ၽူႈၼမ်းပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး SSPP/SSA ၵႂႃႇႁူပ်ႉထူပ်းဢုပ်ႇဢူဝ်းၸွမ်း ၵေႃႇမတီႇ ႁဵတ်းသၢင်ႈၽေႃႇၼမ်ႉၼႄတူဝ် ၶၵ်ႉၵၢၼ်ငမ်းယဵၼ် လႄႈ ၵၢၼ်ၽွမ်ႉႁူမ်ႈ ၸိူဝ်ႉၸၢတ်ႈ (NSPNC) တီႈႁူင်းႁႅမ်း သူၺ်ႇသၢၼ်ႇဢဵင်ႇ ပျီႇတေႃႇ။

ပၢင်ႁူပ်ႉထူပ်းပွၵ်ႈၼႆႉ ၸတ်းႁဵတ်းၵႂႃႇ မိူဝ်ႈဝၼ်းတီႈ 7 လိူၼ်ဢေႃးၵၢတ်ႉသ် ယၢမ်းၵၢင်ၼႂ် ၾၢႆႇပႃႇတီႇမႂ်ႇသုင်ၸိုင်ႈတႆး ပဵၼ်ၵႅမ်ႁူဝ်ပဝ်ႈ 3 ၸဝ်ႈသိူဝ်ပိူင်ၾႃႉ၊ ၽူႈၼမ်းၼႂ်း 3 ၸဝ်ႈပႃႉထုၼ်း၊ ၽူႈၶဝ်ႈၵေႃႇမတီႇငဝ်ႈငုၼ်း ၸဝ်ႈၽူဝ်းလူႇ လႄႈ ၸဝ်ႈၸွမ်မၢဝ်း ဢိၵ်ႇပႃး ၸဝ်ႈသိူဝ်ဢွၼ်ႇမိူင်း လႆႈၵႂႃႇၶဝ်ႈႁူမ်ႈဢုပ်ႇဢူဝ်းၸွမ်းသေ ၾၢႆႇတပ်ႉသိုၵ်းမၢၼ်ႈ ပဵၼ်ၸွမ်သိုၵ်းယႃႇပျေႉ ၵေႃႉၼမ်းၼႃႈ ဢဝ်ၽူႈၶဝ်ႈၸုမ်း လႄႈ လုၵ်ႈၼွင်ႈပွင်ႈပၢႆ ဢုပ်ႇဢူဝ်းၸွမ်း ၼႆယဝ်ႉ။

တင်းသွင်ၸုမ်းႁူပ်ႉၵၼ်ပွၵ်ႈၵမ်းသွင် ဝၢႆးလင်သိုၵ်းမၢၼ်ႈယိုတ်းမိူင်းသေ ၶွတ်ႇၽွတ်ႈၸုမ်းလူင်ပွင်ၸိုင်ႈမႂ်ႇ ယဝ်ႉၼႆႉ လႆႈဢုပ်ႇဢူဝ်းၵၼ်ၵႂႃႇ လွင်ႈၼိမ်တဵင်ႈ ၼႂ်းပိုၼ်ႉတီႈ၊ လွင်ႈၵႄႈ လိတ်ႈပၼ်ႁႃၵၢၼ်မိူင်း လူၺ်ႈလၢႆးတၢင်းဢုပ်ႇဢူဝ်းၵၼ် လႄႈ တႃႇၸတ်းၵၢၼ်လွင်ႈၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊ ႁိုဝ် ၸုမ်းၵျႃႊၽျႅၼ်ႉ ဝႃႈၼႆ။

ၽူႈၼမ်းပႃႇတီႇမႂ်ႇသုင်ၸိုင်ႈတႆး ဢဝ်ၶေႃႈဢၼ်ဝႃႈ – SSPP ၼႆႉ တိုၼ်းယိပ်းတိုဝ်းဝႆႉ မူႇပိူင်သုၼ်ႇလႆႈၽွင်း ငမ်းႁင်းၶေႃ ၶတ်းၸႂ်ႁဵတ်းသၢင်ႈ ၵၢၼ်ငမ်းယဵၼ် ပိူဝ်ႈတႃႇယူႇႁူမ်ႈလူၺ်ႈ ၵၼ်ၵႂႃႇၵတ်းၵတ်းယဵၼ်ယဵၼ် ႁႂ်ႈၵိူတ်ႇပဵၼ်မႃးမိူင်းႁူမ်ႈတုမ်ၸႅတ်ႈၸၢင်ႇ၊ ၵၢၼ်ငမ်းယဵၼ်ၼႆႉ ပဵၼ်ၵၢၼ်လမ်ႇလွင်ႈ တွၼ်ႈတႃႇၵေႃႇသၢင်ႈမိူင်းႁူမ်ႈတုမ်တေႉတေႉ လႄႈ ပေႃးၼႂ်းပိုၼ်ႉတီႈၵတ်းယဵၼ်ၼိမ်တဵင်ႈၵွၼ်ႇ တေမီးလွင်ႈၶိုၼ်ႈယႂ်ႇ ၼႆယဝ်ႉ။

