ဝၼ်းတီႈ 5/7/2026 ၸဝ်ႈၼႃႈတီႈပလိၵ်ႈထႆးတီႈလၢၼ်ႇလႅၼ်လိၼ်ၶူဝ်မၢႆ 2 မႄႈသၢႆ တႃႈၶီႈလဵၵ်း ၵူတ်ႇထတ်းထူပ်းႁၼ်ယႃႈမဝ်းၵမ် (ယႃႈမႃႉ) 6 သႅၼ်မဵတ်ႉၼႂ်းရူတ်ႉသၢမ်လေႃႉလမ်း ၼိုင်ႈ ဢၼ်လုၵ်ႉတၢင်းဝဵင်းတႃႈၶီႈလဵၵ်းဢၢၼ်းၶဝ်ႈၼႂ်းဝဵင်းမႄႈသၢႆ မိူင်းထႆး ၼႆယဝ်ႉ။

ၸဝ်ႈၼႃႈတီႈပလိၵ်ႈထႆးပိုၼ်ၽၢဝ်ႇဝႃႈ –မၼ်းၸၢႆး ၶပ်းရူတ်ႉသၢမ်လေႃႉ တၢင်ႇမႃးၵွင်ႇၸေႈဢၼ်သႂ်ႇမၢၵ်ႇမႆႉမၢၵ်ႇတွၵ်ႇၼၼ်ႉသေ လုၵ်ႉၾင်ႇဝဵင်းတႃႈၶီႈလဵၵ်းသေၶၢမ်ႈၶူဝ်မၢႆ 2 မႃး။ ပလိၵ်ႈထႆးယွၼ်းၵူတ်ႇထတ်းလႄႈထူပ်းႁၼ်မႅၼ်ႈ ယႃႈမႃႉ 6 သႅၼ်မဵတ်ႉ ႁဵတ်းဝႆႉပဵၼ် ႁေႃႇ မီး 60 ႁေႃႇ။ လိူဝ်ၼၼ်ႉ ထူပ်းႁၼ်ပႃး သၢၼ်ယႃႈမဝ်းၵမ် ထႅင်ႈ 107 ႁေႃႇ။ ၵူၼ်းၶပ်းရူတ်ႉ 3 လေႃႉပဵၼ်ၸၢဝ်းၶိူဝ်းမၢၼ်ႈ ၸိုဝ်ႈႁွင်ႉၶုၼ်ႇတဵင်းဢူး ဢႃယု 42 ပီ။ ယၢမ်းလဵဝ်ၺႃးတီႉၺွပ်းဝႆႉတင်းၵူၼ်း တင်းယႃႈမဝ်းၵမ်-ဝႃႈၼႆ။

ၽိူဝ်ႇၸဝ်ႈၼႃႈတီႈပလိၵ်ႈထႆးမႃးၵႄႈၵွင်ႇၸေႈၼၼ်ႉသေၼပ်ႉဢၢၼ်ႇတူၺ်းၼၼ်ႉ လႆႈႁၼ်မႅၼ်ႈ ယႃႈမႃႉ 6 သႅၼ်မဵတ်ႉ ၼႂ်း 60 ႁေႃႇၼၼ်ႉ- လႄႈသၢၼ်ၶႅမ်ႊမီႊၶိူဝ်ႊ ၶႅတ်ႊတႃႊမိၼ်ႊ 111 ၵီႊလူဝ်ႊၵရမ်ႊ ဝႃႈၼႆ။

ၵူၼ်းၸၢဝ်းၶိူဝ်းမၢၼ်ႈ ၶုၼ်ႇတဵင်းဢူးၼႆႉ တေႃႉဢဝ်ယႃႈမႃႉတီႈလႂ်မႃးသေ တေသူင်ႇပၼ်ၸူးၽႂ် ၸဝ်ႈၶွင်ယႃႈမႃႉၼၼ်ႉပဵၼ်ၶွင်ၽႂ်တေႉတေႉၼႆၸိူဝ်းၼႆႉတႄႉ ၸဝ်ႈၼႃႈတီႈတိုၵ်ႉတေသိုပ်ႇၵူတ်ႇထတ်းတူၺ်းထႅင်ႈသေ တေပၼ်တူတ်ႈတၢမ်ႇၵႂႃႇထႅင်ႈဝႃႈၼႆ။

မိူဝ်ႈႁၢင်လိူၼ်ၵျုၼ်ႊပူၼ်ႉမႃး ဝၼ်းတီႈ 23/06/2026 ၼၼ်ႉၵေႃႈ ပလိၵ်ႈထႆးတီႈၶူဝ် မႄႈသၢႆ – တႃႈၶီလဵၵ်း မၢႆ 1 ၵူတ်ႇထတ်းထူပ်းႁၼ် ၵွင်ႇၸေႈဢၼ်သႂ်ႇငိုၼ်းထႆးသေ တၢင်ႇၼႂ်း ရူတ်ႉသၢမ်လေႃႉ ဢဝ်တၢင်းမႄႈသၢႆ ဢၢၼ်းၶၢမ်ႈၶူဝ်ဢဝ်ၵႂႃႇတၢင်းတႃႈၶီႈလဵၵ်း။ ၼၼ်ႉၵေႃႈတီႉလႆႈတႃႇႁူဝ်ၼပ်ႉငိုၼ်း 23 လၢၼ်ႉဝၢတ်ႇ ။ ပဵၼ်ငိုၼ်းထႆးဢၼ်ဢမ်ႇလႆႈၸႅင်ႈၸဝ်ႈၼႃႈတီႈၾၢႆႇ ၶွၼ်ႇသေလၵ်ႉလွမ်ဢဝ်ဢွၵ်ႇၼွၵ်ႈမိူင်းၼႆသေ ပလိၵ်ႈထႆးလႆႈတီႉၺွပ်းတူဝ်ၽူႈတေႃႉငိုၼ်းၼၼ်ႉဝႆႉယဝ်ႉၼင်ႇၵဝ်ႇ။