မိတ်ႉသ်လႃႊသရူဝ်ႊ Ma. Theresa P. Lazaro ၽွင်းလူင်ၾၢႆႇၼွၵ်ႈမိူင်း မိူင်းၾိလိပ်ႉပိၼ်ႊသ် ဢၼ်ပဵၼ်တူဝ်တႅၼ်း ၸုမ်းဢႃႊသီႊယၼ်ႊ ၵဵဝ်ႇလူၺ်ႈမိူင်းမၢၼ်ႈ ႁူပ်ႉၸုမ်းယိပ်းၵွင်ႈၵၢင်ႇၸၢဝ်းၶိူဝ်းမိူင်းမၢၼ်ႈ EAOs လႄႈ တူဝ်တႅၼ်းၸုမ်းငမ်းယဵၼ်လူင်ပွင်ၸိုင်ႈသိုၵ်းမၢၼ်ႈ NSPNC တီႈဝဵင်းလူင် ၽတ်ႉထယႃႊ မိူင်းထႆး။

ဝၼ်းတီႈ 12/07/2026 မၼ်းၼၢင်းဢွၼ်ၼမ်းၸုမ်းၽွင်းလူင်ၾၢႆႇၼွၵ်ႈမိူင်း မိူင်းဢႃႊသီႊယၼ်ႊ ႁူပ်ႉထူပ်း ၽွင်းလူင်ၾၢႆႇၼွၵ်ႈမိူင်း မိူင်းမၢၼ်ႈ ဢူးတိၼ်ႇမွင်ႇသူၺ်ႇ ။

ဝၢႆးၼၼ်ႉ ၸုမ်းမိတ်ႉသ်လႃႊသရူဝ်ႊ ဢိၵ်ႇပႃးတင်းၽွင်းလူင်ၾၢႆႇၼွၵ်ႈမိူင်း မိူင်းထႆး မိတ်ႉသ်တိူဝ်ႊ သီႊႁႃႊသၵ်ႇ ႁူပ်ႉထူပ်းၵၼ်တင်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၼႂ်းမိူင်းမၢၼ်ႈ EAOs ၵမ်းၼိုင်ႈ ၊ ႁူပ်ႉထူပ်းတင်းၸုမ်းတူဝ်တႅၼ်းၸုမ်းငမ်းယဵၼ်လူင်ပွင်ၸိုင်ႈသိုၵ်း NSPNC ၵမ်းၼိုင်ႈ ၼႆ ႁွင်ႈၵၢၼ်ၽွင်းလူင်ၾၢႆႇၼွၵ်ႈမိူင်း မိူင်းၾိလိပ်ႉပိၼ်ႊသ် ပိုၼ်ၽၢဝ်ႇတီႈႁွင်ႈၵၢၼ်ၾၢႆႇပွင်ႇၶၢဝ်ႇၶဝ်ၼင်ႇၼႆ။

ၽွင်းမိူဝ်ႈလႆႈဢုပ်ႇၵၼ်တင်းၸုမ်းၸၢဝ်းၶိူဝ်း EAOs ၼၼ်ႉ လႆႈဢုပ်ႇပႃးဝႃႈ- တႃႇႁႂ်ႈမီးမႃးၵၢၼ်ဢုပ်ႇဢူဝ်းငူပ်ႉငိၵၼ်ၼႂ်းမိူင်းႁူမ်ႈတုမ် တႃႇႁႂ်ႈလႆႈတၢင်းၵမ်ႉၸွႆႈ ၵူၼ်းၼင်ႇၵၼ်ဢီးလူၸွႆႈထႅမ်ၵၼ် ၼၼ်ႉယူႇတီႈဢႃႊသီႊယၼ်ႊသေ တေၸၢင်ႈၸွႆႈၸိူင်ႉႁိုဝ် ၼႆၸိူဝ်းၼႆႉ – ဝႃႈၼႆသေတႃႉ ၼႂ်းၸုမ်းယိပ်းၵွင်ႈၵၢင်ႇၸၢဝ်းၶိူဝ်းၼၼ်ႉ ပဵၼ်ၸုမ်းလႂ်လၢႆလၢႆဢၼ်ဝႃႈၼၼ်ႉတႄႉဢမ်ႇတႅမ်ႈဢွၵ်ႇပိုၼ်ၽၢဝ်ႇပႃး။

