တႄႇဢဝ်ၸဵမ်မိူဝ်ႈလိူၼ်ၵျူၼ်ႊ 2026 ၼၼ်ႉမႃးသေ ၵူၼ်းတႃႈၶီႈလဵၵ်း-မႄႈသၢႆ သုၵ်ႉၸႂ်ၸွမ်း ပၵ်းပိူင်ၸဝ်ႈၼႃႈတီႈၸိုင်ႈမိူင်းတင်းသွင်ၾင်ႇ ။ ၸဝ်ႈၼႃႈတီႈၾၢႆႇလႂ်ၵေႃႈဝႃႈ တေမၢပ်ႇမႂ်ပၼ်တၢမ်ႇ ၸိူဝ်းႁဵတ်းၽိတ်း။ ၾင်ႇထႆးၵေႃႈ ဢဝ်ၶေႃႈဢၢင်ႈဝႃႈ ၵႆႉမီးၵူၼ်းလၵ်ႉတေႃႉၵုၼ်ႇၽိတ်းပၵ်းပိူင်ၼႆသေ ၵူတ်ႇထတ်းၵူၼ်းၾင်ႇတႆးမႃးႁၢဝ်ႈႁႅင်း ။

ၾင်ႇတႆးဢၼ်သိုၵ်းမၢၼ်ႈၵုမ်းၼႆႉၵေႃႈ သမ်ႉဝႃႈ တေၵူတ်ႇသွၵ်ႈၵူၼ်းထႆးၸိူဝ်းမႃးႁဵတ်းၵၢၼ်ၽိတ်းပၵ်းပိူင်ၼႂ်းၾင်ႇတႃႈၶီႈလဵၵ်းၼႆသေ မိူၼ်တင်ႈၸႂ်ႁဵတ်းၶတ်းၵၼ်ဝႆႉ ၊ ႁဵတ်းႁႂ်ႈၵူၼ်းမိူင်းတင်းသွင်ၾင်ႇ လႆႈသုၵ်ႉၸႂ်ၸွမ်း ။ ၵူၼ်းမိူင်းတႄႉ မႆႈၸႂ်ၵူဝ်ႁဵတ်းႁႃၵိၼ်ယၢပ်ႇၵႂႃႇလိူဝ်ၵဝ်ႇထႅင်ႈ ။

ၼႂ်းလိူၼ်ၵျူၼ်ႊၼၼ်ႉ ၸဝ်ႈၼႃႈတီႈၾင်ႇထႆး ၵူတ်ႇထတ်းႁၼ်မႅၼ်ႈၵူၼ်းၸၢႆးၵေႃႉၼိုင်ႈ ဢၼ်ဢဝ် ငိုၼ်းထႆး 23 လၢၼ်ႉ သႂ်ႇၼႂ်းပုင်းၶဝ်ႈမုၼ်းသေ ဢၢၼ်းၶၢမ်ႈၸူးၾင်ႇမိူင်းတႆး ဝဵင်းတႃႈၶီႈလဵၵ်း တီႈၶူဝ်မိုတ်ႈၵိုဝ်းမၢႆၼိုင်ႈ ။ ၼၼ်ႉၵေႃႈ ႁဵတ်းႁႂ်ႈ ၵူၼ်းၾင်ႇမိူင်းတႆး ၸိုဝ်ႈလူႉၵႂႃႇၵမ်းၼိုင်ႈ ဝႃႈ ႁဵတ်းၵၢၼ်ဢမ်ႇၸွမ်းတြႃး။

ၽိူဝ်ႇထိုင် လိူၼ်ၵျူႊလၢႆႊၼႆႉ သမ်ႉဝႃႈ ၵူတ်ႇထတ်းႁၼ်ၺႃး ၵူၼ်းႁေႃႈသၢမ်လေႃႉဢၼ်ယူႇတႃႈၶီႈလဵၵ်း တေႃႉယႃႈမဝ်းၵမ်ႈ ၼပ်ႉႁူဝ်သႅၼ်မၼ်းၼႆသေ ဢဝ်ပၼ်ႁႃယႂ်ႇၵႂႃႇထႅင်ႈၵမ်းၼိုင်ႈ ။

