မိူဝ်ႈဝႃး ဝၼ်းတီႈ 17/6/2026 ယၢမ်းၵၢင်ၶမ်ႈ 7 မူင်းၶိုင်ႈ ႁွင်ႈၵၢၼ်သိုဝ်ႇ ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး SSPP Info ပိုၼ်ၽႄႈဢွၵ်ႇ ၶေႃႈဢုပ်ႇဢူဝ်း SSPP/SSA လႄႈ ၶေႃႈတုမ်ႉတွပ်ႇ ၵေႃႇမတီႇဢုပ်ႇဢူဝ်း လွင်ႈငမ်းယဵၼ် ၶွင်ၸုမ်းသိုၵ်းမၢၼ်ႈ (NSPNC) ဝႆႉ ႁူမ်ႈသဵၼ်ႈမီးယူႇ 13 ၶေႃႈ။

ၼႂ်းၶေႃႈဢုပ်ႇဢူဝ်းၵၼ် 13 ၶေႃႈၼၼ်ႉ ၸွမ်သိုၵ်း ၸဝ်ႈၶုၼ်သႅင် ၵႅမ်ႁူဝ်ပဝ်ႈ ၾၢႆႇ SSPP/SSA ၼမ်းၼႃႈသေ ဢုပ်ႇဢူဝ်းၵႂႃႇ 7 ၶေႃႈ၊ ၸွမ်သိုၵ်း ယႃႇပျေႉ ၾၢႆႇသိုၵ်းမၢၼ်ႈ ႁူဝ်ပဝ်ႈ (NSPNC) တုမ်ႉတွပ်ႇဢုပ်ႇဢူဝ်းဝႆႉ 6 ၶေႃႈ ။

ၼႂ်းၶေႃႈတုမ်ႉတွပ်ႇ 6 ၵေႃႇမတီႇဢုပ်ႇဢူဝ်း လွင်ႈငမ်းယဵၼ် ၾၢႆႇသိုၵ်းမၢၼ်ႈ (NSPNC) ၼၼ်ႉ ပႃးၶေႃႈတူၵ်ႇတၵ်ႉ ပၼ်ၾၢင်ႉဝႃႈ – ၼင်ႇႁိုဝ် တေပဵၼ်ၵၢၼ်ထိင်းသိမ်းဝႆႉ လွင်ႈၼိမ်တဵင်ႈ ၼႂ်းပိုၼ်ႉတီႈၼၼ်ႉ တင်းသွင်ၾၢႆႇ တေလႆႈထိင်းၵၢၼ်ၵပ်းသိုပ်ႇ ၵပ်းသၢၼ်ၸွမ်း ၸုမ်းယိပ်းၵွင်ႈၵၢင်ႇ တၢင်ႇၸုမ်း ယႃႇႁႂ်ႈလႆႈၵႂႃႇၵွင်ႉၵဵဝ်ႇၸွမ်းလႃးလႃး – ဝႃႈၼႆ။

ၼႂ်းပၢင်ႁူပ်ႉထူပ်းဢုပ်ႇဢူဝ်း လွင်ႈငမ်းယဵၼ် တႂ်ႈၽႅၼ်ၵၢၼ် 100 ဝၼ်း ၶွင်ၸုမ်းလူင်ပွင်ၸိုင်ႈသိုၵ်း တမ်းဝၢင်းဝႆႉၼၼ်ႉ မိူဝ်ႈဝၼ်းတီႈ 12/6/2026 ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး လႆႈဢုပ်ႇဢူဝ်းၵႂႃႇဝႃႈ လွင်ႈပၼ်ႁႃၵၢၼ်မိူင်းၼႆႉ ႁႂ်ႈဢဝ်ဢုပ်ႇဢူဝ်းၵႄႈလိတ်ႈၵၼ်ၵႂႃႇ လၢႆးတၢင်းၵၢၼ်မိူင်း၊ ပိူဝ်ႈတႃႇပဵၼ်မႃးလႆႈ မိူင်းႁူမ်ႈတုမ် ဢၼ်မီးပိူင်ၾႅတ်ႊတရႄႇတီႊမူဝ်ႊၶရေႇၸီႇ ႁဵတ်းငဝ်ႈႁၢၵ်ႈၼၼ်ႉၵေႃႈ ထုၵ်ႇလီၶိုင်ပွင်ႁဵတ်းသၢင်ႈၵႂႃႇ ဝႃႈၼႆ။

