သိုၵ်းမၢၼ်ႈမၢပ်ႇၼႄးဝႃး ပဵၼ်ႁိူၼ်းသိုၵ်းတႆး SSPP ၼႆသေ ယႃႉႁိူၼ်းၵူၼ်းဝၢၼ်ႈမိူင်းႁူၵ်း ဢိူင်ႇမိူင်းႁူၵ်း ၸႄႈဝဵင်းမိူင်းမိတ်ႈ ၸိုင်ႈတႆးပွတ်းႁွင်ႇ လူႉၵွႆၵႂႃႇ 2 လင် ။
ၼႂ်းဝၼ်းတီႈ 7/8/2026 ယၢမ်းၵၢင်ၼႂ် 9 မူင်း သိုၵ်းမၢၼ်ႈဢဝ်ဢဵၼ်ႁႅင်း 60 ၵေႃႉ မိူဝ်းသွၵ်ႈတဝ် ဢဝ်ၵႃးပႅၵ်ႊၽူဝ်ႊ မိူဝ်းၶုတ်းယႃႉႁိူၼ်းလႄႈ ႁိူၼ်းၵူၼ်းဝၢၼ်ႈမိူင်းႁူၵ်းလူႉၵွႆၵႂႃႇ 2 လင် ၼႆယဝ်ႉ ။
ၽူႈၸၢႆးၵူၼ်းသႅၼ်းပၢၼ်ႁၢတ်ႈႁၢႆး ၵေႃႉဢၼ်ႁူႉႁၼ်ၸွမ်းလွင်ႈၼႆႉ လၢတ်ႈၽူႈတွႆႇႁွၵ်ႈဝႃႈ -“ၶဝ် (သိုၵ်းမၢၼ်ႈ) ဢဝ်လိူင်ႈထၢင်ႇထိူမ်ဝႃႈ ႁိူၼ်းၵူၼ်းဝၢၼ်ႈလင်ၼိုင်ႈ ပဵၼ်ႁိူၼ်းၵူၼ်းသိုၵ်း SSPP ၼႆသေ ဢဝ်ၵႃးမႃးထုၺ်ယႃႉပႅတ်ႈဢေႃႈ ၊ ႁိူၼ်း 2 လင်ၼႆႉ ဢမ်ႇၸႂ်ႈႁိူၼ်းသိုၵ်းၶႃႈ ပဵၼ်ႁိူၼ်း ၵူၼ်းမိူင်း ၵူၺ်းဢေႃႈ ၊ ၵူၼ်းဝၢၼ်ႈၶဝ်လႆႈယွမ်းၼွမ်း ( တွင်းပၢၼ်ႇ) လႄႈ တၼ်းလႆႈယႃႉၵႂႃႇ 2 လင်ၵူၺ်းၶႃႈ ၊ ၶဝ်ဢမ်ႇထၢမ်သင်သေ ၶဝ်ဢဝ်ၵႃးမႃးယႃႉပႅတ်ႈၸိူင်ႉၼၼ်ၵမ်းလဵဝ်ယဝ်ႉ”- ဝႃႈၼႆ ။
ၸဵမ်မိူဝ်ႈသိုၵ်းတဢၢင်း TNLA ၵုမ်းၵမ်တီႈမိူင်းမိတ်ႈၼၼ်ႉ ပွတ်းတၢင်းဢိူင်ႇမိူင်းႁူၵ်းၼႆႉ သိုၵ်း SSPP တူင်ႉၼိုင်ယူႇသဝ်း ႁဵတ်းလုမ်း ၊ ႁူင်းယႃ သေ ဢဝ်ႁူမ်ႇလူမ်ႈဝႆႉ ။
ဝၢႆးသိုၵ်း တဢၢင်း TNLA ထွႆဢွၵ်ႇမိူင်းမိတ်ႈ ၽွင်းသိုၵ်းမၢၼ်ႈၶဝ်ႈၵုမ်းၶိုၼ်းၼၼ်ႉ သိုၵ်းမၢၼ်ႈ ၼႄးဝႃႈ သိုၵ်း SSPP ပူၼ်ႉပႅၼ်ၼႃႈတီႈၼႆသေ ၸႂ်ႉထွႆဢွၵ်ႇပိုၼ်ႉတီႈ – ၵူၼ်းပိုၼ်ႉတီႈလၢတ်ႈၼင်ႇၼႆ ။
လႆႈႁူႉဝႃႈ – မိူဝ်ႈဝၼ်းတီႈ 2/8/2026 ၼၼ်ႉ သိုၵ်းမၢၼ်ႈသင်ႇသိုၵ်း SSPP ထွႆဢွၵ်ႇ သဵၼ်ႈတၢင်း လူင် ။ ဝၢႆးၼၼ်ႉ ၼႂ်းဝၼ်းတီႈ 5/8/2026 ၸႂ်ႉထွႆဢွၵ်ႇ ပိုၼ်ႉတီႈဢိူင်ႇမိူင်းႁူၵ်း – ဝႃႈၼႆ ။
