လိူၼ်ၵျူႊလၢႆႊ ဝၼ်းတီႈ 20 ထိုင် 21 ဝၼ်းၼႆႉ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၸိူဝ်းလူင်းလၢႆးမိုဝ်း NCA ဝႆႉ 7 ၸုမ်း တင်း ၵေႃႇမတီႇဢုပ်ႇဢူဝ်းငူပ်ႉငီႉ ၽေႃႇၼမ်ႉၼႄတူဝ် လွင်ႈငမ်းယဵၼ် လႄႈ ၵၢၼ်ၽွမ်ႉႁူမ်ႈၸိူဝ်ႉၸၢတ်ႈ (NSPNC)ၶွင်ၸုမ်းသိုၵ်းမၢၼ်ႈၼၼ်ႉ ႁူပ်ႉထူပ်းၵၼ် တီႈႁူင်းႁႅမ်း M Gallery ၼႂ်းဝဵင်းလူင်ၼေႇပျီႇတေႃႇ ။

တီႈပၢင်ႁူပ်ႉထူပ်းၼၼ်ႉ ၸဝ်ႈသိုၵ်းလူင်ၸၢႆးငိုၼ်း RCSS/SSA ၽူႈၼမ်းၼႂ်းမၢႆ 1 ၸုမ်းသိုၵ်းၸၢဝ်းၶိူဝ်း 7 ၸုမ်း ၼမ်းဢဝ် တူဝ်တႅၼ်းၸုမ်း 8 ၵေႃႉ ၸိူဝ်းပဵၼ်ၽူႈၼမ်းၼႂ်းၸုမ်းသိုၵ်းယၢင်းၽိူၵ်ႇ KNU/KNLA ၊ ပႃႇတီႇမိူင်းမွၼ်းမႂ်ႇ (NMSP) ၊ ၸုမ်းၽွမ်ႉႁူမ်ႈတီႊမူဝ်ႊၶရႅၵ်ႉတိၵ်ႉလႃးႁူႇ (LDU)၊ တပ်ႉသိုၵ်းယၢင်းၽိူၵ်ႇ (DKBA)၊ ပႃႇတီႇလွတ်ႈလႅဝ်းသဝ်းၶေႃရၶႅင်ႇ (ALP) ၸိူဝ်းၼႆႉသေ ၵႂႃႇဢုပ်ႇဢူဝ်း ။

ၾၢႆႇတူဝ်တႅၼ်း သိုၵ်းမၢၼ်ႈသမ်ႉ ပဵၼ်ၸွမ်သိုၵ်း ယႃႇပျေႉ ႁူဝ်ပဝ်ႈ NSPNC ၵေႃႉၼမ်းဢဝ် ၽူႈၶဝ်ႈၸုမ်းသေ ဢုပ်ႇဢူဝ်းထတ်းသၢင်ၵၢၼ်ငၢၼ်းၸိူဝ်းပူၼ်ႉမႃး – ဝႃႈၼႆ။

ပၢင်ဢုပ်ႇဢူဝ်းၼႆႉ ထတ်းသၢင်ၶိုၼ်း ပၢင်ႁူပ်ႉထူပ်းဢုပ်ႇဢူဝ်းၵၼ် မိူဝ်ႈလိူၼ်ၵျုၼ်ႊ ဝၼ်းတီႈ 9-10 ပူၼ်ႉမႃးၼၼ်ႉသေ မူၼ်ႉမႄးၶိုၼ်းၶေႃႈဢၼ်ၵိုင်ႇငၢမ်ႇၵၼ်တင်းသွင်ပႃႈသွင်ၾၢႆႇယဝ်ႉ ႁၢင်ႈႁႅၼ်းၸတ်းၽႅၼ်တႃႇၶၵ်ႉၵၢၼ်ငမ်းယဵၼ်ၶၢဝ်းတၢင်းမိူဝ်းၼႃႈ – ၼႆ ၽူႈၼမ်းၾၢႆႇၸုမ်းသိုၵ်းၸၢဝ်းၶိူဝ်း 7 ၸုမ်း လၢတ်ႈ။

