းမိူင်းတႄႉ ပိုၼ်ၽၢဝ်ႇဢွၵ်ႇမႃး ၼႂ်းႁွင်ႈၵၢၼ်သိုဝ်ႇၶၢဝ်ႇၶဝ် ပဵၼ်တၢင်းၵၢၼ်ဝႆႉဝႃႈ – ၵႅမ်ႁူဝ်ပဝ်ႈ ၸုမ်းသိုၵ်းဝႃႉ ၵမ်ႉထႅမ်ႁၼ်လီၸွမ်း ၶၵ်ႉၵၢၼ်ငမ်းယဵၼ် ဢၼ် လူင်ပွင်ၸိုင်ႈၼေႇပျီႇတေႃႇႁဵတ်းသၢင်ႈၼၼ်ႉယူႇသေ တေသိုပ်ႇၵမ်ႉၸွႆႈ ၵၢၼ်ၽဵဝ်ႈမူၺ်ႉ ယႃႈမဝ်းၵမ် လႄႈ ၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊ (ၵျႃႊၽျႅၼ်ႉ) ၵႂႃႇ – ၼႆယဝ်ႉ။

ၼင်ႇႁိုဝ်ၵၢၼ်မိူင်း ၵႄႈၵၢင်ၸုမ်းသိုၵ်းဝႃႉ တင်း လူင်ပွင်ၸိုင်ႈသိုၵ်း (သိုၵ်းမၢၼ်ႈယိုတ်းမိူင်း) တေမီးလွင်ႈၶိုၼ်ႈယႂ်ႇ ၶႅမ်ႉလႅပ်ႈ မႃးလိူဝ်ၵဝ်ႇၼၼ်ႉ တေလႆႈဢုပ်ႇဢူဝ်းၵၼ်ၵႂႃႇထႅင်ႈႁူဝ်ယွႆႈမၼ်း။ လွင်ႈတၢင်းၶႂ်ႈလႆႈၶႂ်ႈပဵၼ်တၢင်းလူဝ်ႇၵၢၼ်မိူင်း ဢၼ်ၸုမ်းသိုၵ်းဝႃႉ တုၵ်းယွၼ်းယူႇၼၼ်ႉၵေႃႈ လႆႈသပ်းၸႅင်ႈတုမ်ႉတွပ်ႇၵႂႃႇၶိုၼ်း ႁႂ်ႈမႅၼ်ႈၸွမ်းပိူင်ငဝ်ႈပိုင်းမိူင်း 2008 သေ ၼင်ႇၵႃႈႁဵတ်းပၼ်လႆႈၵေႃႈ တေႁဵတ်းသၢင်ႈပၼ်ၵႂႃႇယူႇ – ၼႆ ၸွမ်သိုၵ်းယႃႇပျေႉ လၢတ်ႈၼင်ႇၼႆ။

ၸွမ်းၼင်ႇၽႅၼ်ၵၢၼ်ၼႂ်းၶၢဝ်းတၢင်း 100 ဝၼ်းၶွင်လူင်ပွင်ၸိုင်ႈသိုၵ်းမၢၼ်ႈယိုတ်းမိူင်း တမ်းဝၢင်းဝႆႉဝႃႈ ၽွင်းပၢၼ်ဢူးမိၼ်းဢွင်ႇလၢႆႇ ယုၵ်ႉယွင်ႈၸဝ်ႈၵဝ်ႇၶိုၼ်ႈပဵၼ်ၸွမ်ၸိုင်ႈႁင်း ၵူၺ်းၼၼ်ႉ ၵေႃႇမတီႇဢုပ်ႇဢူဝ်း ၶၵ်ႉၵၢၼ်ငမ်းယဵၼ် လႄႈ ၽွမ်ႉႁူမ်ႈၵၢၼ်ၸိူဝ်ႉၸၢတ်ႈ (NSPNC) ၶဝ် ႁူပ်ႉထူပ်းၸွမ်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၼႂ်းမိူင်းႁူမ်ႈတုမ် ယဝ်ႉတူဝ်ႈၵႂႃႇတင်းသဵင်ႈ 13 ၸုမ်း။

လႆႈႁူႉဝႃႈ ၸုမ်းသိုၵ်းၶႄႇၵဝ်ႈၵၢင်ႉ (MNDAA) လႄႈ ၸုမ်းသိုၵ်းတႆး (SSPP/SSA) ဢၼ်ၶဝ်ႈပႃးပဵၼ်ဝႆႉ လုၵ်ႈၸုမ်းဢူၺ်းလီပွတ်းႁွင်ႇ (FPNCC) ၼၼ်ႉၵေႃႈ မီးၽႅၼ်ၵၢၼ်တေၵႂႃႇ ႁူပ်ႉဢုပ်ႇဢူဝ်းၸွမ်း ၵေႃႇမတီႇဢုပ်ႇဢူဝ်း ၶၵ်ႉၵၢၼ်ငမ်းယဵၼ် လႄႈ ၽွမ်ႉႁူမ်ႈၵၼၢ်ၸိူဝ်ႉၸၢတ်ႈ (NSPNC) တႂ်ႈသိုၵ်းမၢၼ်ႈယိုတ်းမိူင်း တီႈဝဵင်းလူင်ၼေႇပျီႇတေႃႇ ၼႂ်းလိူၼ်ဢေႃး ၵၢတ်ႉသ် ၼႆႉမိူၼ်ၵၼ် ၼႆယဝ်ႉ။