ဝၼ်းတီႈ 23/4/2024 ယၢမ်းႁူဝ်ၶမ်ႈ 4 မူင်းပၢႆ ၵူၼ်းမိူင်းထူပ်းႁၼ် ၶၢပ်ႈတူဝ်တၢႆ ၼၢင်းယိင်း ၵေႃႉၼိုင်ႈ ၼႂ်းထိူၼ်ႇ ၾၢႆႇဢွၵ်ႇဝၢၼ်ႈၵၼီႇ ၸႄႈဝဵင်းဢွင်ႇပၢၼ်း ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း။
ယၢမ်းလဵဝ် ပလိၵ်ႈတိုၵ့်ၸွပ်ႇထၢမ်ႁႃ ပီႈၼွင့်မၼ်းၼၢင်းယူႇ ၶၢပ်ႈတူဝ်ၼၼ်ႉ တၢႆႁိုင်မႃး မွၵ်ႈလိူၼ်ယဝ့်လႄႈ ၸွင်ႇမီးႁွႆးမၢတ်ႇၸဵပ်းႁိုဝ်၊ ၺႃးၶႃႈတၢႆႁိုဝ်ဢၼ်ဝႃႈၼၼ့်တႄ့ ဢမ်ႇယိုၼ်ယၼ်လႆႈ။ ႁူႉ ဝႃႈပဵၼ်ၼၢင်းယိင်းၵူၺ်း။ ယွၼ့်ပိူဝ်ႈ တူဝ်တၢႆတူႇၼဝ်ႈဝႆ့ယဝ့်ၼႆ – ၵူၼ်းပိုၼ့်တီႈဢွင်ႇပၢၼ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈၼင်ႇၼႆ။
ဢွင်ႈတီႈ ထူပ်းႁၼ်ၶၢပ်ႈတူဝ်ၼၢင်းယိင်းၼႆ့ တီႈၾၢႆႇဢွၵ်ႇဝၢၼ်ႈၵၼီႇ ယၢၼ်ဝဵင်းဢွင်ႇပၢၼ်းမွၵ်ႈ 7 လၵ်း။ ယူႇတီႈ ၵူၼ်းပိုၼ်ႉတီႈပွင်ႇၶၢဝ်ႇၸူး ၸုမ်းပရႁိတၼႂ်းပိုၼ်ႉတီႈသေ လႆႈၵႂႃႇတေႃႉတူဝ်ၽဝ်ပၼ်ၵႂႃႇ တီႈပႃႇႁဵဝ်ႈ ၼႆယဝ့်။
မိူၼ်ၼႆၼင်ႇၵဝ်ႇ ၼႂ်းဝၼ်းတီႈ 24 ယၢမ်းၵၢင်ၼႂ် မွၵ်ႈ 10 မူင်းၶိုင်ႈၼႆ့ ထူပ်းႁၼ်ၶၢပ်ႈတူဝ်တၢႆ ၵူၼ်းၸၢႆးၵေႃႉၼိုင်ႈထႅင်ႈ ၼႂ်းၵႄႈဝၢၼ်ႈၵၼီႇလႄႈ ၺွင်ႇၵူင်း ဝဵင်းဢွင်ႇပၢၼ်း၊ ၶၢပ်ႈတူဝ်ၵူၼ်းၸၢႆးၼၼ့် တူႇၼဝ်ႈဝႆ့ယဝ့်လႄႈ ဢမ်ႇႁူႉဝႃႈပဵၼ်ၽႂ် ယူႇတီႈလႂ်၊ ယူႇတီႈ ပလိၵ်ႈၽူႈမီးပုၼ်ႈၽွၼ်းၶဝ် တိုၵ့်ၸွပ်ႇႁႃပီႈၼွင့်ၵူၼ်းႁိူၼ်းမၼ်းယူႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