လုၵ်ႈဢွၼ်ႇယိင်း ဢႃယု 6 ၶူပ်ႇ ဢၼ်ၺႃးၸူၼ်ဢဝ်ပေႇႁူသေ ၺႃးၶႃႈႁႅမ်တၢႆ ပွႆႇတူၵ်းၼမ်ႉမေႃႇတီႈဝဵင်းဢွင်ႇပၢၼ်းၼၼ်ႉ ၵၢင်ႉၵႄႇဝၢၼ်ႈဢိူင်ႇၸွမ်းၸွပ်ႇသွၵ်ႈလိုပ်ႈလမ်းတီႉၺွပ်းၵေႃႉလူင်းမိုဝ်းၶႃႈႁႅမ်- လိုၼ်းသုတ်းတီႉလႆႈ ၼၢင်းယိင်းဢွၼ်ႇဢႃယု 19 ပီ ၵူၼ်းယူႇဝၢၼ်ႈလဵဝ်ၵၼ်ၶိုၼ်းၵူၺ်း ဝႃႈၼႆ။
ဝၼ်းတီႈ 6/8/2026 ၼႆႉ လုၵ်ႈဢွၼ်ႇယိင်း ဢႃယု 6 ၶူပ်ႇ လဵၼ်ႈယူႇတၢင်းၼႃႈႁိူၼ်းၸဝ်ႈၵဝ်ႇ တီႈဝၢၼ်ႈၼွင်ယေး ဝဵင်းဢွင်ႇပၢၼ်း – ၽိူဝ်ႇပေႃႈမႄႈၶုၵ်းၸႂ်လႆႈသေႁွင်ႉႁႃၵေႃႈဢမ်ႇႁၼ်ယဝ်ႉ။ ပေႃႈမႄႈ တင်း ၵူၼ်းဝၢၼ်ႈလႄႇၸွမ်းႁႃၼႂ်းဝၢၼ်ႈဢမ်ႇႁၼ် ။ ထိုင်မႃး ယၢမ်းၵၢင်ၶိုၼ်းမွၵ်ႈ 10 မူင်း ၸင်ႇထူပ်း ႁၼ် ၶၢပ်ႈတူဝ်တၢႆ ၼႂ်းၼမ်ႉမေႃႇ ဢၼ်မီးၾၢႆႇၸၢၼ်းၵျွင်းမုၼ်ၸဝ်ႈၼိူဝ်လွႆ ၼႂ်းဝၢၼ်ႈၼွင်ယေး ၊ ယၢၼ်ၵၼ်တင်းႁိူၼ်းလုၵ်ႈဢွၼ်ႇၼၼ်ႉမွၵ်ႈ လၵ်းပၢႆ ဝႃႈၼႆ ။
ဝၢႆးၼၼ်ႉ ၵၢင်ႉၵႄႇလႄႈပလိၵ်ႈ ၸွမ်းသွၵ်ႈႁႃၵူၼ်းဢၼ်လီထၢင်ႇထိူမ်ဝႃႈ ပဵၼ်ၵေႃႉၸူၼ်ၶမ်းလႄႈ ၶႃႈႁႅမ်လုၵ်ႈဢွၼ်ႇတၢႆ – ထိုင်မႃးဝၼ်းတီႈ 8 /8/2026 ၽူႈမီးပုၼ်ႈၽွၼ်းၼႂ်းပိုၼ်ႉတီႈ ၵူတ်ႇထတ်း တီႉၺွပ်းလႆႈ လုၵ်ႈဢွၼ်ႇယိင်းၵေႃႉၼိုင်ႈ ဢႃယု 19 ပီ ၸိုဝ်ႈ မူဝ်းမူဝ်းထူၺ်း ( ႁိုဝ် )မူဝ်းသႅတ်ႉ ။ မၼ်းၼၢင်းယွမ်းႁပ်ႉတီႈၽူႈမီးပုၼ်ႈၽွၼ်းလႄႈၵၢင်ႉၵႄႇဝၢၼ်ႈဝႃႈ မၼ်းၼၢင်းလႆႈဢဝ်ပေႇႁူ တီႈလုၵ်ႈဢွၼ်ႇသေ ဢီးလုၵ်ႈဢွၼ်ႇတူၵ်းၼမ်ႉမေႃႇ ၼႆယဝ်ႉ ။
ၸၢႆးၼုမ်ႇ ၵူၼ်းဝဵင်းဢွင်ႇပၢၼ်းလၢတ်ႈၽူႈတွႆႇႁွၵ်ႈဝႃႈ -“ မၼ်းၼၢင်းလၢတ်ႈတီႈၵူၼ်းလူင်ဝၢၼ်ႈဝႃႈ “လႆႈႁူၺ်းႁွင်ႉလုၵ်ႈဢွၼ်ႇဝႃႈ ပေႇႁူၼွင်ႉႁၢင်ႈလီၼႃႇ ၊ မႃးၵႂႃႇၸွမ်းပီႈ ၼႆႉသေ ႁွင်ႉၵႂႃႇတီႈမီးၼမ်ႉမေႃႇ ၊ ထွတ်ႇဢဝ်ပေႇႁူတီႈလုၵ်ႈဢွၼ်ႇယဝ်ႉၵေႃႈ ဢီးလုၵ်ႈဢွၼ်ႇ တူၵ်းၼမ်ႉမေႃႇသေ ပွၵ်ႈၶိုၼ်းႁိူၼ်းၼႆ။ လႆႈႁူႉဝႃႈ မၼ်းၵေႃႈ လဵၼ်ႈၵဵမ်းဢွၼ်ႊလၢႆႊၼႆဝႃႇ”- ဝႃႈၼႆ ။
