ဝၼ်းတီႈ 28/07/2026 ၽွင်းၵူၼ်းဝၢၼ်ႈတိုၵ်ႉ တၢၼ်းသၢင်ႇၵၢၼ်းၶဝ်ႈဝႃႇယူႇတီႈ ဝတ်ႉၽြႃးယိုၼ်း (တူင်းထၢတ်ႉၵူၺ်ႉ ယၢတ်ႉတေႃႇမူႇၽယႃး) ဢၼ်မီးတီႈၼိူဝ်ႈသဵၼ်ႈတၢင်း မျႃႉဝတီႇ – ဝေႃးလေႇ ၼႂ်းၸႄႈဝဵင်းမျႃႉဝတီႇ မိူင်းယၢင်းၽိူၵ်ႇ။
မၢၵ်ႇလူင် သႅၼ်း 500 ပွင်ႇ တူၵ်းသႂ်ႇဝိႁၢရ် ၽွင်းၵူၼ်းဝၢၼ်ႈတိုၵ်ႉမႃးလူႇသၢင်ႇၵၢၼ်းၶဝ်ႈဝႃႇ လႄႈႁဵတ်းႁႂ်ႈ ၸဝ်ႈသြႃႇၼင်ႈၵျွင်း လူႉလွၼ်ႇထင်တီႈ။ ၵူၼ်းဝၢၼ်ႈမၢတ်ႇၸဵပ်းတင်းၼမ်။
ၵူၼ်းပိုၼ်ႉတီႈလၢတ်ႈဝႃႈ တီႈၵျွင်းမုၼ်ၸဝ်ႈ ဝတ်ႉၽြႃးယိုၼ်း ၼၼ်ႉ ဢမ်ႇမီးပၢင်တိုၵ်းသိုၵ်းသိူဝ်။ ၵူၺ်းၵႃႈသိုၵ်းမၢၼ်ႈတင်ႈၸႂ်ဢဝ်ႁိူဝ်းမိၼ်မႃးယိုဝ်းသႂ်ႇၵျွင်းမုၼ်ၸဝ်ႈ တင်ႈၸႂ်ယိုဝ်းၵူၼ်းမိူင်းၵူၺ်း ။ ပိုၼ်ႉတီႈသိုၵ်းယၢင်း KNLA လႄႈ သိုၵ်းမၢၼ်ႈယိုဝ်းၵၼ်ၼႆႉ ပဵၼ်တၢင်း မိၼ်းလႅတ်ႉပၢၼ်ႇ- ၽလူးၵျီးပုၼ်ႉ။ ယၢၼ်ၵႆၵၼ်တင်းၵျွင်းမုၼ်ၸဝ်ႈၼႆႉၼႃႇ – ၵူၼ်းပိုၼ်ႉတီႈလၢတ်ႈၼင်ႇၼႆ။
ၵဵဝ်ႇလွင်ႈသိုၵ်းမၢၼ်ႈယိုဝ်းသႂ်ႇၵျွင်းမုၼ်ၸဝ်ႈ ထိုင်တီႈၸဝ်ႈၼင်ႈၵျွင်း(သုင်းတၢင်းၵိၼ်ၸၢႆ) လႆႈလူႉလွၼ်ႇထိုင်တီႈၼႆႉသေ သိုၵ်းမၢၼ်ႈတႄႉပႆႇပိုၼ်ၽၢဝ်ႇဢွၵ်ႇမႃးဝႃႈႁိုဝ်။ ဢၼ်သိုၵ်းမၢၼ်ႈယၢမ်ႈလၢတ်ႈဢွၵ်ႇမႃးတႃႇသေႇတႄႉဝႃႈ -ဢမ်ႇလႆႈတင်ႈၸႂ်တႃႇယိုဝ်းၵူၼ်းမိူင်းသေပွၵ်ႈ –ဝႃႈၼႆ။
ၸူဝ်ႈယိုတ်းဢႃႇၼႃႇၸိုင်ႈမိူင်းမႃးၼႆႉ ဢၼ်ယိုဝ်းသႂ်ႇၵျွင်းမုၼ်ၸဝ်ႈၸိူင်ႉၼႆၼႆႉဢမ်ႇၸႂ်ႈပွၵ်ႈၼႆႉပွၵ်ႈလဵဝ်ၵူၺ်း ။ ပီၼႆႉၽွင်းလိူၼ်ႁႃႈသွၼ်းၼမ်ႉ ဝၼ်းတီႈ 13 ဢေႊပရိူဝ်ႊလ် ၼၼ်ႉၵေႃႈ ယိုဝ်းသႂ်ႇတီႈ ၵျွင်းမုၼ်ၸဝ်ႈ ဝၢၼ်ႈသဵၵ်ႉၶုၼ်ႇ ၸႄႈဝဵင်းသူၺ်ႇပူဝ်ႇ တိူင်းၸႄႈၵႅင်း။ ၽွင်းၼၼ်ႉ တူင်ႇလၽ ရႁၢၼ်း 2 ၸဝ်ႈလူႉလွၼ်ႇထင်တီႈ။ ၸဝ်ႈသၢင်ႇမၢတ်ႇၸဵပ်းၵႂႃႇ 8 တူၼ်။
ဝၼ်းတီႈ 22 ဢေႊပရိူဝ်ႊလ် သိုၵ်းမၢၼ်ႈယိုဝ်းသႂ်ႇ တီႈဝၢၼ်ႈၼၢတ်ႉၵျီး ၸႄႈဝဵင်းငၢၼ်းၸုၼ်ႇ တိူင်းတႃႈလိူဝ်ႇမၼ်းတလေး ၊ တူၵ်းသႂ်ႇၽွင်းၵူၼ်းဝၢၼ်ႈဢဝ်သၢင်ႇလွင်းလဵပ်ႈဝၢၼ်ႈ။ ၼၢင်းယိင်းဢွၼ်ႇဢႃယု 15 ပီတၢႆထင်တီႈၵေႃႉၼိုင်ႈ ၊ ၵူၼ်းမၢတ်ႇၸဵပ်း 17 ၵေႃႉ။
ယူႇတီႈၸုမ်းလူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ NUG တႄႉ ပိုၼ်ၽၢဝ်ႇဝႃႈ တင်ႈတႄႇသိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းမႃးတေႃႇထိုင်ဝၼ်းတီႈ 30/06/2026 ၼႆႉ သိုၵ်းမၢၼ်ႈဢဝ်ႁိူဝ်းမိၼ်ယိုဝ်းသႂ်ႇလႄႈ ၵူၼ်းမိူင်းတၢႆ 5846 ၵေႃႉ ၵျွင်းမုၼ်ၸဝ်ႈလူႉၵွႆ 764 လင်ယဝ်ႉဝႃႈၼႆ။
ႁၢင်ႈ- ဝတ်ႉၽြႃးယိုၼ်း တူင်းထၢတ်ႉၵူၺ်ႉ ဝဵင်းမျႃႉဝတီႇ မိူင်းယၢင်းၽိူၵ်ႇ ဢၼ်ၺႃးသိုၵ်းမၢၼ်ႈဢဝ်ႁိူဝ်းမိၼ်ယိုဝ်းသႂ်ႇဝၼ်းတီႈ 28/07/2026 လႄႈလူႉလႅဝ်
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