လိူဝ်ၼၼ်ႉ တုၵ်းယွၼ်းႁႂ်ႈ ၵႄႈလိတ်ႈပၼ်ႁႃၵၢၼ်မိူင်း၊ လွင်ႈႁုၼ်ႈမုၼ်းၶိုၼ်ႈယႂ်ႇ ၼႂ်းပိုၼ်ႉတီႈ၊ တႃႇၸတ်းပၢင်ၵုမ်ၵၢၼ်ငမ်းယဵၼ် ႁႂ်ႈပႃးၵူႈမူႇၵူႈၸုမ်းၸိူဝ်းၵဵဝ်ႇၶွင်ႈ၊ ႁႂ်ႈပွႆႇပၼ် လႅင်း ၾူၼ်ႊ ဢိၼ်ႊထိူဝ်ႊၼႅတ်ႊ MPT လႄႈ ဢုပ်ႇဢူဝ်းပႃးလွင်ႈယႃႈမဝ်းၵမ်၊ တႃႇၽဵဝ်ႈမူၺ်ႉ ၵၢၼ်တေႃႇလွင်းၼိူဝ်ဢွၼ်ႊလၢႆႊ၊ ၵၢၼ်လွၵ်ႇလႅၼ်ၵိၼ်ငိုၼ်းတၢင်းဢွၼ်ႊလၢႆႊ လႄႈ လွင်ႈပူၼ်ႉပႅၼ်ၼႃႈတီႈၵုမ်းၵမ်ၵၼ် ၸဵမ်ၸိူဝ်းၼႆႉၼႆ ၾၢႆႇႁွင်ႈၵၢၼ်သိုဝ်ႇၶၢဝ်ႇသိုၵ်းမၢၼ်ႈယိုတ်းမိူင်း ႁၢႆးငၢၼ်းဢွၵ်ႇဝႆႉၼင်ႇၼႆ။

လႆႈႁူႉဝႃႈ တၢင်းသွင်ၾၢႆႇတူၵ်းလူင်းလႆႈၸႂ်ၵၼ်သေ လူင်းလၢႆးမိုဝ်းဝႆႉ ၼိူဝ်ၶေႃႈဢုပ်ႇဢူဝ်းၵၼ်ၵႂႃႇၸွမ်းၼင်ႇ တင်းသွင်ၾၢႆႇမီးၼၼ်ႉ ၼႆယဝ်ႉ။

ၵူၼ်းၸမ်ၸႂ်ၵၼ်တင်း ၽူႈၼမ်းပႃႇတီႇမႂ်ႇသုင်ၸိုင်ႈတႆး ၸိူဝ်းၵႂႃႇၶဝ်ႈႁူမ်ႈဢုပ်ႇဢူဝ်းၸွမ်း ပၢင်ၵုမ်လွင်ႈငမ်းယဵၼ် တီႈဝဵင်းၼေႇပျီႇတေႃႇ ပွၵ်ႈၵမ်းသွင်ၼႆႉ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈတႄႉ “ယၢမ်းလဵဝ် ၵူၼ်းလူင်ႁဝ်းတိုၵ်ႉသိုပ်ႇဢွၵ်ႇတၢင်းဝႆႉလႄႈ တေပႆႇၸၢင်ႈ ၵပ်းသိုပ်ႇ ၸူးၶဝ်လႆႈ” ဝႃႈၼႆ။

ၼင်ႇႁိုဝ်တေယိုၼ်ယၼ်လႆႈ ၶေႃႈတူၵ်းလူင်း ၼႂ်းပၢင်ဢုပ်ႇဢူဝ်းတင်းသွင်ၾၢႆႇၼၼ်ႉသေ ၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇၸူး ၽူႈၶၢၼ်ပၢၵ်ႇ လႄႈ ၽူႈၼမ်းၼႂ်းပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး ၸိူဝ်းၵႂႃႇၶဝ်ႈႁူမ်ႈၸွမ်းပၢင်ၵုမ်ၼၼ်ႉၵေႃႈ ၵပ်းဢမ်ႇလႆႈ။

ဝၼ်းတီႈ 3-4/08/2026 ၼႆႉၵေႃႈ သိုၵ်းဝႃႉ ၵႂႃႇဢုပ်ႇသိုၵ်းမၢၼ်ႈတီႈၼေႇပျီႇတေႃႇမိူၼ်ၵၼ်။ ၽွင်းၼၼ်ႉၵေႃႈ သိုၵ်းဝႃႉ လႆႈတုၵ်းယွၼ်း တႃႇလႆႈၸႄႈမိူင်းဝႃႉ။ https://shannews.org/archives/78615

ၵွၼ်ႇၼႃႈ ဝႃႉတေၵႂႃႇၼေႇပျီႇတေႃႇၼၼ်ႉ တူဝ်တႅၼ်းသိုၵ်းမၢၼ်ႈ ယင်းလႆႈၵႂႃႇဢႅဝ်ႇယဵမ်ႈထိုင်ႁႃဢုပ်ႇဢူဝ်းဝႃႉ ထိုင် ပၢင်သၢင်း လူးၵွၼ်ႇ ။ https://shannews.org/archives/77797