ဝၢႆးသေ ၸဝ်ႈၼႃႈတီႈထႆး ၾၢင်ႉႁၼ် ၵူၼ်းၽိတ်းပၵ်းပိူင်ထပ်းၵၼ်မႃးယဝ်ႉၼၼ်ႉ ၾင်ႇထႆးၼႆႉ တင်ႈၸႂ် ၶဵင်ႈၶႅင်တႃႇပၵ်းတႃပႂ်ႉတူၺ်း ရူတ်ႉၵႃး လႄႈ ရူတ်ႉသၢမ်လေႃႉၸိူဝ်းၼႆႉမႃး ။ ရူတ်ႉသၢမ်လေႃႉ ဢၼ်လုၵ်ႉၾင်ႇတႃႈၶီႈလဵၵ်းသေ ၵႆႉႁပ်ႉၶႅၵ်ႇၶဝ်ႈမိူင်းထႆးၸိူဝ်းၼၼ်ႉ ၵမ်ႈၼမ် ၺႃးၵူတ်ႇထတ်းႁၢဝ်ႈႁႅင်းမႃး။

ၼႂ်းလိူၼ်ၵျူႊလၢႆႊ ဝၼ်းတီႈ 20 ၼၼ်ႉ ၵူၼ်းၾင်ႇတႃႈၶီႈလဵၵ်း ၵႂႃႇၺႃးၸဝ်ႈၼႃႈတီႈထႆးၺွပ်းၵုမ်း 50 ပၢႆ လူၺ်ႈတၢင်းၽိတ်းပူၼ်ႉပႅၼ်ပၵ်းပိူင်ရူတ်ႉၵႃး ။ ၵမ်ႈၼမ် ဢၼ်ၺႃး ၺွပ်းၼႆႉ ပဵၼ်ၵူၼ်းႁေႃႈသၢမ်လေႃႉလႄႈ ၵူၼ်းႁေႃႈရူတ်ႉၵႃးသႅၼ်းလဵၵ်ႉ HiJet ၸိူဝ်းတေႃႉၵူၼ်းလႄႈတေႃႉၵုၼ်ႇဢိတ်းဢွတ်း ၸိူဝ်းၼႆႉ။

ၵူၼ်းၼိုင်ႈၵေႃႉလႂ် ၸဝ်ႈၼႃႈတီႈထႆး မႂ်ငိုၼ်း 5000(5 ႁဵင်)ၿၢတ်ႇ ။ ၵူၼ်းၸိူဝ်းဢမ်ႇၸၢႆႇငိုၼ်းလႆႈၸိူဝ်းၼၼ်ႉတႄႉ ၺႃးႁွင်ႉၵႂႃႇၵုမ်းတူဝ်ၶင်ဝႆႉ တီႈလုမ်းတြႃးၵဵင်းႁၢႆး ၶၢဝ်းတၢင်း 10 ဝၼ်း ။ ၽွင်းၺႃး ၵုမ်းတူဝ်ယူႇၼႂ်းၶွၵ်ႈၼၼ်ႉၵေႃႈ ၵူၼ်းၺႃးၺွပ်းၸိူဝ်းၼႆႉ လႆႈပၼ်ငိုၼ်း ၼိုင်ႈဝၼ်း ၼိုင်ႈ 100 (ၼိုင်ႈပၢၵ်ႇ) ၿၢတ်ႇ ၼႆ ႁၼ်သိုဝ်ႇၶၢဝ်ႇပိုၼ်ႉတီႈဢွၵ်ႇဝႆႉ။

