တႄႇႁၢင်လိူၼ်ၵျူႊလၢႆႊ မႃးၼႆႉ သိုၵ်းမၢၼ်ႈထႅမ်ႁႅင်းသိုၵ်း ၶဝ်ႈၼႂ်းထုင်ႉဝဵင်းဝၢၼ်ႈငႂ်ႈ (ယႂႃႇငၢၼ်ႇ)  ၸိုင်ႈတႆးပွတ်းၸၢၼ်း တီႉၵူၼ်းဝၢၼ်ႈၵႂႃႇၸွမ်းသၢႆသိုၵ်းၶဝ် ႁဵတ်းႁူဝ်ႉႁႄႉတၢႆတၢင်ၶဝ် ၼႂ်းပၢင်တိုၵ်းၵၼ်တင်း    တပ်ႉသိုၵ်းပူတ်းပွႆႇ ၵူၼ်းမိူင်း ထၼူႉ DPLA ။

မိူဝ်ႈဝႃး ဝၼ်းတီႈ 4/8/2026  သိုၵ်းမၢၼ်ႈထႅမ်ႁႅင်းသိုၵ်းၶဝ်ႈဝၢၼ်ႈ မျႃႉၸေႇတီႇ ဢၼ်မီးၾၢႆႇႁွင်ႇ  ဝဵင်းယႂႃႇငၢၼ်ႇသေ ၵူတ်ႇထတ်းထဵတ်ႈထၢမ်ၵူၼ်းဝၢၼ်ႈတႂ်ႈတႂ်ႈၼိူဝ်ၼိူဝ်၊ ၵူတ်ႇထတ်းပႃး မိုဝ်းထိုဝ်ၾူၼ်ႊၵူၼ်းဝၢၼ်ႈ၊ ၼႄးဝႃႈၵူၼ်းဝၢၼ်ႈ ၵဵဝ်ႇၵွင်ႉၵၼ်တင်း  ၸုမ်းသိုၵ်းၵႅတ်ႇၶႄ ၵူၼ်းမိူင်းထၼူႉ PDF ၼႆသေ တီႉၺွပ်းၵူၼ်းဝၢၼ်ႈၵႂႃႇ 7 ၵေႃႉ၊ ယိုတ်းဢဝ်ပႃး မိုဝ်းထိုဝ်လႄႈ ငိုၼ်းတွင်း လႄႈၶူဝ်းၶွင်ဢၼ်မီးၵႃႈၶၼ်ၶွင်ၵူၼ်းဝၢၼ်ႈၵႂႃႇပႃး ဝႃႈၼႆ။

ၼၢင်းယိင်းၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ဢမ်ႇၸႂ်ႈဝႃႈ ၵူၼ်းဝၢၼ်ႈ မျႃႉၸေႇတီႇၵူၺ်း ၊ မိူၼ်ၼင်ႇ ဝၢၼ်ႈသိၼ်ႇသႃႇပျႃး ၊ ၵျွၵ်ႉငႅတ်ႉ ၸိူဝ်းၼႆႉတီႉၵႂႃႇၼမ်ၼႃႇ ၊ ၶဝ်( သိုၵ်းမၢၼ်ႈ ) ႁၼ်ၽႂ်ၵေႃႉတီႉလူင်ၵႂႃႇၸိူင်ႉၼၼ်ယဝ်ႉ ၊ ၶၢဝ်ႇၵေႃႈဢမ်ႇပၼ်ဢွၵ်ႇ ၊ မိူဝ်ႈလဵဝ်ၼႆႉ ၶဝ်ဢဝ်ႁႅင်းသိုၵ်းမႃးယူႇၸွမ်းဝၢၼ်ႈၸိူဝ်းၼၼ်ႉလႄႈ ၵူၼ်းဝၢၼ်ႈပေႃးဢမ်ႇႁတ်းဢွၵ်ႇၵႂႃႇလႂ်”- ဝႃႈၼႆ ။ 

ယၢမ်းလဵဝ် တပ်ႉသိုၵ်းမၢၼ်ႈၼႆႉ  ပၵ်းတပ်ႉဝႆႉ ၼႂ်းဝၢၼ်ႈမျႃႉၸေႇတီႇသေ ပႂ်ႉၵူတ်ႇထတ်း ၵူၼ်းဝၢၼ်ႈ ဢၼ်ၶဝ်ထၢင်ႇထိူမ်။ လိူဝ်ၼၼ်ႉ ၶဵင်ႈၶႅင်ၵၢၼ်သိုၵ်းတေႃႇၵၼ်ဝႆႉတင်း ၸုမ်းလုၵ်ႉၽိုၼ်ႉလႄႈ ႁဵတ်းႁႂ်ႈၵူၼ်းမိူင်း ဢမ်ႇႁတ်းၵႂႃႇမႃးလွတ်ႈလႅဝ်း၊ တႃႇတေၵႂႃႇႁႆႈ ၵႂႃႇသူၼ်ၵူၺ်းၵေႃႈ ပဵၼ်ဢၼ်မႆႈၸႂ်ဝႆႉ ဝႃႈၼႆ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ မိူဝ်ႈလဵဝ်ၼႆႉ ပေႃးသိုၵ်းမၢၼ်ႈၶဝ်ႁွင်ႉၵူၼ်းဝၢၼ်ႈၼႆႉ ၼိုင်ႈဝၢၼ်ႈလႄႈ ၼိုင်ႈဝၢၼ်ႈ ဢမ်ႇမိူၼ်ၵၼ် ၊ ဢၼ်ၶႃႈႁူႉတႄႉ မီး 10 ၵေႃႉ ၊ တီႉယဝ်ႉ သူင်ႇၼႃႈသိုၵ်းၵမ်းသိုဝ်ႈ ၊ ပေႃးသိုၵ်းမၢၼ်ႈၶဝ်ႈၼႂ်းဝၢၼ်ႈၼိုင်ႈပွၵ်ႈၼႆႉ ဢဵၼ်ႁႅင်း 100 ပၢႆ “- ဝႃႈၼႆ ။