လိူဝ်ၼၼ်ႉ သိုပ်ႇတုၵ်းယွၼ်းၵႂႃႇထႅင်ႈဝႃႈ – ၼင်ႇႁိုဝ် ၵူၼ်းမိူင်းၸိူဝ်းယူႇၼႂ်းပိုၼ်ႉတီႈ SSPP/SSA ၵုမ်းၵမ်တင်းသဵင်ႈ တေၸႂ်ႉတိုဝ်း ၼမ်ႉမၼ်းၸၢၵ်ႈလႆႈ ၵုမ်ႇထူၼ်ႈပဵင်းပေႃးၼၼ်ႉ ၶႂ်ႈႁႂ်ႈၾၢႆႇသိုၵ်းမၢၼ်ႈ ပၼ်ၶႂၢင်ႉတေႃႉသူင်ႇ လႄႈ ၼမ်းၶဝ်ႈၵႂႃႇၼႂ်းပိုၼ်ႉတီႈ ႁႂ်ႈၶိုတ်းတၼ်းၶၢဝ်းယၢမ်း၊ ယွၼ်းႁႂ်ႈ ၽိူမ်ႉပၼ် ႁူင်းႁဵၼ်း လႄႈ မေႃသွၼ် ၼႂ်းပိုၼ်ႉတီႈၼမ်လိူဝ်ၵဝ်ႇထႅင်ႈ၊ တႃႇတိုၵ်းတေႃးၽဵဝ်ႈမူၺ်ႉ ယႃႈမဝ်းၵမ် လႄႈ ၵၢၼ်ၵႂၢတ်ႇလၢင်ႉၵျႃႊၽျႅၼ်ႉၸိူဝ်းၼႆႉၵေႃႈ ၾၢႆႇ SSPP/SSA မီးၵၢင်ၸႂ် ၶႂ်ႈႁူမ်ႈတင်း လူင်ပွင်ၸိုင်ႈသေ ႁဵတ်းသၢင်ႈၵႂႃႇယူႇ ဝႃႈၼႆ။

လႆႈႁူႉဝႃႈ ပေႃးထိုင်မႃး ႁၢင်လိူၼ်ၵျူႊလၢႆႊၸိုင် ၾၢႆႇၵေႃႇမတီႇဢုပ်ႇဢူဝ်းလွင်ႈငမ်းယဵၼ် သိုၵ်းမၢၼ်ႈ (NSPNC) လႃႈႁႅၼ်းဝႆႉ တေၸတ်းပၢင်ႁူပ်ႉထူပ်းၸွမ်း ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး (SSPP/SSA) ထႅင်ႈပွၵ်ႈၼိုင်ႈ ၼႆယဝ်ႉ။

သိုၵ်းမၢၼ်ႈယိုတ်းမိူင်းၼႆႉ ၶွတ်ႇၽွတ်ႈၵေႃႇမတီႇဢုပ်ႇဢူဝ်းလွင်ႈငမ်းယဵၼ်ၼႆသေ ဝၢႆးလင်ၸတ်းပၢင်လိူၵ်ႈတင်ႈပွမ်သေ မိၼ်းဢွင်ႇလၢႆႇ လႆႈၶိုၼ်ႈပဵၼ်ၸွမ်ၸိုင်ႈပဵၼ်တၢင်းၵၢၼ် ၶွတ်ႇၽွတ်ႈၸုမ်းလူင်ပွင်ၸိုင်ႈမႂ်ႇယဝ်ႉ ၼႂ်းၶၢဝ်းတၢင်း 100 ဝၼ်းၼႆႉ ႁွင်ႉဢဝ် ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းလူင်းလၢႆးမိုဝ်းၵိုတ်းတိုၵ်းပတ်းပိုၼ်ႉတူဝ်ႈမိူင်း NCA ဝႆႉ 7 ၸုမ်း လႄႈ ၸိူဝ်းဢမ်ႇပႆႇလူင်းလၢႆးမိုဝ်း NCA မိူၼ်ၼင်ႇ ၸုမ်းသိုၵ်းတႆးလႅင် လႄႈ ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး ၵႂႃႇႁူပ်ႉထူပ်းဢုပ်ႇဢူဝ်းၸွမ်း။

ၼႂ်းၵၢင်လိူၼ်ၵျုၼ်ႊ ၽွင်းမိၼ်းဢွင်ႇလၢႆႇ ဢွၵ်ႇၶၢဝ်းတၢင်း ၵႂႃႇမိူင်းၶႄႇ ႁူပ်ႉထူပ်းသျီႊၸျိၼ်ႉၽိင်ႊယူႇၼၼ်ႉၵေႃႈ ၸွမ်သိုၵ်း ယႃႇပျေႉ ၽႅၼ်ၵၢၼ်ဝႆႉ တေၵႂႃႇႁူပ်ႉထူပ်းဢုပ်ႇဢူဝ်း ၸွမ်း ၽူႈၼမ်းၸုမ်းသိုၵ်းမိူင်းလႃး လႄႈ ၸုမ်းသိုၵ်းဝႃႉ တီႈဝဵင်းပၢင်သၢင်း လႄႈ ဝဵင်းမိူင်းလႃးထႅင်ႈ ၼႆယဝ်ႉ။