ၸိူဝ်းပၼ်လႆႈ 5000 ၿၢတ်ႇၵမ်းလဵဝ်တႄႉ ဢမ်ႇလူဝ်ႇၵႂႃႇထိုင်ၵဵင်းႁၢႆး ပွႆႇလွတ်ႈပွၵ်ႈၶိုၼ်း ။ ၵူၼ်းၸိူဝ်းၺႃးၺွပ်းၼႆႉ ၵမ်ႈၼမ် ပဵၼ်ၵူၼ်းၵိၼ်ၸၢင်ႈ တေႃႉၵုၼ်ႇတေႃႉၵူၼ်း ပၼ်ၵူၼ်းၸိူဝ်း ဢွၵ်ႇတႃႈဢွၵ်ႇတၢင်းၸိူဝ်းၼႆႉ ။

ဢၼ်ၺႃးတီႉၺွပ်းၵႂႃႇၼႆႉ ယွၼ်ႉဝႃႈ ၸဝ်ႈရူတ်ႉၵႃး ၸဝ်ႈသၢမ်လေႃႉၸိူဝ်းၼႆႉ ၵိုတ်းရူတ်ႉဝႆႉဢွင်ႈတီႈဢၼ်ၸဝ်ႈၼႃႈတီႈထႆးႁၢမ်ႈဝႆႉ ၊ မၢင်လမ်းၵေႃႈ ၵိုတ်းသွၼ်ႉၵၼ်ဝႆႉမၢင်လမ်းၵေႃႈ ၵိုတ်းၶႂၢင်တၢင်းၼႃႈႁၢၼ်ႉပိူၼ်ႈဝႆႉလႄႈ ၸင်ႇၺႃးၸဝ်ႈႁၢၼ်ႉၸဝ်ႈသႅင်ႇၸိူဝ်းၼၼ်ႉ တၢင်ႇလၢတ်ႈၵႂႃႇတီႈပလိၵ်ႈထႆး ဝႃႈၼႆ။

ဝၢႆးသေ မီးမႃးပၼ်ႁႃၸိူင်ႉၼၼ်ယဝ်ႉ ၾင်ႇတၢင်းတႃႈၶီႈလဵၵ်းၵေႃႈ ဝၼ်းတီႈ 26 ၵျူႊလၢႆႊၼႆႉ ၾၢႆႇႁူမ်ႇလူမ်ႈမၢၼ်ႈ ပလိၵ်ႈမၢၼ်ႈၸိူဝ်းၼႆႉ တီႉၺွပ်းၵူၼ်းၾင်ႇထႆး ၸိူဝ်းၶဝ်ႈ ၶၢႆထီႇၼႂ်းၾင်ႇတႃႈၶီႈလဵၵ်း ။ ပဵၼ်ၵူၼ်းထႆး ၸၢႆး 2 ၵေႃႉ ယိင်း 2 ၵေႃႉ ႁူမ်ႈ 4 ၵေႃႉ တီႉၺွပ်းလူၺ်ႈတၢင်းၽိတ်း ဢမ်ႇလႆႈၶႂၢင်ႉသင်သေ ၶဝ်ႈၶၢႆထီႇၼႂ်းတႃႈၶီႈလဵၵ်း ၼႆယူႇ။

တႄႇၼၼ်ႉမႃး ၽူႈမီးဢႃႇၼႃႇတင်းသွင်ၾင်ႇ ထႅမ်ႁႅင်းၵူတ်ႇထတ်းႁၢဝ်ႈႁႅင်း ။ ၾၢႆႇ ၸဝ်ႈၼႃႈတီႈထႆးၵေႃႈ ပၵ်းတႃၵူၼ်းၸိူဝ်းလုၵ်ႉမႃးၾင်ႇတႃႈၶီႈလဵၵ်း ၊၊ ၾင်ႇတႃႈၶီႈလဵၵ်း ဢၼ်ၸုမ်းသိုၵ်းမၢၼ်ႈၽွတ်ႈဝႆႉၸုမ်းႁူမ်ႇလူမ်ႈၸိူဝ်းၼႆႉၵေႃႈ သမ်ႉၶိုၼ်းပၵ်းတႃပႂ်ႉတူၺ်း ၵူၼ်းၾင်ႇထႆး ။