ၾၢႆႇလူင်ပွင်ၸိုင်ႈသိုၵ်းမၢၼ်ႈၵေႃႈ ႁၢႆးငၢၼ်းပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉဝႃႈ – ပၢင်ဢုပ်ႇဢူဝ်း ဝၼ်းဢွၼ်တၢင်းသုတ်းၼၼ်ႉ လႆႈၶိုၼ်းသပ်းလႅင်းၼႄၵၼ် လွၼ်ႉၵႅၼ်ၶၵ်ႉၵၢၼ်ငမ်းယဵၼ်ၵၼ်ၵႂႃႇသေ ၶၢဝ်းတၢင်းသွင်ဝၼ်းၼႆႉ လႆႈဝႃႈပၢင်ၵုမ် ၶႅမ်ႉလႅပ်ႈတႅတ်ႈတေႃး လႆႈၸတ်းၽႅၼ်ဝႆႉ ၶၵ်ႉၵၢၼ်ငမ်းယဵၼ် တႃႇမိူဝ်းၼႃႈ ပႃးထႅင်ႈ- ၼႆယဝ်ႉ။

လႆႈႁူႉဝႃႈ တင်းသွင်ၾၢႆႇဢုပ်ႇဢူဝ်းငူပ်ႉငီႉၵၼ်ၵႂႃႇ လွင်ႈတေၸတ်းပၢင်ဢုပ်ႇဢူဝ်းၵႄႈလိတ်ႈပၼ်ႁႃၵၢၼ်မိူင်း ဢၼ်ပႃး ၵူႈမူႇၵူႈၸုမ်း ၸိူဝ်းၵဵဝ်ႇၶွင်ႈ၊ တႃႇၸတ်းပွင်ဢဝ် ၸုမ်းတူဝ်တႅၼ်းငူပ်ႉငီႉၶဝ် မႃးႁူပ်ႉၵၼ် လႄႈ ႁဵတ်းသၢင်ႈၽေႃႇၼမ်ႉ ၼႄတူဝ်ၵႂႃႇ လွင်ႈႁုၼ်ႈမုၼ်းၶိုၼ်ႈယႂ်ႇ ၸွမ်းၼင်ႇၽႅၼ်ၵၢၼ် EAO တမ်းဝၢင်းဝႆႉ၊ တႃႇႁွင်ႉဢဝ်ၵူၼ်းမိူင်း ၸိူဝ်းယူႇ ၼႂ်းပိုၼ်ႉတီႈသေ ၸတ်းပၢင်ဢုပ်ႇဢူဝ်း ၵၢၼ်မိူင်းၵႂႃႇ ၼႂ်းၸႄႈတိူင်း လႄႈ ၸႄႈမိူင်းၽႂ်မၼ်း ၸဵမ်ၸိူဝ်းၼႆႉ – ဝႃႈၼႆ။

ၸဝ်ႈသိုၵ်းလူင်ၸၢႆးငိုၼ်း RCSS/SSA ၽူႈၼမ်းၼႂ်းမၢႆ 1 ၸုမ်းသိုၵ်းၸၢဝ်းၶိူဝ်း 7 ၸုမ်းၵေႃႈ လၢတ်ႈၵႂႃႇၼႂ်းဝၼ်းပၢင်ၵုမ် ၼၼ်ႉဝႃႈ “ၼင်ႇႁိုဝ် ၸိူဝ်းထုၵ်ႇလီၶဝ်ႈႁူမ်ႈပႃးမႃးၸွမ်း ၼႂ်းၶၵ်ႉၵၢၼ်ငမ်းယဵၼ်သေ ၵေႃႇသၢင်ႈလွင်ႈယုမ်ႇၸႂ်ၼိူဝ်ၵၼ် လႆႈၶဝ်ႈမႃးပႃးၸွမ်းၼၼ်ႉ တင်းသွင်ၾၢႆႇလႆႈဝႆႉၼၵ်းပၵ်းၸႂ်သေ ဢုပ်ႇဢူဝ်းၵၼ်ၵႂႃႇ ၼႂ်းၶၢဝ်းတၢင်းသွင်ဝၼ်း။ ၾၢႆႇၼိုင်ႈၵေႃႈ ၼင်ႇႁိုဝ် သဵၼ်ႈတၢင်းၶၵ်ႉၵၢၼ်ငမ်းယဵၼ် ဢၼ်ၸုမ်းသိုၵ်းၸၢဝ်းၶိူဝ်း ၸုမ်းလႂ်ၸုမ်းၼၼ်ႉ ဝၢင်းၽႅၼ်ဝႆႉ လႄႈ ဢၼ် ၸုမ်းသိုၵ်းၸၢဝ်းၶိူဝ်း 7 ၸုမ်းဝၢင်းၽႅၼ်ဝႆႉၼၼ်ႉ တေၵိုင်ႇငမ်ႇၶဝ်ႈႁႃၵၼ်မႃးလႆႈၼၼ်ႉၵေႃႈ ၶတ်းၸႂ်ဢုပ်ႇဢူဝ်းငူပ်ႉငီႉၵၼ်ဝႆႉယူႇ” ဝႃႈၼႆ။