ယၢမ်းလဵဝ် ၼၢင်းမူဝ်းသႅတ်ႉ ၵေႃႉဢၼ်ပူၼ်ႉပႅၼ်ၶႃႈႁႅမ်လုၵ်ႈဢွၼ်ႇၼၼ်ႉ ထုၵ်ႇၵုမ်းၶင်တူဝ်ဝႆႉ တီႈႁူင်းပလိၵ်ႈ ဝဵင်းဢွင်ႇပၢၼ်း။ ၺႃးပလိၵ်ႈၵုမ်းၶင်တူဝ်ဝႆႉသေ ထုၵ်ႇဢဝ်လိူင်ႈလူၺ်ႈ ပၵ်းပိူင် မၢႆမီႈမတ်ႉတႃ 302/394 “တင်ႈၸႂ်ၸူၼ်ႁိမ်ၶူဝ်းၶွင်ပိူၼ်ႈလႄႈ တင်ႈၸႂ်ၶႃႈႁႅမ်ၵူၼ်းတၢႆ” ဝႆႉ- ဝႃႈၼႆ ။
ယၢမ်းလဵဝ် ၼႂ်းၸိုင်ႈတႆးပွတ်းၸၢၼ်း ၼႆႉ ၽူႈလၵ်ႉၸၵ်ႉၶုတ်ႈလိူင်ႇၼမ် လိူင်ႈၵၼ်ႉၸၼ်ၶႃႈႁႅမ်ၵၼ် လႄႈ လုၵ်ႈဢွၼ်ႇယိင်းၵႆႉၺႃးၶၢႆၵိၼ်ၵေႃႈမီးၼမ်မႃးၵူႈမိုဝ်ႉၵူႈဝၼ်းလႄႈ ယူႇတီႈပေႃႈမႄႈ ပီႈၼွင်ႉႁႂ်ႈၾၢင်ႉတူၺ်းလုၵ်ႈလၢင်းၸဝ်ႈၵဝ်ႇ လီလီ – ပေႃႈမႄႈလုၵ်ႈဢွၼ်ႇၵေႃႉၼိုင်ႈၵူၼ်းမိူင်းဝဵင်းတူၼ်ႈတီးလၢတ်ႈၼင်ႇၼႆ ။
ပေႃႈမႄႈလုၵ်ႈဢွၼ်ႇဝဵင်းဢွင်ႇပၢၼ်းလၢတ်ႈၽူႈတွႆႇႁွၵ်ႈဝႃႈ -“ ၵူၼ်းမိူဝ်ႈၵူႈပွၵ်ႈလၢတ်ႈဝႆႉၼၼ်ႉ မႅၼ်ႈၼႃႇ လုၵ်ႈဢွၼ်ႇၼႆႉ ဢမ်ႇၵိုင်ႇလီ တိုဝ်းပၼ်ၶမ်းၼႆႉ ၊ ငဝ်းလၢႆးဝၢၼ်ႈမိူင်းဢမ်ႇလီၸိူင်ႉၼႆ ၶႅၼ်းဢမ်ႇလီတိုဝ်း ပၼ်လုၵ်ႈလၢင်းၸဝ်ႈၵဝ်ႇယဝ်ႉၶႃႈ ၊ မိူဝ်ႈလဵဝ် ၵူၼ်းၸပ်းၵဵမ်းဢွၼ်ႊလၢႆႊလႄႈ ၵူၼ်းၸပ်းယိၼ်ႉယႃႈၵေႃႈ လိူင်ႇၼမ်လႄႈ လီၵူဝ်ၼႃႇ“- ဝႃႈၼႆ ။
တီႈဝဵင်းဢွင်ႇပၢၼ်းၼႆႉ ယၢမ်းလဵဝ် မီးၵူၼ်းပႅၵ်ႇၼႃႈၼမ် ၊ ၵူၼ်းပၢႆႈၽေးသိုၵ်းၵေႃႈမႃးယူႇၼမ် ၊ ၵူၼ်းတၢင်းမိူင်းမၢၼ်ႈတူင်ႈပဵင်းၶိုၼ်ႈမႃးယူႇယိင်ႈၶႅၼ်းၼမ် ၵၢၼ်ႁႃၵိၼ်လဵင်ႉတွင်ႉယၢပ်ႇလႄႈ ၼႂ်းၶၢဝ်းတၢင်းလိူၼ်လဵဝ်ၵူၺ်း လိူင်ႈဢမူႉလဵၵ်ႉယႂ်ႇ ၼႂ်းပိုၼ်ႉတီႈၼႆႉ ၵိူတ်ႇၶိုၼ်ႈ 15 လိူင်ႈ တေဢႄႇသုတ်းၼႆႉၵူၼ်းၸွႆႈထႅမ်ၼႂ်းပိုၼ်ႉတီႈလၢတ်ႈၼင်ႇၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