ပၼ်ႁႃဢၼ် ၸဝ်ႈၼႃႈတီႈတင်းသွင်ၾင်ႇ ၶဵင်ႈၶႅင်ပၵ်းပိူင်တေႃႇၵၼ်ၼႆႉ ဢမ်ႇၸႂ်ႈယွၼ်ႉတေႃႉၶူဝ်းၽိတ်းၸိူဝ်းၼၼ်ႉ ၵမ်းသိုဝ်ႈ ။ ပိူင်လူင်မၼ်း ပဵၼ်ယွၼ်ႉ ၸဝ်ႈသၢမ်လေႃႉၸၢဝ်းမၢၼ်ႈဢၼ်ယူႇၾင်ႇတႃႈၶီႈလဵၵ်း ၸိူဝ်း ၵႂႃႇၾင်ႇမႄႈသၢႆသေ ဢမ်ႇၸွမ်းပၵ်းပိူင်ရူတ်ႉၵႃး ၶႂ်ႈၵိုတ်းတီႈလႂ်ၵေႃႈၵိုတ်း ဢမ်ႇၵဵင်ၸႂ်ၽႂ်ၸိူဝ်းၼၼ်ႉ ။ ၺႃးၾၢင်ႉလၢႆၵမ်းၵေႃႈ ဢမ်ႇလၢပ်ႇလႄႈ ၸဝ်ႈၼႃႈတီႈထႆး ၸင်ႇလူင်းမိုဝ်းႁဵတ်းၸွမ်းပၵ်းပိူင်ၵူၺ်း ၼႆ ၵူၼ်းႁေႃသၢမ်လေႃႉတႃႈၶီႈလဵၵ်းဢၼ်ယၢမ်ႈၶဝ်ႈဢွၵ်ႇမႄႈသၢႆၵေႃႉၼိုင်ႈလၢတ်ႈၼင်ႇၼႆ –

မၼ်းဢမ်ႇၸႂ်ႈ တႄႇတီႈပၼ်ႁႃတၢင်ႇယႃႈမဝ်းၵမ် ၊ မၼ်းတႄႇတီႈသၢမ်လေႃႉမၢၼ်ႈၶဝ် ၵႃးၶဝ်ၸိူဝ်းၼၼ်ႉ ၶဝ်ၵႂႃၸွတ်ႇ(ၵိုတ်း) ၼႃႈ ၵၢတ်ႇ ။ ၵူၼ်းပိူၼ်ႈမႃးၵၢတ်ႇ ၸဝ်ႈႁၢၼ်ႉၸဝ်ႈသႅင်ႇၸိူဝ်းၼႆႉဢမ်ႇမီးတီႈမႃးၵိုတ်း။ပိူၼ်ႈၵႂႃႇၸႅင်ႈတမ်ႇၼူတ်ႇ လၢႆပွၵ်ႈလၢႆၵမ်းၼႃႇယဝ်ႉလူး။တမ်ႇၼူတ်ႇၵေႃႈ ၾၢင်ႉၶဝ်လၢႆပွၵ်ႈယဝ်ႉၼင်ႇၵဝ်ႇသႄႈ ။ပွၵ်ႈၼႆႉ ၸင်ႇႁႆႇပႅတ်ႈႁႅင်းႁႅင်းၼၼ်ႉၼႃႇ ၼင်ႇႁိုဝ်တေလၢပ်ႇ

လွင်ႈထႅမ်ႁႅင်းၵူတ်ႇထတ်းၵူၼ်းတင်းသွင်ၾင်ႇၼႆႉ တၢင်းယိူင်းဢၢၼ်းတႄႉၵေႃႈ တႃႇႁၢမ်ႈၵၢၼ်ၽိတ်းပၵ်းပိူင် ၼႆသေတႃႉ သမ်ႉတုမ်ႉယွၼ်ႈထိုင် ၵူၼ်းႁႃၵိၼ်လဵင်ႉတွင်ႉသိုဝ်ႈသိုဝ်ႈ ယူဝ်းယူဝ်းၸိူဝ်းၼၼ်ႉပႃး ။ သင်ဝႃႈ ႁဵတ်းၸွမ်းပၵ်းပိူင်ၽဵၼ်ႈၽဵၼ်ႈတႄႉ ၵူၼ်းမိူင်းၵေႃႈ ဢမ်ႇလႆႈသုၵ်ႉၸႂ် ၊ ၸဝ်ႈၼႃႈတီႈတင်းသွင်ၾၢႆႇၵေႃႈ ဢမ်ႇလူဝ်ႇဢဝ်လၢႆးမၼ်းယုင်ႈ ။

