ၵူၼ်းမိူင်းၸိူဝ်းၵႂႃႇဢႅဝ်ႇယဵမ်ႈ ဝႆႈၽြႃးပူၵ်ႉပႃး ၼႂ်းၸႄႈဝဵင်းၵျွၵ်ႉပတွင်း တိူင်းမၢၼ်းတလေး (ဝဵင်းလိူဝ်ႇ) ၼၼ်ႉ ၺႃးၸုမ်းယိပ်းၵွင်ႈၵၢင်ႇ တီႉၺွပ်းဢဝ်ၵႂႃႇ ႁိုင်ၼိုင်ႈဝူင်ႈယဝ်ႉၵေႃႈ ပႆႇ ထူပ်းႁၼ်တူဝ်ၶိုၼ်း ၼႆယဝ်ႉ။
မိူဝ်ႈဝၼ်းတီႈ 27 လိူၼ်ၵျူႊလၢႆႊယၢမ်းၵၢင်ၶမ်ႈ ၵူၼ်းၸၢႆး 9 ၵေႃႉ လႄႈ ၼၢင်းယိင်း 2 ၵေႃႉ ဢႃႇယု 16 ပီ ထိုင် 60 ပီ ၸိူဝ်းယူႇၼႂ်းတိူင်းတႃႈၵုင်ႈ လႄႈ တိူင်းမၢၼ်းတလေး (ဝဵင်းလိူဝ်ႇ) ၺႃးတီႉၺွပ်းၵႂႃႇ ၽွင်းလုၵ်ႉတီႈႁူင်းႁႅမ်း Popa Garden Resort ဢွၵ်ႇၵႂႃႇလႄႇၼၼ်ႉ ဝႃႈၼႆ။
ၵဵဝ်ႇလူၺ်ႈလွင်ႈၼႆႉသေ ၵူၼ်းၸိူဝ်းၵမ်ႉထႅမ်ႁၼ်လီၼိူဝ် သိုၵ်းမၢၼ်ႈယိုတ်းမိူင်းၶဝ်တႄႉ တႅမ်ႈတၢင်ႇၼိူဝ်သိုဝ်ႇတူင်ႇဝူင်းၵူၼ်း ႁၢႆးငၢၼ်းၶၢဝ်ႇ ၼႂ်းတႄႇရီႇၵရမ်ႇဝႆႉဝႃႈ ပဵၼ်ၸုမ်းသိုၵ်း PDF ၶဝ် တီႉၺွပ်းဢဝ်ၵႂႃႇ ယွၼ်းငိုၼ်းၵႃႈထုတ်ႇတူဝ်ၼႆသေတႃႉ ပဵၼ်ၽီမိုဝ်းၸုမ်းလႂ် တီႉၺွပ်းဢဝ်ၵႂႃႇတေႉ တေႉၼႆတႄႉ ပႆႇယိုၼ်ယၼ်လႆႈ။
လႆႈႁူႉဝႃႈ ၾၢႆႇၼႃႈၵျွင်းပူၵ်ႉပႃးလုၼ်ႇ သဵၼ်ႈတၢင်းဢွၵ်ႇပူၵ်ႉပႃးၵႂႃႇၼၼ်ႉ မီးၸုမ်းသိုၵ်းပျီႇတူႉၸိတ်ႉ၊ ၸုမ်းသိုၵ်းမၢၼ်ႈယိုတ်းမိူင်းယူႇသဝ်း ဢဝ်ႁူမ်ႇလူမ်ႈဝႆႉသေ ၼႂ်းၶၢဝ်းတၢင်းဝူင်ႈ ဝၢင်ႈၼႆႉ ပိုၼ်ႉတီႈၸိူဝ်းၼၼ်ႉ ပဵၼ်ပၢင်တိုၵ်းၵၼ်ဝႆႉ ၼႆယဝ်ႉ။
ႁူင်းႁႅမ်းၼႆႉ မီးယူႇဝႆႉႁိမ်းတိၼ်လွႆၽြႃးပူၵ်ႉပႃး ၸႄႈဝဵင်းၵျွၵ်ႉပတွင်း ဢၼ်ၸမ်ၵၼ်ၵတင်း ဝဵင်းပူးၵမ်ႇ (ပုဂံ) ဢၼ်ၸိုဝ်ႈလိုဝ်းလင်လုမ်ႈၾႃႉၼၼ်ႉ ၼႆယဝ်ႉ။
ၼႂ်းပီ 2026 ၼႆႉ ၵိူတ်ႇပဵၼ်လိူင်ႈတီႉၺွပ်းဢဝ်ၵူၼ်းမိူင်းၵႂႃႇယွၼ်းၵႃႈထုတ်ႇတူဝ်၊ ၵႃးတၢင်ႇၵူၼ်းၵႂႃႇဝႆႈၽြႃး ဝဵင်းပူးၵမ်ႇ (ပုဂံ) ၺွင်ႇဢူး၊ ပူၵ်ႉပႃးၸိူဝ်းၼႆႉ ၺႃးယိုတ်း ၺႃးၸူၼ်ၸိူဝ်း ၼႆႉ ဢမ်ႇယွမ်း 10 ပွၵ်ႈ၊ ၼိုင်ႈပွၵ်ႈၼႆႉ ယွၼ်းငိုၼ်းၵႃႈထုတ်ႇတူဝ် ၼပ်ႉထိုင်ႁူဝ်ႁဵင်သႅၼ်ပျႃးလႄႈ ႁဵတ်းႁႂ်ႈ ၶႅၵ်ႇၸိူဝ်းတေၵႂႃႇဝႆႈၽြႃး ဢမ်ႇႁတ်းၵႂႃႇ ထိုင်တီႈလႆႈယႃႉပႅတ်ႈၶၢဝ်းတၢင်း ဢၼ်ၸတ်းၽႅၼ်ဝႆႉၸိူဝ်းၼၼ်ႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