တႄႇလိူၼ်ၵျုၼ်ႊ ထိုင် လိူၼ်ၵျူႊလၢႆႊ ၼႂ်းၶၢဝ်းတၢင်း 2 လိူၼ်မႃးၼႆႉ ၵေႃႇမတီႇၶၵ်ႉၵၢၼ်ငမ်းယဵၼ် NSPNC တႂ်ႈဢႃႇၼႃႇလူင်ပွင်ၸိုင်ႈသိုၵ်းမၢၼ်ႈ တင်း ၸုမ်းသိုၵ်းၸၢဝ်းၶိူဝ်း 7 ၸုမ်းၸိူဝ်းလူင်းလၢႆးမိုဝ်း NCA ဝႆႉၼၼ်ႉ ႁူပ်ႉၵၼ်ပဵၼ်ၸုမ်းယႂ်ႇၸုမ်းလူင်ၵူၺ်းဢမ်ႇၵႃး ယင်းလႆႈၸႅၵ်ႇၸုမ်းၽႂ်မၼ်းသေ ႁူပ်ႉဢုပ်ႇၸွမ်း လူင်ပွင်ၸိုင်ႈသိုၵ်းမၢၼ်ႈၵႂႃႇထႅင်ႈ။

ၼွၵ်ႈလိူဝ်ၼၼ်ႉ တၢင်းၸုမ်းသိုၵ်းၸၢဝ်းၶိူဝ်း ဢၼ်ဢမ်ႇၸႂ်ႈလုၵ်ႈၸုမ်းၼႂ်း 7 EAO Alliance ၼႆႉၵေႃႈ လႆႈႁူပ်ႉပႃး လႄႈ လႆႈဝႃႈ ၶၵ်ႉၵၢၼ်ငမ်းယဵၼ်ၼႆႉ မီးလွင်ႈၶိုပ်ႈၼႃႈမႃးလိူဝ်ၵဝ်ႇယူႇ – ၼႆ ၸဝ်ႈသိုၵ်းလူင်ၸၢႆးငိုၼ်း လၢတ်ႈလူပ်းလိုၼ်း ၼင်ႇၼႆ။

ဝၢႆးလင်မိၼ်းဢွင်ႇလၢႆႇ ၸွမ်ၸိၵ်းသိုၵ်းမၢၼ်ႈယိုတ်းမိူင်း ယုၵ်ႉတူဝ်ၵဝ်ႇၶိုၼ်ႈပဵၼ်ၸွမ်ၸိုင်ႈ ပဵၼ်တၢင်းၵၢၼ်သေ ၸတ်းပွင်ၽႅၼ်ၵၢၼ် ၶၢဝ်းတၢင်း 100 ဝၼ်း ဢၼ်လူင်ပွင်ၸိုင်ႈမႂ်ႇ တေလႆႈႁဵတ်းသၢင်ႈၵႂႃႇၼၼ်ႉယဝ်ႉ ၵေႃႇမတီႇၶၵ်ႉၵၢၼ်ငမ်းယဵၼ် NSPNC ၵေႃႈ တူင်ႉၼိုင်ၵၢၼ်သေ ႁွင်ႉဢဝ် ၸုမ်းသိုၵ်းၸၢဝ်းၶိူဝ်း 7 ၸုမ်း ၸိူဝ်းလူင်းလၢႆးမိုဝ်း NCA ဝႆႉၵႂႃႇဢုပ်ႇဢူဝ်းၸွမ်း ၵူၺ်းဢမ်ႇၵႃး မိူၼ်ၼင်ႇ ၸုမ်းသိုၵ်းတႆး SSPP/SSA၊ ၸုမ်းသိုၵ်းတႆးလႅင် (SNA)၊ ၸုမ်းသိုၵ်းဝႃႉ (UWSP/UWSA)၊ ၸုမ်းသိုၵ်းမိူင်းလႃး (NDAA) လႄႈ ၸုမ်းသိုၵ်းလွႆ (တဢၢင်း) TNLA ၵေႃႈ ႁွင်ႉၵႂႃႇဢုပ်ႇဢူဝ်းသေ လူင်းလၢႆးမိုဝ်း တူၵ်းလူင်းၵၼ်ဝႆႉ ၵမ်ႈၽွင်ႈ ၼႆယဝ်ႉ။