ၵူၼ်းပိုၼ်ႉတီႈလၢတ်ႈ ပိူင်ပဵၼ်မၼ်းဝႃႈ –“ သိုၵ်းမၢၼ်ႈ ၸႂ်ႉသိုၵ်း SSPP ထွႆ သိုၵ်း SSPP ဢမ်ႇထွႆ ၊ သိုၵ်းမၢၼ်ႈသမ်ႉထူဝ်းသိုၵ်းၶဝ်ႈ ၼႂ်းဢိူင်ႇမိူင်းႁူၵ်းဢေႃႈ။ ၵူၼ်းမိူင်းသမ်ႉတုၵ်းယွၼ်း ယႃႈႁႂ်ႈ ပဵၼ်ပၢင်တိုၵ်း ၼႆသေ ႁႂ်ႈ သိုၵ်း SSPP ငိူင်ႉပၼ်ၼႆ ၊ ဝၢႆးၼၼ်ႉသိုၵ်း SSPP လုၵ်ႉတီႈ တပ်ႉပၢင် သဝ်းႁိမ်းၶႅပ်ႇဝၢၼ်ႈမိူင်းႁူၵ်းသေ ထွႆဢွၵ်ႇပၼ်ၸူဝ်ႈၶၢဝ်း ”- ဝႃႈၼႆ ။
ဝၢႆးၼၼ်ႉ ၼႂ်းဝၼ်းတီႈ 6/8/2026 ၾၢႆႇသိုၵ်းမၢၼ်ႈဢဝ်ၵႃး ပႅၵ်ႊၾူဝ်ႊ မႃးထုၺ်ယႃႉပႅတ်ႈ တပ်ႉပၵ်းသဝ်း သိုၵ်း SSPP သေ ၊ ၼႂ်းဝၼ်းတီႈ 7/8/2026 သမ်ႉမႃး ယႃႉပႃးႁိူၼ်းၵူၼ်းမိူင်း 2 လင် ဢၼ်မီးၶႅပ်ႇဝၢၼ်ႈၼၼ်ႉၼႆယဝ်ႉ ။
ၵဵဝ်ႇၵပ်းလွင်ႈ ႁိူၼ်းၵူၼ်းမိူင်း ထုၵ်ႇယႃႉလူႉၵွႆၵႂႃႇၼႆႉ ၵူၼ်းၸၢႆးပိုၼ်ႉတီႈလၢတ်ႈၼႄ တင်းႁၼ် ထိုင် မၼ်းဝႃႈ – “ လႆႈႁၼ်ဝႃႈ သိုၵ်းမၢၼ်ႈၼႆႉ ၼႂ်းၸႂ်မၼ်းတေႉတေႉၼႆႉ မၼ်းၵေႃႈ တိုၵ်ႉမီးဝႆႉ ၸၢဝ်းၶိူဝ်းၼႆႉ ပဵၼ်ၽူႈၶဵၼ်မၼ်းယူႇဢေႃႈ ၊ ပေႃးမၼ်းဝႆႉ ၵူၼ်းမိူင်းႁဝ်းၶႃႈ ပဵၼ်လွင်ႈယႂ်ႇၼႆ မၼ်းထၢမ်ပိူၼ်ႈၵေႃႈလႆႈယူႇၶႃႈ ဝႃႈပဵၼ်ႁိူၼ်းၵူၼ်းသိုၵ်းႁႃႉ ႁိူၼ်းၵူၼ်းမိူင်း ႁႃႉၼႆ ၊ ၼႆႉမၼ်းပွင်ႇဝႃႈ မီးၶေႃႈဢၢင်ႈဢိတ်ႉၼိုင်ႈၵေႃႈ ဢမ်ႇဝႃႈပဵၼ် ၵူၼ်းသိုၵ်း ၵူၼ်းမိူင်း မၼ်းသွၼ်ႇဝႆႉ ပဵၼ်ဢၼ်လဵဝ်ၵၼ် ၊ မၼ်းတေႁႅမ်ပႅတ်ႈၵမ်းလဵဝ်ယဝ်ႉ”- ဝႃႈၼႆ ။
ၼႂ်းႁၢင်ပီ 2025 ဝၢႆးလင် သိုၵ်းတဢၢင်းပိုၼ်ၽၢဝ်ႇ ထွႆသိုၵ်းဢွၵ်ႇ ဝဵင်းမိူင်းၵုတ်ႈ၊ ဝဵင်းမိူင်းမိတ်ႈယဝ်ႉဢမ်ႇႁိုင် သိုၵ်းမၢၼ်ႈႁႅၼ်းသိုၵ်းမႃးပၵ်းတပ်ႉယူႇၶိုၼ်းၼႂ်းဝဵင်းၵူၺ်းဢမ်ႇၵႃး ၸွမ်းဝၢၼ်ႈၸိူဝ်းမီးယူႇၾၢႆႇၼွၵ်ႈဝဵင်းၼၼ်ႉၵေႃႈ ၵႂႃႇပၵ်းတပ်ႉပၢင်သဝ်းဝႆႉ သွင်သၢမ်တီႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