ၵဵဝ်ၵပ်းလွင်ႈၼႆႉ ၽူႈၶၢၼ်ပၢၵ်ႇ တပ်ႉသိုၵ်းၵႅတ်ႇၶႄၸိူဝ်ႉၸၢတ်ႈထၼူႉ DSNDA လၢတ်ႈ ၽူႈတွႆႇႁွၵ်ႈဝႃႈ -“ မိူဝ်ႈလဵဝ် ဢဵၼ်ႁႅင်းသိုၵ်းမၢၼ်ႈဢၼ်ၶဝ်ႈမႃးမီးၼႂ်းထုင်ႉဝၢၼ်ႈငႂ်ႈၼႆႉ တေမီးမွၵ်ႈ 1500  မႃးတူင်ႉၼိုင်ဝႆႉယူႇတင်းထုင်ႉယဝ်ႉ”- ဝႃႈၼႆ ။

မိူၼ်ၼင်ႇၼႆ ဝၼ်းတီႈ 24 လိူၼ်ၵျူႊလၢႆႊ ထိုင် ဝၼ်းတီႈ 27 ၼႆႉ သိုၵ်းမၢၼ်ႈထႅမ်ႁႅင်းသိုၵ်း ထူဝ်းသိုၵ်းၶဝ်ႈၼႂ်းဝၢၼ်ႈ ၵျွၵ်ႉငႅတ်ႉ(ကျောက်ငှက်)  လႄႈ ဝၢၼ်ႈသိၼ်ႇသႃႇပျႃး (ဆင်ဆာပြား) တီႉၺွပ်းထုပ်ႉပေႃႉၵူၼ်းဝၢၼ်ႈ 20 ပၢႆ ၊  ၵမ်ႈၽွင်ႈ ပွႆႇပွၵ်ႈႁိူၼ်းၶိုၼ်းယူႇသေတႃႉ ၸိူဝ်းၺႃးတီႉၺွပ်းဝႆႉၵေႃႈ တိုၵ်ႉမီးယူႇတင်းၼမ် ဝႃႈၼႆ။

လွင်ႈၵူၼ်းမိူင်းယႂႃႇငၢၼ်ႇ ၵမ်းၵမ်းၺႃးတီႉၺွပ်းၵုမ်းၶင်ယူႇၸိူင်ႉၼႆၼႆႉ ၶႂ်ႈႁႂ်ႈၸုမ်းၸွႆႈထႅမ် ၾၢႆႇသုၼ်ႇလႆႈၵူၼ်းၶဝ် ၸုမ်းယိပ်းၵွင်ႈၵၢင်ႇၼႂ်းပိုၼ်ႉတီႈ ဢၼ်ဝႃႈႁဵတ်းတႃႇၵူၼ်းမိူင်း ၼႆၸိူဝ်းၼၼ်ႉ ၸွႆႈထႅမ်ပၼ်ၽွင်ႈ- တုၵ်းယွၼ်းၼင်ႇၼႆ။

ၼႂ်းၸႄႈဝဵင်းယႂႃႇငၢၼ်ႇၼၼ်ႉ ၸုမ်းလုၵ်ႉၽိုၼ်ႉ မီးလၢႆလၢႆၸုမ်း တူင်ႉၼိုင်ယူႇသဝ်းဝႆႉ။ မိူၼ်ၼင်ႇ တပ်ႉသိုၵ်းပူတ်းပွႆႇၵူၼ်းမိူင်းထၼူႉ DPLA ၊ တပ်ႉသိုၵ်းၵႅတ်ႇၶႄၸိူဝ်ႉၸၢတ်ႈထၼူႉ DSNDA လႄႈ တပ်ႉၵွင် 1003 ၸုမ်း PDF ဢၼ်ယူႇတႂ်ႈ NUG ၸိူဝ်းၼႆႉ တူင်ႉၼိုင်ယူႇသဝ်းဝႆႉ။ၼွၵ်ႈလိူဝ်ၼၼ်ႉ တေမီးတပ်ႉသိုၵ်းမၢၼ်ႈ ၸုမ်းပိဝ်ႇသေႃးထီး လႄႈ ပျီႇတူႉၸိတ်ႉၸိူဝ်းၼႆႉၵေႃႈ တူင်ႉၼိုင်ၵႂႃႇမႃးဝႆႉ။