ဢၼ်ဢုပ်ႇၵၼ်တင်းၸုမ်း ၶွမ်ႊမၼီႊဢုပ်ႇဢူဝ်းငူပ်ႉငိလွင်ႈၽေႃႇၼမ်ႉၼႄတူဝ် ၵၢၼ်ငမ်းယဵၼ်လႄႈလွင်ႈၽွမ်ႉႁူမ်ႈၸိူဝ်ႉၸၢတ်ႈ NSPNC ၼၼ်ႉၵေႃႈလႆႈဢုပ်ႇၵႂႃႇဝႃႈ ယူႇတီႈဢႃႊသီႊယၼ်ႊ တူဝ်ႈတၼ်းတႃႇၸွႆႈထႅမ် – ႁႂ်ႈပဵၼ် (Myanmar-owned and -led)တူဝ်မိူင်းမၢၼ်ႈၵေႃႉဢွၼ်ၼမ်းၸတ်းပၢင်ဢုပ်ႇဢူဝ်းလႅၵ်ႈလၢႆႈတၢင်းႁၼ်ထိုင်ၵၼ်ၼႂ်းၵၢၼ်ၽေႃႇၼမ်ႉၼႄတူဝ်ၶၵ်ႉၵၢၼ်ငမ်းယဵၼ်ၼႂ်းမိူင်း – ၸဵမ်ၸိူဝ်းၼႆႉ ဝႃႈၼႆ။

တီႈပၢင်ၵုမ်ၽွင်းလူင်ၾၢႆႇၼွၵ်ႈမိူင်း ၸိုင်ႈမိူင်းဢႃႊသီႊယၼ်ႊ ဢၼ်ႁဵတ်းၵႂႃႇလူၺ်ႈဢမ်ႇပဵၼ်တၢင်းၵၢၼ် တီႈဝဵင်းလူင်ၵုင်းထဵပ်ႈၼၼ်ႉၵေႃႈ ၽွင်းလူင်ၾၢႆႇၼွၵ်ႈမိူင်း မိူင်းမၢၼ်ႈ လႆႈဢုပ်ႇဢူဝ်းလၢတ်ႈၵႂႃႇလွင်ႈငဝ်းလၢႆးမိူင်းမၢၼ်ႈယၢမ်းလဵဝ်သေ ၸိူဝ်းပဵၼ်ၽွင်းလူင်ၾၢႆႇၼွၵ်ႈမိူင်း မိူင်းဢႃႊသီႊယၼ်ႊၶဝ်ၵေႃႈလႆႈလႅၵ်ႈလၢႆႈတူဝ်ထူပ်းလႄႈတၢင်းၶႆႈၸႂ် လွင်ႈတႃႇၵိုတ်းၵၢၼ်ၵေႃႇၵၢၼ်ႁၢႆႉၼႂ်းမိူင်းမၢၼ်ႈ၊ တႃႇၵမ်ႉၸွႆႈၵၼ်ၼႂ်းၶၵ်ႉၵၢၼ်တႃႇပဵၼ်မႃးပၢင်ဢုပ်ႇဢူဝ်းငူပ်ႉငိၵၼ်၊ တႃႇပၼ်တၢင်းၸွႆႈထႅမ်လွင်ႈၵူၼ်းတေႃႇၵူၼ်းတူၺ်းလူၵၼ်၊ တႃႇၵႄႈလိတ်ႈပၼ်ႁႃလွင်ႈလၵ်ႉၶၢမ်ႈလႅၼ်လိၼ်သေပၢႆႈၶဝ်ႈမိူင်းႁိမ်းႁွမ်း ဢိၵ်ႇတႃႇၵႄႈလိတ်ႈပၼ်ႁႃၸုမ်းၵေႃႇၵၢၼ်ၽိတ်းမၢႆမီႈၸိုင်ႈမိူင်းၸိူဝ်းၼႆႉၵႂႃႇ – ဝႃႈၼႆ။

တီႈၼႂ်းၽိုၼ်ၶၢဝ်ႇ မျၢၼ်ႇမႃႉဢလိၼ်းၶွင်ၸုမ်းသိုၵ်းမၢၼ်ႈၵေႃႈတႅမ်ႈဢွၵ်ႇပိုၼ်ၽၢဝ်ႇလွင်ႈ ၽွင်းလူင်ၾၢႆႇၼွၵ်ႈမိူင်း ၶွင်ၸုမ်းသိုၵ်းမၢၼ်ႈ ႁူပ်ႉဢုပ်ႇၵၼ်တင်းၸုမ်းၽွင်းလူင်ၾၢႆႇၼွၵ်ႈမိူင်း မိူင်းဢႃႊသီႊယၼ်ႊ ၼၼ်ႉၵူၺ်း။ ဢမ်ႇတႅမ်ႈဢွၵ်ႇပႃးလွင်ႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ႁူပ်ႉၵၼ်တင်းၸုမ်းၽွင်းလူင်ၾၢႆႇၼွၵ်ႈမိူင်း မိူင်းဢႃႊသီႊယၼ်ႊ ၼၼ်ႉပႃး။