ၼႆႉသမ်ႉ ပေႃးၾၢႆႇၼိုင်ႈ ၶဵင်ႈၶႅင်ပၵ်းပိူင်ၼႆၵေႃႈ ၾၢႆႇၼိုင်ႈသမ်ႉၶဵင်ႈၸွမ်းထႅင်ႈ ။ မိူၼ်လုၵ်ႈဢွၼ်ႇ ၽိတ်းႁူဝ်ၵၼ်ဝႆႉ ၵႄႈပၼ်ႁႃဢမ်ႇတိူဝ်ႉတီႈယမ်မၼ်း ။ တီႈၶူမ်းဢမ်ႇယၢႆး တီႈၵၢႆးဢမ်ႇတိုၼ်ႇၼႆ ၼၢင်းယိင်းၵူၼ်းပိုၼ်ႉတီႈၵေႃႉၼိုင်ႈလၢတ်ႈၼင်ႇၼႆ-

ၼိုင်ႈၵေႃႈ ႁႂ်ႈဢွၵ်ႇပိူင်ၽႂ်မၼ်းဝႆႉ ဝႃႈ ၵူၼ်းၾင်ႇၼႆႉ တေလႆႈၸွမ်းပိူင်ၾၢႆႇပုၼ်ႉၸိူင်ႉႁိုဝ် ၾၢႆႇပုၼ်ႉသမ်ႉတေလႆႈၸွမ်းပိူင်ၾၢႆႇၼႆႉၸိူင်ႉႁိုဝ် ။ သွင်ၵေႃႈ ၵူၼ်းမိူင်းလူဝ်ႇလႆႈၸွမ်း ။ သၢမ်ၵေႃႈ ၵၢၼ်ဢၼ်ပိူၼ်ႈဝႃႈ ၽိတ်းပၵ်းပိူင်ၼၼ်ႉယႃႇႁဵတ်း ။ ပေႃးဢမ်ႇၸႂ်ႈတႄႉ ဢမ်ႇယဝ်ႉသေပွၵ်ႈယဝ်ႉ။ၼႆႉသမ်ႉ ၶဝ်ဢွၵ်ႇပိူင် မိူၼ်ၶဝ်ၵႅင်ႈ(ၶိတ်ႈ)ၵၼ် ငၢႆးလုၵ်ႈဢွၼ်ႇ ပေႃးပေႃႉႁူဝ်ၵေႃႉၼိုင်ႈၸဵပ်းယဝ်ႉ ၵေႃႉၼိုင်ႈၶႂ်ႈတွႆႇၶိုၼ်းၵႄႈပၼ်ႁႃဢမ်ႇတိူဝ်ႉတီႈယမ်မၼ်း

ၾင်ႇထႆးၼႆႉ မိူဝ်ႈဝၼ်းတီႈ 27/07/2026 ၼၼ်ႉတႄႉ ၽူႈၵွၼ်းၸႄႈဝဵင်းမႄႈသၢႆ ၼၢႆးဝရႃႊဝုတ်ႊ ၶွမ်ႉၿုၼ်ႊ นายวรายุทธ ค่อมบุญ ပၼ်ၾၢင်ႉၵူၼ်းၼႂ်းမိူင်းထႆးဝႃႈ ပေႃးတေၶဝ်ႈၾင်ႇတႃႈၶီႈလဵၵ်း ဢမ်ႇဝႃႈတေပဵၼ်လွင်ႈၵႃႉၶၢႆ လွင်ႈဢွၵ်ႇတၢင်းသုၼ်ႇတူဝ်ၸိူဝ်းၼႆႉၵေႃႈယဝ်ႉ ႁႂ်ႈႁဵၼ်းႁူႉ ပၵ်းပိူင်ၾၢႆႇမိူင်းမၢၼ်ႈလီလီသေ ၸင်ႇၶဝ်ႈဢွၵ်ႇ ဝႃႈၼႆဝႆႉ။

