ၽူႈႁပ်ႉပုၼ်ႈၽွၼ်း ၼႂ်းၸုမ်းလူင်ပွင်ၸူဝ်ႈၶၢဝ်း (NUG) တီႈၵိင်ႇၽႄဝဵင်းလိူဝ်ႇ ၺႃးၸုမ်းသိုၵ်းမိူင်းလႃး (NDAA) တီႉၺွပ်းဢဝ်တူဝ်သူင်ႇပၼ် တီႈသိုၵ်းမၢၼ်ႈ ၼႆယဝ်ႉ။
မေးၼၢင်း ၽူႈႁပ်ႉပုၼ်ႈၽွၼ်း NUG တီႈဝဵင်းလိူဝ်ႇ (မၢၼ်းတလေး) ၺႃးသိုၵ်းမၢၼ်ႈၵူတ်ႇထတ်းၸႅတ်ႈထၢမ် တီႈၵဵတ်ႉလၢၼ်ႇ ၼႂ်းၸႄႈဝဵင်းၵဵင်းတုင် တီႈၼိုင်ႈယဝ်ႉသေ ဝၢႆးလင် ၼၼ်ႉ ၵေႃႉပဵၼ်ၽူဝ်မၼ်းၼၢင်း ၵူဝ်ႇဝၼ်ႇၼဢွင်ႇၵေႃႈ ၺႃးသိုၵ်းမိူင်းလႃး တီႉၺွပ်းဢဝ်တီႈမိူင်းလႃး ဝႃႈၼႆ။
ၵူၼ်းၸမ်ၸႂ်ၽူႈႁပ်ႉပုၼ်ႈၽွၼ်းၵေႃႉၺႃးတီႉၺွပ်းၵေႃႉၼိုင်ႈ လၢတ်ႈဝႃႈ “မေးၼၢင်းမၼ်းၵႂႃႇၵဵင်းတုင် ၵႂႃႇႁဵတ်း Kpay ၽိူဝ်ႇမၼ်းပွၵ်ႈမႃး သမ်ႉၺႃးသိုၵ်းမၢၼ်ႈၸႅတ်ႈထၢမ်ႁႄ ႁူႉၵႂႃႇဝႃႈ ၵေႃႉပဵၼ်ၽူဝ်မၼ်း ၵိုတ်းဝႆႉတီႈမိူင်းလႃး” ဝႃႈၼႆ။
ၵူဝ်ႇဝၼ်ႇၼဢွင်ႇၼႆႉ ပဵၼ်ၽူႈတႅၼ်းၽွင်း လုမ်းသၽႃးၵူၼ်းမိူင်း ၸႄႈဝဵင်းတတႃးဢူး ၼႂ်းပႃႇတီႇၼူၵ်ႉယုင်း (NLD) ၵေႃႉၼိုင်ႈသေ ဝၢႆးလင်သိုၵ်းမၢၼ်ႈယိုတ်းဢဝ်ဢႃႇၼႃႇၸိုင်ႈမိူင်းယဝ်ႉ လႆႈႁဵတ်းပဵၼ် ၽူႈႁပ်ႉပုၼ်ႈၽွၼ်း ၼႂ်းၸုမ်း NUG တီႈဝဵင်းလိူဝ်ႇသေ ၺႃးသိုၵ်းမိူင်းလႃး တီႉၺွပ်းဢဝ်ၵႂႃႇ မိူဝ်ႈဝၼ်းတီႈ 24 လိူၼ်ၵျူႊလၢႆႊယဝ်ႉ ထုၵ်ႇသူင်ႇတူဝ်ၵႂႃႇပၼ်တီႈ သိုၵ်းမၢၼ်ႈယိုတ်းမိူင်းၶိုၼ်း ၼႆယဝ်ႉ။
ၼႂ်းၸုမ်းယိပ်းၵွင်ႈၵၢင်ႇၸၢဝ်းၶိူဝ်း မိူင်းႁူမ်ႈတုမ်ၼႆႉ တပ်ႉသိုၵ်းမိူင်းလႃးၼႆႉ ပဵၼ်ၸုမ်းမီးလွင်ႈၸမ်ၸႂ်ၵၼ် တင်း သိုၵ်းမၢၼ်ႈယိုတ်းမိူင်း ၼမ်လိူဝ်ပိူၼ်ႈၸုမ်းၼိုင်ႈယူႇ။ ၼႂ်းလိူၼ် ၵျုၼ်ႊ ပူၼ်ႉမႃးၼႆႉၵေႃႈ ႁူဝ်ပဝ်ႈ ၵေႃႇမတီႇဢုပ်ႇဢူဝ်းငူပ်ႉငီႉၵၢၼ်ငမ်းယဵၼ် လႄႈ ၶွတ်ႇလိူတ်ႈၽွမ်ႉႁူမ်ႈၸိူသ်ႉၸၢတ်ႈ (NSPNC) ၶွင်သိုၵ်းမၢၼ်ႈယိုတ်းမိူင်း ၵႂႃႇႁူပ်ႉထူပ်းဢုပ်ႇဢူဝ်း ၸွမ်း ၽူႈၼမ်းၸုမ်းသိုၵ်းမိူင်းလႃး (NDAA) ထိုင်တီႈငဝ်ႈငုၼ်း ဝဵင်းမိူင်းလႃးၵမ်းသိုဝ်ႈဝႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