လိူၼ်ၵျူႊလၢႆႊ ဝၼ်းတီႈ 22 ထိုင် ဝၼ်းတီႈ 25 ၼႆႉ လူင်ပွင်ၸိုင်ႈမိူင်းၶႄႇ ၸတ်းပၢင်ၵႃႉၶၢႆ ႁပ်ႉသိုဝ်ႉသႅင်ၶဵဝ် ၼႂ်းမိူင်းႁူမ်ႈတုမ် (မိူင်းမၢၼ်ႈ) ၼႂ်းသုၼ်ၵၢၼ်ပၢႆးမၢၵ်ႈမီးၶိုၵ်ႉတွၼ်းၸႄႈၵဝ်ႇ (ကျယ်‌ဂေါင်) ဝဵင်းသူၺ်ႇလီ ၸႄႈမိူင်းယုၼ်ႊၼၢၼ်ႊ မိူင်းၶႄႇ။

ၼႂ်းပၢင်ၵႃႉၶၢႆသႅင်ၶဵဝ်ၼၼ်ႉ လူင်ပွင်ၸိုင်ႈမိူင်းၶႄႇၸႄႈမိူင်းယုၼ်ႊၼၢၼ်ႊ တင်း ႁွင်ႈၵၢၼ်ၽွင်းလူင်ႁၵ်ႉသႃသိင်ႇဝႅတ်ႉလွမ်ႉ လႄႈ ၶူဝ်းႁႄႈတိုၼ်းလၢင်း တႂ်ႈဢႃႇၼႃႇလူင်ပွင်ၸိုင်ႈ သိုၵ်းမၢၼ်ႈယိုတ်းမိူင်း ႁူမ်ႈၵၼ် ၸတ်း ပွင်ဝႆႉသေ မီးၶွမ်ႊပၼီႊႁပ်ႉသိုဝ်ႉၵႃႉၶၢႆ သႅင်ၵူႈသႅၼ်းသႅၼ်းၼႂ်းမိူင်းမၢၼ်ႈ (MGE) (ဢၼ်ၺႃး လူင်ပွင်ၸိုင်ႈမိူင်းဢမေႊရိၵၼ်ႊ တင်း ယူႊ ရူပ်ႊ(EU) လႄႈ ဢိင်းၵလဵတ်ႈ ပရိတဵၼ်ႊၶဝ် ဢိုတ်းႁႅတ်ႉပၢႆးမၢၵ်ႈမီးၵၢၼ်ၵႃႉၶၢႆၶဝ်ဝႆႉ) ၼၼ်ႉ ၼမ်းၼႃႈၶိုင်ပွင်ပၢင်ပွႆးဝႆႉ – ၼႆယဝ်ႉ။

လူင်ပွင်ၸိုင်ႈမိူင်းၶႄႇၼႆႉ ပၼ်သုၼ်ႇလႆႈ ၶွမ်ႊပၼီႊႁပ်ႉသိုဝ်ႉၵႃႉၶၢႆသႅင်ၵူႈသႅၼ်းသႅၼ်းၼႂ်းမိူင်းမၢၼ်ႈ (MGE) တႂ်ႈသိုၵ်းမၢၼ်ႈ ၵႂႃႇၸတ်းပွင်ပၢင်ပွႆးသေ ႁဵတ်းၵၢၼ်ၵႃႉၶၢႆ ၼႂ်းမိူင်းၶႄႇ ၼႆႉ ပွၵ်ႈၼႆႉ ပဵၼ်ၵမ်းႁႅၵ်ႈ ဢွၼ်တၢင်းသုတ်း ဝႃႈၼႆ။

ပၢင်ပွႆးၵႃႉၶၢႆႁပ်ႉသိုဝ်ႉသႅင်ၶဵဝ် မိူင်းႁူမ်ႈတုမ်ၼႆႉ မိူဝ်ႈၵူႈပွၵ်ႈ ယၢမ်ႈၸတ်းႁဵတ်းၼႂ်းဝဵင်းလူင် တႃႈၵုင်ႈ လႄႈ ၼေႇပျီႇတေႃႇၸိူဝ်းၼႆႉၵူၺ်းသေတႃႉ ၽွင်းမိူင်းႁူမ်ႈတုမ် ႁူပ်ႉပၼ်ႁႃၵၢၼ် မိူင်း ပဵၼ်ပၢင်တိုၵ်းသိုၵ်းသိူဝ် ဢၼ်ဢဝ်ၼႃႈတိူဝ်ႈ တႃႇၽဵဝ်ႈမူၺ်ႉ ၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆး (ၵျႃႊၽျႅၼ်ႉ) သေပဵၼ်မႃးၼၼ်ႉ ၸဝ်ႈၵၢၼ်ပၢႆးမၢၵ်ႈမီးမိူင်းၶႄႇၵေႃႈ ဢမ်ႇႁတ်းၶဝ်ႈမႃးႁဵတ်းၵၢၼ်သိုဝ်ႉၶၢႆ ၼႂ်းမိူင်းမၢၼ်ႈတေႉတေႉဝႃႈဝႃႈ လႄႈ ၸင်ႇလႆႈၸတ်းႁဵတ်းၵႂႃႇ ၼႂ်းမိူင်းၶႄႇ ပိုၼ်ႉတီႈတိတ်းၸပ်းဝႆႉၸွမ်းလႅၼ်လိၼ် ၼႆယဝ်ႉ။