သိုပ်ႇလၢတ်ႈထႅင်ႈဝႃႈ ၽွင်းမိူဝ်ႈဢွၵ်ႇတၢင်းလႄႈသင် ၽွင်းသိုဝ်ႉၶူဝ်းသင် ၼႂ်းၶဵတ်ႇမိူင်းမၢၼ်ႈၼၼ်ႉ ပေႃးတေၽိတ်းမႅၼ်ႈပၵ်းပိူင်မိူင်းမၢၼ်ႈၼႆၸိုင် ႁႂ်ႈဝႄႈပႅတ်ႈ ။
ပိူင်လူင်ၵေႃႈ ယႃႇၶဝ်ႈဢွင်ႈတီႈဢၼ်ႁၢမ်ႈဝႆႉ ၊ ယႃႇပူၼ်ႉပႅၼ်ပၵ်းပိူင်ရူတ်ႉၵႃး ၊ ယႃႇႁဵတ်းၵၢၼ်တေႃႇၵၢၼ်လွင်း ၊ ယႃႇထၢႆႇၶႅပ်းႁၢင်ႈဢွင်ႈတီႈဢၼ်ႁၢမ်ႈဝႆႉ ၸိူဝ်းၼႆႉ ။ ပေႃးႁဵတ်းမႅၼ်ႈ ၸၢင်ႈၺႃးၾၢႆႇပလိၵ်ႈမိူင်းမၢၼ်ႈတီႉၺွပ်းၼႆ ၽူႈၵွၼ်းၸႄႈဝဵင်းမႄႈသၢႆတႄႉ ပၼ်ၾၢင်ႉၵူၼ်းမိူင်းတူဝ်ၵဝ်ႇဝႆႉၼင်ႇၼႆ။

ၾၢႆႇတၢင်းတႃႈၶီႈလဵၵ်းသမ်ႉ ၾၢႆႇႁူမ်ႇလူမ်ႈဢၼ်ယူႇတႂ်ႈသိုၵ်းမၢၼ်ႈ ၸတ်းပၢင်ၵုမ်လၢတ်ႈလွင်ႈၸိူဝ်းၼႆႉၵႂႃႇ မိူဝ်ႈၼႂ်းဝၼ်းတီႈ 23/07/2026 ၼၼ်ႉ ။ၼႂ်းပၢင်ၵုမ်ၼၼ်ႉ ၸဝ်ႈၼႃႈတီႈထႆးၵေႃႈ ၶဝ်ႈႁူမ်ႈၸွမ်း မိူၼ်ၼင်ႇ ၾၢႆႇၵူတ်ႇထတ်းၵူၼ်းၶဝ်ႈမိူင်း ၊ ပလိၵ်ႈ လႄႈ ၾၢႆႇၵဵပ်းၶွၼ်ႇ ၸိူဝ်းၼႆႉ။

ၼႂ်းပၢင်ၵုမ်ၼၼ်ႉ တၢင်းသွင်ၾင်ႇတူၵ်းလူင်းၵၼ်ဝႆႉဝႃႈ တႄႇဢဝ်လိူၼ်ဢေႃႊၵတ်ႉသ် 2026 ၼႆႉၵႂႃႇ တင်းသွင်ၾၢႆႇ တေဢဝ်လိူင်ႈပၼ်တၢမ်ႇ ၵူၼ်းၸိူဝ်းဢမ်ႇၸွမ်းပိူင်ရူတ်ႉၵႃးၵႂႃႇ ႁႂ်ႈထိုင်တီႈ ၼႆယူႇ။