လႆႈႁူႉဝႃႈ ၶွမ်ႊပၼီႊႁပ်ႉသိုဝ်ႉၵႃႉၶၢႆသႅင်ၵူႈသႅၼ်းသႅၼ်း (MGE)၊ ၶွမ်ႊပၼီႊၵၢၼ်မၢၵ်ႈမီး မိူင်းမၢၼ်ႈ (မြန်မာစီးပွားရေးဦးပိုင်ကုမ္ပဏီ) ၊ ၶွမ်ႊပၼီႊသုၼ်ႇလဵဝ် လႄႈ ၸိူဝ်းႁဵတ်းၵၢၼ် ၵႃႉၶၢႆသႅင်သႅၼ်းႁၢတ်ႈၵူႈသႅၼ်းသႅၼ်း ဢၼ်ႁူမ်ႈၵၼ်တင်းသိုၵ်းမၢၼ်ႈသေ ႁဵတ်းၵၢၼ်ၵႃႉၶၢႆႁႂ်ႈလႆႈၼမ်ႉတွၼ်းၸွမ်းၼၼ်ႉ မီးဝႆႉသႅင်ၶဵဝ် တႃႇ 700 ၸုမ်ႇ။

ၼႂ်းၼၼ်ႉ သႅင်ၶဵဝ်သႅၼ်းဢၼ်ၶႅမ်ႉတီႈသုတ်းၼႆႉ မီးယူႇ 500 ၸုမ်ႇသေ ၾၢႆႇလူင်ပွင်ၸိုင်ႈမိူင်းၶႄႇ လႆႈဝႆႉ ဝႂ်ၶႂၢင်ႉတႃႇဢဝ်သႅင်ၶဵဝ် သႅၼ်းဢၼ်ၶႅမ်ႉတီႈသုတ်းၼၼ်ႉ ၵႂႃႇၶၢႆဝႆႉ တႃႇ 200 ၸုမ်ႇ ၼႆယဝ်ႉ။

တႃႇဢဝ်သႅင်ၶဵဝ်ၵႂႃႇၶၢႆ ၼႂ်းပၢင်ပွႆးၸတ်းပၢႆးၼႄသႅင်ၵူႈသႅၼ်းသႅၼ်း ၼႂ်းမိူင်းၶႄႇၼႆႉ သိုၵ်းမၢၼ်ႈႁၢင်ႈႁႅၼ်း ဢဵၼ်းဢၢၼ်းဝႆႉ ၸဵမ်မိူဝ်ႈသွင်ပီပူၼ်ႉမႃးၼၼ်ႉသေတႃႉ ယွၼ်ႉႁူပ်ႉၺႃး ၽေး ၽႅၼ်ႇလိၼ်ဝႆ ႁၢဝ်ႈႁႅင်းၵႂႃႇလႄႈ ၸင်ႇလႆႈႁိုင်ၵႂႃႇ ပီ 2026 ၼႆႉၸင်ႇပဵၼ်ၸတ်းၶိုၼ်းလႆႈတေႉတေႉဝႃႈဝႃႈ ။

လိူဝ်ၼၼ်ႉ ယင်းၽႅၼ်ၵၢၼ်ဝႆႉ တေႁူမ်ႈၵၼ်တင်း လူင်ပွင်ၸိုင်ႈမိူင်းၶႄႇသေ သိုပ်ႇႁဵတ်းသၢင်ႈ ပၢင်ပွႆးၸတ်းပၢႆးၼႄသႅင်ၵူႈသႅၼ်းသႅၼ်း လႄႈ ၵႃႉၶၢႆႁပ်ႉသိုဝ်ႉသႅင်ၶဵဝ်ၵႂႃႇ ႁိုင်ၶၢဝ်း တၢင်း 5 ပီ ထပ်းၵၼ် ဝႃႈၼႆ။

ၼင်ႇႁိုဝ် ၵၢၼ်တေႃႉသူင်ႇသႅင်ၶဵဝ် တေဢမ်ႇမီးပၼ်ႁႃ လႄႈ လွတ်ႈၽေးၸူၼ်ၸွမ်းတၢင်းၼၼ်ႉ သႅင်ၶဵဝ်ၵူႈသႅၼ်းသႅၼ်းၸိူဝ်းဢဝ်ၵႂႃႇပၢႆးၼႄ လႄႈ ၵႃႉၶၢႆယူႇၼႂ်းပၢင်ပွႆးၼၼ်ႉ ၶွမ်ႊပၼီႊ Innocraft လႆႈႁပ်ႉပုၼ်ႈၽွၼ်းသေ တေႃႉဢဝ်ၵႂႃႇၸွမ်း သဵၼ်ႈတၢင်းၵၢင်ႁၢဝ် ၼႆယဝ်ႉ။